Read Chambeali मत्ती 15 Bible Online

मत्ती 15 - Chambeali bible

मत्ती 15

¹तां यरुशलेम सहर का किच्‍छ फरीसी अते शास्त्रि मणू यीशु का आई करी बोलणा लग्गे,

²तेरे चेल्‍ले बुजुर्ग मणू रे रीवाजां जो किजो नी मन्दे? से रोट्टी खाणे का पैह्ल्ले हात्थ-पैर किजो नी धोन्दे?

³यीशु ने उन्हा जो जवाब दित्तेया, तुसा भी अपणे रीवाजां री वजह कने किजो परमेश्वर रे हुकमा जो नी मन्दे?

⁴किजोकी परमेश्वर ने बोल्लेया है, अपणे मां-प्यो री बड़ाई करो, अते, जे कोई मां-प्यो जो बुरा बोल्ले, तिसजो मारी दैणा चाएदा।

⁵पर तुसा बोलदे कि जे कोई अपणे मां-प्यो जो बोल्ले, किजोकी मैं अपणा सब किच्‍छ परमेश्वर जो अर्पित करी बैठ्ठे रा है, इधेरे तांइ तुसा री मदत नी करी सकदा।

⁶तां तिसजो अपणे मां-प्यो री बड़ाई करणे री जरुरत नी है, इस्सी तरिक्के कने तुसा परमेश्वर रे हुकमां जो टालदे हिन।

⁷ओ ढोंगियों! यशायाह ने तुसा रे बारे बिच ए भविष्यवाणी ठीक ही कित्ती थी।

⁸ए मणू सिर्फ होंठाँ कने मेरी बड़ाई करदे हिन, पर इन्हेरे मन मेरे का दुर हिन।

⁹ए बेकार अंदर ही मेरी भक्ति करदे, अते मणूआं रे उपदेस जो धर्म रे सिद्धान्त करी के सिखान्दे।

¹⁰तां यीशु ने मणूआं जो अपणे का सद्दी करी तिन्हा जो बोल्लेया, सुणो अते समझो।

¹¹मणू रे मुँह अन्दर जे जान्दा, से मणू जो भिठ्ठा नी करदा, पर उसेरे मुँह का निकलेरी गल्ल तिसजो भिठ्ठा करदी।

¹²तां चेल्‍लेयां ने आई करी तिन्हा जो बोल्लेया, कै तुसा जाणदे हिन कि फरीसी तुसा री गल्ल रा बड़ा बुरा मन्नी गेरे हिन?

¹³पर यीशु ने जवाब दित्तेया, हर इक्क पौधा जे मेरे स्वर्गीय पिता ने नी लाए रा है, से पुट्टी दित्ता जाणा।

¹⁴तिन्हा जो छड्डो से तां अप्पु अन्ने होई करी दूज्जे अन्ने जो रस्ता दसणे वाले हिन, इन्हा दोनां ने ही गत्ता बिच पेई जाणा।

¹⁵पतरस ने बोल्लेया, ए उदारण असा जो समझाई देयो।

¹⁶यीशु ने बोल्लेया, कै तुसा हल्ले तांइ भी नी समजे?

¹⁷कै तुसा नी जाणदे कि जे किच्‍छ भी मुँह बिच जान्दा से पेट्टा बिच जान्दा, अते संडास का निकली जान्दा?

¹⁸पर जे किच्‍छ मुँह का निकलदा, से दिल का निकलदा, ते सेह्ई मणू जो भिठ्ठा करदा।

¹⁹किजोकी बुरी गल्लां, खून करणा, बगैर ब्याहतिरी जनानी कने व्यभिचार, पराई जनानी नाजायज़ रिस्ता, व्यभिचार, चोरी, झूठ्ठी गुवाई, बेजती करणा जदेई बुराईयां दिल का ही निकलदी।

²⁰ए ही गल्लां हिन जे मणू जो भिठ्ठा करदी, बगैर हात्थ-पैर धोये रे रोट्टी खाणे कने कोई भिठ्ठा नी हुन्दा।

²¹फिरी यीशु तित्ते का निकली करी, सूर अते सैदा रे सहर रे पास्से चली गे।

²²अते दिख्खो, तिस प्रदेश का इक्क कनानी जनानी आई अते चिंडा मारी के बोलणा लग्गी, ओ प्रभु, दाऊद री संतान, मेरे पर दया करो! मेरी कुड़ी जो दुष्टात्मा बड़ी तंग है करेया करदी।

²³पर तिन्हा ने तिसजो कोई जवाब नी दित्तेया तां यीशु रे चेल्‍लेयां ने आई करी तिन्हेरे छन्दे कित्ते कि, इसजो भेजी देंन, किजोकी ए लेरां मारदे-मारदे असां रे पीच्छे है आया करदी।

²⁴पर यीशु ने उन्हा जो बोल्लेया, इस्राएल रे ‍खानदान री गुअच्चे री भेड़ां जो छड्डी मैं होर कुसकी का नी भेजेया गे रा है।

²⁵पर से आई अते यीशु री प्रणाम करी के बोलणा लग्गी, ओ प्रभु, मेरी मदत करो।

²⁶यीशु ने तिसजो बोल्लेया, मुन्डेयाँ री रोट्टी लेई करी कुतेंयाँ रे मुहाग्गर पाणा ठीक नी है।

²⁷तिनिये बोल्लेया, सच है प्रभु, पर कुते भी से चुरा चारा खान्दे जे तिन्हेरे मालका रे मेज का पैन्दा।

²⁸तां यीशु ने बोल्लेया, ओ जनानी, तेरा विश्वास बड्डा है, जिय्यां तू चाह्दीं, तिय्यां ही तेरे तांइ हो। तिसेरी कुड़ी तिस्सी बेल्ले ठीक होई गई।

²⁹यीशु तित्ते का गलील री झील रे कनारे पूज्जे से इक्क पहाड़ पर चढ़ी करी तित्ते बेई गे।

³⁰अते मणूआं री बड़ी बड्डी भीड़ तिन्हा का आई अते से अपणे कने लंगड़े, लूले, अन्ने, जल्ले अते होर भी बड़े जणेया जो तिन्हेरे का लियाये अते तिन्हा जो यीशु रे पैरा का रख्खी दित्तेया अते यीशु ने उन्हा जो खरा करी दित्तेया।

³¹जां मणूआं ने दिख्खेया कि जल्ले बोलदे हिन ते टुण्डे ठीक होई गे, लट्टे चलदे अते अन्ने दिखदे तां से हैरान होई गे अते से इस्राएल रे परमेश्वर री बड़ाई करणा लग्गे।

³²यीशु ने अपणे चेल्‍लेयां जो अपणे का सद्देया अते बोल्लेया, मेरे जो इस भीड़ पर तरस आन्दा किजोकी ए मणू तीन्न रोज्ज का मेरे कने हिन अते इन्हा का किच्‍छ भी खाणे जो नी है, मैं इन्हा जो भूखा भेजणा नी चाह्‍ंदा, कुदखी इय्यां नी हो कि रस्ते बिच ही अद्ध-मरे होई जाओ।

³³चेल्‍लेयां ने उन्हा जो बोल्लेया, असा जो इस बंजर जगाह् बिच कुते का इन्नी रोट्टी मिलणी कि असी इन्नी बड्डी भीड़ जो रजाई सकण?

³⁴यीशु ने तिन्हा जो पूच्छेया, तुसा रे का किन्नी रोट्टी हिन? तिन्हा ने बोल्लेया, सत्त रोटियां, अते थोड़ी करी हल्कियां मछियां भी हिन।

³⁵तां तिन्हा ने मणूआं जो जमीन पर बैणे रा हुकम दित्तेया।

³⁶ते तिन्हा सत्त रोटियां अते मच्छियाँ जो लेया अते शुकर करी के तोड़ेया, ते अपणे चेल्‍लेयां जो दिदें गे ते चेल्‍ले मणूआं जो।

³⁷से सब खाई करी रजी गे अते चेल्‍लेयां ने बचे रे टुकड़ेयां कने भरितेरे सत्त टोकरे चुक्के।

³⁸खाणे वाले जनानियां अते निक्केयां रे अलावा चार हजार मड़द थिये।

³⁹तां से भीड़ जो भेजी करी किस्ती पर चढ़ी गे, अते मगदन देस री सीमा बिच आये।