Read Central Tibetan Bible ཡ་ཀོབ། 3 Bible Online

ཡ་ཀོབ། 3 - Central Tibetan Bible bible

ཡ་ཀོབ། 3

¹ངའི་སྤུན་ཟླ་རྣམས། ཁྱེད་ཚོའི་ཁྲོད་དུ་མི་མང་པོ་ཆོས་སློབ་མཁན་དུ་འགྱུར་མི་རུང༌། གང་ཡིན་ཟེར་ན། ང་ཚོ་སློབ་མཁན་ནི་ཁྲིམས་ལྷག་པར་དམ་པོ་གཅོད་པར་འགྱུར་བ་ཁྱེད་ཀྱིས་ཤེས།

²ང་ཚོ་ཚང་མས་དོན་མང་པོར་འཕྱུགས་པས། སུ་ཡང་གཏམ་ལ་མ་འཕྱུགས་པ་དེ་མ་ཚང་བ་མེད་པ་ཞིག་ཡིན་ཏེ་ལུས་ཧྲིལ་པོའང་གཅུན་ཐུབ་བོ།

³ཡང་རྟ་གཅུན་པའི་ཕྱིར་ཁ་ལ་སྲབ་གཡོགས་ན་དེའི་ལུས་ཧྲིལ་པོའང་གཅུན་ཐུབ།

⁴ཡང་དཔེ་གཞན་ཞིག་གྲུ་གཟིངས་ལ་བལྟས་ན། དེ་ཚོ་ཆེ་ཞིང་རླུང་ཆེན་གྱིས་འདེད་ཀྱང༌། མཇུག་གི་སྐྱ་བོ་ཆུང་ཆུང་གིས་གྲུ་པའི་འདོད་པ་ལྟར་གྱི་སར་ཁ་ལོ་སྒྱུར་ཐུབ།

⁵དེ་བཞིན་ལྕེ་ནི་ལུས་ཀྱི་ཡན་ལག་ཆུང་ཆུང་ཞིག་ཡིན་ཡང་དོན་ཆེན་གྱི་སྐོར་འུད་ཤོབ་བྱེད། མེ་ཆུང་ངུ་ཞིག་གིས་ཅི་ལྟར་ཆེ་བའི་ཤིང་ནགས་སྲེག

⁶ཡང་ལྕེ་ནི་མེ་སྟེ། ང་ཚོའི་ཡན་ལག་གི་ནང་ནས་ལྕེ་དེས་དྲང་པོ་མེད་པའི་འཇིག་རྟེན་མཚོན། དེས་ལུས་ཧྲིལ་པོ་མི་གཙང་བར་བྱེད་ཅིང༌། མི་ཚེའི་འཁོར་ཆ་ཚང་སྤར་བ་དང༌། དམྱལ་ཁམས་ཀྱིས་མེ་ཡིན་པའི་ལྕེ་སྤར་རོ།

⁷མིའི་རིགས་ཀྱིས་གཅན་གཟན་དང༌། བྱ་བྱིའུ། ལྟོ་བགྲོད། རྒྱ་མཚོའི་སྲོག་ཆགས་རིགས་ཀུན་འདུལ་བར་བྱེད་ཅིང༌། བཏུལ་ཟིན་ཀྱང༌།

⁸སུས་ཀྱང་ལྕེ་འདུལ་མི་ཐུབ། དེ་ནི་མི་བརྟན་པ་དང་ངན་པ་ཡིན་ཏེ། སྲོག་ལེན་དུག་ཆུ་ཡིས་གང༌།

⁹ང་ཚོས་ལྕེ་ཡིས་ང་ཚོའི་གཙོ་བོ་ཡིན་པའི་ཡབ་ལ་བསྟོད་བསྔགས་བྱེད་ཅིང༌། ལྕེ་ཡིས་དཀོན་མཆོག་གི་དཔེ་རུ་བཀོད་པའི་མི་རྣམས་ལ་དམོད་མོ་ཡང་འདེབས་པས།

¹⁰ཁ་གཅིག་ནས་བསྟོད་པ་དང་དམོད་མོ་གཉིས་ཀ་འཐོན། ངའི་སྤུན་ཟླ་རྣམས། དེ་ལྟར་མི་རུང་ངོ༌།

¹¹ཆུ་མིག་གི་ཁ་གཅིག་ལས་འཐུང་ཆུ་དང་ཚྭ་ཆུ་གཉིས་ཀ་འཐོན་ནམ།

¹²ངའི་སྤུན་ཟླ་རྣམས། བསེ་ཡབ་ཟེར་བའི་ཤིང་སྡོང་ལས་སྐྱུར་རུའམ། རྒུན་འབྲུམ་ཤིང་ལས་བསེ་ཡབ་སྐྱེ་མི་སྲིད་པ་ལྟར། དེ་ལྟར་ཚྭ་ཆུ་ལས་འཐུང་ཆུ་འབྱུང་བར་མི་སྲིད།

¹³ཁྱེད་ཚོའི་ནང་ནས་མཁས་ཤིང་བློ་གྲོས་ཅན་སུ་ཡིན། མི་དེས་སྤྱོད་ལམ་བཟང་པོ་དང༌། ཤེས་རབ་ལས་བྱུང་བའི་སེམས་དུལ་པོའི་སྒོ་ནས་སྟོན་དགོས།

¹⁴འོན་ཀྱང་ཁྱོད་ཚོའི་སེམས་ལ་ཕྲག་དོག་དྲག་པོ་དང་འདོད་པ་ཚ་པོ་ཡོད་ན། རང་གི་ཤེས་རབ་སྐོར་འུད་ཤོབ་བྱེད་པའི་སྒོ་ནས་རྫུན་གཏམ་མ་ཤོད་ཅིག

¹⁵འདི་ལྟར་གྱི་ཤེས་རབ་ནི་དཀོན་མཆོག་གི་ཞིང་ཁམས་ནས་འབབ་པ་མ་ཡིན་ཏེ། འཇིག་རྟེན་འདིའི་ཤེས་རབ། སྡིག་ཉེས་འདོད་པའི་ཤེས་རབ། བདུད་ཀྱི་ཤེས་རབ་ཡིན་ནོ།

¹⁶གང་ཡིན་ཞེ་ན། ཕྲག་དོག་དང་འདོད་པ་ཚ་པོ་ཡོད་སར་མི་མཐུན་པ་དང་ངན་སྤྱོད་ཀུན་ཡང་ཡོད།

¹⁷འོན་ཀྱང་དཀོན་མཆོག་གི་ཞིང་ཁམས་ནས་བྱུང་བའི་ཤེས་རབ་ནི་དང་པོར་བཅོས་མིན་དང༌། གཉིས་པར་ཞི་བདེ་ལ་དགའ་བ། དེ་བཞིན་སེམས་དུལ་པོ། ཡ་རབས། སྙིང་རྗེ་འབྲས་བཟང་དང་ལྡན་པ། ཕྱོགས་རིས་སམ་ཁ་བཤད་དོན་ལ་མི་གནས་པ་ཅི་ཡང་མེད་པ་ཞིག་ཡིན།

¹⁸ཡང་ཞི་བདེ་སྐྲུན་མཁན་གྱིས་ཞི་བའི་ངང་ནས་ས་བོན་བཏབ་སྟེ་ཡང་དག་པའི་འབྲས་བུ་འཐོབ་བོ། །