Read Central Tibetan Bible ཐེ་ཏུ། 1 Bible Online

ཐེ་ཏུ། 1 - Central Tibetan Bible bible

ཐེ་ཏུ། 1

¹དཀོན་མཆོག་གིས་བདམས་པའི་མི་རྣམས་ཀྱི་དད་པ་འཕེལ་བའི་ཆེད་དང༌། བདེན་པ་རྟོགས་ཏེ་དད་ལྡན་རྣམས་ཀྱི་སྤྱོད་ཚུལ་གྱིས་དཀོན་མཆོག་གི་ཐུགས་མཉེས་པར་བྱེད་པའི་ཕྱིར། དཀོན་མཆོག་གིས་ང་པའུ་ལུ་ཞབས་ཕྱི་དང་ཡེ་ཤུ་མཱ་ཤི་ཀའི་སྐུ་ཚབ་ལྟར་བཀོད་དེ།

²འཇིག་རྟེན་མ་བཀོད་པའི་སྔོན་ནས་དཀོན་མཆོག་རྫུན་གསུང་མི་སྲིད་པ་དེས་ཁོང་གི་མི་རྣམས་ལ་དཔག་ཏུ་མེད་པའི་ཚེ་ཡི་ཞལ་ཆད་གནང་བས་དེ་ཚོས་ཡིད་རྟོན་ནས་དེ་ལ་བརྟེན།

³ང་ཚོའི་སྐྱབས་མགོན་དཀོན་མཆོག་གིས་ང་ལ་ཆོས་བསྟན་དགོས་པའི་བཀའ་གནང་བས། དུས་ལ་འབབ་སྐབས་ཁོང་གི་བཀའ་མངོན་པར་མཛད།

⁴ང་ཚོའི་ཐུན་མོང་གི་དད་པའི་ཐོག་ནས་ངའི་བདེན་པའི་བུ་ཐེ་ཏུ་ལ་ང་པའུ་ལུ་ཡིས་འཕྲིན་ཡིག་འདི་འབུལ་ལོ། ། ཡབ་དཀོན་མཆོག་དང་ང་ཚོའི་སྐྱབས་མགོན་མཱ་ཤི་ཀ་ཡེ་ཤུ་ནས་དཀོན་མཆོག་གི་ཐུགས་རྗེ་དང་ཞི་བདེ་ཁྱེད་ལ་ལྡན་པར་གྱུར་ཅིག

⁵ངས་ཁྱེད་ཀེ་རེ་ཊེ་ཡུལ་ལ་བཞག་དགོས་དོན་ནི་ཚར་མེད་པའི་ལས་རྣམས་སྒྲུབ་པའི་ཆེད་དང༌། ངས་བཀའ་བསྒོས་པ་ལྟར་ཁྱེད་ཀྱིས་གྲོང་ཁྱེར་རེར་འགན་འཁུར་བ་རྣམས་སྐོ་བའི་ཕྱིར་ཡིན།

⁶འགན་འཁུར་བ་དེ་རྣམས་ནི་སྐྱོན་མེད་པ་དང༌། བཟའ་ཟླ་གཅིག་གི་ཁྱོ་ག་ཡིན་དགོས་པ་མ་ཟད། ཁོའི་ཕྲུ་གུ་ནི་དད་ལྡན་དང་བག་ཡོད་པ་ཞིག་ཡིན་པ་དང་ཕ་མའི་ཁ་ལ་མི་ཉན་པའི་སྐྱོན་བརྗོད་མེད་པ་ཞིག་ཡིན་དགོས།

⁷དོ་དམ་པ་ནི་དཀོན་མཆོག་གི་འཕྲིན་ལས་སྒྲུབ་མཁན་ཡིན་པས་སྐྱོན་མེད་པ་ཡིན་དགོས་པ་དང༌། རང་ལ་མི་ཆགས་པ། ཁོང་ཁྲོ་ལངས་བདེ་བ། རྒུན་ཆང་ལ་སོགས་མང་པོ་འཐུང་མཁན། འཐབ་པ་དང༌། དངུལ་ལ་ཆགས་པ་མ་ཡིན་པར།

⁸ཀུན་ལ་སེམས་རྩ་འཁོལ་བ་དང༌། བཟང་པོ་ལ་དགའ་བ། རང་ཚོད་ཟིན་པ། དྲང་པོ། དམ་པ། བག་ཡོད་དང་ལྡན་པ་བཅས་ཡིན་དགོས།

⁹མི་གཞན་ལ་ཡང་དག་པའི་བསླབ་བྱ་སྟོན་པ་དང༌། བདེན་པའི་གནས་ལུགས་བརྟན་པོར་འཛིན་དགོས། དེ་ལྟར་བྱུང་ཚེ་གཞན་གྱིས་རྒོལ་བ་འཇོམས་པར་བྱེད་ནུས་པ་དང་བདེན་པའི་ཆོས་ཀྱིས་གཞན་ལ་སྐུལ་མ་གཏོང་ཐུབ།

¹⁰གང་ལགས་ཟེར་ན། ངོ་རྒོལ་བྱེད་མཁན་མང་པོ་ཡོད། དེ་ཚོ་སྙིང་པོ་མེད་པའི་གཏམ་ཤོད་མཁན་དང་མགོ་སྐོར་གཏོང་མཁན་ཡིན་ཏེ་མང་ཆེ་ཤོས་ཡ་ཧུ་དཱ་པའི་ཆོས་ཀྱི་རྟགས་བརྒྱབ་དགོས་ཟེར་བའི་ཕྱོགས་ཁག་ནས་ཡིན།

¹¹མི་འདི་རྣམས་ཀྱི་ཁ་བཀག་དགོས། གང་ཡིན་ཟེར་ན། དེ་ཚོས་དངུལ་འཐོབ་པའི་ཆེད་དུ་ཕན་མེད་ཀྱི་བསླབ་བྱ་སྟོན་པའི་སྒོ་ནས་མི་ཚང་མང་པོ་དད་ལོག་ཏུ་འགྱུར་བར་བྱེད།

¹²ཀེ་རེ་ཊེ་པའི་སྙན་ངག་པ་ཞིག་གིས། ཀེ་རེ་ཊེ་པ་རྣམས་ཀྱིས་ནི། ། རྟག་ཏུ་རྫུན་གཏམ་ཁོ་ན་སྨྲ། ། གཅན་གཟན་ངན་པ་དང་འདྲ་བའི། ། གྲོད་ཆེན་ལེ་ལོ་ཅན་ཞིག་ཡིན། ། ཞེས་བཤད།

¹³གོང་དུ་བཤད་པ་དེ་ནི་བདེན་པ་ཡིན། དེ་ཚོའི་དད་པ་སྐྱོན་མེད་པར་འབྱུང་བའི་ཆེད་དང༌། དེ་ཚོས་ཡ་ཧུ་དཱ་པའི་སྙིང་པོ་མེད་པའི་སྒྲུང་ཡང་ན་བདེན་པ་སྤོང་མཁན་གྱི་བསྟན་པ་ལ་དོ་སྣང་མི་བྱེད་པའི་ཆེད་དུ་དེ་ཚོར་ནན་གྱིས་སྐུལ།

¹⁵བཅོས་མིན་གྱི་མི་རྣམས་ལ་དངོས་པོ་ཐམས་ཅད་གཙང་མ་ཡིན། མི་གཙང་མ་དང་དད་མེད་པ་རྣམས་ལ་གང་ཡང་གཙང་མ་མིན། གང་ལགས་ཟེར་ན། དེ་ཚོའི་བློ་དང་སེམས་ངན་རུལ་དུ་གྱུར་བས་སོ།

¹⁶དེ་ཚོས་དཀོན་མཆོག་ངོ་ཤེས་ཞེས་ཟེར་ཡང་ལས་ངན་བྱེད་པའི་སྒོ་ནས་ཁོང་ངོ་མི་ཤེས་པ་མཚོན་པས། དེ་ཚོ་ནི་སྐྱུག་བྲོ་བ་དང༌། ཁ་ལ་མི་ཉན་པ། ལས་བཟང་པོ་གང་ཡང་བྱེད་མི་ཐུབ་པ་ཡིན་ནོ། །