Read Central Tibetan Bible ཕི་ལིབ་པཱི་པ། 1 Bible Online

ཕི་ལིབ་པཱི་པ། 1 - Central Tibetan Bible bible

ཕི་ལིབ་པཱི་པ། 1

¹པའུ་ལུ་དང་ཐི་མོ་ཐེ་མཱ་ཤི་ཀ་ཡེ་ཤུའི་ཞབས་ཕྱི་གཉིས་ཀྱིས། ཕི་ལིབ་པཱི་གྲོང་ཁྱེར་དུ་མཱ་ཤི་ཀ་ཡེ་ཤུའི་ནང་ན་ཡོད་པའི་དཀོན་མཆོག་གི་མི་ཐམས་ཅད་དང༌། ཆོས་ཚོགས་ཀྱི་དོ་དམ་པ་དང་ལས་འཛིན་པ་རྣམས་ལ་འཕྲིན་ཡིག་འདི་ཕུལ་ལོ།

²ང་ཚོའི་ཡབ་དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀ་ནས་ཐུགས་རྗེ་དང་ཞི་བདེ་ཁྱེད་ལ་འཐོབ་པར་གྱུར་ཅིག

³ངས་ཁྱེད་ཚོ་དྲན་ཐེངས་རེ་རེར་ངའི་དཀོན་མཆོག་ལ་བཀའ་དྲིན་ཆེ་ཞུ།

⁴ཁྱེད་ཚོ་ཐམས་ཅད་ཀྱི་དོན་ལ་གསོལ་བ་འདེབས་པའི་ཚེ་ངས་རྒྱུན་དུ་དགའ་བའི་ངང་ནས་སྨོན་ལམ་འདེབས།

⁵དེ་ནི་ཉིན་དང་པོ་ནས་ད་ལྟའི་བར་དུ་ཁྱེད་ཚོས་འཕྲིན་བཟང་གི་ལས་བྱེད་པར་ང་ལ་རོགས་རམ་བྱས་པས་སོ།

⁶ཁྱེད་ཚོའི་ཁྲོད་དུ་བྱ་བ་བཟང་པོ་འགོ་འཛུགས་མཁན་དཀོན་མཆོག་གིས་མཱ་ཤི་ཀ་ཡེ་ཤུ་སླར་འབྱོན་པའི་ཉིན་མོའི་བར་དུ་སྒྲུབ་པར་ཡང་མཛད་རྒྱུ་ཡིན་པ་དེ་ངར་ཡིད་ཆེས་ཡོད།

⁷ངས་ཁྱེད་ཚོ་ཐམས་ཅད་ཀྱི་སྐོར་ལ་དེ་ལྟར་བསམས་ན་འོས་སོ། གང་ཡིན་ཟེར་ན། ཁྱེད་ཚོ་རྟག་ཏུ་ངའི་སེམས་ལ་གནས་ཏེ། ང་བཙོན་ལ་འཇུག་པ་དང༌། འཕྲིན་བཟང་གསལ་བཤད་བྱེད་པ་དང༌། མི་རྣམས་ཀྱི་དད་པ་བརྟན་པོར་བྱེད་པའི་ཆ་ནས་ཁྱེད་ཚོ་ནི་ང་དང་མཉམ་དུ་དཀོན་མཆོག་གི་ཐུགས་རྗེ་འཐོབ་མཁན་ཡིན།

⁸ངས་མཱ་ཤི་ཀ་ཡེ་ཤུའི་ཐུགས་བརྩེ་ཡིས་ཁྱེད་ཐམས་ཅད་དྲན་པ་དེ་དཀོན་མཆོག་ངའི་དཔང་པོ་མཛད་མཁན་ཡིན།

⁹ཡང་ངས་འདི་ལྟར་གསོལ་བ་འདེབས་ཏེ། ཁྱེད་ཚོའི་བྱམས་སེམས་དེ་ཤེས་རབ་དང་རྟོགས་པ་ཐམས་ཅད་ཀྱི་སྟེང་སྔར་ལས་ལྷག་པར་འཕེལ་ནས།

¹⁰ཁྱེད་ཚོས་གང་མཆོག་ཡིན་པ་བླངས་ཏེ་མཱ་ཤི་ཀའི་ཉིན་མོའི་བར་དུ་བཅོས་མིན་དང་སྐྱོན་མེད་པར་འགྱུར་བའི་ཆེད་དང༌།

¹¹དཀོན་མཆོག་གི་གཟི་བརྗིད་དང་བསྟོད་པ་འཕེལ་བའི་ཕྱིར་ཡེ་ཤུ་མཱ་ཤི་ཀ་ལ་བརྟེན་ནས་རྣམ་པར་དག་པའི་འབྲས་བུ་ཡིས་ཁྱེད་ཚོ་གང་བར་འགྱུར།

¹²སྤུན་ཟླ་རྣམས། ང་ལ་གང་བྱུང་བ་དེས་དོན་དམ་དུ་འཕྲིན་བཟང་འཕེལ་བར་བྱས་པ་ཤེས་པར་གྱིས་ཤིག

¹³གོང་མའི་རྒྱལ་པོའི་ཕོ་བྲང་གི་སྲུང་དམག་ཚང་མ་དང༌། གཞན་མི་ཐམས་ཅད་ཀྱིས་ང་མཱ་ཤི་ཀའི་དོན་ལ་བཙོན་དུ་བཅུག་པ་དེ་ཤེས་པར་གྱུར།

¹⁴མ་ཟད་ང་བཙོན་དུ་བཅུག་པའི་རྐྱེན་གྱིས་སྤུན་ཟླ་མང་ཆེ་བས་གཙོ་བོ་ལ་བརྟེན་ཏེ་དཀོན་མཆོག་གི་བཀའ་འཇིགས་པ་མེད་པར་སྒྲོག་པའི་བློ་སྟོབས་ཆེ་བར་གྱུར།

¹⁵དོན་དམ་དུ་མི་ལ་ལས་མཱ་ཤི་ཀའི་ཆོས་སྟོན་པ་ནི་ཕྲག་དོག་ཅན་དང་ཁ་རྩོད་ལ་དགའ་མཁན་ཡིན་ཡང༌། ལ་ལས་སེམས་བཟང་པོ་ཡིས་ཆོས་སྟོན།

¹⁶རྗེས་མ་རྣམས་ཀྱིས་བྱམས་སེམས་ཀྱི་ངང་ནས་མཱ་ཤི་ཀའི་ཆོས་སྟོན་པ་ནི། ང་འཕྲིན་བཟང་གསལ་བཤད་བྱེད་པའི་ཕྱིར་བསྐོས་པ་ཡིན་པ་ཤེས་པས་ཡིན།

¹⁷འོན་ཀྱང༌། ང་བཙོན་ཁང་ལ་ཡོད་དུས་ང་ལ་སྡུག་པོ་གཏོང་བར་བསམས་ནས་སྔ་མ་རྣམས་ཀྱིས་སེམས་བཟང་ནས་མིན་པར་འགྲན་སེམས་ནས་ཆོས་སྟོན།

¹⁸དེ་ལྟར་ཡིན་པར་ཅི་སྨྲ། སྔ་རྗེས་ཀྱི་བདེན་རྫུན་གང་ཡིན་ཡང་མཱ་ཤི་ཀའི་ཆོས་སྒྲོག་བཞིན་ཡོད་པས་ང་ད་ལྟ་དགའ་སྟེ། རྗེས་མའང་དགའ་བར་འགྱུར།

¹⁹གང་ཡིན་ཞེ་ན། གནས་ཚུལ་འདི་ནི་ཁྱེད་ཚོའི་སྨོན་ལམ་དང༌། ཡེ་ཤུ་མཱ་ཤི་ཀའི་ཐུགས་ཉིད་ཀྱི་རོགས་རམ་བརྒྱུད་ནས་ང་སྐྱོབ་པའི་རྒྱུར་འགྱུར་བར་ངས་ཤེས།

²⁰ངས་སྙིང་ཐག་པ་ནས་རེ་སྨོན་བྱེད་པའི་དོན་གང་ལའང་ངོ་མི་ཚ་བར། ང་སྙིང་སྟོབས་ཆེན་པོས་གསོན་རུང་ཤི་རུང་སྔར་ལྟར་དུས་རྟག་ཏུ་མཱ་ཤི་ཀ་ངའི་ལུས་ཀྱི་སྒོ་ནས་འཕག་པར་འདོད།

²¹གང་ལགས་ཟེར་ན། ང་ནི་འཚོ་བ་མཱ་ཤི་ཀའི་དོན་དུ་ཡིན། ཤི་ནའང་ལེགས་སོ།

²²གལ་ཏེ་ང་མུ་མཐུད་གསོན་པོར་གནས་ན་ངའི་བྱ་བར་མཱ་ཤི་ཀའི་དོན་དུ་འབྲས་བུ་དང་ལྡན་པ་ཡིན་པས། ཡང་སྙིང་ཤི་གསོན་གང་ཞིག་འདམ་རྒྱུ་ཡིན་པ་མི་ཤེས།

²³ང་ནི་ཐེ་ཚོམ་ནང་དུ་ཚུད། འཇིག་རྟེན་འདི་ལས་འདས་ཏེ་མཱ་ཤི་ཀ་དང་མཉམ་དུ་གནས་འདོད། འདི་ལས་ལྷག་པ་མེད་པས་སོ།

²⁴འོན་ཀྱང༌། ཁྱེད་ཚོར་ཕན་པའི་ཆེད་དུ་ང་གསོན་པོར་གནས་པ་དེ་བས་གལ་ཆེའོ།

²⁵དེའི་ཡིད་ཆེས་ཀྱི་ངེས་པ་རྙེད་དེ། ཁྱེད་ཚོ་དད་པའི་ནང་ཡར་སྐྱེད་དང་དགའ་བ་འབྱུང་བའི་ཕྱིར་ང་གསོན་པོར་གནས་ནས་མུ་མཐུད་ཁྱེད་ཚོ་ཐམས་ཅད་དང་མཉམ་དུ་སྡོད་པ་ངས་ཤེས།

²⁶དེ་ནི་ང་ཁྱེད་ཚོའི་རྩར་ཕྱིར་ལོག་སྐབས་ངའི་རྐྱེན་གྱིས་ཁྱེད་ཚོ་མཱ་ཤི་ཀའི་ཐོག་ནས་དེ་བས་དགའ་སྤྲོ་འཕེལ་བའི་ཆེད་དུ་ཡིན།

²⁷གང་ལྟར་ཁྱེད་ཚོས་བྱ་སྤྱོད་ཚང་མ་མཱ་ཤི་ཀའི་འཕྲིན་བཟང་དང་མཐུན་པར་གྱིས་ཤིག དེ་ནས་ང་ཁྱེད་ཚོ་དང་མཇལ་རུང་མི་མཇལ་རུང༌། ཁྱེད་ཚོ་བློ་སེམས་གཅིག་མཐུན་གྱི་སྒོ་ནས་བརྟན་པོར་གནས་ཤིང༌། འཕྲིན་བཟང་ལ་བརྟེན་པའི་དད་པ་དེའི་དོན་དུ་བློ་རྩེ་གཅིག་སྒྲིམ་གྱིས་བརྩོན་པའི་གཏམ་ངས་ཐོས་པར་འགྱུར།

²⁸དགྲ་བོ་རྣམས་ལ་གང་ཡིན་ཡང་མི་སྐྲག་པ་དེ་ནི་ཁོ་ཚོ་ལ་འཇིག་པ་དང༌། ཁྱེད་ཚོ་ལ་ཐར་པ་འབྱུང་བའི་སྔ་ལྟས་ཡིན། ཐར་པ་དེ་ནི་དཀོན་མཆོག་ནས་འབྱུང་བས་མ་འཇིགས་ཤིག

²⁹མཱ་ཤི་ཀ་ལ་དད་པ་བྱེད་པ་མ་ཟད། ཁོང་གི་དོན་ལ་སྡུག་བསྔལ་མྱོང་བའང་དཀོན་མཆོག་གིས་ཁྱེད་རྣམས་ལ་གནང་བ་ཡིན།

³⁰གང་ལགས་ཟེར་ན། ང་ལ་བྱུང་བའི་འཐབ་རྩོད་སྔར་མཐོང་བ་དང་ད་ལྟ་ཐོས་པ་དེ་བཞིན་ཁྱེད་ཚོ་ལའང་འབྱུང་ངོ༌། །