Read Chambeali मत्ती 20 Bible Online

मत्ती 20 - Chambeali bible

मत्ती 20

¹स्वर्ग रा राज इक्क इदेइ कहाणी जदेया है, जिस बिच इक्क घर रा मालक अपणे अंगूर रे बगीच्चे बिच मजदूरां जो कम्मां पर लाणा जांदा।

²तिनिये मजदूरां पर इक्क दीनार [11]रोज रा ठहराया ते उन्हेरे जो अपणे अंगूर रे बगीच्चे बिच भेज्जेया।

³फिरी नौ [12]बजे तिनिये निकली करी होर लोक्कां जो बजार बिच बेकार खड़ित्ते रे दिख्खेया।

⁴ते उन्हा जो बोल्लेया, तुसा भी अंगूर रे बगीच्चे बिच जाओ, ते जिन्नी धियाड़ी बणगी, तुसा जो दिंगा अते से भी गे।

⁵फिर तिनिये धियाड़ी रे बारा [13]बजे ते फिरी त्रै [14]बजे दुबारा निकली करी तिय्यां ही कित्तेया।

⁶सँझ रे पाज्जं बजे रे नेड़े-तेड़े तिनिये फिरी निकली करी लोक्कां जो खड़ित्ते रे दिख्खेया, ते उन्हेरे जो बोल्लेया, तुसा किजो सारी धिहाड़ी इत्ते बेकार खड़ी रेय? उन्हा ने तिसजो बोल्लेया, इस तांइ किजोकी कुसकी ने असा जो मजदूरी पर नी लाया।

⁷तिनिये उन्हा जो बोल्लेया, तुसा भी अंगूर रे बगीच्चे बिच जाओ ते तित्ते कम्म करो।

⁸सज्जां बेल्ले अंगूर रे बगीच्चे रे मालक ने अपणे मुशीं जो बोल्लेया, सारे दिन अंदर जिनिये मजदूर आए रे हिन, तिन्हा सारेयां जो तिन्हेरी धियाड़ी देई देयो।

⁹जां से आए जे घटां भर धिहाड़ी लाए गे थिये[15], उन्हा जो इक्क-इक्क दीनार मिल्लेया।

¹⁰जे मजदूर भ्यागा ही आए थिये, उन्हा ने ए समजेया कि असा जो जादा मिलणा, पर उन्हा जो भी इक्क-इक्क दीनार [16]ही मिल्लेया।

¹¹जां मिल्लेया तां से घरे रे मालक पर बूड़बूड़ाइ करी बोलणा लग्गे,

¹²इन्हा पिछलेयां ने इक्क ही घटां कम्म कित्तेया, पर असी तां सारे दिन कड़ी धूप्प बिच मैहनत कित्ती ते भार चुक्केया पर तुसा उन्हेरे जो हमारे बराबर ही धियाड़ी दित्ती।

¹³तिस बगीच्चे रे मालक तिन्हेरे बिच का इक्क जो जवाब दित्तेया, ओ मित्तर, मैं तेरे कने किच्‍छ अन्याय नी है करेया करदा? कै मैं तेरे जो पैल्ले ही नी दस्सेया थिया कि पूरे दिन रे कम्म तांइ इन्नी ही धियाड़ी मिलणी?

¹⁴अपणी धियाड़ी लेई करी चली जा, किजोकी मेरी मर्जी ए है कि जिन्ना तेरे जो देयां उन्ना ही इन्हा बाद बिच आए रे मजदूरां जो भी देयां।

¹⁵“क्‍या ए ठीक नी है कि मेरी दौलत जो जिय्यां मर्जी इस्तेमाल करां? मेरा कुसकी कने भलाई करणे पर तिज्जो जलन नी होणा चाएदी।

¹⁶इसी तरिके कने जे पिछले हिन, पैल्ले कित्ते जाणे ते जे पैल्ले हिन, से पिछले होणे।” इसी तरिक्के कने परमेश्वर ने भी तिन्हा लोक्कां जो हिसाब-किताब रे दिन पर ईनाम दैणा जे अब्बे घट समजे जांदे।

¹⁷यीशु यरुशलेम सहर जादें बेल्ले बारां चेल्‍लेयां जो किल्ले बिच लेई गेया ते रस्ते बिच उन्हा जो बोलणा लग्गेया।

¹⁸दिख्खो, असी यरुशलेम जो जाया करदे हिन ते मणू रा पुत्तर, जे मैं ही है बड्डे पुरोत्त ते शास्त्रियां रे हत्थां पकड़वाया जाणा, ते उन्हा ने उन्हेरे जो मारणे जोग्गे ठैहराणा।

¹⁹ते तिन्हा जो गैर-यहूदियां रे हत्थां बिच सौपेंया जाणा कि से तिन्हेरा मजाक उडा़ण, ते कोड़े मारण, ते सुली पर चढ़ा़ण, ते से तिज्जे रोज्जे फिरी जिन्दा कित्ते जाणे।

²⁰तां जब्दी रे पुत्तरां री मां ने, अपणे पुत्तरां कने यीशु रे नेड़े आई करी उन्हा जो प्रणाम कित्तेया, ते उन्हा का किच्‍छ मगंणा लग्गी।

²¹उन्हा ने उन्हेरे जो बोल्लेया, तू कै चाह्दि? से उन्हा जो बोलणा लग्गी, ए वचन दयो कि मेरे ए दो पुत्तर तेरे राज बिच इक्क तुसा रे सज्जे ते इक्क तुसा रे खब्बे पास्से बैठ्ठे।

²²यीशु ने तिन्हा दोन्नां जो जवाब दित्तेया, तुसा नी जाणदे कि तुसा कै मंगदे हिन। जे दुख मैं सहणे वाला है कै तुसा से सही सकदे? तिन्हा दोन्नां ने यीशु जो बोल्लेया, हाँ, असी सही सकदे।

²³उन्हा ने उन्हेरे जो बोल्लेया, तुसा मेरा कटोरा तां पिग्गें पर अपणे सीद्दे पास्से ते पुठ्ठे पास्से बेठ्ठाणा मेरा कम्म नी है, पर जिन्हेरे तांइ मेरे पिता रे पास्से का तैयार कित्ते रे गेया है उन्हेरे तांइ है।

²⁴ए सुणी करी सारे दसों ही चेल्‍ले उन्हा दोन्नां भाईयां पर गुस्सा होए।

²⁵यीशु ने उन्हा जो नेड़े सद्दी करी बोल्लेया, तुसा जाणदे कि गैर-यहूदियां रे हाकिम उन्हा पर राज करदे ते जे बड्डे हिन, से उन्हा पर हक्क जतादें।

²⁶पर तुसा बिच इय्यां नी होणा पर जे कोई तुसा बिच बड्डा होणा चाह्‍ंदा, से तुसा रा नौक्कर बणे।

²⁷ते जे तुसा बिच कोई प्रधान बणना चाह्‍ंदा से तुसा रा नौक्कर बणे।

²⁸जिय्यां मणू रा पुत्तर, जे मैं ही है से इस तांइ नी आया कि उसेरी सेवा-टहल कित्ती जाए, पर इस तांइ आया कि अप्पु सेवा टहल करे ते मते जणेया रे छुटकारे तांइ अपणी जान देई दे।

²⁹जां से यरीहो का निकलेया करदे थिये, तां इक्क बड्डी भीड़ उन्हेरे पीच्छे चली पेई।

³⁰ते दो अन्ने, जे सड़क रे कनारे बैठ्ठे रे थिये, ए सुणी करी कि यीशु जाया करदे हिन, हक्क मारी करी बोलणा लग्गे, ओ प्रभु दाऊद री औलाद, असा पर दया कर।

³¹लोक्कां ने उन्हेरे जो झिड़केया कि चुप रैह्ण पर से होर भी चिल्लाई करी बोलणा लग्गे, ओ प्रभु दाऊद री औलाद असा पर दया करो।

³²तां यीशु ने खड़ी करी, उन्हेरे जो सद्देया ते बोल्लेया, तुसा कै चाह्‍ंदे कि मैं तुसा तांइ करां?

³³तिन्हा ने उन्हेरे जो बोल्लेया, “ओ प्रभु, ए ही कि असा री हाख्खियां खुली जाण।”

³⁴यीशु ने तरस खाई करी उन्हेरी हाख्खी छुई, ते से तिस्सी बेल्ले दिखणा लग्गी पेय ते उन्हेरे पीच्छे चली पेय।