Read Central Tibetan Bible ཀོ་རིན་ཐུ་པ། ༡ 8 Bible Online

ཀོ་རིན་ཐུ་པ། ༡ 8 - Central Tibetan Bible bible

ཀོ་རིན་ཐུ་པ། ༡ 8

¹ད་ལྷ་སྐུ་རྣམས་ལ་ཕུལ་བའི་ཟས་ཀྱི་སྐོར་ལ་ཁྱེད་རྣམས་ཀྱིས་གསུངས་པ་ལྟར། ང་ཚོ་ཚང་མར་ཤེས་བྱ་ཡོད་པ་ངེད་རྣམས་ཀྱིས་ཤེས། ཤེས་བྱ་ཡིས་ང་རྒྱལ་སྐྱེད། འོན་ཏེ་བྱམས་སེམས་ཀྱིས་ཡར་སྐྱེད་གཏོང༌།

²མི་ཞིག་གིས་ངས་ཇི་ཞིག་ཤེས་སྙམ་ན་ཁོས་ཇི་འདྲ་ཤེས་དགོས་པ་དེ་ད་དུང་མི་ཤེས།

³འོན་ཀྱང་མི་ཞིག་གིས་དཀོན་མཆོག་ལ་གཅེས་པར་བཟུང་ན་དཀོན་མཆོག་གིས་ཁོ་ངོ་མཁྱེན་ནོ།

⁴ལྷ་སྐུ་རྣམས་ལ་ཕུལ་བའི་ཟས་ཟ་བའི་སྐོར་ནས་བཤད་ན་ལྷ་སྐུ་རྣམས་ནི་འཇིག་རྟེན་ཐོག་ཅི་ཡང་མ་ཡིན་པ་དང༌། དཀོན་མཆོག་གཅིག་པུ་ལས་གཞན་དཀོན་མཆོག་མེད་པར་ངེད་རྣམས་ཀྱིས་ཤེས།

⁵བྱས་ན། ཞིང་ཁམས་སམ། ས་ལ་ལྷ་ཞེས་བྱ་བ་ཡོད་པ་དང༌། ལྷ་དང་གཙོ་བོ་ཟེར་བ་མང་པོ་ཡོད་ཀྱང༌།

⁶ངེད་རྣམས་ཀྱི་ཆ་ནས་ཡབ་དཀོན་མཆོག་གཅིག་རང་ཡིན། ཁོང་ལས་དངོས་པོ་ཐམས་ཅད་འབྱུང་ཞིང༌། ངེད་རྣམས་ནི་ཁོང་གི་ཆེད་དུ་གནས། ཡང་གཙོ་བོ་གཅིག་སྟེ་ཡེ་ཤུ་མཱ་ཤི་ཀ་ཡིན། ཁོང་གི་སྒོ་ནས་དངོས་པོ་ཐམས་ཅད་འབྱུང་ཞིང༌། ངེད་རྣམས་ཁོང་གི་སྒོ་ནས་གནས་སོ། །

⁷འོན་ཀྱང་མི་ཐམས་ཅད་ལ་དེའི་ཤེས་བྱ་མེད། སྔོན་སྐུ་འདྲ་བརྟེན་རྒྱུར་གོམས་པས་མི་ཁ་ཤས་ཀྱིས་ད་ལྟའི་བར་དུ་ཡང་ཟས་ཟ་བ་དེ་སྐུ་འདྲར་ཕུལ་བའི་ཟས་སུ་སེམས་པ་དང༌། ཁོ་ཚོའི་དྲང་སེམས་ཞན་པས་ངན་རུལ་དུ་འགྱུར།

⁸ཟས་ཟ་བའི་སྒོ་ནས་ངེད་རྣམས་དཀོན་མཆོག་དང་ཉེ་བར་མི་འགྲོ མ་བཟས་ན་གནོད་པ་མེད་ལ། བཟས་ན་ཕན་འདོགས་ཀྱང་མེད།

⁹འོན་ཏེ་ཁྱེད་ཀྱི་རང་དབང་འདི་དྲང་སེམས་ཞན་པ་རྣམས་ལ་སྡིག་ཉེས་ཀྱི་རྒྱུ་རྐྱེན་དུ་མི་འགྱུར་བར་དོགས་ཟོན་གྱིས་ཤིག

¹⁰གང་ཡིན་ཞེ་ན། དྲང་སེམས་ཞན་པ་ཞིག་གིས་ཁྱོད་ཤེས་བྱ་དང་ལྡན་པས་ལྷ་ཁང་ལ་ཟས་ཟ་བར་མཐོང་ན། ཁོས་ལྷ་སྐུ་ལ་མཆོད་པ་དེ་ཟ་བར་མི་སྐུལ་ལམ།

¹¹དེའི་ཕྱིར་ཁྱོད་ཀྱི་ཤེས་བྱའི་སྒོ་ནས་དྲང་སེམས་ཞན་པ་དེ་འཕྲོ་བརླག་འགྲོ་བར་འགྱུར། མཱ་ཤི་ཀ་སྤུན་ཟླ་དེའི་ཆེད་དུ་ཡང་བཀྲོངས།

¹²སྤུན་ཟླ་རྣམས་ལ་སྡིག་ཉེས་དེ་ལྟར་བྱེད་དེ། ཁོ་ཚོའི་དྲང་སེམས་ཞན་པ་དེ་གནོད་པའི་སྒོ་ནས་ཁྱོད་རྣམས་ཀྱིས་མཱ་ཤི་ཀ་ལ་སྡིག་པ་བྱེད།

¹³གལ་ཏེ་ངས་གང་ཟས་པ་དེ་སྤུན་ཟླའི་སྡིག་ཉེས་ཀྱི་རྒྱུ་རྐྱེན་དུ་གྱུར་ན། སྤུན་ཟླས་སྡིག་ཉེས་མི་བྱེད་པའི་ཕྱིར་ངས་ནམ་ཡང་ཤ་མི་ཟའོ། །