Read Central Tibetan Bible ཡ་ཀོབ། 1 Bible Online

ཡ་ཀོབ། 1 - Central Tibetan Bible bible

ཡ་ཀོབ། 1

¹དཀོན་མཆོག་དང་གཙོ་བོ་ཡེ་ཤུ་མཱ་ཤི་ཀའི་ཞབས་ཕྱི་ཡ་ཀོབ་ཀྱིས་འཇིག་རྟེན་དུ་འཐོར་བར་གྱུར་བའི་ཡ་ཧུ་དཱ་པའི་ཚོ་ཁག་བཅུ་གཉིས་པོར་འཚམས་འདྲི་ཞུ།

²ངའི་སྤུན་ཟླ་རྣམས། ཉམས་ཚོད་སྣ་ཚོགས་མྱོང་སྐབས་དགའ་སྤྲོ་ཁོ་ནར་རྩིས་ཤིག[1]

³གང་ལགས་ཟེར་ན། དད་པ་ལ་ཚོད་ལྟ་མྱོང་བའི་སྒོ་ནས་བཟོད་པའི་སེམས་སྐྱེ་བ་ཁྱེད་ཀྱིས་ཤེས།

⁴ཡང་ཁྱེད་ཚོ་མ་ཚང་བ་མེད་པར་སྨིན་ཞིང་ཡོངས་སུ་རྫོགས་པར་འགྱུར་བའི་ཆེད་དུ་བཟོད་པའི་སེམས་དེས་བྱ་བ་ཚར་བར་བྱེད་དུ་ཆུག

⁵ཁྱེད་ཚོའི་ནང་ནས་སུ་ཞིག་ལ་ཤེས་རབ་མ་ཚང་ན། སྐྱོན་འདོགས་ཅི་ཡང་མི་མཛད་པར་ཐམས་ཅད་ལ་ལྷག་པར་གནང་མཁན་དཀོན་མཆོག་ལ་གསོལ་བ་འདེབས་ཤིང༌། གནང་བར་འགྱུར།

⁶འོན་ཀྱང་མི་དེས་ཐེ་ཚོམ་ཅི་ཡང་མེད་པར་དད་པའི་ངང་ནས་གསོལ་བ་འདེབས་དགོས། གང་ལགས་ཟེར་ན། ཐེ་ཚོམ་ལྡན་པ་ནི་རྒྱ་མཚོའི་རྦ་རླབས་རླུང་གིས་འདེད་ཅིང་འཕྱུར་བ་དང་འདྲ་བ་ཡིན།

⁷ཡང་བློ་རྩེ་གཉིས་ཅན་ཏེ་སྤྱོད་ལམ་ཀུན་ལ་མི་བརྟན་པས་གཙོ་བོ་དཀོན་མཆོག་ནས་ཅི་ཞིག་འཐོབ་རྒྱུ་ཡིན་པ་མ་སོམས་ཤིག

⁹དཀོན་མཆོག་གིས་སྤུན་ཟླ་དམའ་བ་ལ་མཐོ་བར་མཛད་པས་ཁོས་དགའ་བར་བྱེད་དགོས།

¹⁰ཡང་དཀོན་མཆོག་གིས་ཕྱུག་པོ་ལ་དམའ་བར་མཛད་པས་ཁོས་དགའ་བར་བྱེད་འོས། གང་ཡིན་ཞེ་ན། རྩྭ་ཐང་གི་མེ་ཏོག་ལྟར་ཁོ་འདའ་བར་འགྱུར་ཏེ།

¹¹ཉི་མ་ཤར་ནས་དེའི་ཚ་རླུང་དྲག་པོས་མེ་ཏོག་སྐམ་ཞིང༌། འདབ་མ་སར་ལྷུངས་ནས་དེའི་མཛེས་སྡུག་འཇིག་པར་འགྱུར། དེ་ལྟར་ཕྱུག་པོའང་ལས་ཀ་བྱེད་པའི་ལམ་དུ་འཇིག་པར་འགྱུར།

¹²ཉམས་ཚོད་མྱོང་དུས་བཟོད་བསྲན་བྱེད་མཁན་མི་དེ་བདེའོ། ཁོ་ལ་གདེང་འཇོག་ཐོབ་ནས་གཙོ་བོས་ཁོང་ལ་བརྩེ་བར་འཛིན་མཁན་རྣམས་ལ་དཔག་མེད་ཚེ་ཡི་ཅོད་པན་ཞལ་གྱིས་བཞེས་པ་དེ་འཐོབ་ངེས་ཡིན།

¹³བསླུ་བྲིད་མྱོང་སྐབས་མི་སུ་ཞིག་གིས་“དཀོན་མཆོག་གིས་ང་ལ་བསླུ་བྲིད་མཛད་”ཅེས་ཟེར་མི་རུང༌། གང་ཡིན་ཞེ་ན། ངན་པས་དཀོན་མཆོག་ལ་བསླུ་བྲིད་བྱེད་མི་སྲིད་ཅིང༌། ཁོང་ཉིད་ཀྱིས་སུ་ལ་ཡང་བསླུ་བྲིད་མཛད་མི་སྲིད།

¹⁴འོན་ཀྱང་མི་རྣམས་རང་རང་གི་འདོད་ཆགས་ཀྱིས་སླུ་ཞིང་འདྲེན་ཏེ་བསླུ་བྲིད་མྱོང༌།

¹⁵དེ་ནས་འདོད་ཆགས་ཀྱི་འབྲས་བུ་སྨིན་ཏེ་སྡིག་ཉེས་སྐྱེ་ཞིང༌། སྡིག་ཉེས་ཀྱི་འབྲས་བུ་སྨིན་ཏེ་འཆི་བ་སྐྱེ།

¹⁶ངའི་གཅེས་པའི་སྤུན་ཟླ་རྣམས། མགོ་མ་འཁོར་ཞིག

¹⁷གནང་སྦྱིན་བཟང་པོ་དང་ཡང་དག་པ་ཀུན་སྟེང་ནས་ཉི་ཟླ་སྐར་གསུམ་གྱི་འགོད་པ་གནང་མཁན་ཡབ་དཀོན་མཆོག་ལས་འབབ། ཁོང་ལ་འགྱུར་བའམ་གཡོ་བའི་གྲིབ་མས་མ་གོས་ཤིང་འགྱུར་མེད་ལགས་སོ།

¹⁸ཁོང་གིས་གང་བཀོད་པའི་ནང་ནས་ང་ཚོ་ནི་ལོ་ཏོག་གི་ཕུད་དུ་འགྱུར་བའི་ཆེད་དུ། ཁོང་གི་དགོངས་པ་ལྟར་བདེན་པའི་བཀའ་ཡི་སྒོ་ནས་ང་ཚོ་གསར་དུ་སྐྱེ་བར་མཛད།

¹⁹ངའི་གཅེས་པའི་སྤུན་ཟླ་རྣམས། མི་ཐམས་ཅད་ཉན་པ་ལ་མགྱོགས། ཤོད་པ་ལ་དལ་ཞིང༌། ཁོང་ཁྲོ་ལངས་མི་བདེ་བར་འགྱུར་དགོས་པ་ཤེས་པར་གྱིས་ཤིག

²⁰གང་ལགས་ཟེར་ན། མི་རྣམས་ཀྱི་ཁོང་ཁྲོས་དཀོན་མཆོག་གི་དྲང་བདེན་གྱི་བྱ་བ་སྒྲུབ་མི་སྲིད།

²¹དེའི་ཕྱིར་མི་གཙང་བ་ཀུན་དང་ངན་སེམས་ལྷག་མ་དག་སྤངས་ཏེ། སྙེམས་ཆུང་ངང་ནས་ཁྱེད་ཚོ་ཐར་བར་མཛད་ཐུབ་པའི་བཀའ་ཁྱེད་ཀྱི་སེམས་སུ་བཞག་པ་དེ་དང་ལེན་བྱོས་ཤིག

²²རང་གིས་རང་ལ་མགོ་སྐོར་གཏོང་བའི་བཀའ་ཐོས་མཁན་འབའ་ཞིག་ཏུ་མི་འགྱུར་བར། བཀའ་སྒྲུབ་མཁན་དུ་འགྱུར་ཞིག

²³བཀའ་ཐོས་ནས་མི་སྒྲུབ་མཁན་ནི་མེ་ལོང་ལ་བལྟས་ནས་རང་གི་གདོང་པ་མཐོང་མཁན་ལྟར་ཡིན།

²⁴གང་ལགས་ཤེ་ན། རང་ལ་བལྟས་ཏེ་མེ་ལོང་དང་ཁ་བྲལ་རྗེས་འཕྲལ་དུ་ཅི་ལྟར་ཡོད་པ་བརྗེད།

²⁵འོན་ཀྱང་ཡང་དག་པ་དང་སྡིག་ཉེས་དང་འཆི་བ་ལས་ཐར་བའི་བཀའ་ཁྲིམས་ལ་ནན་གྱིས་བལྟས་ནས། བརྩོན་འགྲུས་བྱེད་མཁན་ནི་བཀའ་ཐོས་ནས་བརྗེད་པ་མིན་ཏེ་བཀའ་སྒྲུབ་ནས་ལག་ལེན་བྱེད་པ་ཡིན་པས་ཁོའི་བྱ་བ་ལ་བྱིན་གྱིས་བརླབས་པར་འགྱུར་རོ། །

²⁶གལ་ཏེ་མི་ཞིག་གིས་ང་ཆོས་སེམས་དང་ལྡན་པའི་མི་ཞིག་ཡིན་སྙམ་ནས་རང་གི་ལྕེ་ལ་ཁ་ལོ་མ་སྒྱུར་བར་རང་གིས་རང་ལ་མགོ་སྐོར་བཏང་ན། མི་དེའི་ཆོས་ཕན་མེད་ཡིན།

²⁷ཡབ་དཀོན་མཆོག་གི་སྤྱན་སྔར་བཅོས་མིན་དང་སྐྱོན་མེད་པའི་ཆོས་ནི་སྡུག་བསྔལ་མྱོང་བའི་དྭ་ཕྲུག་དང་ཡུགས་མོ་རྣམས་ལ་བྱམས་སྐྱོང་བྱེད་ལ། རང་ཉིད་ལ་ཡང་འཇིག་རྟེན་གྱི་མི་གཙང་བ་མ་འགོ་བར་སྲུང་བ་དེ་ཡིན་ནོ། །