Read Central Tibetan Bible ཡ་ཀོབ། 2 Bible Online

ཡ་ཀོབ། 2 - Central Tibetan Bible bible

ཡ་ཀོབ། 2

¹ངའི་སྤུན་ཟླ་རྣམས། ཁྱེད་ཚོ་ནི་ང་ཚོའི་གཟི་བརྗིད་དང་ལྡན་པ་གཙོ་བོ་ཡེ་ཤུ་མཱ་ཤི་ཀ་ལ་དད་མཁན་ཡིན་པས་ཕྱོགས་རིས་མ་བྱོས་ཤིག

²དཔེར་ན་མི་གོས་སྤུས་ལེགས་ཤིང་གསེར་གྱི་སོར་གདུབ་གྱོན་པ་ཞིག་དང༌། དབུལ་པོ་གོས་ཧྲུལ་པོ་གྱོན་པ་ཞིག་ཀྱང་ཁྱོད་ཚོའི་ཚོགས་པར་ཡོང་ནས།

³གོས་སྤུས་ལེགས་གྱོན་པ་དེར་བརྩི་བཀུར་བྱས་ནས་ཁྱོད་ཀྱིས་“གལ་ཆེ་སར་བཞུགས་གདན་འཇགས་”ཞེས་ཟེར་ཞིང༌། དབུལ་པོ་དེར་“དེར་ལངས་ནས་སྡོད་”ཡང་ན་“ངའི་རྐང་པའི་འཁྲིས་ལ་སྡོད་ཅིག་”ཅེས་ཟེར་ན།

⁴ཁྱོད་ཚོའི་ནང་ནས་དབྱེ་བ་ཕྱེ་པས་ངན་སེམས་ཀྱིས་སྐུལ་བའི་ཁྲིམས་དཔོན་དུ་མ་གྱུར་རམ།

⁵ངའི་གཅེས་པའི་སྤུན་ཟླ་རྣམས། ཉོན་ཞིག འཇིག་རྟེན་འདིའི་ངོས་ནས་དབུལ་པོ་རྣམས་ནི་དད་པའི་ཆ་ནས་ཕྱུག་པོར་འགྱུར་བ་དང༌། ཁོང་ལ་བརྩེ་བ་རྣམས་ལ་ཞལ་ཆད་གནང་བའི་རྒྱལ་སྲིད་འཛིན་མཁན་དུ་འགྱུར་བར་དཀོན་མཆོག་གིས་བདམས་པར་མ་མཛད་དམ།

⁶འོན་ཀྱང་ཁྱོད་རྣམས་ཀྱིས་དབུལ་པོར་རྩིས་མེད་བཏང༌། ཕྱུག་པོ་རྣམས་ནི་ཁྱོད་ལ་བཙན་གནོན་བྱེད་མཁན་དང༌། ཁྱོད་ཁྲིམས་རར་གཏུག་མཁན་མ་ཡིན་ནམ།

⁷ཡང་ཁོ་རྣམས་ནི་ཁྱེད་ཚོ་དང་སྡེབ་པའི་མཚན་མཆོག་ལ་སྐུར་བ་འདེབས་མཁན་མ་ཡིན་ནམ།

⁸གལ་ཏེ་ཁྱེད་རྣམས་ཀྱིས་ཁྱིམ་མཚེས་ལ་རང་དང་འདྲ་བར་བརྩེ་བར་ཟུངས་ཤིག་ཅེས་པའི་གསུང་རབ་ལྟར་གྱི་ཆེས་མཐོའི་ཁྲིམས་བསྒྲུབས་ན་ཁྱེད་ཚོས་ལེགས་པར་བྱེད།

⁹འོན་ཀྱང་ཕྱོགས་རིས་བྱས་ན་ཁྱོད་རྣམས་ཀྱིས་སྡིག་ཉེས་ཀྱི་ལས་བྱས་པ་ཡིན་ལ། བཀའ་ཁྲིམས་ཀྱིས་ཁྱོད་རྣམས་ཁྲིམས་དང་འགལ་མཁན་ཡང་ཡིན་པར་སྟོན།

¹⁰སུས་ཀྱང་ཆོས་ཁྲིམས་ཆ་ཚང་བསྲུངས་ནས་སྣེ་གཅིག་དང་འགལ་ན་ཐམས་ཅད་འགལ་མཁན་ལ་རྩི་བར་གྱུར་རོ།

¹¹གང་ཡིན་ཞེ་ན། ལོག་གཡེམ་མ་བྱེད་ཅེས་གསུང་མཁན་དེས་རང་གིས་མིའི་སྲོག་མ་གཅོད་ཅེས་ཀྱང་གསུངས། འོ་ན་ཁྱོད་ཀྱིས་ལོག་གཡེམ་མི་བྱེད་ཀྱང་མིའི་སྲོག་བཅད་ན། ཁྱོད་ཁྲིམས་དང་འགལ་མཁན་དུ་གྱུར་རོ།

¹²སྡིག་ཉེས་དང་འཆི་བ་ལས་ཐར་བའི་བཀའ་ཁྲིམས་ཀྱིས་ཁྲིམས་གཅོད་མྱོང་རྒྱུ་ཡིན་པ་ལྟར་གཏམ་དང་སྤྱོད་པ་བྱོས་ཤིག

¹³གང་ལགས་ཤེ་ན། གཞན་ལ་སྙིང་རྗེ་མ་བྱེད་མཁན་རྣམས་ལ་དཀོན་མཆོག་གིས་ཐུགས་བརྩེ་མེད་པར་ཁྲིམས་གཅོད་པར་འགྱུར་ཡང༌། སྙིང་རྗེ་ཡིས་ཁྲིམས་གཅོད་ལས་རྒྱལ་ལོ། །

¹⁴ངའི་སྤུན་ཟླ་རྣམས། གལ་སྲིད་མི་ཞིག་གིས་དད་པ་མཚོན་བྱེད་ཀྱི་བྱ་བ་མ་བྱས་པར་དད་པ་ཡོད་ཅེས་སྨྲས་ན་ཅི་ཕན། དད་པ་དེས་ཁོ་ཐར་བར་བྱེད་ཐུབ་བམ།

¹⁵གལ་ཏེ་སྤུན་ཟླ་ཞིག་ལ་གོས་སམ་ཉིན་རེའི་ཁ་ཟས་མི་འདང་བར།

¹⁶གཟུགས་པོར་གང་དགོས་པ་མ་སྦྱིན་པར་ཁྱོད་ཚོའི་ནང་ནས་མི་ཞིག་གིས་“བདེ་བའི་ངང་ནས་སོང༌། དྲོད་དང་འགྲང་བར་འགྱུར་བར་ཤོག་”ཅེས་ཟེར་ན་ཅི་ཕན།

¹⁷དེའི་ཕྱིར་བྱ་བ་མི་སྒྲུབ་པའི་དད་པ་ནི་སྟོང་པའོ། །

¹⁸འོན་ཀྱང་མི་ཞིག་གིས་“ཁྱེད་ལ་དད་པ་ཡོད། ང་ལ་བྱ་བ་བཟང་པོ་ཡོད་”ཅེས་ཟེར་ཡོང༌། ཁྱོད་ཀྱིས་ང་ལ་བྱ་སྤྱོད་དང་བྲལ་ཏེ་རང་གི་དད་པ་བསྟན་ན། ངས་ཁྱོད་ལ་བྱ་སྤྱོད་ཀྱི་སྒོ་ནས་ངའི་དད་པ་སྟོན་པར་བྱ།

¹⁹ཁྱོད་ཀྱིས་དཀོན་མཆོག་གཅིག་རང་ཡིན་པར་དད་པ་བྱེད། དེ་ལེགས་སོ། གདོན་འདྲེས་ཀྱང་དེ་ལྟར་བྱེད་དེ་འཇིགས་ནས་འདར།

²⁰བླུན་པོ་ཁྱོད། བྱ་སྤྱོད་དང་བྲལ་ཏེ་དད་པ་ཕན་མེད་ཡིན་པ་སྟོན་པར་འདོད་དམ།

²¹ང་ཚོའི་མེས་པོ་ཨབ་ར་ཧམ་གྱིས་རང་གི་བུ་ཨི་སཱག་མཆོད་པ་འབུལ་བརྩིས་བྱས་ཏེ་མཆོད་ཁྲིའི་སྟེང་ལ་བཞག་པ་དེ། བྱ་བའི་སྒོ་ནས་ཡང་དག་པར་མ་བརྩིས་སམ།[2]

²²དེའི་སྟེང་ནས་དད་པ་དང་བྱ་བ་བྱེད་པ་གཉིས་མཉམ་དུ་འགྲོགས་ཤིང་བྱ་བ་བྱས་པས་དད་པ་ཚང་བར་གྱུར་བ་དེ་གསལ་ལོ།

²³ཡང་གསུང་རབ་ལས་ཨབ་ར་ཧམ་གྱིས་དཀོན་མཆོག་ལ་དད་པ་བྱས་པས། དཀོན་མཆོག་གིས་ཁོང་རྣམ་པར་དག་པའི་མི་ཞིག་ལ་བརྩིས་གནང་ངོ་ཞེས་པའི་བཀའ་གྲུབ་ཅིང༌། ཁོང་ལ་དཀོན་མཆོག་གི་མཛའ་གྲོགས་ཞེས་བྱ་བ་ཡིན།[3]

²⁴དད་པ་ཁོ་ན་མ་ཡིན་གྱིས། བྱ་བའི་སྒོ་ནས་མི་ཞིག་ཡང་དག་པར་རྩི་བ་དེ་གསལ་ལོ།

²⁵དེ་བཞིན་དུ་ཐ་ན་སྨད་འཚོང་མ་ར་ཧབ་ཀྱིས་སོ་པ་རྣམས་སྣེ་ལེན་བྱས་ནས་ཁོ་ཚོ་ལམ་གཞན་ལ་ཕྱིར་བཏང་བས་བྱ་བའི་སྒོ་ནས་རྣམ་པར་དག་པར་གྱུར་བ་མ་ཡིན་ནམ།[4]

²⁶དེ་བས་ན་ཇི་ལྟར་སེམས་དང་བྲལ་བའི་ལུས་ནི་རོ་ཡིན་པ་བཞིན། དེ་ལྟར་བྱ་བ་དང་བྲལ་བའི་དད་པ་ཡང་སྟོང་པ་ཡིན་ནོ། །