Read Central Tibetan Bible ག་ལད་ཡཱ་པ། 6 Bible Online

ག་ལད་ཡཱ་པ། 6 - Central Tibetan Bible bible

ག་ལད་ཡཱ་པ། 6

¹སྤུན་ཟླ་རྣམས། མི་ཞིག་གིས་དཀོན་མཆོག་གི་བཀའ་དང་འགལ་ན། དམ་པའི་ཐུགས་ཉིད་དང་ལྡན་པ་རྣམས་ཀྱིས་འཇམ་པོའི་ངང་ནས་ཁོ་སླར་གསོ་བྱེད་དགོས། ཁྱེད་ཚོ་ཡང་བསླུ་བར་མི་འགྱུར་བའི་ཕྱིར་དོགས་ཟོན་གྱིས་ཤིག

²གཅིག་གི་ཁུར་པོ་གཅིག་གིས་ཁུར་ཞིག དེ་ལྟར་བྱས་ན་ཁྱེད་ཚོས་མཱ་ཤི་ཀའི་བཀའ་ཁྲིམས་སྒྲུབ་བོ།

³མི་ཞིག་ཅིའང་མ་ཡིན་པ་དེས་གལ་ཆེན་པོ་ཡིན་སྙམ་ན། རང་གིས་རང་ལ་མགོ་སྐོར་གཏོང་མཁན་ཡིན།

⁴མི་རེ་རེས་རང་གི་སྤྱོད་ལམ་ལ་བརྟག་དཔྱད་བྱེད་དགོས། དེ་ལྟར་བྱས་ན་མི་གཞན་གྱི་སྤྱོད་པ་དང་སྡུར་མི་དགོས་པར་རང་གི་སྤྱོད་ལམ་ལ་ཡིད་ཚིམ་པར་འགྱུར།

⁵གང་ཡིན་ཞེ་ན། རེ་རེས་རང་གི་ཁུར་པོ་འཁུར་དགོས།

⁶དཀོན་མཆོག་གི་བཀའི་སློབ་མ་རྣམས་ཀྱིས་བཟང་པོ་ཐམས་ཅད་སློབ་དཔོན་ལ་བགོ་བཤའ་རྒྱག་དགོས།

⁷མགོ་མ་འཁོར་ཞིག སུས་ཀྱང་དཀོན་མཆོག་ལ་འཕྱ་སྨོད་བྱེད་མི་སྲིད། མི་ཞིག་གིས་གང་བཏབ་པ་དེའི་འབྲས་བུ་འཐོབ་པར་འགྱུར་བས་སོ།

⁸སྡིག་པའི་རང་གཤིས་དང་བསྟུན་པའི་སྤྱོད་པ་བྱེད་མཁན་ལ་རང་གཤིས་དེ་ནས་འཆི་བའི་འབྲས་བུ་འཐོབ། འོན་ཀྱང་དམ་པའི་ཐུགས་ཉིད་དང་བསྟུན་པའི་སྤྱོད་པ་བྱེད་མཁན་ལ་ཐུགས་ཉིད་ནས་དཔག་ཏུ་མེད་པའི་ཚེ་སྲོག་གི་འབྲས་བུ་འཐོབ།

⁹ང་ཚོས་བཟང་པོ་བྱེད་པར་ཡིད་ཐང་མ་ཆད་ཅིག དེ་ལྟར་བྱས་ན་དུས་ལ་འབབ་སྐབས་འབྲས་བུ་འཐོབ་པར་འགྱུར།

¹⁰དེའི་ཕྱིར་གོ་སྐབས་ཅི་བྱུང་ཡང་ང་ཚོས་མི་ཐམས་ཅད་དང༌། ཁྱད་པར་དུ་དད་ལྡན་གྱི་སྤུན་ཟླ་རྣམས་ལ་བཟང་པོ་བྱེད་དགོས།

¹¹ངས་རང་གི་ལག་པས་བྲིས་པའི་ཡི་གེ་ཆེན་པོ་འདི་ལ་གཟིགས་དང༌།

¹²མཱ་ཤི་ཀའི་རྒྱང་ཤིང་གི་དོན་དུ་གནོད་འཚེ་མི་མྱོང་བའི་ཕྱིར་ཕྱི་ཚུལ་ལ་དང་བསྟོད་བྱེད་མཁན་རྣམས་ཀྱིས་ཁྱེད་ཚོ་ཡ་ཧུ་དཱ་པའི་ཆོས་ཀྱི་རྟགས་ལེན་དུ་འཇུག་ཐབས་བྱེད།

¹³ཡ་ཧུ་དཱ་པའི་ཆོས་ཀྱི་རྟགས་དང་ལྡན་པ་རྣམས་ཀྱིས་ཆོས་ཁྲིམས་མི་སྲུང་ན་ཡང༌། ཁྱེད་ཚོའི་སྐོར་རང་བསྟོད་བྱེད་པའི་ཕྱིར་ཁྱེད་རྣམས་ལ་ཡ་ཧུ་དཱ་པའི་ཆོས་ཀྱི་རྟགས་རྒྱག་ཏུ་འཇུག་པར་འདོད།

¹⁴འོན་ཀྱང་གཙོ་བོ་ཡེ་ཤུ་མཱ་ཤི་ཀའི་རྒྱང་ཤིང་མ་གཏོགས་པར་ངས་གཞན་ཞིག་ལ་ཅི་ནས་ཀྱང་མི་བསྟོད། གཙོ་བོ་ཡེ་ཤུ་རྒྱང་ཤིང་སྒང་ལ་གྲོངས་པའི་སྒོ་ནས་ང་འཇིག་རྟེན་འདིའི་ཆ་ནས་ཤི་བ་དང༌། འཇིག་རྟེན་འདི་ཡང་ངའི་ཆ་ནས་མེད་པ་ལྟར་གྱུར།

¹⁵ཡ་ཧུ་དཱ་པའི་ཆོས་ཀྱི་རྟགས་དང་ལྡན་ཡོད་མེད་དེ་དོན་མེད་ཡིན། འོན་ཀྱང་གསར་དུ་སྐྱེ་བ་དེ་གལ་ཆེའོ།

¹⁶ཡང་རྩ་དོན་དེ་བཞིན་དུ་སྲུང་མཁན་དང༌། དཀོན་མཆོག་གི་ཡི་སི་ར་ཨེལ་ལ་ཞི་བདེ་དང་ཐུགས་རྗེ་འབབ་པར་ཤོག

¹⁷ངའི་གཟུགས་པོར་ཡེ་ཤུའི་རྨ་རྟགས་ཡོད་པས་ད་ནས་བཟུང་སུས་ཀྱང་ང་ལ་སྡུག་པོ་མ་གཏོང༌།

¹⁸སྤུན་ཟླ་རྣམས། ང་ཚོའི་གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ཁྱེད་ཚོའི་སེམས་ལ་བཞུགས་པར་གྱུར་ཅིག ཨ་མེན། ། ། །