Read Chambeali मत्ती 1 Bible Online

मत्ती 1 - Chambeali bible

मत्ती 1

¹यीशु मसीह अब्राहम ते दाऊद राज्जे रे ‍खानदान बिच का थिये। यीशु मसीह रे गोत्रियां रे ए नां हिन,

²अब्राहम रा पुत्तर इसहाक थिया, इसहाक रा पुत्तर याकूब थिया, याकूब रा पुत्तर यहूदा अते यहूदा रे भ्याल थिये।

³यहूदा ते तामार रे पुत्तर फिरिस ते जेरह थिये, फिरिस रा पुत्तर हिस्त्रोन थिया, ते हिस्त्रोन रा पुत्तर एराम थिया।

⁴एराम रा पुत्तर अम्मीनादाब थिया, अम्मीनादाब रा पुत्तर नहशोन, अते नहशोन रा पुत्तर सलमोन थिया।

⁵सलमोन रा पुत्तर बोअज थिया, जिसेरी मां राहाब भी इक्क गैर यहूदी जनानी थी, बोअज रा पुत्तर ओबेद थिया, जिसेरी मां रूत भी इक्क गैर यहूदी जनानी थी, अते ओबेद रा पुत्तर यिशै थिया।

⁶ते यिशै रा पुत्तर दाऊद, जे राज्जा थिया, ते दाऊद रा पुत्तर सुलैमान थिया, बैतशिबा सुलैमान री मां थी जे पैल्ले उरिय्याह री लाड़ी थी।

⁷सुलैमान रा पुत्तर रहबाम थिया, रहबाम रा पुत्तर अबिय्याह थिया, ते अबिय्याह रा पुत्तर आसा थिया।

⁸आसा रा पुत्तर यहोशाफात थिया, यहोशाफात रा पुत्तर योराम थिया, योराम रा पुत्तर उज्जियाह थिया।

⁹उज्जियाह रा पुत्तर योताम थिया, योताम रा पुत्तर आहाज थिया, अते आहाज रा पुत्तर हिजकिय्याह थिया।

¹⁰हिजकिय्याह रा पुत्तर मनश्शिह थिया, मनश्शिह रा पुत्तर आमोन थिया, ते आमोन रा पुत्तर योशिय्याह थिया।

¹¹योशिय्याह रा पुत्तर यकुन्याह ते तिसेरे भ्याल पैदा होये। उस दौरान इस्राएल देस रे लोक्कां जो गुलाम बणाई करी बेबिलोन लेई जाया गेया।

¹²बेबिलोन बिच गुलाम बणाई करी लेई जाणे का बाद, यकुन्याह रे घरे मुंडा पैदा होया जिसेरा नां तिसने शालतियेल रख्खेया। शालतियेल रे मुंडे रा नां जरुब्बाबेल थिया।

¹³जरुब्बाबेल रा पुत्तर अबीहूद थिया, अबीहूद रा पुत्तर इल्याकीम थिया, ते इल्याकीम रा पुत्तर अजोर थिया।

¹⁴अजोर रा पुत्तर सदोक थिया, सदोक रा पुत्तर अखीम थिया, ते अखीम रा पुत्तर इलीहूद थिया,

¹⁵इलीहूद रा पुत्तर एलीआज़ार थिया, एलीआज़ार रा पुत्तर मत्तान थिया, अते मत्तान रा पुत्तर याकूब थिया।

¹⁶याकूब रा पुत्तर यूसुफ थिया, जिसेरी लाड़ी रा नां मरियम थिया, अते यूसुफ ते मरियम का यीशु पैदा होए जे “मसीह हिन।”

¹⁷इसी तरिक्के कने अब्राहम का लेई करी राजा दाऊद तिकर चौदह पीढ़ियां होई, ते राजा दाऊद का लेई करी बेबिलोन बिच गुलामी करणे रे बेल्ले तिकर चौदह पीढ़ियां, ते तित्ते का लेई करी यीशु मसीह रे पैदा होणे तिकर चौदह पीढ़ियां होई।

¹⁸यीशु मसीह रा जन्म इस तरिक्के कने होया, जां तिन्हेरी मां मरियम री मंगणी यूसुफ कने होई गई, पर ब्याह होणा का पैल्ले ही, जां हल्ले मरियम कुंवारी ही थी, से पवित्रात्मा री ताकत कने दुपराणी होई गई।

¹⁹मरियम रा मगेंतर यूसुफ जे इक्क धार्मिक मणू थिया, मरियम जो सरेआम बदनाम नी करणा चाह्‍ंदा थिया, इधेरे तांइ चुपचाणे ही तिसजो छड्डी दैणा चाह्‍ंदा थिया।

²⁰“जां यूसुफ इन्हा गल्लां रे बारे अन्दर सोच्चेया ही करदा थिया, तां प्रभु रा स्वर्गदूत तिसजो सुपने अन्दर आई करी बोलणा लगेया, ओ यूसुफ! दाऊद री औलाद, तू मरियम जो अपणी लाड़ी बणाणे रा का मत डर, किजोकी जे बच्चा तिसेरे पेट अन्दर है, से पवित्रात्मा रे पास्से का है।

²¹तिसने इक्क मुंडे जो जमणा, ते तू तिसेरा नां यीशु रख्खेया, किजोकी तिनिए सारी दुनिया रे मणूआं रा तिन्हेरे पाप्पां का छुटकारा दैणा।”

²²ए सब इधेरे तांइ होया कि जे वचन प्रभु ने यशायाह भविष्यद्वक्ता रे जरिए बोल्लेया थिया, से पूरा होई जाओ।

²³“दिख्खो, इक्क कुंवारी ने दुपराणी होणा ते तिसने इक्क निक्के जो जमणा, ते तिसेरा नां इम्मानुएल रख्खेया जाणा, जिसेरा मतलब हुन्दा, ‘परमेश्वर असा रे कन्ने हिन।’”

²⁴तां यूसुफ निन्दर का जाग्गी करी प्रभु रे स्वर्गदूत रे हुकम रे ह्साब कने मरियम जो ब्याई करी तिसजो अपणे घरे लेई आया।

²⁵ते जां तांइ मरियम ने पुत्तर नी जम्मेया तां तांइ यूसुफ ने मरियम कने कोई शारीरिक सम्बध नी रख्खेया: ते तिसेरे पैदा होणा का बाद यूसुफ ने तिस मुंडे रा नां यीशु रख्खेया।