Read Central Tibetan Bible མངོན་པ། 8 Bible Online

མངོན་པ། 8 - Central Tibetan Bible bible

མངོན་པ། 8

¹ལུ་གུས་ཕྱག་རྒྱ་བདུན་པ་གཅོད་པར་མཛད་པའི་ཚེ། ཆུ་ཚོད་ཕྱེད་ཙམ་གྱི་བར་དུ་དཀོན་མཆོག་གི་ཞིང་ཁམས་སྒྲ་མེད་དུ་གྱུར།

²ཡང་ངས་དཀོན་མཆོག་གི་མདུན་དུ་ལངས་ཏེ་སྡོད་པའི་ཕོ་ཉ་བདུན་པོ་དེ་ཚོ་མཐོང༌། ཁོ་རྣམས་ལ་དུང་ཆེན་བདུན་གནང༌།

³ཕོ་ཉ་གཞན་ཞིག་གསེར་གྱི་བསངས་ཕོར་འཁྱེར་ཏེ་མཆོད་ཁྲིའི་མདུན་དུ་ཡོང་ནས་ལངས། དཀོན་མཆོག་གི་མི་ཐམས་ཅད་ཀྱི་སྨོན་ལམ་དང་བཅས་བཞུགས་ཁྲིའི་མདུན་དུ་གསེར་གྱི་མཆོད་ཁྲིའི་ཁར་ཕུལ་བའི་ཕྱིར། ཁོང་ལ་བདུག་སྤོས་མང་པོ་ཐོབ།

⁴བདུག་སྤོས་ཀྱི་དུ་བ་ནི་དཀོན་མཆོག་གི་མི་རྣམས་ཀྱི་སྨོན་ལམ་དང་བཅས་པར་ཕོ་ཉ་དེའི་ཕྱག་ནས་ཡར་དཀོན་མཆོག་གི་མདུན་དུ་སླེབས།

⁵དེ་ནས་ཕོ་ཉ་དེས་མཆོད་ཁྲིའི་མེ་ཡིས་བསངས་ཕོར་བཀང་ནས་ས་གཞི་ལ་འཕངས་ཏེ། གློག་འཁྱུག་པ་དང༌། སྒྲ་སྣ་ཚོགས། འབྲུག་སྒྲ་དང༌། ས་ཡོམ་བྱུང༌།

⁶དུང་ཆེན་བདུན་ཡོད་པའི་ཕོ་ཉ་བདུན་པོས་དུང་ཆེན་གཏོང་རྒྱུའི་གྲ་སྒྲིག་བྱས།

⁷ཕོ་ཉ་དང་པོས་རང་གི་དུང་ཆེན་བུས་ནས་སེར་བ་དང་མེ་ཁྲག་འདྲེས་པ་བྱུང་སྟེ་ས་གཞི་ལ་འཕངས་ནས་ས་གཞིའི་གསུམ་ཆ་གཅིག་དང༌། ཤིང་རྣམས་ཀྱི་གསུམ་ཆ་གཅིག་དང༌། རྩྭ་སྔོན་པོ་ཐམས་ཅད་མེས་ཚིག་པར་གྱུར།

⁸ཕོ་ཉ་གཉིས་པས་རང་གི་དུང་ཆེན་བུས་ནས་མེ་འབར་བའི་རི་ཆེན་པོ་དང་འདྲ་བ་ཞིག་རྒྱ་མཚོ་ལ་འཕངས། རྒྱ་མཚོའི་གསུམ་ཆ་གཅིག་ཁྲག་ཏུ་གྱུར་ཏེ།

⁹རྒྱ་མཚོ་ནང་ལ་ཡོད་པའི་སེམས་ཅན་གསུམ་ཆ་གཅིག་ཤི་ནས། གྲུ་གཟིངས་ཀྱི་གསུམ་ཆ་གཅིག་འཇིག་པར་གྱུར།

¹⁰ཕོ་ཉ་གསུམ་པས་རང་གི་དུང་ཆེན་བུས་ནས་མེ་འབར་བའི་དཔལ་འབར་དང་འདྲ་བའི་སྐར་མ་ཆེན་པོ་ཞིག་ནམ་མཁའ་ནས་གཙང་པོ་རྣམས་ཀྱི་གསུམ་ཆ་གཅིག་དང༌། ཆུ་མིག་རྣམས་ལ་ལྷུངས།

¹¹སྐར་མ་དེའི་མིང་ནི་ཁ་ཏིག་ཡིན། ཆུ་རྣམས་ཀྱི་གསུམ་ཆ་གཅིག་ཁ་ཏིག་ཏུ་གྱུར་བས་མི་མང་པོ་ཤི

¹²ཕོ་ཉ་བཞི་པས་རང་གི་དུང་ཆེན་བུས་ནས་ཉི་མའི་གསུམ་ཆ་གཅིག་དང༌། ཟླ་བའི་གསུམ་ཆ་གཅིག་དང༌། སྐར་མ་རྣམས་ཀྱི་གསུམ་ཆ་གཅིག་ལ་ཕོག་སྟེ། དེ་ཚོ་ལས་གསུམ་ཆ་གཅིག་མུན་ནག་ཏུ་གྱུར་བས། ཉིན་མོ་དང་མཚན་མོའི་གསུམ་ཆ་གཅིག་ལ་འོད་མ་འཕྲོས།

¹³དེ་ནས་ངས་བལྟས་པ་དང༌། ནམ་མཁའི་དཀྱིལ་ལ་བྱ་གླག་འཕུར་བ་ཡིས་སྐད་ཆེན་པོས་“ཆག་སྒོ་ཆེན་པོ། ཆག་སྒོ་ཆེན་པོ། ཆག་སྒོ་ཆེན་པོ། ཕོ་ཉ་གཞན་གསུམ་གྱིས་ད་ལྟ་དུང་ཆེན་འབུད་དགོས་པའི་རྐྱེན་གྱིས་ས་གཞི་ལ་སྡོད་པའི་མི་རྣམས་ལ་ཆག་སྒོ་ཆེན་པོ་འབྱུང་ངེས་ཡིན་”ཞེས་སྨྲས་པ་ཐོས་སོ། །