Read Central Tibetan Bible ཡ་ཧུ་དཱ་པ། 11 Bible Online

ཡ་ཧུ་དཱ་པ། 11 - Central Tibetan Bible bible

ཡ་ཧུ་དཱ་པ། 11

¹དད་པ་ནི་རེ་བ་གནས་ས་ལ་བློ་གདེང་དང༌། མིག་གིས་མི་མཐོང་བ་དེ་རྣམས་ལ་ཡིད་ཆེས་ངེས་པ་རྙེད་པ་དེའོ།

²དད་པའི་སྒོ་ནས་གནའ་བོའི་དུས་ཀྱི་མི་རྣམས་ལ་དཀོན་མཆོག་གི་གདེང་འཇོག་ཐོབ།

³དད་པའི་སྒོ་ནས་དཀོན་མཆོག་གི་བཀའ་ཡིས་འཇིག་རྟེན་ཁམས་བཀོད་པ་དང༌། མིག་གིས་མཐོང་བ་ནི་མི་སྣང་བ་ལས་མཛད་པ་ཡིན་པ་ང་ཚོས་རྟོགས།

⁴དད་པའི་སྒོ་ནས་མེས་པོ་ཧ་བེལ་གྱིས་ཁོའི་སྤུན་ཀ་ཡིན་ལས་ལེགས་པའི་མཆོད་པ་ཞིག་དཀོན་མཆོག་ལ་ཕུལ་བས། དྲང་ལྡན་པ་ཞིག་ཡིན་པར་མཚོན་ཞིང༌། ཁོང་གི་མཆོད་པ་ལ་དཀོན་མཆོག་གི་གདེང་འཇོག་ཐོབ། ཧ་བེལ་ཤི་ཡང་དད་པའི་དཔེའི་སྒོ་ནས་ད་དུང་ང་ཚོར་གཏམ་བྱེད།

⁵དད་པའི་སྒོ་ནས་ཧེ་ནོག་ཡར་དྲངས་ནས་འཆི་བ་མ་མྱོང༌། དཀོན་མཆོག་གིས་ཁོང་ཡར་ཁྲིད་གནང་བས་མི་རྙེད་པར་གྱུར། ཁོང་ཡར་འདྲངས་པའི་སྔོན་ལ་དཀོན་མཆོག་གི་ཐུགས་མཉེས་པའི་མི་ཡིན་པར་གདེང་འཇོག་ཐོབ།[35]

⁶དད་པ་མེད་པར་དཀོན་མཆོག་ཐུགས་མཉེས་མི་སྲིད། གང་ཡིན་ཟེར་ན། དཀོན་མཆོག་གི་དྲུང་དུ་ཡོང་བ་དེས་དཀོན་མཆོག་ཡོད་པ་དང༌། ཁོང་འཚོལ་མཁན་རྣམས་ལ་བྱ་དགའ་གནང་མཁན་ཡིན་པར་དད་པ་བྱེད་དགོས་པས་སོ།

⁷མེས་པོ་ནོ་ཨ་ཡིས་དད་པའི་སྒོ་ནས་དཀོན་མཆོག་གིས་ཁོང་ལ་ད་དུང་མ་མཐོང་བ་རྣམས་ཀྱི་སྐོར་ལ་ཐ་ཚིག་སྒྲོག་པར་མཛད་པའི་སྐབས་སུ། རང་གི་ནང་མི་སྐྱོབ་པའི་ཕྱིར་བསྙེན་བཀུར་བྱས་ཏེ་གྲུ་གཟིངས་ཤིག་བཟོས། དེའི་སྒོ་ནས་ཁོང་གིས་འཇིག་རྟེན་གྱི་སྐྱོན་གསལ་པོར་བསྟན་ཞིང༌། དད་པ་ལས་འབྱུང་བའི་རྣམ་པར་དག་པ་ཡི་ཞལ་ཆད་ཐོབ།

⁸དད་པའི་སྒོ་ནས་མེས་པོ་ཨབ་ར་ཧམ་ནི་དཀོན་མཆོག་གི་ཞལ་ཆད་ལྟར་འཐོབ་རྒྱུ་ཡིན་པའི་ཡུལ་ཞིག་ལ་འགྲོ་བར་བོས་པའི་ཚེ། གང་དུ་འགྲོ་བ་མི་ཤེས་ཀྱང་བཀའ་དེ་ལ་ཉན།

⁹དད་པའི་སྒོ་ནས་གནས་གཡར་བ་ལྟར་ཞལ་ཆད་མཛད་པའི་ཡུལ་དེ་ལ་བསྡད་དེ། ཁོང་དང་ཞལ་ཆད་འཛིན་མཁན་ཡིན་པའི་ཨི་སཱག་དང་ཡ་ཀོབ་ལྟར་གུར་རྣམས་ལ་བསྡད།

¹⁰རྒྱུ་མཚན་ནི་ཁོང་གིས་དཀོན་མཆོག་གིས་འཆར་འགོད་དང་སྐྲུན་གནང་བའི་གཏན་གྱི་རྨང་གཞི་ཡོད་པའི་གྲོང་ཁྱེར་མཆོག་དེ་ཡིད་རྟོན་ནས་བསྒུགས།

¹¹དད་པའི་སྒོ་ནས་ས་རཱ་ཡིས་ཀྱང་ཞལ་ཆད་མཛད་མཁན་དེ་ཐུགས་གཏད་ཆོག་པར་བརྩིས་པས། རྒས་མོར་གྱུར་ཡང་ཕྲུ་གུ་སྐྱེ་ཐུབ་པའི་ནུས་པ་ཐོབ།[36]

¹²དེ་བས་ན་སྐུ་ཕུང་དང་འདྲ་བའི་མི་ཞིག་ལས་བུ་རྒྱུད་ནམ་མཁའི་སྐར་མ་མང་པོ་དང༌། མཚོ་འགྲམ་གྱི་བྱེ་མ་བཞིན་གྲངས་མེད་བྱུང༌།

¹³དེ་ཚོ་ཐམས་ཅད་ཀྱིས་མ་འཆི་བར་དུ་དད་པ་ལ་བརྟེན་ཏེ། གང་ཞལ་གྱིས་བཞེས་པ་མ་ཐོབ་ཀྱང༌། ཐག་རིང་ནས་མཐོང་ཞིང་དགའ་བསུ་བྱས། འཇིག་རྟེན་འདིར་རང་ཉིད་གནས་གཡར་བ་དང༌། མགྲོན་པོར་ངོས་འཛིན་བྱས།

¹⁴དེ་ལྟར་སྨྲ་བའི་མི་རྣམས་ཀྱིས་འདི་ངའི་ཕ་ཡུལ་ཡིན་ཟེར་ཐུབ་པའི་ལུང་པ་ཞིག་སྒུག་མཁན་ཡིན་པར་གསལ་སྟོན་བྱེད།

¹⁵ཡུལ་གང་ནས་ཐོན་པ་དེ་དྲན་པ་ཡིན་ན་དེར་ལོག་པའི་གོ་སྐབས་བྱུང་ཡོད།

¹⁶འོན་ཀྱང་ཁོ་ཚོས་དེ་ལས་ལེགས་པའི་ཡུལ་ཏེ་དཀོན་མཆོག་གི་ཞིང་ཁམས་སུ་ཡོད་པ་དེ་རེ་སྒུག་བྱེད་མཁན་ཡིན། དེའི་ཕྱིར་དཀོན་མཆོག་གིས་ཁོ་ཚོའི་དོན་ལ་གྲོང་ཁྱེར་མཆོག་ཅིག་བཤམས་པར་མཛད་ཅིང༌། ཁོང་ཁོ་ཚོའི་དཀོན་མཆོག་ཅེས་ཟེར་བར་ཐུགས་ཚ་མི་གནང༌།

¹⁷དཀོན་མཆོག་གིས་མེས་པོ་ཨབ་ར་ཧམ་ལ་ཨི་སཱག་བརྒྱུད་ནས་ཁྱོད་ཀྱི་བུ་རྒྱུད་རྩི་བར་འགྱུར་ཞེས་གསུངས་ཀྱང༌། ཉམས་ཚོད་བླངས་པའི་ཚེ་དད་པའི་སྒོ་ནས་ཞལ་ཆད་འཛིན་མཁན་ཨབ་ར་ཧམ་གྱིས་རང་གི་བུ་གཅིག་པོ་ཨི་སཱག་མཆོད་པར་འབུལ་གྲབས་བྱས།[37]

¹⁹ཨབ་ར་ཧམ་གྱིས་དཀོན་མཆོག་གིས་མི་རྣམས་འཆི་བ་ལས་སླར་གསོན་དུ་མཛད་ཐུབ་པར་སྙམ་ཞིང༌། ཁོང་ལ་བུ་ཨི་སཱག་འཆི་བ་ལས་ལོག་པ་བཞིན་ཐོབ།

²⁰དད་པའི་སྒོ་ནས་མེས་པོ་ཨི་སཱག་གིས་མ་འོངས་པའི་དོན་ལ་བལྟས་ཏེ་ཁོང་གི་བུ་ཡ་ཀོབ་དང་ཨེ་སའུ་གཉིས་ལ་བྱིན་རླབས་གནང༌།

²¹དད་པའི་སྒོ་ནས་མེས་པོ་ཡ་ཀོབ་གྲོངས་པའི་སྐབས་སུ་ཡོ་སེབ་ཀྱི་བུ་རེ་རེ་ལ་བྱིན་རླབས་གནང་སྟེ། འཁར་བ་ལ་བསྙེས་ཏེ་དཀོན་མཆོག་ལ་བསྙེན་བཀུར་བྱས།[38]

²²དད་པའི་སྒོ་ནས་མེས་པོ་ཡོ་སེབ་འཆི་བ་ལ་ཐུག་པའི་ཚེ་ཡི་སི་ར་ཨེལ་གྱི་བུ་རྒྱུད་ཨེ་ཇེབ་ཡུལ་ནས་འཐོན་པའི་སྐོར་སྨྲ་ཞིང༌། རང་གི་རུས་པ་དུར་དུ་འཇུག་པའི་སྐོར་ལ་བཀའ་གནང༌།

²³དད་པའི་སྒོ་ནས་ལུང་སྟོན་པ་མོ་ཤེའི་ཕ་མ་ཡིས་ཁོང་འཁྲུངས་ནས་ཕྲུ་གུ་མཛེས་པ་ཞིག་ཡོད་པར་མཐོང་སྟེ། རྒྱལ་པོའི་བཀའ་ལ་མི་འཇིགས་པར། ཟླ་བ་གསུམ་རིང་ཁོང་སྦས་ནས་བཞག

²⁴དད་པའི་སྒོ་ནས་ལུང་སྟོན་པ་མོ་ཤེ་ན་སོ་ལོན་ནས་ཨེ་ཇེབ་ཀྱི་རྒྱལ་པོ་ཕར་ཨོ་ཡི་སྲས་མོའི་བུ་ཟེར་བའི་མིང་དང་ལེན་མ་བྱས་ཏེ།

²⁵སྡིག་ཉེས་ཀྱི་ལོངས་སྤྱོད་མི་རྟག་པ་ལས། ཁོང་གིས་དཀོན་མཆོག་གི་མི་རྣམས་དང་མཉམ་དུ་མནར་གཅོད་མྱོང་བར་བདམས།

²⁶མ་འོངས་པའི་བྱ་དགའ་ལ་བལྟས་ཏེ། ཨེ་ཇེབ་ཀྱི་གཏེར་ལས་མཱ་ཤི་ཀའི་དོན་ལ་སྡུག་བསྔལ་མྱོང་བའི་ནོར་ཆེ་བར་བརྩིས།

²⁷དད་པའི་སྒོ་ནས་རྒྱལ་པོའི་ཁྲོ་བ་ལ་མ་འཇིགས་པར་མོ་ཤེ་ཨེ་ཇེབ་ནས་ཐོན། མིག་གིས་མཐོང་མི་སྲིད་པའི་དཀོན་མཆོག་ལ་ནན་གྱིས་བལྟས་ནས་ཁོང་གིས་བཟོད་པ་བསྒོམས།

²⁸དད་པའི་སྒོ་ནས་ཁོང་གིས་པེ་སག་ཟེར་བའི་དུས་ཆེན་བསྲུངས་ཤིང༌། སྔོན་སྐྱེས་ཀྱི་བུ་རྣམས་མེད་པ་བཟོ་བའི་ཕོ་ཉ་ཡིས་ཡི་སི་ར་ཨེལ་གྱི་སྔོན་སྐྱེས་པའི་བུ་རྣམས་ལ་གནོད་པ་མི་བྱེད་པའི་ཕྱིར་ཁྲག་གཏོར།

²⁹དད་པའི་སྒོ་ནས་ཡི་སི་ར་ཨེལ་པ་རྣམས་སྐམ་ས་འགྲོ་བ་ལྟར་རྒྱ་མཚོ་དམར་པོ་བརྒྱུད་ནས་ཕྱིན། འོན་ཀྱང་ཨེ་ཇེབ་པ་རྣམས་དེ་ལྟར་བྱེད་པར་ཕྱིན་པས་ཆུ་ལ་ནུབ་སྟེ་ཤིའོ།

³⁰དད་པའི་སྒོ་ནས་ཡི་སི་ར་ཨེལ་པ་རྣམས་ཡེ་རུ་ཀོ་གྲོང་ཁྱེར་གྱི་ལྕགས་རི་ཉི་མ་བདུན་གྱི་བར་དུ་བསྐོར་ནས་ལྕགས་རི་དེ་རྡིབ།

³¹དད་པའི་སྒོ་ནས་སྨད་འཚོང་མ་ར་ཧབ་ཀྱིས་སོ་པ་རྣམས་ལ་ཞི་བདེའི་ངང་ནས་སྣེ་ལེན་བྱས་པས། བཀའ་ལ་མ་ཉན་པ་རྣམས་དང་མཉམ་དུ་མ་ཤིའོ། །

³²ད་ཅི་སྨྲ། གི་དེ་ཡོན་དང༌། པཱ་རག སམ་སོན། ཡེབ་ཐཱ། དཱ་བིད། ཤ་མུ་ཨེལ་དང༌། ལུང་སྟོན་པ་རྣམས་ཀྱི་སྐོར་སྨྲ་ལོང་མེད།

³³དད་པའི་སྒོ་ནས་ཁོ་ཚོས་རྒྱལ་ཁམས་བཅོམ། ཁྲིམས་གཅོད་བདེན་པར་བྱས། གང་ཞལ་གྱིས་བཞེས་པ་ཐོབ། སེང་གེའི་ཁ་བཀག

³⁴མེ་དྲག་བསད། རལ་གྲིའི་ཁ་ལས་ཐར། སྟོབས་ཞན་པ་ལས་སྟོབས་ཅན་དུ་བསྒྱུར་ཞིང༌། དམག་གི་དཔའ་བོར་གྱུར་ནས་ཕྱི་རྒྱལ་གྱི་དམག་དཔུང་འབྲོས་སུ་བཅུག

³⁵བུད་མེད་རྣམས་ལ་རང་གི་ནང་མི་རྣམས་འཆི་བ་ནས་གསོན་པོར་གྱུར་ནས་ཐོབ། གཞན་རྣམས་མནར་གཅོད་མྱོང༌། འཆི་བ་ནས་སླར་གསོན་ཏེ་ཚེ་འདི་ལས་ལེགས་པ་འཐོབ་པའི་ཕྱིར་སྡུག་བསྔལ་དེ་ལས་སྒྲོལ་བའི་ཆེད་དུ་དཀོན་མཆོག་སྤོང་བར་ཁས་ལེན་མ་བྱས།

³⁶གཞན་རྣམས་ཀྱིས་འཕྱ་དམོད་དང༌། རྟ་ལྕག་གིས་བརྡུངས་པར་གྱུར་བ་མ་ཟད། ལྕགས་ཐག་གིས་བཅིངས་ནས་བཙོན་དུ་འཇུག་པའང་མྱོང༌།

³⁷ཁོ་ཚོ་རྡོ་རུབ་བཏང་ནས་བསད། སོག་ལེ་ཡིས་བསད། རལ་གྲི་ཡིས་བསད། ཁོ་ཚོས་ར་དང་ལུག་གི་ལྤགས་པ་གྱོན་ཏེ་འཁྱམས། དབུལ་ཞིང༌། མནར་གཅོད། སྡུག་བསྔལ་དྲག་པོ་མྱོང༌།

³⁸འཇིག་རྟེན་འདི་ལ་ཁོ་ཚོ་གནས་པ་འོས་པ་མིན་པས། ཁོ་ཚོ་འབྲོག་སྟོང་དང༌། རི་དང༌། བྲག་ཕུག ས་དོང་རྣམས་ལ་བསྡད་དུ་བཅུག

³⁹ཁོ་ཚོ་ཐམས་ཅད་དད་པའི་སྒོ་ནས་དཀོན་མཆོག་གི་གདེང་འཇོག་ཐོབ་ཀྱང༌། གང་ཞལ་གྱིས་བཞེས་པ་དེ་མ་ཐོབ།

⁴⁰གང་ཡིན་ཟེར་ན། དཀོན་མཆོག་གིས་ང་ཚོའི་དོན་ལ་དེ་ལས་ལེགས་པ་ཞིག་གནང་བས། ང་ཚོ་དང་བྲལ་བར་ཁོ་རྣམས་ཡོངས་སུ་རྫོགས་པར་མི་མཛད་པའི་ཕྱིར་རོ། །