Read Chambeali मत्ती 10 Bible Online

मत्ती 10 - Chambeali bible

मत्ती 10

¹तां यीशु ने अपणे बारां चेल्‍लेयां जो सद्दी करी तिन्हा जो दुष्टात्मा जो बाहर निकालणे, अते हर तरह री बीमारी ते कमजोरी जो दुर करणे रा हक दित्तेया।

²इन्हा बारहा खास प्रेरितां रे नां ए हिन, पैल्ला शमौन, जिस जो कि पतरस भी बोलदे अते तिसेरा भाई अन्द्रियास, जब्दी रा निक्का याकूब अते तिसेरा भाई यूहन्ना।

³फिलिप्पुस बरतुल्मै, थोमा, चुंगी लैणे वाला मत्ती हलफई रा पुत्तर याकूब, तद्दै

⁴शमौन जे जेलोतेस नां रे समुह[2] रा मणू थिया अते यहूदा इस्करियोती, जिनिये यीशु जो पकड़वाई भी दित्तेया।

⁵तिन्हा बारा जो यीशु ने ए हुकम देई करी भेजेया, गैर यहूदियां रे लोक्कां का मत जांदे, अते ना सामरिया प्रदेश बिच बड़दे।

⁶पर इस्राएल रे ‍खानदान री गुआची री भेड़ां का जायो।

⁷अते जांदे-जांदे तुसा ए प्रचार करी के बोलेयो, स्वर्ग रा राज नेड़े आई गे रा है।

⁸बिमारां जो खरा करो, मरे रेयां जो जिंदा करो, कोढ़ियां जो सुच्चा करो, दुष्टात्मा जो कड्डो तुसा जो मुफ्त बिच मिलेया है मुफ्त बिच ही देयो।

⁹अपणी कमर रे थैल्ले बिच ना तां सुन्ना, चाँदी अते ना तां तांबा रखयो,

¹⁰रस्ते तांइ ना झोली रख्खो, ना दो कुरते, ना जूत्ते ना सोठी, किजोकी मजदूर जो तिसेरी रोट्टी मिलणी चाएदी।

¹¹जिस भी सहर या ग्रां बिच तुसा बड़गे तां पता करो कि इत्ते कुण लायक है, अते तिस जगाह् जो छडणे तक तित्ते ही रेयो।

¹²जां तुसा तिस घरे बड़गे तां तित्ते सांती री आशीष देयो।

¹³जे से घर लायक होया तां तुसा री आशीष तिन्हा पर बणी रेह्णी, पर जे नी हुन्गा तां सांती री तुसा री आशीष तुसा रे का हटी आणी।

¹⁴जे कोई तुसा जो नी अपणांदा अते तुसा री गल्लां नी सूणदा, तां तिस घर या तिस सहर का जांदे बेल्ले अपणे पैरां का धूल झम्मी आयो।

¹⁵मैं तुसा जो सच बोलदा हिसाब-किताब होणे रे रोज्जे उस सहर री हालत का सदोम अते अमोरा रे देस री हालत केई जादा ठीक होणी।

¹⁶दिख्खो, जिय्यां कोई भेड़ भेड़िये रे बिच मझाटे हो तिय्यां ही मैं तुसा जो तिन्हा लोक्कां बिच भेज्जेया करदा है। इधेरे तांइ कीड़े सांई चलाक अते कबूतरां सांई भोले बणो

¹⁷पर मणूआं का बची करी रेयो, किजोकी तिन्हा तुसा जो पंचायता बिच देई दैणा, अते तिन्हा तुसा जो अपणी सभास्थल बिच कोड़े मारणे।

¹⁸तुसा जो मेरी वजह कने राज्पालां अते राज्जेयां रे सामणे लित्तेया जाणा, ताकि उन्हा पर अते गैर यहूदियां रे लोक्कां तांइ गवाह बणो।

¹⁹जां से तुसा जो पकड़न तां फिकर मत करदे, कि तुसा जो कै बोलणा ए अते किय्यां बोलणा ए किजोकी उस बेल्ले तुसा जो दस्सी दित्तेया जाणा कि तुसा जो कै बोलणा है।

²⁰किजोकी बोलणे वाले तुसा नी हिन, पर तुसा रे परम-पिता री आत्‍मा ने तुसा रे अन्दर का बोलणा।

²¹भाई ने अपणे भाई जो पकड़वाई करी मरवाई दैणा, मां-प्यो ने अपणे बच्चे जो पकड़वाई दैणा अते बच्चेयां ने अपणे मां-प्यो रे खिलाफ होई जाणा ते तिन्हा जो मरवाई दैणा।

²²मेरी नां री वजह कने सबने तुसा रे कने नफरत करणी, पर जे आखर तांइ सबर रखगा तिसेरा ही छुटकारा होणा।

²³जां भी से तुसा जो इस सहर बिच तंग करो, तां दूज्जे सहर नह्स्सी जायो किजोकी मैं तुसा जो सच बोलदा इसका पैल्ले तुसा इस्राएल रे सब सहरां बिच जाणा खत्म करो मणू रे पुत्तर जे मैं ही है, ने आई जाणा।

²⁴ना चेल्ला अपणे गुरु का अते ना नौक्कर अपणे मालक का बड्डा हुन्दा,

²⁵चेल्‍ले तांइ ए काफी है कि से अपणे गुरु रे बराबर है, अते नौक्कर तांइ ए कि से अपणे मालक रे बराबर है, जे तिन्हा घरे रे मालक जो दुष्टात्मां रा सरदार बोल्ली दित्तेया तां घरे रे दूज्जेयां लोक्कां जो कै किच्‍छ नी बोलणा।

²⁶इधेरे तांइ उन्हा का डरदे मत, किजोकी जे किच्‍छ लूक्के रा है, सब सामणे आई जाणा

²⁷जे मैं तुसा रे कने न्यहारे बिच बोलदा तिसजो तुसा लौ बिच बोलो अते जे मैं तुसा रे कन्ना बिच बोल्लेया है, तिसजो घरे री छत्त पर चढ़ी करी प्रचार करो।

²⁸उन्हा का मत डरो जे सरीर जो मारदे हिन पर आत्‍मा जो नी मारी सकदे, बल्कि परमेश्वर का डरो जे आत्‍मा अते सरीर दोनां जो नरक बिच नास करी सकदा।

²⁹कै बड़ी घट कीमत बिच दो गौरेयां चिड़ी नी बिकदी? फिरी भी तुसा रे पिता री मर्जी रे बगैर इन्हा बिच का इक्क भी जमीन पर नी पेई सकदी।

³⁰तुसा रे सिर रे बाल तक भी गिणे रे हिन,

³¹इधेरे तांइ डरो मत किजोकी तुसा तदेयी मती सारी चिड़ियाँ का भी केई जादा बधी करी हिन।

³²जे कोई मेरे जो मणूआं रे सामणे अपनांगा, मैं भी तिसजो अपणे स्वर्ग बिच रैह्णे वाले परम-पिता रे सामणे अपणाई लैणा।

³³पर जे मणूआं रे सामणे मेरे जो नी अपनांगा, मैं भी तिसजो अपणे पिता रे सामणे जे स्वर्ग बिच हिन, नी अपनाणा।

³⁴ए मत सोच्चो कि मैं दुनिया रे लोक्कां बिच मेल-मिलाप करवाणा आए रा है, पर लोक्कां जो इक्क-दूए रे खिलाफ करणा आए रा है,

³⁵मैं मुंडे जो तिसेरे प्यो रे खिलाफ, कुड़ी जो उसेरी मां रे खिलाफ, नूह जो तिसेरी सस्सू रे खिलाफ करणे तांइ आये रा है।

³⁶अते तुसा रे दुश्मण तुसा रे अपणे घरे रे ही मणू होणे।

³⁷जे अपणे मां-प्यो जो मेरे का जादा प्यार करदा, से मेरा चेल्ला होणे रे लायक नी है, जे अपणे बच्चेयां जो मेरे का जादा प्यार करदा, से मेरा चेल्ला होणे रे लायक नी है,

³⁸अते जे अपणे आप्पे रा इन्कार करी के अपणे दुख री सुली चुक्की करी मेरे पीच्छे नी चलदा, से मेरा चेल्ला बणने रे लायक नी है।

³⁹जे अपणी जिन्दगी जो बचाणे री इच्छा रखदा तिसने तिसजो गुआई दैणा, अते जे मेरी वजह कने अपणी जिन्दगी जो गुआणा, तिन्ने तिसजो पाणा।

⁴⁰जे तुसा जो अपणाई लिंदा, से मेरे जो अपणाई लिंदा, अते जे मेरे जो अपणांदा से मेरे भेजणे वाले जो अपणाई लिंदा।

⁴¹जे कुसकी भविष्यद्वक्ता जो भविष्यद्वक्ता समजी करी अपणांदा, तिसजो से ही ईनाम मिलणा जे भविष्यद्वक्ता जो मिलणा, अते जे तुसा कुसकी धार्मिक मणू जो धार्मिक मणू मन्नी करी अपणांदे तां तुसा जो से ही ईनाम मिलणा जे धार्मिक मणू जो मिलणा चाएदा।

⁴²जे कोई मेरे इन्हा भोले-भाले चेल्‍लेयां जो इक्क गलास ठण्डा पाणी पीणे जो दे कि से मेरा चेल्ला है, तां मैं तुसा रे कने सच्ची बोलदा कि तिसजो इधेरा ईनाम मिलणा ही मिलणा।