Read Central Tibetan Bible མངོན་པ། 4 Bible Online

མངོན་པ། 4 - Central Tibetan Bible bible

མངོན་པ། 4

¹དེ་ནས་ངས་བལྟས་ཏེ་དཀོན་མཆོག་གི་ཞིང་ཁམས་སུ་སྒོ་ཕྱེས་པ་ཞིག་འདུག སྔར་གྱི་དུང་ཆེན་དང་འདྲ་བའི་གསུང་སྐད་དེས་ང་ལ་“ཡར་ཤོག་ལ། དོན་འདི་རྣམས་ཀྱི་རྗེས་སུ་གང་འབྱུང་དགོས་པ་རྣམས་ཁྱོད་ལ་སྟོན་པར་བྱ་”ཞེས་གསུངས་མ་ཐག

²ང་དཀོན་མཆོག་གི་དམ་པའི་ཐུགས་ཉིད་ཀྱི་དབང་འོག་ཏུ་ཡོད་པ་དང༌། དཀོན་མཆོག་གི་ཞིང་ཁམས་སུ་བཞུགས་ཁྲི་ཞིག་ཡོད་ཅིང༌། དེ་ལ་བཞུགས་པ་ཞིག་འདུག

³ཁོང་གི་སྐུའི་རྣམ་པ་ནི་འོད་འཕྲོ་བའི་ནོར་བུ་སྣ་ཚོགས་དང་འདྲ་བ་ཡིན། ཁོང་གི་བཞུགས་ཁྲིའི་མཐའ་འཁོར་ལ་མར་གད་དང་འདྲ་བའི་འཇའ་ཞིག་འདུག

⁴ཡང་བཞུགས་ཁྲི་དེའི་མཐའ་འཁོར་ལ་བཞུགས་ཁྲི་ཉི་ཤུ་རྩ་བཞི་ཡོད་པ་དང༌། ཁྲི་དེ་རྣམས་ལ་ན་བཟའ་དཀར་པོ་དང༌། དབུ་ལ་གསེར་གྱི་ཅོད་པན་གྱོན་པའི་རྒན་པོ་ཉི་ཤུ་རྩ་བཞི་བཞུགས།

⁵བཞུགས་ཁྲི་ནས་གློག་འཁྱུག་པ་དང༌། སྒྲ་སྣ་ཚོགས་དང༌། འབྲུག་སྒྲ་འཐོན། བཞུགས་ཁྲིའི་དྲུང་དུ་དཔལ་འབར་མེ་འབར་བ་བདུན་ཡོད། དེ་ཚོ་ནི་དཀོན་མཆོག་གི་ཐུགས་ཉིད་བདུན་པོ་ཡིན་ནོ།

⁶ཡང་བཞུགས་ཁྲིའི་མདུན་དུ་ཤེལ་གྱི་རྒྱ་མཚོ་ནི་དྭངས་ཤེལ་དང་འདྲ་བ་ཞིག་ཡོད་ཅིང༌། བཞུགས་ཁྲིའི་མཐའ་འཁོར་ལ་ཕྱོགས་བཞིར་རྒྱབ་མདུན་ཐམས་ཅད་མིག་གིས་གང་བའི་སེམས་ཅན་བཞི་ཡོད་དེ།

⁷དང་པོ་ནི་སེང་གེ་དང་འདྲ་བ། གཉིས་པ་དེ་བ་གླང་དང་འདྲ་བ། གསུམ་པ་དེ་མིའི་ངོ་དང་ལྡན་པ། བཞི་པ་དེ་བྱ་གླག་འཕུར་བ་དང་འདྲ་བ་ཡིན།

⁸སེམས་ཅན་བཞི་པོ་རེ་རེ་ལ་གཤོག་པ་དྲུག་ལྡན་ལ་ཕྱི་ནང་གཉིས་པོ་མིག་གིས་གང་བའི་སེམས་ཅན་གྱིས་ཉིན་མཚན་མེད་པར། དམ་པ་དམ་པ་དམ་པ། ། གཙོ་བོ་དཀོན་མཆོག་དབང་ཀུན། ། འདས་དང་ད་ལྟ་མ་འོངས། ། དུས་གསུམ་ཀུན་ཏུ་གནས་སོ། ། ཞེས་གསུང་བཞིན་འདུག

⁹སེམས་ཅན་དེ་ཚོས་བཞུགས་ཁྲི་ལ་བཞུགས་མཁན་རྟག་ཏུ་གནས་པ་ལ་གཟི་བརྗིད་དང༌། བཀུར་སྟི་དང༌། ཐུགས་རྗེ་ཆེ་ཞུ་བའི་སྐབས་སུ།

¹⁰རྒན་པོ་ཉི་ཤུ་རྩ་བཞི་པོས་བཞུགས་ཁྲི་ལ་བཞུགས་མཁན་གྱི་མདུན་དུ་ཕྱག་བཙལ་ནས། དུས་གཏན་དུ་གནས་པ་ལ་བསྙེན་བཀུར་ཞུ། ཁོང་ཚོའི་ཅོད་པན་རྣམས་བཞུགས་ཁྲིའི་མདུན་དུ་བཞག་ནས།

¹¹ང་ཚོའི་གཙོ་བོ་ང་ཚོའི་དཀོན་མཆོག་ལགས། ། གཟི་བརྗིད་དཔལ་ཡོན་དབང་དང་ལྡན་པར་འོས། ། གནམ་སར་ཡོད་པ་ཐམས་ཅད་ཁྱེད་ཀྱིས་བཀོད། ། ཡོད་ཚད་ཁྱེད་ཀྱི་ཐུགས་དགོངས་བཞིན་དུ་གནས། ། ཞེས་གསུང་བཞིན་འདུག །