Read Central Tibetan Bible རོ་མཱ་པ། 8 Bible Online

རོ་མཱ་པ། 8 - Central Tibetan Bible bible

རོ་མཱ་པ། 8

¹དེའི་ཕྱིར་ད་ནས་མཱ་ཤི་ཀ་ཡེ་ཤུའི་ནང་ན་གནས་པ་རྣམས་ལ་ཆད་པ་ཅིའང་མེད།

²གང་ལགས་ཟེར་ན། ཚེ་གསར་པ་གནང་བའི་དམ་པའི་ཐུགས་ཉིད་ཀྱི་བཀའ་ཁྲིམས་ཀྱིས་མཱ་ཤི་ཀ་ཡེ་ཤུ་བརྒྱུད་ནས་ཁྱེད་རྣམས་སྡིག་ཉེས་དང་འཆི་བའི་དབང་ལས་བསྒྲལ་བར་མཛད།

³མིའི་རིགས་ཀྱི་སྡིག་པའི་རང་གཤིས་ཀྱི་དབང་གིས་སྟོབས་ཉམས་པར་གྱུར་བའི་ཆོས་ཁྲིམས་ཀྱིས་བྱེད་མ་ཐུབ་པ་དེ་དཀོན་མཆོག་གིས་བསྒྲུབས་པར་མཛད། ཁོང་གིས་རང་ཉིད་ཀྱི་སྲས་སྡིག་ཅན་གྱི་ལུས་དང་འདྲ་བའི་སྐུ་གཟུགས་དང་ལྡན་པར་ངེད་རྣམས་ཀྱི་སྡིག་ཉེས་སེལ་བའི་དོན་དུ་མཆོད་པར་འགྱུར་བའི་ཕྱིར་མངགས་ཏེ། མིའི་རིགས་ཀྱི་རང་གཤིས་ལ་གནས་པའི་སྡིག་ཉེས་ཁྲིམས་ཐག་གཅོད་པར་མཛད།

⁴དེ་ནི་སྡིག་པའི་རང་གཤིས་ལྟར་འཚོ་བ་མིན་པར་དམ་པའི་ཐུགས་ཉིད་བཞིན་དུ་འཚོ་བ་ངེད་རྣམས་ཀྱི་ནང་ན་ཆོས་ཁྲིམས་ཀྱི་དྲང་བདེན་གྱི་དགོས་པ་སྒྲུབ་པའི་ཆེད་དུ་ཡིན།[19]

⁵སྡིག་པའི་རང་གཤིས་དང་བསྟུན་པའི་སྤྱོད་པ་བྱེད་མཁན་རྣམས་ཀྱིས་སྡིག་ཉེས་ཀྱི་སྐོར་བློ་གཅིག་ཏུ་སེམས། འོན་ཀྱང་དམ་པའི་ཐུགས་ཉིད་དང་བསྟུན་པའི་སྤྱོད་པ་བྱེད་མཁན་རྣམས་ཀྱིས་ཐུགས་ཉིད་གང་མཉེས་པའི་སྐོར་བློ་གཅིག་ཏུ་སེམས།

⁶སྡིག་པའི་རང་གཤིས་ལ་བློ་གཅིག་ཏུ་སེམས་པའི་འབྲས་བུ་ནི་འཆི་བ་ཡིན། འོན་ཀྱང་དམ་པའི་ཐུགས་ཉིད་ལ་བློ་གཅིག་ཏུ་བསམས་ན་དཔག་ཏུ་མེད་པའི་ཚེ་དང་ཞི་བདེ་ཡིན་ནོ།

⁷དེའི་ཕྱིར་སྡིག་པའི་རང་གཤིས་ལ་བློ་གཅིག་ཏུ་སེམས་པ་འདིས་དཀོན་མཆོག་ལ་རྒོལ། དེས་དཀོན་མཆོག་གི་བཀའ་ཁྲིམས་མི་སྲུང་ཞིང་སྲུང་ཡང་མི་སྲིད་པས།

⁸སྡིག་པའི་རང་གཤིས་ལྟར་མི་ཚེ་སྐྱེལ་བ་རྣམས་ཀྱིས་དཀོན་མཆོག་ཐུགས་མཉེས་པ་བྱེད་མི་ཐུབ།

⁹གལ་ཏེ་དཀོན་མཆོག་གི་ཐུགས་ཉིད་ཁྱེད་རྣམས་ལ་དངོས་སུ་བཞུགས་ན། ཁྱེད་ཚོ་སྡིག་ཅན་གྱི་རང་གཤིས་མིན་ཏེ་དམ་པའི་ཐུགས་ཉིད་ཀྱི་དབང་འོག་ཏུ་ཡོད། གལ་ཏེ་སུ་ཞིག་ལ་མཱ་ཤི་ཀའི་ཐུགས་ཉིད་མེད་ན། མཱ་ཤི་ཀའི་ཁོངས་གཏོགས་མིན།

¹⁰གལ་ཏེ་མཱ་ཤི་ཀ་ཁྱེད་ཚོའི་ནང་བཞུགས་ན། སྡིག་ཉེས་ཀྱི་རྐྱེན་གྱིས་ལུས་ཤི་བ་ཡིན་ཡང༌། དཀོན་མཆོག་གི་སྤྱན་སྔར་ཁྱེད་ཚོ་རྣམ་པར་དག་པ་ཡིན་པས་སེམས་གསོན་ནོ།

¹¹ཡེ་ཤུ་འཆི་བ་ནས་སླར་གསོན་དུ་མཛད་མཁན་གྱི་དམ་པའི་ཐུགས་ཉིད་ཁྱེད་རྣམས་ཀྱི་ནང་ལ་བཞུགས་ན། དེ་ལྟར་མཛད་མཁན་གྱིས་ཁྱེད་རྣམས་ཀྱི་ནང་ལ་བཞུགས་ཏེ་ཁོང་གི་དམ་པའི་ཐུགས་ཉིད་ཀྱི་སྒོ་ནས་ཁྱེད་ཀྱི་མི་རྟག་པའི་ལུས་ཀྱང་གསོན་པོར་མཛད་པར་འགྱུར་ངེས་ཡིན།

¹²སྤུན་ཟླ་རྣམས། དེའི་ཕྱིར་སྡིག་པའི་རང་གཤིས་དང་བསྟུན་པའི་སྤྱོད་པ་བྱེད་མི་དགོས།

¹³གང་ཡིན་ཞེ་ན། སྡིག་པའི་རང་གཤིས་དང་བསྟུན་པའི་སྤྱོད་པ་བྱས་ན་འཆི་བར་ངེས། འོན་ཀྱང་དམ་པའི་ཐུགས་ཉིད་ཀྱི་སྒོ་ནས་སྡིག་པའི་སྤྱོད་པ་མེད་པར་བྱས་ན་གསོན་པོར་འགྱུར།

¹⁴གང་ཡིན་ཟེར་ན། དཀོན་མཆོག་གི་དམ་པའི་ཐུགས་ཉིད་ཀྱིས་འཁྲིད་པ་ཐམས་ཅད་ནི་དཀོན་མཆོག་གི་སྲས་ཡིན།

¹⁵ཡང་དཀོན་མཆོག་གིས་ཁྱེད་རྣམས་ལ་གནང་བའི་ཐུགས་ཉིད་ཀྱིས་ཁྱེད་ཚོ་ཞེད་སྣང་དང་ལྡན་པའི་བྲན་གཡོག་མིན་ཏེ། ཁོང་གི་སྲས་སུ་འགྱུར་བར་མཛད། ཁོང་གི་སྒོ་ནས་ངེད་རྣམས་ཀྱིས་ཨབ་པཱ་ཡབ་ཅེས་འབོད།[20]

¹⁶ཐུགས་ཉིད་ཀྱིས་ང་ཚོའི་སེམས་དང་འགྲོགས་ཏེ་ངེད་རྣམས་དཀོན་མཆོག་གི་སྲས་དང་སྲས་མོ་ཡིན་པར་བདེན་དཔང་མཛད།

¹⁷དེས་ན་ངེད་རྣམས་ནི་དཀོན་མཆོག་གི་སྲས་དང་སྲས་མོ་ཡིན་ན། མཱ་ཤི་ཀ་དང་མཉམ་དུ་དཀོན་མཆོག་གི་ཞལ་ཆད་འཛིན་མཁན་ཡང་ཡིན། གལ་ཏེ་ངེད་རྣམས་མཱ་ཤི་ཀ་དང་མཉམ་དུ་སྡུག་བསྔལ་མྱོང་ན་ཁོང་དང་ལྷན་དུ་འགྲོགས་ཏེ་གཟི་བརྗིད་དང་ལྡན་པར་འགྱུར་རོ། །

¹⁸ངའི་བསམ་པར། དེང་དུས་ཀྱི་སྡུག་བསྔལ་ནི་མ་འོངས་པའི་དུས་སུ་ངེད་རྣམས་ལ་མངོན་པར་འགྱུར་བའི་གཟི་བརྗིད་དང་བསྡུར་ན་ཅི་ཡང་མིན།

¹⁹དཀོན་མཆོག་གིས་གང་བཀོད་པ་ཐམས་ཅད་ཀྱིས་དཀོན་མཆོག་གི་སྲས་རྣམས་མངོན་སུམ་དུ་འགྱུར་བར་གདུང་ཞིང་སྒུག

²⁰གང་ལགས་ཟེར་ན། དཀོན་མཆོག་གིས་གང་བཀོད་པ་རྣམས་རང་གི་འདོད་པ་ལྟར་མེད་དེ། ཁོང་གི་དགོངས་པ་ལྟར་དོན་མེད་པའི་དབང་དུ་བཅུག དེ་ནི་རེ་བ་བྱེད་དེ་གང་བཀོད་པ་འཇིག་པ་ལས་བསྒྲལ་ནས་དཀོན་མཆོག་གི་སྲས་དང་སྲས་མོ་རྣམས་ཀྱི་གཟི་བརྗིད་དང་ལྡན་པའི་རང་དབང་འཐོབ་པའི་ཆེད་དུ་ཡིན།

²²ད་ལྟའི་བར་དུ་དཀོན་མཆོག་གིས་གང་བཀོད་པ་ཐམས་ཅད་སྦྲུམ་མར་སྐྱེ་ཟུག་ལང་བ་ལྟར་འཁུན་སྒྲ་འབྱིན་པ་ངེད་ཀྱིས་ཤེས།

²³དེ་མ་ཟད་དམ་པའི་ཐུགས་ཉིད་ལོ་ཏོག་གི་ཕུད་དང་ལྡན་པ་ངེད་རྣམས་ཀྱང་དཀོན་མཆོག་གི་སྲས་སུ་གྱུར་བ་དང༌། ང་ཚོའི་ལུས་པོ་སྡིག་ཉེས་དང་སྡུག་བསྔལ་ལས་སྒྲོལ་ཏེ་མི་འཇིག་པའི་ལུས་གསར་པ་འཐོབ་པར་རེ་སྒུག་བྱེད་དུས་ཁོག་ན་འཁུན་སྒྲ་འབྱིན།

²⁴གང་ཡིན་ཞེ་ན། རེ་བའི་ནང་དུ་ངེད་རྣམས་ཐར་བར་གྱུར། འོན་ཀྱང་མིག་གིས་གང་མཐོང་ཟིན་པ་དེར་རེ་བ་བྱེད་རྒྱུ་མེད་དེ། མིག་གིས་མཐོང་ཟིན་པ་ལ་སུས་རེ་སྒུག་བྱེད།

²⁵འོན་ཏེ་གང་རེ་བ་བྱེད་པ་དེ་མི་མཐོང་ན། ངེད་རྣམས་ཀྱིས་བཟོད་པའི་སྒོ་ནས་རེ་སྒུག་བྱེད།

²⁶དེ་བཞིན་དུ་དམ་པའི་ཐུགས་ཉིད་ཀྱིས་ང་ཚོ་སྟོབས་མེད་པར་རོགས་པ་གནང༌། ངེད་རྣམས་ཀྱིས་སྨོན་ལམ་ཇི་ལྟར་འདེབས་དགོས་པ་མི་ཤེས་ཀྱང༌། དམ་པའི་ཐུགས་ཉིད་ཀྱིས་ཚིག་གིས་སྨྲ་བར་མི་ཐུབ་པའི་འཁུན་སྒྲས་ང་ཚོའི་དོན་ལ་ཞུ་ངོ་མཛད།

²⁷ཡང་ངེད་རྣམས་ཀྱི་སེམས་ལ་གཟིགས་མཁན་གྱིས་དམ་པའི་ཐུགས་ཉིད་ཀྱི་དགོངས་པ་མཁྱེན། གང་ལགས་ཤེ་ན། དཀོན་མཆོག་གི་དགོངས་པ་ལྟར་དམ་པའི་ཐུགས་ཉིད་ཀྱིས་དད་ལྡན་པ་རྣམས་ཀྱི་དོན་ལ་ཞུ་ངོ་མཛད་པས་སོ།

²⁸དཀོན་མཆོག་གིས་དོན་ཐམས་ཅད་མཉམ་དུ་མཛད་དེ་ཁོང་ལ་བརྩེ་ཞིང་ཁོང་གི་དགོངས་པ་ལྟར་བོས་པ་རྣམས་ལ་ཕན་པའི་ཆེད་དུ་ཡིན་པ་ངེད་རྣམས་ཀྱིས་ཤེས།

²⁹གང་ཡིན་ཞེ་ན། ཁོང་གི་སྲས་ནི་སྤུན་ཟླ་མང་པོའི་ནང་ནས་སྔོན་སྐྱེས་སུ་འགྱུར་བའི་ཆེད་དུ་དཀོན་མཆོག་གིས་སྔར་བདམས་པ་རྣམས་ཁོང་གི་སྲས་དང་འདྲ་བར་འགྱུར་བའི་ཕྱིར་བསྐོས་པར་མཛད།

³⁰ཡང་ཁོང་གིས་སྔར་བསྐོས་པ་རྣམས་བོས་པར་ཡང་མཛད། བོས་པ་རྣམས་རྣམ་པར་དག་པར་ཡང་མཛད། རྣམ་པར་དག་པར་གྱུར་བ་རྣམས་གཟི་བརྗིད་དང་ལྡན་པར་ཡང་མཛད་དོ། །

³¹འོ་ན་དོན་དེ་རྣམས་ཀྱི་སྐོར་ལ་ཅི་སྨྲ། གལ་སྲིད་དཀོན་མཆོག་གིས་ངེད་ཀྱི་ཕྱོགས་མཛད་ན་ངེད་རྣམས་ལ་སུས་རྒོལ་ཐུབ།

³²རང་གི་སྲས་ཀྱང་ཕངས་སེམས་མི་མཛད་པར་ངེད་ཐམས་ཅད་ཀྱི་དོན་དུ་གཏོད་པར་མཛད་མཁན་གྱིས་སྲས་དང་མཉམ་དུ་ཐུགས་རྗེའི་སྒོ་ནས་ངེད་རྣམས་ལ་དོན་ཐམས་ཅད་ཀྱང་མ་གནང་བ་དེ་ཅི་ལ་སྲིད།

³³དཀོན་མཆོག་གིས་བདམས་པར་མཛད་པ་རྣམས་ལ་ཉེས་སྐྱོན་འཛུགས་མཁན་སུ་ཡིན། དཀོན་མཆོག་ནི་རྣམ་པར་དག་པར་མཛད་མཁན་ཡིན་པས།

³⁴ཁྲིམས་གཅོད་གཏོང་མཁན་སུ་ཡིན་ནམ། མཱ་ཤི་ཀ་ཡེ་ཤུ་ཡིན་ནམ། མིན་ཏེ་ཁོང་ནི་གྲོངས་ཤིང༌། དེ་བས་ཀྱང་སྐུ་གསོན་པོར་བཞེངས་སུ་གྱུར་ནས་དཀོན་མཆོག་གི་ཕྱག་གཡས་སུ་བཞུགས་མཁན་དེ་ཡིན་པ་མ་ཟད། ཁོང་གིས་ངེད་རྣམས་ཀྱི་དོན་དུ་ཞུ་ངོ་མཛད།

³⁵མཱ་ཤི་ཀའི་བྱམས་པ་ལས་ངེད་རྣམས་སུས་ཕྲལ། སྡུག་བསྔལ་ལམ། དཀའ་ངལ་ལམ། མནར་གཅོད་དམ། མུ་གེའམ། གོས་མེད་པའམ། ཉེན་ཁའམ། རལ་གྲི་ལ་སོགས་པས་ངེད་རྣམས་ཁོང་གི་བྱམས་པ་ལས་ཕྲལ་ཐུབ་པ་ཡིན་ནམ།

³⁶མདོ་ལས། ཁྱེད་ཀྱི་ཆེད་དུ་ང་ཚོ་ཉིན་ལྟར་གསོད། ། གཞན་གྱིས་ངེད་རྣམས་བཤས་རྒྱུའི་ལུག་བཞིན་རྩི། །[21] ཞེས་འཁོད།

³⁷གནས་ཚུལ་དེ་ལྟར་ཡིན་ཡང་ངེད་རྣམས་ལ་བྱམས་པར་མཛད་མཁན་བརྒྱུད་ནས་ང་ཚོ་རབ་ཏུ་རྒྱལ་ལོ།

³⁸གང་ལགས་ཟེར་ན། འཆི་ཚེའམ། ཕོ་ཉའམ། གདོན་འདྲེའམ། ད་ལྟའམ། མ་འོངས་པའི་གནས་ཚུལ་ལམ། མཐུ་ལྡན་པའམ།

³⁹མཐོ་གཏིང་ངམ། དཀོན་མཆོག་གིས་གང་བཀོད་པ་ཐམས་ཅད་ལས་གང་ཞིག་གིས་ཀྱང་མཱ་ཤི་ཀ་ཡེ་ཤུ་ངེད་རྣམས་ཀྱི་གཙོ་བོ་བརྒྱུད་ནས་མངོན་པའི་དཀོན་མཆོག་གི་བྱམས་པ་ལས་ང་ཚོ་ཕྲལ་མི་ཐུབ་པར་ངས་ཡིད་ཆེས་ངེས་པ་རྙེད་དོ། །