Read Central Tibetan Bible མངོན་པ། 7 Bible Online

མངོན་པ། 7 - Central Tibetan Bible bible

མངོན་པ། 7

¹དེ་རྗེས་ངས་དཀོན་མཆོག་གི་ཕོ་ཉ་བཞི་ས་གཞིའི་མཐའ་བཞི་ལ་བཞེངས་ཏེ་རླུང་གང་ཞིག་སའམ། རྒྱ་མཚོའམ། ཤིང་གང་ལ་ཡང་མི་རྒྱུག་པའི་ཆེད་དུ་ས་གཞིའི་རླུང་བཞི་པོ་འགོག་པར་མཐོང༌།

²ཡང་ངས་ཕོ་ཉ་གཞན་ཞིག་ཉི་མ་ཤར་བའི་ཕྱོགས་ནས་ཡར་འབྱོན་པ་མཐོང༌། དེ་ལ་གཏན་དུ་གནས་པའི་དཀོན་མཆོག་གི་ཕྱག་རྒྱ་ཡོད་ཅིང༌། ཕོ་ཉ་དེས་ས་གཞི་དང་རྒྱ་མཚོ་ལ་གནོད་སྐྱོན་གཏོང་བའི་དབང་ཆ་ཐོབ་པའི་ཕོ་ཉ་བཞི་ལ་སྐད་ཆེན་པོས་

³“ང་ཚོའི་དཀོན་མཆོག་གི་ཞབས་ཕྱི་རྣམས་ཀྱི་དཔྲལ་བ་ལ་རྟགས་རྒྱག་མ་ཚར་བའི་བར་དུ། སའམ། རྒྱ་མཚོའམ། ཤིང་རྣམས་ལ་གནོད་སྐྱོན་མ་གཏོང་ཞིག་”ཅེས་གསུངས།

⁴ཡི་སི་ར་ཨེལ་གྱི་ཚོ་པ་ཐམས་ཅད་ནས་ཕྱག་རྒྱ་ཡིས་བཏབ་པའི་གྲངས་ནི་ཆིག་འབུམ་བཞི་ཁྲི་བཞི་སྟོང་ཡོད་པ་ཐོས་ཏེ།

⁵ཡུ་དཱ་ཚོ་པ་ལས་སྟོང་ཕྲག་བཅུ་གཉིས། རུ་པེན་ཚོ་པ་ལས་སྟོང་ཕྲག་བཅུ་གཉིས། གཱད་ཚོ་པ་ལས་སྟོང་ཕྲག་བཅུ་གཉིས།

⁶ཨ་ཤེར་ཚོ་པ་ལས་སྟོང་ཕྲག་བཅུ་གཉིས། ནབ་ཐ་ལི་ཚོ་པ་ལས་སྟོང་ཕྲག་བཅུ་གཉིས། མཱ་ན་ཟེ་ཚོ་པ་ལས་སྟོང་ཕྲག་བཅུ་གཉིས།

⁷སི་མེ་ཡོན་ཚོ་པ་ལས་སྟོང་ཕྲག་བཅུ་གཉིས། ལེ་ཝི་ཚོ་པ་ལས་སྟོང་ཕྲག་བཅུ་གཉིས། ཨི་སཱ་ཀར་ཚོ་པ་ལས་སྟོང་ཕྲག་བཅུ་གཉིས།

⁸ཟ་བུ་ལུན་ཚོ་པ་ལས་སྟོང་ཕྲག་བཅུ་གཉིས། ཡོ་སེབ་ཚོ་པ་ལས་སྟོང་ཕྲག་བཅུ་གཉིས། པེན་ཡ་མཱིན་ཚོ་པ་ལས་སྟོང་ཕྲག་བཅུ་གཉིས་སོ། །

⁹དེ་ནས་ངས་རྒྱལ་ཁབ་དང༌། ཚོ་པ། མི་རིགས། སྐད་རིགས་ཐམས་ཅད་ནས་ཡིན་པའི་གྲངས་ལས་འདས་པའི་མི་ཚོགས་ཆེན་མོ་ལུ་གུ་དང་བཞུགས་ཁྲིའི་མདུན་དུ་ལང་བ་མཐོང༌། གོས་དཀར་པོ་གྱོན་ཞིང༌། ཤིང་ཏ་ལའི་ཡལ་ག་ཁོ་ཚོའི་ལག་ཏུ་འཁྱེར་ཏེ།

¹⁰ཁོ་ཚོས་སྐད་ཆེན་པོས། བཞུགས་ཁྲིར་བཞུགས་པའི་ང་ཚོ་ཡི། ། དཀོན་མཆོག་དང་ནི་ལུ་གུ་ལས། ། ཐར་པ་ཞེས་པ་འབྱུང་བ་ཡིན། ། ཞེས་གསུངས།

¹¹དཀོན་མཆོག་གི་ཕོ་ཉ་ཐམས་ཅད་བཞུགས་ཁྲི་དང་རྒན་པོ་རྣམས་དང་སེམས་ཅན་བཞིའི་མཐའ་འཁོར་ལ་བཞེངས་ཏེ། བཞུགས་ཁྲིའི་མདུན་དུ་ཕྱག་བཙལ་ནས་དཀོན་མཆོག་ལ་བསྙེན་བཀུར་བྱས་ཏེ།

¹²ཨ་མེན། ངེད་ཀྱི་དཀོན་མཆོག་བཀུར་སྟི་དང༌། ། གཟི་བརྗིད་ཤེས་རབ་ཐུགས་རྗེ་དང༌། ། དཔལ་ཡོན་མངའ་དབང་མཐུ་སྟོབས་ཏེ། ། ཇི་སྲིད་བསྐལ་བརྒྱའི་བར་དུ་བརྟན། ། ཨ་མེན། ཞེས་གསུངས།

¹³དེ་ནས་རྒན་པོ་ཞིག་གིས་ང་ལ་“གོས་དཀར་པོ་གྱོན་པ་རྣམས་ནི་སུ་ཡིན། གང་ནས་བྱུང་”ཞེས་གསུངས་པས།

¹⁴ངས་ཁོང་ལ་“སྐུ་ཞབས་ལགས། ཁྱེད་ཀྱིས་མཁྱེན་ནོ་”ཞེས་ཟེར་བས་ཁོང་གིས་ང་ལ་“འདི་རྣམས་ནི་སྡུག་བསྔལ་ཆེན་མོ་ལས་ཐོན་ཏེ། རང་གི་གོས་རྣམས་ལུ་གུའི་སྐུ་ཁྲག་གིས་བཀྲུས་ནས་དཀར་པོ་བྱས་པ་རྣམས་ཡིན།

¹⁵དེ་ཕྱིར་དེ་རྣམས་དཀོན་མཆོག་གི ། བཞུགས་ཁྲིའི་དྲུང་དུ་བསྡད་ནས་ནི། ། ཉིན་མཚན་མེད་པར་མཆོད་ཁང་ནང༌། ། ཞབས་ཏོག་ཞུ་བཞིན་བཞུགས་ཁྲིའི་སྟེང༌། ། བཞུགས་མཁན་དེ་ཡིས་དེ་རྣམས་སྐྱོང༌། །

¹⁶དེ་རྣམས་ནམ་ཡང་བཀྲེས་སྐོམ་དང༌། ། ཉི་མ་ཡང་ན་ཚ་བ་སོགས། ། གང་ཡང་ཕོག་པར་མི་འགྱུར་རོ། །

¹⁷གང་ཡིན་ཟེར་ན་བཞུགས་ཁྲི་ཡི། ། དཀྱིལ་དུ་བཞུགས་པའི་ལུ་གུ་དེས། ། དེ་རྣམས་ཀྱི་ནི་རྫི་བོ་མཛད། ། ཚེ་སྲོག་ཆུ་མིག་འགྲམ་དུ་འཁྲིད། ། དཀོན་མཆོག་གིས་ནི་དེ་ཚོ་ཡི། ། མཆི་མ་ཐམས་ཅད་འཕྱི་བར་མཛད། །” ཅེས་གསུངས་སོ། །