Read Central Tibetan Bible ཀོ་རིན་ཐུ་པ། ༢ 11 Bible Online

ཀོ་རིན་ཐུ་པ། ༢ 11 - Central Tibetan Bible bible

ཀོ་རིན་ཐུ་པ། ༢ 11

¹ངའི་ཅུང་ཟད་ལྐུགས་རྟགས་ཚ་བའི་སྐད་ཆ་ལ་ཁྱེད་ཚོས་བཟོད་པ་སྒོམ་པར་འདོད། དོན་དངོས་ཐོག་ཁྱེད་ཚོས་བཟོད་པ་སྒོམ་བཞིན་ཡོད།

²དཀོན་མཆོག་ལྟར་ངས་ཁྱེད་ཚོར་སེམས་ཁུར་ཆེན་པོ་བྱེད་དེ། ཁྱེད་ཚོ་གཙང་བའི་གཞོན་ནུ་མ་བཞིན་ངས་ཁྱོ་ག་མཱ་ཤི་ཀ་ཁོ་ནར་བག་མར་བཏང་བ་ཡིན།

³སྦྲུལ་གྱིས་གཡོ་ཐབས་ཀྱི་སྒོ་ནས་ཧ་ཝ་ལ་མགོ་སྐོར་བཏང་བ་ལྟར། ཁྱེད་ཚོའི་སེམས་ཀྱང་མཱ་ཤི་ཀར་ལྷག་བསམ་དང་དྲང་པོ་ཡོད་པ་དེ་ལས་བསླུ་བར་འགྱུར་བའི་འཇིགས་པ་ཡོད།[13]

⁴གང་ཡིན་ཞེ་ན། མི་སུ་ཞིག་ཡོང་ནས་སྔར་ང་ཚོས་མ་བསྒྲགས་པའི་ཡེ་ཤུ་གཞན་ཞིག་གི་སྐོར་བསྒྲགས་པའམ། ཡང་ན་ཁྱོད་ཀྱིས་སྔར་མ་ཐོབ་པའི་སེམས་ཉིད་གཞན་ཞིག་ཐོབ་པའམ། ཡང་ན་སྔར་ཁྱོད་ཀྱིས་དང་ལེན་བྱས་པའི་འཕྲིན་བཟང་དེ་ལས་འཕྲིན་བཟང་རྫུན་མ་ཞིག་དང་ལེན་བྱས་ན། ཁྱོད་ཚོས་ཐེ་ཚོམ་མེད་པའི་ངང་ནས་དང་ལེན་བྱེད།

⁵ངའི་བསམ་པར། ང་ནི་མཆོག་ཏུ་གྱུར་བའི་སྐུ་ཚབ་ཡིན་ཟེར་མཁན་རྣམས་ལས་རྩ་བ་ནས་དམན་པ་མེད།

⁶ང་སྨྲ་མ་མཁས་ཀྱང་རྟོགས་པ་དང་ལྡན་པ་ཞིག་ཡིན་པ་ཐབས་ཀུན་གྱིས་རྣམ་པ་ཐམས་ཅད་ནས་ང་ཚོས་ཁྱོད་ཚོར་གསལ་པོར་བསྟན།

⁷ངས་རང་དམའ་བར་བཏང་ནས་ཁྱེད་ཚོ་མཐོ་སར་འདེགས་པའི་ཕྱིར་ཁྱེད་ཚོར་དཀོན་མཆོག་གི་འཕྲིན་བཟང་རིན་མེད་པར་བསྒྲགས། དེ་ནི་སྡིག་ཉེས་ཡིན་ནམ།

⁸ཁྱོད་ཚོར་ཞབས་ཏོག་བྱེད་པའི་ཕྱིར་ངས་ཕྲོགས་པ་ནང་བཞིན་ཆོས་ཚོགས་གཞན་དག་ནས་གླ་ཆ་བླངས་པ་ཡིན།

⁹ང་ཁྱོད་ཚོའི་རྩར་ཡོད་དུས་མཁོ་ཆས་མེད་པར་གྱུར་ནའང་ཁྱོད་ཚོར་ཁུར་པོ་བཟོས་མེད། གང་ཡིན་ཟེར་ན། མ་ཀེ་དོན་ཡཱ་ཡུལ་ནས་ཡོང་བའི་སྤུན་ཟླ་རྣམས་ཀྱིས་ང་ལ་རྒྱབ་སྐྱོར་བྱས། དོན་ཐམས་ཅད་དུ་ངས་སྔར་ཁྱོད་ཚོར་ཁུར་པོ་མ་བཟོས་པ་ལྟར། མུ་མཐུད་ངས་ཁྱོད་ཚོར་ཁུར་པོ་མི་བཟོ།

¹⁰ངའི་སེམས་ནང་ན་ཡོད་པའི་མཱ་ཤི་ཀའི་བདེན་པ་དཔང་དུ་བཙུགས་ནས། ངས་རིན་མེད་པར་ཁྱོད་ཚོར་འཕྲིན་བཟང་སྒྲོག་པའི་སྤོབས་པ་དེ་ཨ་ཀ་ཡཱ་ཡུལ་ལ་སུས་ཀྱང་འགོག་པར་མི་འགྱུར།

¹¹ཅི་ལགས་ཟེར་ན། ངས་ཁྱོད་ཚོར་གཅེས་པར་མི་འཛིན་པའི་ཕྱིར་རམ། ངས་ཁྱོད་ཚོར་གཅེས་པ་དེ་དཀོན་མཆོག་གིས་མཁྱེན་ནོ།

¹²འོན་ཀྱང་ངས་ད་ལྟ་གང་བྱེད་པ་དེ་མུ་མཐུད་དེ་ལྟར་བྱ། དེ་ནས་ཁོ་ཚོའི་ལས་ཀ་ང་ཚོའི་ལས་ཀ་དང་འདྲ་བ་ཡིན་ཞེས་ཟེར་འདོད་མཁན་རྣམས་ཀྱིས་འུད་ཤོབ་བྱེད་པའི་གོ་སྐབས་མེད་པར་འགྱུར།

¹³དེ་ལྟ་བུའི་མི་རྣམས་ནི་སྐུ་ཚབ་རྫུན་མ་དང༌། གཡོ་སྒྱུའི་ལས་བྱེད་མཁན། མཱ་ཤི་ཀའི་སྐུ་ཚབ་ཡིན་མདོག་བྱེད་མཁན་དེ་ཚོ་ཡིན།

¹⁴བདུད་སཱ་ཏན་གྱིས་ཀྱང་འོད་ཀྱི་ཕོ་ཉ་ཡིན་མདོག་བྱེད་པས་དེ་ངོ་མཚར་ཆེ་བ་མིན།

¹⁵དེའི་ཕྱིར་ཁོའི་གཡོག་པོས་ཀྱང་དྲང་བ་ཉིད་ཀྱི་གཡོག་པོ་ཡིན་མདོག་བྱས་ན་ངོ་མཚར་ཆེ་བ་མིན། ཁོ་ཚོའི་ལས་ཀའི་མཇུག་འབྲས་དེ་ཁོ་ཚོའི་བྱ་སྤྱོད་དང་མཐུན་ནོ། །

¹⁶སུ་ཞིག་གིས་ང་བླུན་པོ་ཡིན་པར་མ་སོམས་ཤིག་ཅེས་ངས་ཡང་བསྐྱར་རྗོད། གལ་ཏེ་དེ་ལྟར་བསམས་ན། ངས་ཀྱང་རང་བསྟོད་ཏོག་ཙམ་བྱེད་པའི་ཕྱིར་ང་ལྐུགས་པ་ཡིན་པར་དང་ལེན་གྱིས་ཤིག

¹⁷ངས་གང་ཟེར་བ་འདི་ནི་གཙོ་བོ་ནས་མ་ཡིན་ཏེ། ངས་ལྐུགས་པ་ནང་བཞིན་སྐད་ཆ་ཤོད།

¹⁸མི་མང་པོས་འཇིག་རྟེན་གྱི་ལུགས་སྲོལ་ལྟར་རང་བསྟོད་བྱེད་པས་ངས་ཀྱང་རང་བསྟོད་བྱེད།

¹⁹ཁྱོད་ཚོ་ཤེས་རབ་དང་ལྡན་པས་དགའ་བའི་ངང་ནས་ལྐུགས་པ་རྣམས་ལ་བཟོད་སྒོམ་བྱེད།

²⁰མི་སུ་ཞིག་གིས་ཁྱོད་ཚོར་བྲན་གཡོག་ཏུ་བཅུག་གམ། བཤུ་གཞོག་བཏང་ངམ། མགོ་སྐོར་བཏང་ངམ། རང་མཐོང་ཆེན་པོ་བྱས་སམ། འགྲམ་ལྕག་བརྒྱབ་ནའང་ཁྱོད་ཚོས་དེ་ལ་བཟོད་པར་བྱེད།

²¹དེ་ལྟར་བྱེད་པ་ང་ཚོ་སྟོབས་ཞན་པ་ཡིན་ཞེས་ངས་ངོ་ཚ་བའི་ངང་ནས་ཟེར། ངས་ལྐུགས་པའི་གཏམ་ཤོད་དེ། གཞན་གྱིས་རང་བསྟོད་བྱེད་པར་ཕོད་ན་ངས་ཀྱང་དེ་ལྟར་བྱེད་ཕོད།

²²ཁོ་ཚོ་ཡ་ཧུ་དཱ་པ་ཡིན་ནམ། ངའང་ཡིན། ཁོ་ཚོ་ཡི་སི་ར་ཨེལ་པ་ཡིན་ནམ། ངའང་ཡིན། ཁོ་ཚོ་མེས་པོ་ཨབ་ར་ཧམ་གྱི་བུ་རྒྱུད་ཡིན་ནམ། ངའང་ཡིན།

²³ཁོ་ཚོ་མཱ་ཤི་ཀའི་ཞབས་ཕྱི་ཡིན་ནམ། ངས་སྨྱོ་བ་ལྟར་རྗོད་དེ། ང་དེ་བས་ཀྱང་ཡིན། ངས་ཁོ་ཚོ་ལས་ཧུར་བརྩོན་ཆེ་བའི་ལས་ཀ་བྱས། བརྩོན་ཁང་ལ་ཐེངས་མང་བ་བཅུག ང་ལ་རྟ་ལྕག་གིས་དྲག་པར་བརྡུངས་ཤིང༌། སྲོག་ཉེན་ཡང་ཡང་མྱོང༌།

²⁴ཡ་ཧུ་དཱ་པ་རྣམས་ཀྱིས་ང་ལ་རྟ་ལྕག་གཅིག་གིས་མ་གཏོགས་བཞི་བཅུ་ཐེངས་ལྔ་བརྡུངས།[14]

²⁵ཐེངས་གསུམ་ང་ལ་དབྱུག་པས་བརྡུངས། ཐེངས་གཅིག་རྡོ་རུབ་བཏང༌། ཐེངས་གསུམ་གྲུ་གཟིངས་བཤིག ཉིན་མཚན་གཅིག་རིང་ང་རྒྱ་མཚོའི་དཀྱིལ་ལ་ལུས།

²⁶ཐེངས་མང་འགྲུལ་བྱེད་དུས་ང་ལ་གཙང་པོའི་ཉེན་ཁ་ཐུག་ཅིང༌། ཇག་པའི་ཉེན་ཁ་ཐུག ཕ་ཡུལ་གཅིག་པ་དང་ཡ་ཧུ་དཱ་མིན་པ་ནས་ཉེན་ཁ་ཐུག གྲོང་ཁྱེར་དང༌། དབེན་སྟོང་ལ་འགྲོ་དུས་ཉེན་ཁ་བྱུང༌། རྒྱ་མཚོའི་ཉེན་ཁ་བྱུང༌། སྤུན་ཟླ་རྫུན་མ་ནས་བྱུང་བའི་ཉན་ཁ་ཐུག

²⁷ངལ་རྩོལ་བྱེད་པ་དང་དཀའ་ངལ་མྱོང་བ། ཐེངས་མང་པོ་གཉིད་མི་ལོག་པར་སྡོད་པ། ལྟོགས་པ་དང་སྐོམ་པ། ལན་མང་པོ་ཟས་མེད་པ། གྲང་ངར་དང་གོས་དང་བྲལ་བ་ང་ལ་བྱུང༌།

²⁸དེས་མ་ཚད་ང་ལ་ཆོས་ཚོགས་ཚང་མར་དོ་སྣང་བྱེད་པས་ཉིན་ལྟར་སེམས་ཁྲལ་ཡོད།

²⁹གཞན་རྣམས་སྟོབས་ཞན་པར་འགྱུར་ན་ངའང་སྟོབས་ཞན་པར་འགྱུར། གཞན་རྣམས་བསླུ་བྲིད་པར་གྱུར་ན་ང་བསླུ་བྲིད་བྱེད་མཁན་ལ་ཁོང་ཁྲོ་སྐྱེ།

³⁰གལ་སྲིད་ངས་རང་བསྟོད་བྱེད་དགོས་ན་ང་རང་གི་ཞན་ཆའི་ཐད་ལ་རང་བསྟོད་བྱེད།

³¹ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་སྟེ་རྒྱུན་དུ་བསྟོད་བསྔགས་པ་དེས་ང་རྫུན་མི་ཤོད་པར་མཁྱེན་ནོ།

³²དཱ་མེ་སེག་གྲོང་ཁྱེར་དུ་རྒྱལ་པོ་ཨ་རེ་ཊ་ཡི་སྤྱི་ཁྱབ་ཀྱིས་ང་འཛིན་བཟུང་བའི་ཕྱིར་གྲོང་ཁྱེར་བསྲུངས་ཀྱང༌།[15]

³³ང་སླེ་པོ་ཆེན་པོ་ཞིག་གི་ནང་དུ་ལྕགས་རིའི་ཨི་ཁུང་བརྒྱུད་ནས་མར་ཕབ་པས་དེའི་ལག་པ་ནས་བྲོས་ནས་ཐར་བར་གྱུར་རོ། །