Read Central Tibetan Bible རོ་མཱ་པ། 7 Bible Online

རོ་མཱ་པ། 7 - Central Tibetan Bible bible

རོ་མཱ་པ། 7

¹སྤུན་ཟླ་རྣམས། ངས་ཆོས་ཁྲིམས་རྒྱུས་ཡོད་པ་རྣམས་ལ་སྨྲ་སྟེ། མི་ཞིག་གསོན་པའི་དུས་ཁོ་ནར་ཆོས་ཁྲིམས་ཀྱིས་ཁོ་ལ་ཁྲིམས་འཛིན་གྱི་དབང་ཆ་ཡོད་པར་ཁྱེད་ཚོས་མི་ཤེས་སམ།

²དཔེར་ན། ཁྱོ་བོ་གསོན་པའི་རིང་ལ་ཁོའི་བཟའ་ཟླ་གཉེན་སྒྲིག་གི་བཀའ་ཁྲིམས་ཀྱི་དབང་འོག་ཏུ་ཡོད་ཀྱང༌། ཁྱོ་བོ་ཤི་ན་བུད་མེད་དེ་གཉེན་སྒྲིག་གི་བཀའ་ཁྲིམས་དང་བྲལ་བར་འགྱུར།

³དེའི་ཕྱིར་ཁྱོ་བོ་གསོན་པའི་རིང་ལ་བུད་མེད་དེས་སྐྱེས་པ་གཞན་དང་འགྲོགས་ན་ལོག་གཡེམ་བྱེད་མཁན་ཞེས་ཟེར་བར་འགྱུར། འོན་ཀྱང་བུད་མེད་དེའི་ཁྱོ་བོ་ཤི་ན། གཉེན་སྒྲིག་གི་བཀའ་ཁྲིམས་དང་བྲལ་བར་འགྱུར་བས་སྐྱེས་པ་གཞན་དང་གཉེན་སྒྲིག་བྱས་ནའང་ལོག་གཡེམ་པ་མ་ཡིན།

⁴ངའི་སྤུན་ཟླ་རྣམས། དེ་བཞིན་དུ་ཁྱེད་ཚོའང་མཱ་ཤི་ཀ་དང་མཉམ་དུ་རྒྱང་ཤིང་ཐོག་ཆོས་ཁྲིམས་ཀྱི་ངོས་ནས་འཆི་བའོ། དེ་ནི་མི་གཞན་ཏེ་འཆི་བ་ནས་སླར་གསོན་དུ་མཛད་པ་ཁོང་དང་འགྲོགས་པའི་ཆེད་ཅིང༌། ངེད་རྣམས་དཀོན་མཆོག་གི་དོན་ལ་འབྲས་བུ་དང་ལྡན་པར་འགྱུར་བའི་ཕྱིར་རོ།

⁵སྡིག་པའི་རང་གཤིས་ཀྱི་དབང་འོག་ཏུ་ཡོད་པའི་དུས་སུ། ཆོས་ཁྲིམས་ཀྱི་རྐྱེན་གྱིས་འདོད་ཆགས་སྐྱེས་ཏེ་ང་ཚོའི་ལུས་ཀྱི་ཡན་ལག་རྣམས་ངན་པར་བསྐུལ། དེའི་རྐྱེན་གྱིས་ང་ཚོར་འཆི་བའི་འབྲས་བུ་བསྐྱེད།

⁶འོན་ཀྱང་ད་ལྟ་ཆོས་ཁྲིམས་ལས་ཐར་ཏེ་བཅིངས་པར་བྱེད་པའི་ཆོས་ཁྲིམས་ཀྱི་ཆ་ནས་ངེད་རྣམས་ཤི་བས། ང་ཚོས་ཆོས་ཁྲིམས་ཀྱི་ཚིག་འབྲུའི་ལུགས་རྙིང་པ་ལྟར་མིན་ཏེ་དམ་པའི་ཐུགས་ཉིད་ཀྱི་ལུགས་གསར་པ་བཞིན་དུ་ཞབས་ཞུ་སྒྲུབ།

⁷དེ་བས་ན་ང་ཚོས་ཅི་ཟེར། ཆོས་ཁྲིམས་ནི་སྡིག་པ་ཡིན་ནམ། དེ་མི་སྲིད། དེ་ལས་ལྡོག་སྟེ་ཆོས་ཁྲིམས་མེད་པ་ཡིན་ན་ངས་སྡིག་ཉེས་གང་ཡིན་པ་མི་ཤེས། དཔེར་ན། ཆོས་ཁྲིམས་ཀྱིས་ཧམ་འདོད་མ་བྱོས་ཤིག་ཅེས་མ་གསུངས་ན་ངས་ཧམ་འདོད་བྱེད་ཅེས་པ་དེ་གང་ཡིན་པར་མི་ཤེས།[18]

⁸སྡིག་ཉེས་ཀྱིས་བཀའ་ཁྲིམས་ཀྱི་སྒོ་ནས་ངའི་སེམས་ལ་ཧམ་འདོད་ཀྱི་རིགས་ཀུན་སྐྱེད་དུ་བཅུག གང་ཡིན་ཞེ་ན། ཆོས་ཁྲིམས་མེད་ན་སྡིག་ཉེས་ལ་དབང་མེད་དོ།

⁹སྔོན་གྱི་དུས་ན་ང་ཆོས་ཁྲིམས་དང་བྲལ་ནས་འཚོ་ཡང༌། བཀའ་ཁྲིམས་བྱུང་བའི་རྗེས་སུ་སྡིག་ཉེས་གསོན་པོར་གྱུར་ཞིང་ང་ཤི་སྟེ།

¹⁰ཚེ་ཡོང་བའི་ཆེད་དུ་གནང་བའི་བཀའ་ཁྲིམས་འདི་ཉིད་ང་ཤི་བའི་རྒྱུ་རྐྱེན་དུ་གྱུར་བར་ངས་ཤེས།

¹¹གང་ཡིན་ཟེར་ན། སྡིག་ཉེས་ཀྱིས་བཀའ་ཁྲིམས་ཀྱི་ཐབས་བྱས་ཏེ་ང་ལ་མགོ་སྐོར་བཏང་ནས་བཀའ་ཁྲིམས་ཀྱིས་ང་བསད།

¹²དེའི་ཕྱིར་ཆོས་ཁྲིམས་ནི་དམ་པ་ཡིན་ཏེ། དེའི་ནང་གི་བཀའ་ཁྲིམས་ཀྱང་དམ་པ་དང༌། དྲང་བདེན་ཉིད་དང་ལྡན་པ། བཟང་པོ་བཅས་ཡིན་ནོ།

¹³འོ་ན་གང་བཟང་པོ་ཡིན་པ་དེ་ང་འཆི་བའི་རྒྱུ་རྐྱེན་དུ་གྱུར་བ་ཡིན་ནམ། དེ་རྩ་བ་ནས་མིན། སྡིག་ཉེས་ངན་པ་ཡིན་པར་སྟོན་པའི་ཕྱིར་དེས་གང་བཟང་པོ་ཡིན་པའི་སྒོ་ནས་ང་ལ་འཆི་བ་བསྐྱེད་དུ་བཅུག དེ་ནི་བཀའ་ཁྲིམས་ཀྱི་ངང་ནས་སྡིག་ཉེས་དེ་དཔེ་མི་སྲིད་པའི་ངན་པར་མངོན་པའི་ཆེད་དུ་ཡིན།

¹⁴ཆོས་ཁྲིམས་དཀོན་མཆོག་ལས་བྱུང་བ་ངེད་རྣམས་ཀྱིས་ཤེས། འོན་ཀྱང་ང་ལ་མིའི་རིགས་ཀྱི་སྡིག་པའི་རང་གཤིས་ཡོད་པས། སྡིག་ཉེས་ལ་བྲན་གཡོག་ལྟར་བཙོངས།

¹⁵ངའི་སྤྱོད་ལམ་མི་རྟོགས། གང་ཡིན་ཞེ་ན། ངས་གང་འདོད་པ་དེ་མི་བྱེད་དེ། གང་སྡང་བ་དེ་རང་བྱེད།

¹⁶ངས་མི་འདོད་པ་ལྟར་བྱས་ན། ངས་ཆོས་ཁྲིམས་བཟང་པོ་ཡིན་པ་ཁས་ལེན་བྱེད།

¹⁷དོན་དམ་དུ་ང་རང་གིས་དེ་ལྟར་བྱེད་པ་མ་ཡིན་ཏེ། ངའི་ནང་དུ་གནས་པའི་སྡིག་ཉེས་ཀྱིས་བྱེད།

¹⁸ངའི་སྡིག་པའི་རང་གཤིས་ལ་བཟང་པོ་ཅིའང་མེད་པར་ངས་ཤེས། གང་ལགས་ཤེ་ན། བཟང་པོ་བྱེད་པར་འདོད་ནའང༌། ངས་སྒྲུབ་མི་ཐུབ།

¹⁹ངས་འདོད་པའི་བཟང་པོ་དེ་མི་བྱེད། འོན་ཀྱང་ངས་མི་འདོད་པའི་ངན་པ་དེ་བྱེད།

²⁰གལ་སྲིད་ངས་མི་འདོད་པའི་བྱ་བ་བྱས་ན། ང་རང་གིས་བྱེད་པ་མ་ཡིན་ཏེ། ངའི་ནང་དུ་གནས་པའི་སྡིག་ཉེས་ཀྱིས་བྱེད།

²¹དེ་བས་ན་ངས་བཟང་པོ་བྱེད་འདོད་པའི་ཚེ་ངན་པ་ངའི་འཁྲིས་སུ་ཡོད་པའི་གནས་ལུགས་རྟོགས།

²²ངའི་སེམས་ཀྱི་གཏིང་ནས་དཀོན་མཆོག་གི་ཁྲིམས་ལ་དགའ་བར་བྱེད་མོད།

²³ངའི་ལུས་ཀྱི་ནང་ན་ཁྲིམས་གཞན་ཞིག་ཡོད་པར་ཤེས། དེས་སེམས་ཀྱི་ཁྲིམས་ལ་རྒོལ་ཞིང༌། ང་ནི་ངའི་ལུས་ལ་གནས་པའི་ཁྲིམས་ཀྱི་བཙོན་པར་སྒྱུར།

²⁴ང་ཉམ་ཐག་པ་ཡིན་ཏེ། འཆི་བས་དབང་དུ་སྒྱུར་བའི་ལུས་འདི་ལས་ང་ཐར་བར་བྱེད་མཁན་སུ་ཡིན།

²⁵ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀ་བརྒྱུད་ནས་དཀོན་མཆོག་ལ་བཀའ་དྲིན་ཆེ་ཞུའོ། མདོར་བསྡུས་ན་ངའི་སེམས་ཀྱིས་དཀོན་མཆོག་གི་ཁྲིམས་ལ་གཡོག་བྱེད་ཀྱང༌། ངའི་སྡིག་པའི་རང་གཤིས་ཀྱིས་སྡིག་ཉེས་ཀྱི་ཁྲིམས་ལ་གཡོག་བྱེད་དོ། །