Read Central Tibetan Bible ཕི་ལིབ་པཱི་པ། 4 Bible Online

ཕི་ལིབ་པཱི་པ། 4 - Central Tibetan Bible bible

ཕི་ལིབ་པཱི་པ། 4

¹དེའི་ཕྱིར་ངའི་མཛའ་ཞིང་བརྩེ་ལ། སྙིང་ནས་དྲན་པའི་སྤུན་ཟླ་ཚོ། ཁྱེད་ཚོ་ནི་ངའི་དགའ་སྤྲོ་དང༌། ཅོད་པན་དང་འདྲ་བ་ཡིན་པས་གཙོ་བོའི་ཐོག་ནས་དེ་ལྟར་བརྟན་པོར་གནས་ཤིག

²ངས་བུད་མེད་ཡུ་ཨོ་དི་ཡཱ་དང་སིན་ཏི་ཀེ་གཉིས་ལ་གཙོ་བོའི་ངང་ནས་ཡིད་མཐུན་པར་སྐུལ།

³ངའི་བདེན་པའི་ལས་རོགས། ཁྱེད་ཀྱིས་ཀྱང་བུད་མེད་དེ་གཉིས་ལ་རོགས་རམ་བྱེད་པར་ཞུ། གང་ཡིན་ཟེར་ན། ཁོ་ཚོས་ཁི་ལུ་མིན་ཐུ་ལ་སོགས་པའི་ངའི་ལས་རོགས་གཞན་ང་དང་མཉམ་དུ་འཕྲིན་བཟང་གི་ཕྱིར་འབད་རྩོལ་བྱས། ཁོ་ཚོའི་མིང་ནི་དཔག་ཏུ་མེད་པའི་ཚེའི་མདོ་ལ་འཁོད་ཡོད།

⁴གཙོ་བོ་ལ་བརྟེན་ནས་རྟག་ཏུ་དགའ་བར་གྱིས་ཤིག ངས་ཡང་བསྐྱར་ཁྱེད་ཚོར་དགའ་བར་གྱིས་ཤིག་ཅེས་སྨྲ།

⁵མི་ཐམས་ཅད་ཀྱིས་ཁྱེད་ཚོའི་སེམས་དུལ་བ་དེ་ཤེས་པར་གྱིས་ཤིག གཙོ་བོ་འབྱོན་པ་ལ་ཉེའོ།

⁶སེམས་ཁྲལ་གང་ཡང་མི་བྱེད་པར་རྣམ་པ་ཐམས་ཅད་དུ་སྨོན་ལམ་དང་གསོལ་བ་ཐུགས་རྗེ་ལེགས་འབུལ་གྱི་སྒོ་ནས་དཀོན་མཆོག་ལ་ཞུ།

⁷ཡང་དཀོན་མཆོག་གི་བསམ་ཡུལ་ལས་འདས་པའི་ཞི་བདེ་ཡིས་མཱ་ཤི་ཀ་ཡེ་ཤུའི་སྒོ་ནས་ཁྱེད་ཚོའི་བློ་སེམས་སྲུང་བར་འགྱུར།

⁸མདོར་ན་སྤུན་ཟླ་རྣམས། ཁྱེད་ཚོས་བདེན་པ་གང་ཡིན་པ་དང༌། བཀུར་སྟི་གང་ཡིན་པ། དྲང་པོ་གང་ཡིན་པ། དག་པ་གང་ཡིན་པ། ཡིད་དུ་འོང་བ་གང་ཡིན་པ། སྙན་པ་དང༌། བཟང་པོ་གང་ཡིན་པ། བསྟོད་འོས་པ་བཅས་པའི་དོན་དེ་རྣམས་ཀུན་ལ་བསམ་བློ་གཏོང་ཞིག

⁹ཁྱེད་ཚོས་ང་ནས་གང་བསླབས་པ་དང༌། དང་ལེན་བྱས་པ་དང༌། ཐོས་པ་དང༌། མཐོང་བ་དེ་དག་ཉམས་ལེན་བྱེད་དགོས། ཡང་ཞི་བདེ་གནང་མཁན་དཀོན་མཆོག་ཁྱེད་ཚོ་དང་མཉམ་དུ་བཞུགས་པར་འགྱུར།

¹⁰ཁྱེད་ཚོས་ད་ལྟ་ཡང་བསྐྱར་ང་ལ་སེམས་ཁུར་བྱེད་པས་ངས་གཙོ་བོ་ལ་བརྟེན་ནས་ཤིན་ཏུ་དགའ་བར་བྱེད། དོན་དམ་དུ་ཁྱེད་ཚོས་སྔར་ནས་སེམས་ཁུར་བྱས་ཀྱང་ང་ལ་རོགས་རམ་བྱེད་པའི་གོ་སྐབས་མ་བྱུང༌།

¹¹ང་ལ་མཁོ་ཆས་མེད་པས་དེ་ལྟར་མི་ཟེར། རྒྱུ་མཚན་ནི་ང་ལ་ཅི་ཡོད་པ་དེར་ཆོག་ཤེས་བྱེད་པ་ཤེས་ཟིན་པ་ཡིན།

¹²ངས་དམན་པའི་དུས་ལ་ཇི་ལྟར་བྱེད་པ་དང༌། ལོངས་སྤྱོད་ཡོད་པའི་དུས་ཀྱང་ཇི་ལྟར་བྱེད་པ་ཤེས། འགྲང་བ་ཡང་ན་ལྟོགས་པ། ལྷག་པའམ་ཡང་ན་ཆད་པ། གནས་བབས་ཀུན་ལ་ཇི་ལྟར་བཟོད་པ་སྒོམ་པའི་གསང་བ་དེ་ཤེས།

¹³ང་ལ་སྟོབས་ཤུགས་གནང་མཁན་གྱི་སྒོ་ནས་ངས་ཐམས་ཅད་བྱེད་ཐུབ་བོ།

¹⁴འོན་ཀྱང་ང་སྡུག་བསྔལ་མྱོང་དུས་ཁྱེད་ཚོས་ང་ལ་རོགས་རམ་བྱས་པས་དེ་ལེགས།

¹⁵འཕྲིན་བཟང་ཐོག་མར་སྒྲོག་པའི་སྐབས་སུ་ང་མ་ཀེ་དོན་ཡཱ་ཡུལ་ནས་ཁ་བྲལ་བའི་རྗེས། ཁྱེད་ཚོ་མ་གཏོགས་ཆོས་ཚོགས་ཕར་སྤྲོད་ཚུར་ལེན་གྱི་རོགས་རམ་མ་བྱས་པ་ཁྱེད་ཕི་ལིབ་པཱི་པ་རྣམས་ཀྱིས་ཤེས།

¹⁶ང་ཐེ་ས་ལོ་ནི་ཀེ་གྲོང་ཁྱེར་ལ་ཡོད་དུས་ཀྱང་ཁྱེད་ཚོས་ང་ལ་སྦྱིན་པ་ཐེངས་འགའ་བཏང༌།

¹⁷རང་གི་དོན་ལ་སྦྱིན་པ་མི་འཚོལ་བར་ངས་ཁྱེད་རྣམས་ཀྱི་དོན་ལ་དཀོན་མཆོག་གི་དྲུང་དུ་ཕན་པའི་འབྲས་བུ་འཚོལ།

¹⁸ཁྱེད་ཚོས་ཨེ་པབ་རོ་དི་ཊུ་བརྒྱུད་གང་བསྐུར་བ་དེ་འབྱོར་ནས་ང་ལ་གང་དགོས་ཡོད་པ་མ་ཟད་ལྷག་མའང་ཡོད་པས་ཡིད་ཚིམ་པར་གྱུར། ཁྱེད་ཀྱིས་བསྐུར་བའི་གནང་སྦྱིན་ནི་དྲི་ཞིམ་གྱི་མཆོད་པ་དཀོན་མཆོག་གི་ཐུགས་སུ་བྱོན་པ་དང་མཉེས་པ་ཞིག་ཡིན།

¹⁹ཡང་ངའི་དཀོན་མཆོག་གིས་རང་གི་གཟི་བརྗིད་དང་ལྡན་པའི་ནོར་བཞིན་དུ་མཱ་ཤི་ཀ་ཡེ་ཤུ་བརྒྱུད་ནས་ཁྱེད་ཚོར་དགོས་པ་ཐམས་ཅད་མཁོ་འདོན་མཛད་པར་འགྱུར།

²⁰ངེད་རྣམས་ཀྱི་དཀོན་མཆོག་དང་ཡབ་ལ་དུས་གཏན་དུ་གཟི་བརྗིད་དང་ལྡན་པར་གྱུར་ཅིག ཨ་མེན།

²¹མཱ་ཤི་ཀ་ཡེ་ཤུའི་ངང་ནས་དད་ལྡན་རེར་འཚམས་འདྲི་ཞུས། ང་དང་མཉམ་དུ་ཡོད་པའི་སྤུན་ཟླ་རྣམས་ཀྱིས་ཁྱེད་ཚོར་འཚམས་འདྲི་ཞུ།

²²དད་ལྡན་ཐམས་ཅད་དང༌། ཁྱད་པར་དུ་གོང་མ་སེ་སར་གྱི་ཕོ་བྲང་ལ་བཞུགས་པ་རྣམས་ཀྱིས་ཁྱེད་ཚོར་འཚམས་འདྲི་ཞུ།

²³གཙོ་བོ་ཡེ་ཤུ་མཱ་ཤི་ཀའི་ཐུགས་རྗེ་ཁྱེད་ཚོའི་སེམས་ལ་གནས་པར་གྱུར་ཅིག ། ། །