Read Central Tibetan Bible ཨེ་ཕེ་སུ་པ། 1 Bible Online

ཨེ་ཕེ་སུ་པ། 1 - Central Tibetan Bible bible

ཨེ་ཕེ་སུ་པ། 1

¹དཀོན་མཆོག་གི་ཐུགས་དགོངས་བཞིན་དུ་མཱ་ཤི་ཀ་ཡེ་ཤུའི་སྐུ་ཚབ་ང་པའུ་ལུ་ཡིས། ཨེ་ཕེ་སུ་གྲོང་ཁྱེར་དུ་ཡོད་པའི་དཀོན་མཆོག་གི་མི་རྣམས་ཏེ། མཱ་ཤི་ཀ་ཡེ་ཤུའི་ཐོག་ནས་ལྷག་བསམ་ཆེ་བ་རྣམས་ལ་འཕྲིན་ཡིག་འདི་ཕུལ་ལོ།

²ང་ཚོའི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཐུགས་རྗེ་དང་ཞི་བདེ་ཁྱེད་ལ་འཐོབ་པར་གྱུར་ཅིག

³ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་ཡབ་དཀོན་མཆོག་ལ་བསྟོད་པ་འབུལ་བར་ཤོག མཱ་ཤི་ཀའི་ཐོག་ནས་ཁོང་གིས་ང་ཚོར་སེམས་ཉིད་ཀྱི་བྱིན་རླབས་ཐམས་ཅད་ཞིང་ཁམས་སུ་གནང༌།

⁴ང་ཚོ་དཀོན་མཆོག་གི་སྤྱན་སྔར་དམ་པ་དང་སྐྱོན་མེད་པར་འགྱུར་བའི་ཆེད་དུ་འཇིག་རྟེན་མ་བཀོད་པའི་སྔོན་ལ་ཁོང་གིས་མཱ་ཤི་ཀའི་ཐོག་ནས་ངེད་རྣམས་བདམས།

⁵བྱམས་པའི་སྒོ་ནས་ཁོང་གི་བཀའ་དྲིན་ལྡན་པའི་ཐུགས་དགོངས་བཞིན་དུ་ཡེ་ཤུ་མཱ་ཤི་ཀ་བརྒྱུད་ནས་ང་ཚོ་ཁོང་གི་སྲས་སུ་འགྱུར་བའི་ཕྱིར་སྔར་འདམ་པར་མཛད།

⁶དེ་ནི་ཁོང་གི་གཟི་བརྗིད་དང་ལྡན་པའི་ཐུགས་རྗེ་ལ་བསྟོད་པའི་ཆེད་དུ་ཡིན། ཐུགས་རྗེ་དེ་དཀོན་མཆོག་གི་གཅེས་པའི་སྲས་ཀྱི་སྒོ་ནས་ང་ཚོར་གནང༌།[1]

⁷ཁོང་གི་སྐུ་ཁྲག་ཡིན་པའི་བླུ་རིན་གྱི་ངང་ནས་ང་ཚོའི་སྡིག་ཉེས་སེལ་ཏེ་ཐར་པ་ཐོབ། དེ་ནི་ཁོང་གི་དཔག་ཏུ་མེད་པའི་ཐུགས་རྗེ་བཞིན་དུ་ང་ཚོར་ལྷག་པར་གནང༌། ཤེས་རབ་དང་རྟོགས་པ་ཐམས་ཅད་ཀྱིས་མཱ་ཤི་ཀ་བརྒྱུད་ནས་དཀོན་མཆོག་ཐུགས་དགྱེས་པ་བཞིན་དུ་ཁོང་གི་ཐུགས་དགོངས་ཀྱི་གསང་བ་ང་ཚོར་མངོན་པར་མཛད།

¹⁰ཡང་ཁོང་གི་ཐུགས་དགོངས་ནི་དུས་ལ་འབབ་སྐབས་སུ་གནམ་ས་གཉིས་ལ་གང་ཡོད་པ་ཐམས་ཅད་གཅིག་ཏུ་བསྡུས་ནས་མཱ་ཤི་ཀའི་དབང་འོག་ཏུ་འཇུག་པ་དེ་ཡིན།

¹¹རང་ཉིད་ཀྱི་ཐུགས་དགོངས་བཞིན་དུ་བྱ་བ་ཐམས་ཅད་སྒྲུབ་མཁན་དཀོན་མཆོག་གིས་སྔར་ནས་བསྐོས་པས། མཱ་ཤི་ཀའི་སྒོ་ནས་ང་ཚོ་ལའང་དཀོན་མཆོག་གིས་ཞལ་ཆད་གནང་བའི་བྱིན་རླབས་ཀྱི་སྐལ་བ་ཐོབ་བྱུང༌།

¹²དེ་ནི་མཱ་ཤི་ཀ་ལ་ཐོག་མར་རེ་སྒུག་བྱེད་མཁན་ང་ཚོ་ཁོང་གི་གཟི་བརྗིད་ཀྱི་བསྟོད་པའི་དོན་ལ་འཚོ་བའི་ཆེད་དུ་ཡིན།

¹³ཁྱེད་ཚོས་ཀྱང་ཐར་པ་གནང་བའི་བདེན་པའི་བཀའ་འཕྲིན་ཐོས་ནས། མཱ་ཤི་ཀ་ལ་དད་པ་བྱས་པས་ཁྱེད་ཚོ་དཀོན་མཆོག་གིས་སྔར་ནས་ཞལ་ཆད་གནང་བའི་དམ་པའི་ཐུགས་ཉིད་ཡིན་པའི་རྒྱ་ཡིས་བཏབ་པར་གྱུར།

¹⁴དཀོན་མཆོག་གི་ཁོངས་མི་རྣམས་ཐར་བར་འགྱུར་བའི་བར་དུ། དམ་པའི་ཐུགས་ཉིད་ནི་ང་ཚོར་འཐོབ་རྒྱུ་ཡིན་པའི་བྱིན་རླབས་ཀྱི་གཏའ་མ་ཡིན། དེ་ནི་དཀོན་མཆོག་གི་གཟི་བརྗིད་ཀྱི་བསྟོད་པ་ཡོང་བའི་ཆེད་དུ་ཡིན།

¹⁵དེ་བས་ན་ཁྱེད་ཚོས་གཙོ་བོ་ཡེ་ཤུ་ལ་དད་ཅིང༌། དཀོན་མཆོག་གི་མི་ཐམས་ཅད་ལ་གཅེས་པར་འཛིན་པའི་སྐོར་ཐོས་པས།

¹⁶སྨོན་ལམ་འདེབས་པའི་དུས་སུ་ངས་ཁྱེད་ཚོ་གླེང་བ་དང༌། ཁྱེད་ཚོའི་དོན་དུ་རྒྱུན་ཆད་མེད་པར་བཀའ་དྲིན་ཆེ་ཞུ།

¹⁷ཁྱེད་ཚོས་ཁོང་དེ་བས་ཡག་པ་ངོ་ཤེས་པའི་ཕྱིར། གཟི་བརྗིད་དང་ལྡན་པའི་ཡབ་སྟེ་ངེད་རྣམས་ཀྱི་གཙོ་བོ་ཡེ་ཤུ་མཱ་ཤི་ཀའི་དཀོན་མཆོག་གིས་ཁྱེད་ཚོར་ཤེས་རབ་དང་རྟོགས་པའི་ཐུགས་ཉིད་གནང་བའི་སྨོན་ལམ་འདེབས།

¹⁸དེ་ནི་ཁྱེད་ཚོའི་བློ་སྒོ་ཕྱེ་ནས་ཁོང་གིས་ཁྱེད་ཚོར་བོས་པའི་རེ་བ་དང༌། དཀོན་མཆོག་གིས་ཁོང་གི་མི་རྣམས་ལ་ཞལ་གྱིས་བཞེས་པའི་བྱིན་རླབས་ཕུན་སུམ་ཚོགས་པ་གང་ཡིན་ཞིང༌།

¹⁹ང་ཚོ་དད་ལྡན་རྣམས་ཀྱི་དོན་ལ་ཁོང་གི་བླ་ན་མེད་པའི་ནུས་མཐུ་གང་ཡིན་པ་ཁྱེད་ཚོས་ཤེས་པའི་ཆེད་དུ་ཡིན། ནུས་མཐུ་དེ་རང་གིས་

²⁰དཀོན་མཆོག་གིས་མཱ་ཤི་ཀ་འཆི་བ་ནས་སླར་གསོན་པར་མཛད་ནས་ཞིང་ཁམས་སུ་ཁོང་གི་ཕྱོགས་གཡས་ལ་བཞུགས་སུ་བཅུག་གོ

²¹དེར་མཱ་ཤི་ཀ་ནི་ཁྲིམས་དང༌། དབང༌། ནུས་མཐུ། མངའ་ཐང༌། གོ་མིང་ཐམས་ཅད་ཀྱི་སྟེང་ལ། དུས་འདིར་མ་ཟད་མ་འོངས་པའི་དུས་སུའང་བཞུགས་སོ།

²²ཡང་དོན་ཐམས་ཅད་མཱ་ཤི་ཀའི་ཞབས་འོག་ཏུ་བཅུག་པར་མཛད་ཅིང་དཀོན་མཆོག་གིས་ཁོང་ཐམས་ཅད་ཀྱི་དབུ་རུ་བསྐོས་ནས་ཆོས་ཚོགས་ལ་གནང༌།

²³ཆོས་ཚོགས་ནི་ཁོང་གི་སྐུ་ལུས་ཡིན་ཏེ། ཅི་ཡོད་པ་ཐམས་ཅད་ཡོངས་སུ་རྫོགས་པ་མཛད་མཁན་གྱིས་ཡོངས་སུ་རྫོགས་པར་འགྱུར་རོ། །