Read Central Tibetan Bible ཡ་ཧུ་དཱ་པ། 2 Bible Online

ཡ་ཧུ་དཱ་པ། 2 - Central Tibetan Bible bible

ཡ་ཧུ་དཱ་པ། 2

¹དེའི་ཕྱིར་ང་ཚོས་གང་ཐོས་པ་དེ་ལ་སྔོན་ལས་ལྷག་པར་དོ་སྣང་བྱེད་དགོས། དེ་མིན་ང་ཚོར་བདེན་པའི་ལམ་ལས་ཤོར་བའི་ཉེན་ཁ་ཡོད།

²དཀོན་མཆོག་གི་ཕོ་ཉ་རྣམས་བརྒྱུད་ནས་བསྒྲགས་པའི་འཕྲིན་ནི་བདེན་པར་སྟོན་པ་ཡིན་ཞིང༌། ཆོས་ཁྲིམས་དང་འགལ་བ་དང་བཀའ་ལ་མ་ཉན་པ་རེ་རེར་ཚང་མར་འོས་པའི་ཉེས་ཆད་ཐོབ་པ་ཡིན་ན།

³དེ་ལྟ་བུ་ཐར་པ་ཆེན་པོ་ལ་དོ་སྣང་མ་བྱས་ན་ང་ཚོ་ཇི་ལྟར་ཐར་བར་འགྱུར། ཐར་པ་དེ་ནི་གཙོ་བོ་ཡེ་ཤུ་བརྒྱུད་ནས་དང་པོར་བསྒྲགས་ཤིང༌། ཐོས་པ་རྣམས་ཀྱིས་ངེད་རྣམས་ལ་ར་སྤྲོད་བྱས།

⁴ངོ་མཚར་ཆེ་བའི་རྟགས་དང་དོན། ངོ་མཚར་བའི་ལས་སྣ་ཚོགས་དང༌། དམ་པའི་ཐུགས་ཉིད་ཀྱི་གནང་སྦྱིན་རང་གི་ཐུགས་དགོངས་ལྟར་གནང་བའི་སྒོ་ནས་དཀོན་མཆོག་གིས་ཀྱང་བདེན་དཔང་མཛད།

⁵ང་ཚོས་སྨྲ་བའི་མ་འོངས་པའི་རྒྱལ་སྲིད་དེ་ནི་དཀོན་མཆོག་གིས་ཕོ་ཉ་རྣམས་ཀྱིས་དབང་བསྒྱུར་དུ་བཅུག་པ་མ་མཛད།

⁶འོན་ཀྱང་མི་ཞིག་གིས་མདོ་ཞིག་གི་ནང་ལ་དཔང་པོ་བྱེད་པའི་གཏམ་སྟེ། མི་ནི་ཅི་ཡིན་ཁྱེད་ཀྱིས་ཐུགས་འཁུར་མཛད། ། མི་བུ་ཅི་ཡིན་ཁྱེད་ཀྱིས་ལྟ་སྐྱོང་མཛད། །

⁷གནས་སྐབས་ཁོ་ནི་ཕོ་ཉ་ལས་དམའ་མཛད། ། དཔལ་དང་བཀུར་འོས་ཅོད་པན་རྒྱན་དུ་མཛད། །

⁸ཡོད་ཚད་ཁོ་ཡི་རྐང་པའི་འོག་ཏུ་བཅུག །[7] དཀོན་མཆོག་གིས་དོན་ཐམས་ཅད་ཁོའི་རྐང་པ་འོག་ཏུ་བཅུག་པར་མཛད་ནས་ཁོའི་འོག་ཏུ་མ་བཅུག་པ་གང་ཡང་ལུས་པར་མ་མཛད། འོན་ཀྱང་ཐམས་ཅད་ཁོའི་དབང་འོག་ཏུ་བཅུག་ཡོད་པ་ང་ཚོས་ད་ལྟ་མི་མཐོང་ཡང༌།

⁹ཡེ་ཤུ་མཐོང༌། མཐོང་བ་ནི་ཕོ་ཉ་རྣམས་ལས་རེ་ཞིག་དམའ་བར་མཛད་པའི་ཡེ་ཤུ་ཡིན། ཁོང་ནི་ང་ཚོའི་དོན་ལ་འཆི་བའི་སྡུག་བསྔལ་མྱོང་བས་ད་ལྟ་ཁོང་བཀུར་སྟི་འོས་པ་དང་གཟི་བརྗིད་དང་ལྡན་པ་ཡིན། དེ་ནི་དཀོན་མཆོག་གི་ཐུགས་རྗེའི་སྒོ་ནས་མི་ཐམས་ཅད་ཀྱི་དོན་ལ་ཁོང་གིས་འཆི་བའི་སྡུག་བསྔལ་མྱོང་བའི་ཕྱིར་རོ།

¹⁰ཡོད་དོ་ཅོག་བཀོད་པ་གནང་ཞིང༌། ཡོད་དོ་ཅོག་སུ་གཏོགས་པའི་དཀོན་མཆོག་གིས་སྲས་མང་པོ་གཟི་བརྗིད་དང་ལྡན་པར་མཛད་པའི་ཕྱིར། ཁོ་ཚོ་ཐར་བར་འཁྲིད་མཁན་གྱི་དེད་དཔོན་སྡུག་བསྔལ་མྱོང་བའི་སྒོ་ནས་ཡོངས་སུ་རྫོགས་པ་དེ་འོས་སོ།

¹¹མི་རྣམས་དམ་པ་རུ་མཛད་མཁན་ཡེ་ཤུ་དང་དམ་པ་རུ་འགྱུར་བ་ཐམས་ཅད་ལ་ཡབ་གཅིག་ཡོད་པས་ཡེ་ཤུས་ཁོ་ཚོར་སྤུན་ཟླ་ཞེས་གསུང་བ་ལ་ཐུགས་ཚ་མི་གནང༌།

¹²ཁོང་གིས་དཀོན་མཆོག་ལ། ང་ཡིས་ཁྱེད་ཀྱི་མཚན་སྙན་སྤུན་ཟླར་བསྒྲག ། ཆོས་ཚོགས་ཁྲོད་དུ་ཁྱེད་ལ་བསྔགས་པ་བརྗོད། །[8] ཅེས་གསུངས།

¹³ཡང་ཁོང་གིས། ང་ཡིས་ཁོང་ལ་དད་པས་བརྟེན་པར་བྱ། ། ཅེས་དང༌། ཡང༌། གཟིགས་དང༌། འདི་ལ་ཡོད་པའི་ང་དང་དཀོན་མཆོག་གིས། ། ང་ལ་གནང་བའི་བུ་ཕྲུག་མཉམ་དུ་ཡོད། །[9] ཅེས་གསུངས།

¹⁴དཀོན་མཆོག་གི་སྲས་དང་སྲས་མོ་རྣམས་ལ་ཤ་ཁྲག་ལས་གྲུབ་པའི་མིའི་ལུས་པོ་དང་ལྡན་པ་ཡིན་པས་ཡེ་ཤུའང་མིའི་ལུས་པོ་དང་ལྡན་པར་འཁྲུངས། དེ་ནི་ཁོང་འགྲོངས་པའི་སྒོ་ནས་ཁོང་གིས་འཆི་བའི་བདག་པོ་སྟེ་བདུད་རྒྱལ་པོ་མེད་པར་མཛད་ཅིང༌།

¹⁵འཆི་བའི་འཇིགས་པས་ཚེ་གང་བཅིངས་པའི་མི་རྣམས་ཡོད་པ་ཐམས་ཅད་སྐྱོབ་པའི་ཆེད་དུ་ཡིན།

¹⁶ཁོང་གིས་དཀོན་མཆོག་གི་ཕོ་ཉ་རྣམས་ལ་རོགས་པ་མི་མཛད་དེ། ཨབ་ར་ཧམ་གྱི་རྒྱུད་པ་རྣམས་ལ་རོགས་པ་མཛད་པ་དེ་གསལ་ལོ།

¹⁷དེའི་ཕྱིར་དཀོན་མཆོག་གི་ཐུགས་ཁྲོ་དག་པར་མཛད་དེ་མི་རྣམས་ཀྱི་སྡིག་ཉེས་སེལ་བ་དང༌། ཁོང་གི་སྤྱན་སྔར་བླ་ཆེན་ཐུགས་རྗེ་ཅན་དང་བློ་གཏད་ཆོག་པར་འགྱུར་བའི་ཆེད་དུ། ཡེ་ཤུ་ནི་རྣམ་པ་ཀུན་ནས་ཁོང་གི་སྤུན་ཟླ་དང་འདྲ་བ་འགྱུར་དགོས།

¹⁸ཁོང་ལ་བསླུ་བྲིད་བྱུང་དུས་སྡུག་བསྔལ་བྱུང་བས། ཁོང་གིས་བསླུ་བྲིད་འབྱུང་བ་རྣམས་ལ་རོགས་པ་མཛད་ཐུབ་བོ། །