Read Central Tibetan Bible མངོན་པ། 20 Bible Online

མངོན་པ། 20 - Central Tibetan Bible bible

མངོན་པ། 20

¹དེ་ནས་ངས་གཏིང་མཐའ་མེད་པའི་དོང་གི་ལྡེ་མིག་དང་ཕྱག་ཏུ་ལྕགས་ཐག་ཆེན་པོ་འཁྱེར་བའི་ཕོ་ཉ་ཞིག་དཀོན་མཆོག་གི་ཞིང་ཁམས་ནས་འབབ་པ་མཐོང༌།

²ཕོ་ཉ་དེས་གནའ་བོའི་དུས་ནས་ཡོད་པའི་སྦྲུལ་ཏེ། བདུད་ཀྱི་རྒྱལ་པོ་དང་སཱ་ཏན་ཞེས་བྱ་བའི་འབྲུག་བཟུང་ནས་ལོ་སྟོང་ཕྲག་གཅིག་གི་བར་དུ་བཅིངས་ནས།

³ལོ་ཆིག་སྟོང་དེ་རྫོགས་པའི་བར་དུ་མི་རིགས་རྣམས་ལ་བསླུ་བྲིད་མི་བྱེད་པའི་ཕྱིར་ཕོ་ཉ་དེས་བདུད་གཏིང་མཐའ་མེད་པའི་དོང་ནང་ལ་འཕངས་ཏེ། སྒོ་ལྕགས་བརྒྱབ་ནས་རྒྱ་ཡིས་བཏབ། དེའི་རྗེས་སུ་དུས་ཐུང་རིང་ཁོ་འགྲོལ་ངེས་ཡིན།

⁴དེ་ནས་ངས་བཞུགས་ཁྲི་རྣམས་མཐོང༌། དེར་བཞུགས་མཁན་ལ་ཁྲིམས་གཅོད་མཛད་པའི་དབང་ཆ་གནང༌། ཡང་ངས་ཡེ་ཤུའི་དཔང་པོ་བྱས་པ་དང་དཀོན་མཆོག་གི་བཀའ་བསྒྲགས་པའི་དོན་དུ་མགོ་བཅད་པ་རྣམས་ཏེ། གཅན་གཟན་ནམ་དེའི་འདྲ་སྐུ་ལ་བསྙེན་བཀུར་མ་བྱས་ཤིང༌། དཔྲལ་བའམ་ལག་པ་ལ་དེའི་རྟགས་མ་བླངས་པ་རྣམས་ཀྱི་སེམས་ཉིད་མཐོང༌། ཁོ་ཚོ་སླར་གསོན་པོར་གྱུར་ནས་མཱ་ཤི་ཀ་དང་མཉམ་དུ་ལོ་སྟོང་ཕྲག་གཅིག་གི་བར་དུ་དབང་བསྒྱུར།

⁵འདི་ནི་སླར་གསོན་པོར་འགྱུར་བ་དང་པོ་ཡིན། (ལོ་སྟོང་ཕྲག་གཅིག་དེ་མ་རྫོགས་པའི་བར་དུ་གཤིན་པོ་གཞན་རྣམས་སླར་གསོན་པོར་མ་གྱུར་)

⁶སླར་གསོན་པོར་འགྱུར་བ་དང་པོ་རྣམས་ནི་བདེ་བ་དང་དམ་པ་ཡིན་ནོ། འཆི་བ་གཉིས་པས་ཁོ་རྣམས་ལ་དབང་བྱེད་མི་སྲིད་དེ། དཀོན་མཆོག་དང་མཱ་ཤི་ཀའི་མཆོད་དཔོན་དུ་གྱུར་ནས་མཱ་ཤི་ཀ་དང་མཉམ་དུ་ལོ་སྟོང་ཕྲག་གཅིག་གི་བར་དུ་དབང་སྒྱུར་རོ། །

⁷ལོ་ཆིག་སྟོང་དེ་རྫོགས་པའི་ཚེ་སཱ་ཏན་བཙོན་ནས་གློད་གྲོལ་གཏོང་བར་འགྱུར་ཞིང༌།

⁸ས་གཞིའི་མཐའ་བཞི་ལ་ཡོད་པའི་མི་རིགས་ཏེ་གོག་དང་མཱ་གོག་ཅེས་བྱ་བ་ལ་བསླུ་བྲིད་བྱས་ནས། སྡུད་དེ་དམག་འཐབ་པའི་ཕྱིར་འཐོན། དེའི་གྲངས་ནི་རྒྱ་མཚོའི་བྱེ་མ་དང་འདྲ་བ་ཡིན།

⁹དེ་ཚོས་ས་གཞིའི་ཐང་ཆེན་བརྒལ་ནས་གཅེས་པའི་གྲོང་ཁྱེར་དང༌། དཀོན་མཆོག་གི་མི་རྣམས་ཀྱི་དམག་སྒར་བསྐོར། དཀོན་མཆོག་གི་ཞིང་ཁམས་ནས་མེ་བབས་པ་དང༌། ཁོ་ཚོ་ཐམས་ཅད་འཇིག་པར་བྱས།

¹⁰ཡང་དེ་རྣམས་ལ་བསླུ་བྲིད་བྱེད་མཁན་བདུད་ནི་མེ་འབར་བའི་མུ་ཟིའི་མཚོའི་ནང་དུ་འཕངས། དེར་གཅན་གཟན་དང་ལུང་སྟོན་པ་རྫུན་མའང་ཡོད་དེ། ཉིན་མཚན་མེད་པར་དུས་རྒྱུན་དུ་ཁོ་རྣམས་མནར་གཅོད་གཏོང་བར་འགྱུར།

¹¹དེ་ནས་ངས་བཞུགས་ཁྲི་དཀར་པོ་ཆེན་པོ་ཞིག་དང་དེའི་སྟེང་དུ་བཞུགས་མཁན་ཞིག་མཐོང༌། ཁོང་གི་མདུན་ནས་ས་གཞི་དང་ཞིང་ཁམས་བྲོས་ཏེ་མི་མཐོང་བར་གྱུར།

¹²ངས་གཤིན་པོ་རྣམས་མཐོ་དམན་མེད་པར་ཀུན་བཞུགས་ཁྲིའི་མདུན་དུ་ལངས་ནས་བསྡད་པ་མཐོང་ཞིང༌། མདོ་རྣམས་ཁ་ཕྱེ། མདོ་གཞན་ཏེ་དཔག་ཏུ་མེད་པའི་ཚེའི་མདོའང་ཁ་ཕྱེ་ལ། དེར་གང་བྲིས་པ་ལྟར་གཤིན་པོ་རྣམས་རང་གི་བྱས་པ་བཞིན་དུ་ཁྲིམས་གཅོད་པར་གྱུར།

¹³རྒྱ་མཚོས་དེའི་ནང་ལ་ཡོད་པའི་གཤིན་པོ་རྣམས་དང༌། འཆི་བ་དང་གཤིན་པོའི་ཁམས་ཀྱིས་དེའི་ནང་ལ་ཡོད་པའི་གཤིན་པོ་རྣམས་ཕྱིར་བཏང་ནས། སོ་སོས་བྱས་པ་ལྟར་རེ་རེ་ལ་ཁྲིམས་གཅོད་མཛད།

¹⁴དེ་ནས་འཆི་བ་དང་གཤིན་པོའི་ཁམས་ཉིད་མེའི་མཚོའི་ནང་དུ་འཕངས། མེའི་མཚོ་དེ་ནི་འཆི་བ་གཉིས་པ་དེ་ཡིན་ནོ།

¹⁵སུ་ཞིག་གི་མིང་དཔག་ཏུ་མེད་པའི་ཚེའི་མདོ་ཡི་ནང་དུ་འཁོད་མེད་ན། མེའི་མཚོ་དེའི་ནང་ལ་འཕངས་པར་གྱུར་རོ། །