Read Central Tibetan Bible རོ་མཱ་པ། 6 Bible Online

རོ་མཱ་པ། 6 - Central Tibetan Bible bible

རོ་མཱ་པ། 6

¹འོ་ན། ང་ཚོས་ཅི་ཟེར་བར་བྱ། ཐུགས་རྗེ་འཕེལ་བའི་ཆེད་དུ་ངེད་རྣམས་སྡིག་ཉེས་ལ་གནས་པར་བྱའམ།

²དེ་མི་སྲིད། ངེད་རྣམས་སྡིག་ཉེས་ལས་འདས་ཟིན་པས་ད་དུང་དེའི་ནང་འཚོ་བར་ཅི་ལྟར་སྲིད།

³མཱ་ཤི་ཀ་ཡེ་ཤུའི་ཐོག་ནས་ཁྲུས་གསོལ་ལེན་མཁན་ངེད་ཐམས་ཅད་ཀྱིས་ཁོང་གྲོངས་པའི་ཐོག་ནས་ཁྲུས་གསོལ་བླངས་པ་དེ་མི་ཤེས་སམ།

⁴དེའི་ཕྱིར་ཁྲུས་གསོལ་ལེན་པའི་སྒོ་ནས་ངེད་རྣམས་ཁོང་དང་མཉམ་དུ་ཤི་ནས་དུར་དུ་བཅུག་པ་ལྟར་ཡིན་པས། དེ་ནི་ཡབ་ཀྱི་གཟི་བརྗིད་དང་ལྡན་པའི་ནུས་མཐུ་ཡིས་མཱ་ཤི་ཀ་སླར་གསོན་དུ་མཛད་པ་བཞིན། ང་ཚོའང་ཚེ་གསར་ཞིག་གི་ནང་འཚོ་བའི་ཕྱིར་རོ།

⁵གང་ཡིན་ཞེ་ན། གལ་སྲིད་དེ་ལྟར་ཁོང་གྲོངས་པའི་ཐོག་ནས་ངེད་རྣམས་ཁོང་དང་གཅིག་ཏུ་གྱུར་ན། ཁོང་དང་གཅིག་ཏུ་སླར་གསོན་པོར་ཡང་འགྱུར་ངེས་ཡིན།

⁶ད་ཕྱིན་ཆད་ངེད་རྣམས་སྡིག་ཉེས་ཀྱི་བྲན་གཡོག་མ་ཡིན་པའི་ཆེད་དུ་དང༌། སྡིག་ཉེས་ཀྱི་དབང་འོག་ཏུ་མི་གནས་པའི་ཕྱིར། ང་ཚོ་སྡིག་ཉེས་ཅན་གྱི་གང་ཟག་རྙིང་པ་དེ་མེད་པར་འགྱུར་བའི་ཕྱིར་མཱ་ཤི་ཀ་དང་མཉམ་དུ་རྒྱང་ཤིང་སྒང་ལ་བརྒྱངས་པ་ཡིན་པ་ངེད་རྣམས་ཀྱིས་ཤེས།

⁷གང་ལགས་ཟེར་ན། ཤི་ཟིན་པ་དེ་སྡིག་ཉེས་ཀྱི་དབང་ལས་ཐར་བར་གྱུར་བ་ཡིན་པས་སོ།

⁸ངེད་རྣམས་མཱ་ཤི་ཀ་དང་མཉམ་དུ་ཤི་བ་ཡིན་ན། ཁོང་དང་མཉམ་དུ་འཚོ་བར་ཡང་ཡིད་ཆེས།

⁹མཱ་ཤི་ཀ་འཆི་བ་ནས་སླར་གསོན་པོར་གྱུར་བ་ཡིན་ཏེ་ཡང་བསྐྱར་འགྲོངས་མི་སྲིད་པས། ད་ཕྱིན་ཆད་ཁོང་འཆི་བའི་དབང་འོག་ཏུ་མིན་པ་ངེད་ཀྱིས་ཤེས།

¹⁰ཁོང་གྲོངས་པ་དེ་སྡིག་ཉེས་ཀྱི་དབང་ལས་རྒྱལ་བའི་ཕྱིར་ཐེངས་གཅིག་གྲོངས། ཁོང་འཚོ་བ་དེ་དཀོན་མཆོག་ཐུགས་མཉེས་ཕྱིར་འཚོ།

¹¹དེ་བས་ན་ཁྱེད་ཚོའང་སྡིག་ཉེས་ཀྱི་དབང་འོག་ཏུ་མི་གནས་པ་དང༌། མཱ་ཤི་ཀ་ཡེ་ཤུ་བརྒྱུད་ནས་དཀོན་མཆོག་ཐུགས་མཉེས་ཕྱིར་གསོན་པ་ཡིན་པར་རྩིས་ཤིག

¹²དེའི་ཕྱིར་འདོད་ཆགས་ཀྱི་དབང་དུ་མི་འགྲོ་བའི་ཆེད་དུ་སྡིག་ཉེས་ཀྱིས་ཁྱེད་ཚོའི་མི་རྟག་པའི་ལུས་ལ་དབང་བསྒྱུར་དུ་མ་འཇུག

¹³ལུས་ཀྱི་ཡན་ལག་དེ་ངན་པ་ལ་གཡོག་བྱེད་པའི་ལག་ཆ་ལྟར་སྡིག་ཉེས་ལ་མ་གཏོད། དེ་ལས་ལྡོག་སྟེ་ཤི་ནས་གསོན་པོར་གྱུར་བ་ལྟར་ཁྱོད་ཚོས་རང་ཉིད་དཀོན་མཆོག་ལ་ཕུལ་ཞིང༌། ལུས་ཀྱི་ཡན་ལག་ཀྱང་ཡང་དག་པ་ཉིད་ཀྱི་ལག་ཆ་ལྟར་ཁོང་ལ་མཆོད་པ་ཕུལ་ཞིག

¹⁴སྡིག་ཉེས་ཀྱིས་ཁྱེད་ཚོར་དབང་མི་བསྒྱུར། གང་ཡིན་ཞེ་ན། ཁྱེད་ཚོ་ཆོས་ཁྲིམས་ཀྱི་དབང་འོག་ཏུ་མ་ཡིན་པར་ཐུགས་རྗེའི་དབང་འོག་ཏུ་ཡོད་པས་སོ། །

¹⁵བྱས་ན། ཆོས་ཁྲིམས་ཀྱི་དབང་འོག་ཏུ་མིན་ཏེ་ཐུགས་རྗེའི་དབང་འོག་ཏུ་ཡོད་པས་སྡིག་ཉེས་བྱེད་དམ། དེ་རྩ་བ་ནས་མི་རུང༌།

¹⁶གང་གི་བཀའ་ལ་ཉན་པ་དེའི་བྲན་གཡོག་ཏུ་འགྱུར་བ་ཁྱེད་ཚོས་མི་ཤེས་སམ། སྡིག་ཉེས་ཀྱི་བྲན་གཡོག་ཏུ་གྱུར་བའི་འབྲས་བུ་ནི་འཆི་བ་དང༌། བཀའ་ལ་ཉན་པའི་བྲན་གཡོག་ཏུ་གྱུར་བའི་འབྲས་བུ་ནི་དཀོན་མཆོག་ཐུགས་མཉེས་པའི་སྤྱོད་ལམ་བཟང་པོ་ཡིན།

¹⁷སྔོན་མ་སྡིག་ཉེས་ཀྱི་བྲན་གཡོག་བྱས་ཀྱང༌། ད་ཁྱེད་ཚོར་གཏད་པར་གྱུར་བའི་བསྟན་པ་ལ་སྙིང་ཐག་པ་ནས་ཉན་པས་དཀོན་མཆོག་ལ་བཀའ་དྲིན་ཆེ་ཞུའོ།

¹⁸སྡིག་ཉེས་ལས་བསྒྲལ་ཏེ་ཁྱེད་ཚོ་དྲང་བདེན་གྱི་སྤྱོད་པའི་བྲན་གཡོག་ཏུ་གྱུར།

¹⁹ཁྱེད་ཚོའི་རྟོགས་པའི་ནུས་པ་ཞན་པས་ངས་མིའི་ལུགས་སྲོལ་ལྟར་བརྗོད་དེ། སྔར་ཁྱེད་རྣམས་ཀྱིས་ལུས་ཀྱི་ཡན་ལག་མི་གཙང་བ་དང་ངན་པའི་གཡོག་བྱེད་དུ་གཏད་དེ་དེ་བས་ངན་པ་མང་དུ་འཕེལ་བཞིན། ད་ལྟ་དམ་པར་འཕེལ་བའི་ཕྱིར་ཁྱེད་ཀྱི་ཡན་ལག་སྤྱོད་པ་བཟང་པོ་ལ་གཡོག་བྱེད་པར་གཏོད་ཅིག

²⁰སྡིག་ཉེས་ཀྱི་གཡོག་བྱེད་དུས་ཁྱེད་ཚོ་དྲང་བདེན་ཉིད་ཀྱི་དབང་བསྒྱུར་ལས་བྲལ་ལོ།

²¹དེ་བས་ན། ད་ལྟ་ངོ་ཚ་བར་རྩི་བའི་དོན་དེ་རྣམས་ལས་ཕན་ཐོགས་ཅི་ཐོབ། དེ་ཚོའི་འབྲས་བུ་ནི་འཆི་བ་ཡིན།

²²ད་ལྟ་ཁྱེད་རྣམས་སྡིག་ཉེས་ལས་ཐར་བར་གྱུར་ནས་དཀོན་མཆོག་གི་བྲན་གཡོག་བྱེད་པས། དམ་པར་འགྱུར་བའི་ཕན་ཐོགས་འཐོབ། དེའི་འབྲས་བུ་ནི་དཔག་ཏུ་མེད་པའི་ཚེ་ཡིན།

²³དེས་ན་སྡིག་ཉེས་ཀྱི་གླ་ཆ་ནི་འཆི་བ་ཡིན། འོན་ཀྱང་དཀོན་མཆོག་གི་རིན་ཐང་བྲལ་བའི་ཐུགས་རྗེའི་གནང་སྦྱིན་ནི་མཱ་ཤི་ཀ་ཡེ་ཤུ་ངེད་རྣམས་ཀྱི་གཙོ་བོ་བརྒྱུད་ནས་ཐོབ་པའི་དཔག་ཏུ་མེད་པའི་ཚེ་དེ་ཡིན་ནོ། །