Read Chambeali मत्ती 18 Bible Online

मत्ती 18 - Chambeali bible

मत्ती 18

¹तां यीशु रे चेल्‍ले यीशु का आई करी पूच्छणा लगे, कि स्वर्ग रे राज बिच बड्डा कुण है?

²अते यीशु ने इक्क निक्के जो सद्देया अते तिन्हेरे मझाटे खड़ा करी दित्तेया।

³ते बोल्लेया, मैं तुसा कने सच बोल्दा, जां तांइ तुसा अपणे पाप्पां का तौबा करी के बच्चेयां सांई नी बणी जान्दे, स्वर्ग रे राज बिच जाई नी सकणा।

⁴जे कोई अपणे आप जो इस निक्के रे बराबर निम्मता करगा, तिनिये स्वर्ग राज बिच बड्डा होणा।

⁵अते जे कोई मेरे नां कने इस निक्के जो अपनान्दा, से मेरे जो अपनान्दा।

⁶पर जे कोई मेरे पर विश्वास करणे वाले मेरे कुसकी निम्मते चेल्‍ले रे रस्ते री रुकावट बणदा, खरा हुन्गा कि तिसेरे गले बिच इक्क चक्की रा पाट लटकाई करी तिसजो समुंद्र बिच डूबाई दित्तेया जाये।

⁷अड़चणा री वजहा कने दुनिया पर लाणत है! रुकावट तां आणी ही हिन, पर लाणत तिस मणू पर जिसेरी वजह कने आंदी।

⁸जे तेरे हत्थ या तेरे पैर तेरे पाप करणे री वजह बणदे, तां तिन्हा जो कट्टी करी सूटी दे, किजोकी लगंड़ा-लुला होई करी हमेसा री जिन्दगी बिच आणा इसका केई जादा खरा है, कि दो हत्थ अते पैर हुन्दे-सुन्दे तिज्जो हमेसा तिकर बलणे वाली आग्ग बिच पाई दित्तेया जाये।

⁹अते जे तेरी हाख्खी तेरे का पाप करान्दी, तां तिसजो कड्डी सुट्ट किजोकी टीणा होई करी जिन्दगी बिच आणा इसका केई जादा खरा है, कि दो हाख्खियां हुन्दे सुन्दे तू नरक री आग्ग बिच पाई दित्तेया जाये।

¹⁰इधेरे तांइ दिख्खो, तुसा इन्हा मेरे भोले बच्चेयां बिच का कुसकी जो भी छोटा मत समजदे, किजोकी मैं तुसा जो बोल्दा, कि स्वर्ग बिच दूत मेरे स्वर्गीय पिता रे सामणे हाजिर रैहन्दे।

¹¹किजोकी मणू रा पुत्तर, जे मैं ही है, गुअच्चे रे लोक्कां जो तोपणे तांइ आए रा है।

¹²तुसा कै समजदे? जे कुसकी मणू री सौ भेड़ां होण, ते तिन्हा बिच का इक्क गुआची जाण, तां कै से नड़िनुये जो छड्डी करी तिस गुआची री भेड़ जो तोपणा नी जांगा?

¹³अते जे जां से तिसजो मिल्ली जाणी, मैं तुसा जो सच बोल्दा, तिसजो तिन्हा नड़िनुये भेड़ां तांइ इन्नी खुसी नी होणी जितणी कि इस इक्क भेड़ तांइ होणी।

¹⁴इय्यां ही तुसा रे स्वर्गीय पिता भी नी चाह्‍ंदे कि इन्हा छोटेयां बिच का कोई नास हो।

¹⁵जे तेरा संगी विश्वासी तेरे कने बुरा करण तां, जा ते कल्ले बिच तिस कने गल्ल-बात करी के समझा, जे से तेरी सूणदा तां समजी लै कि तू तिसजो पाई लेया।

¹⁶अगर जे से तेरी नी सूणदा तां अपणे कने इक्क-दो जणे होर लेई जा, ताकि मूसा रे कानून रे हिसाब कने हर गल्ल री दो-तीन्न लोक्कां सामणे गवाई होणी चाएदी।

¹⁷जे से तिन्हा लोक्कां री भी ना सुणे, तां कलीसिया जो तिस कने गल्ल करणे तांइ बोल, जे से कलीसिया री भी नी सुणे, तां तुसा तिसजो कलीसिया का कड्डी देयो ते तिस कने इदेया बर्ताव रख्खो जदेया तुसा कुसकी गैर-यहूदी ते चुंगी लैणे वाले कने करदे।

¹⁸मैं तुसा कने सच बोलदा, जे किच्‍छ तुसा दुनिया बिच बणना, स्वर्ग बिच बन्नेया जाणा अते जे किच्‍छ तुसा दुनिया पर खोलणा से स्वर्ग अन्दर खोल्लेया जाणा।

¹⁹मैं तुसा कने फिरी सच बोलदा, जे तुसा रे बिच का दो जणे कुसकी गल्ल तांइ इकमत होई करी प्रार्थना करो[7], तां तिसजो मेरे स्वर्ग बिच रैह्णे वाले पिता ने पूरा करी दैणा।

²⁰किजोकी जित्ते मेरे पर विश्वास करणे दो या त्रै मणू मेरे नां कने इकट्ठा हुन्गे, तिन्हेरे मैं बिच मझाटे होणा।

²¹तां पतरस ने आई करी यीशु जो पूच्छेया, प्रभु, मेरा संगी विश्वासी कितणी वरी मेरे कने गलत करदा रे कि मैं तिसजो माफ करां? कै सत्त वरी तांइ?

²²[8]यीशु ने तिसजो बोल्लेया, मैं तेरे कने ए नी बोलदा कि सत्त वरी तांइ, पर सत्त वरी रे सत्तर गुणा तांइ माफ कर।

²³इधेरे तांइ स्वर्ग रे राज इक्क इदेय राज्जे सांई है जिनिये अपणे नौकरांं का हिसाब-किताब मंगेया।

²⁴जां से हिसाब-किताब लैणा लग्गेया तां इक्क मणू जो लियाया गेया जिस पर दस हजार तोड़े[9] रा उधार थिया।

²⁵पर जां तिसका उधार चुकाणे तांइ किच्‍छ नी थिया तां उसेरे राज्जे ने हुकम दित्तेया कि, तिसजो अते उसेरे लाड़ी-बच्चे, ते जे किच्‍छ तिसका है, सब बेच्ची करी उधार पूरा कित्तेया जाये।

²⁶तां से नौक्कर पैरा पेई गेया अते बोलणे लग्गेया, मालक सबर रखो मैं सब किच्‍छ चुकाई दिंगा।

²⁷तां उस नौक्कर रे मालक ने तरस खाई करी तिसजो छड्डी दित्तेया अते तिसेरा उधार भी माफ करी दित्तेया।

²⁸पर से नौक्कर बाहर निकलेया अते तिसजो तिसेरा इक्क साथी नौक्कर मिलेया जिस का तिसने सौ दीनार [10] लैणे थिये उसने तिसजो पकड़ेया अते तिसेरा गला पकड़ी करी बोल्लेया, मेरा पैसे दे!

²⁹तां से तिसेरा साथी नौक्कर पैरा पेई करी छन्दे करणा लगेया, सबर रखो, मैं सब देई दिंगा

³⁰से फिरी भी नी मन्नेया अते तिसजो तां तांइ जेल बि पाई रख्खेया जां तांइ उधार देई ना दैण।

³¹ए दिख्खी करी तिसेरे साथी नौकरांं जो बड़ा जादा बुरा लग्गेया अते तिन्हा ने जाई करी ए सारी गल्ल अपणे मालक जो सूणाई दित्ती।

³²तां तिस राज्जे ने अपणे तिस नौक्कर जो सद्देया जिस जो दस हजार तोड़े उधार दित्ते थिये ते तिसजो सद्दी करी बोल्लेया, ओ बुरे नौक्कर, तेरे छन्दे करणे पर मैं तेरा उधार माफ करी दित्तेया थिया,

³³मैं जिय्यां तेरे पर तरस खाया थिया, तिज्जो भी तिय्यां ही अपणे साथी नौक्कर पर भी तरस खाणा चाएदा थिया।

³⁴अते मालक ने गुस्सा होई करी तिसजो सजा दैणे वाले रे हत्थे देई दित्तेया ताकि से उधार चुकाणे तक तिन्हेरे ही हत्थां रेह्।

³⁵इय्यां ही जे तुसा बिच सब अपणे संगी विश्वासी जो माफ नी करगे तां मेरे स्वर्ग बिच रैह्णे वाले पिता ने भी तुसा कने तिय्यां ही करणा।