Read Chambeali मत्ती 21 Bible Online

मत्ती 21 - Chambeali bible

मत्ती 21

¹जां से यरुशलेम सहर रे नेड़े आई रेह् अते जैतून पहाड़ पर बैतफगे पूज्जे, तां यीशु ने दो चेल्‍लेयां जो ए बोल्ली करी भेज्जेया,

²सामणे वाले ग्रां बिच जाओ उत्ते जादें कने ही गधी ते तिसेरा बच्चा बन्ने रा मिलणा तिन्हेरे जो खोल्ली करी लेई आओ।

³जे कोई तुसा जो किच्‍छ बोल्ले, तां बोल्ली देयो कि प्रभु जो इसेरी जरुरत है, तां तिनिये तिस्सी बेल्ले तिसजो भेज्जी दैणा।

⁴ए इस तांइ होया कि जे गल्ल भविष्यद्वक्ता रे जरिए बोल्ली गेई थी से पूरी हो;

⁵“सिय्योन री कुड़ी जो बोल्लो, ‘दिख्ख, तेरा राज्जा तेरे का आदां है; से नमर, ते गधे पर बैठ्ठे रा है; बल्कि लादू रे बच्चे पर।’”

⁶चेल्‍लेयां ने जाई करी जिय्यां यीशु ने बोल्लेया थिया, तिय्यां ही कित्तेया।

⁷ते गधी ते तिसेरे बच्चे जो लाई करी तिन्हेरे पर अपणे कपड़े पाई दित्ते, ते से तिन्हेरे पर बेई गे।

⁸तां मते सारे लोक्कां ने अपणे कपड़े रस्ते बिच बिछाए, ते होर लोक्कां ने बूट्टेयां का डाल कटी करी रस्ते बिच बिछाए।

⁹जे भीड़ अग्गे-अग्गे जाया करदी थी ते जे पीच्छे का आया करदी थी, हक्कां लाई-लाई करी बोलदी थी, “दाऊद री औलाद री जय हो है, धन्न है से जे प्रभु रे नां कने आदां, स्वर्ग बिच जय हो।”

¹⁰जां यीशु यरुशलेम सहर बिच आए, तां सारे नगर बिच हलचल मची गई, ते मणू बोलणा लगे, ए कुण हिन?

¹¹लोक्कां ने बोल्लेया, गलील रे नासरत रे भविष्यद्वक्ता यीशु हिन।

¹²यीशु ने परमेश्वर रे मन्दिर बिच जाई करी तिन्हा सारेयां जो, जे सभास्थल बिच लैण दैण करदे थिये, कड्डी दित्ता, ते सर्राफेयां रे पीढ़े ते कबूतर बेचणे वालेयां री चौकियां पलटी दित्ती।

¹³ते तिन्हेरे जो बोल्लेया, लिख्खे रा है कि मेरा घर प्रार्थना रा मन्दिर होणा पर तुसा तिसजो डाकुआं रा अड्डा बणादें।

¹⁴तां अन्ने ते लगंड़े तिन्हेरे का मन्दिर बिच आए, ते तिन्हा ने तिन्हेरे जो ठीक कित्ता।

¹⁵पर जां बड्डे पुरोत्त ते शास्त्रियां ने इन्हा अनौखी गल्लां जो दिख्खेया जे तिन्हा ने कित्ते थिये, ते मुडेंया जो मन्दिर बिच दाऊद री सतांन री जय हो बोलदे सूणेया, तां से गुस्से होए।

¹⁶ते तिन्हा जो बोलणा लग्गे, कै तू सूणदा कि ए मणू कै हिन बोल्लेया करदे? यीशु ने तिन्हा जो बोल्लेया, हाँ कै तुसा ए कदी नी पढ़ेया: मुडेंया ते दूद्द पिदें बच्चेयां का तू अपणी महिमा कराई?

¹⁷तां से तिन्हा जो छड्डी करी नगर का बाहर बैतनिय्याह जो गे ते तित्ते रात बिताई।

¹⁸भ्यागा जां से नगर जो हटेया करदे थिये तां तिन्हा जो भूख लग्गी।

¹⁹सड़क रे कनारे इक्क अंजीर रा इक्क बूट्टा दिख्खी करी तिसेरे नेड़े गे ते पत्तेयां जो छड्डी करी तिस बिच होर किच्‍छ ना पाई करी तिसजो बोल्लेया, अब्बे का तेरे बिच फिरी कदी फल्ल ना लगे ते अंजीर रा बूट्टा तिसी बेल्ले सुकी गेया।

²⁰ए दिख्खी करी चेल्‍लेयां जो हैरानी होई ते तिन्हा ने बोल्लेया, ए अंजीर रा बूट्टा इन्नी तौले किय्यां सुकी गेया?

²¹यीशु ने तिन्हा जो जवाब दित्तेया, मैं तुसा कने सच बोलदा, जे तुसा विश्वास रखो ते शक ना करो, ते ना सिर्फ ए करगे जे इस अंजीर रे बूट्टे कने कित्ते रा है, पर जे इस पहाड़ कने भी बोलगे, उखड़ी जा, ते समुदंर बिच जाई पे, तां ए होई जाणा।

²²ते जे किच्‍छ तुसा प्रार्थना भी मेरे का मगंगे से सारा किच्‍छ तुसा जो मिलणा।

²³से मन्दिर बिच जाई करी भाषण देया करदे थिये, तां बड्डे पुरोत्त ते यहूदी लोक्कां रे बुजुर्ग लोक्कां ने तिसेरे का जाई करी तिन्हेरे का पूच्छेया, तू ए कम्म कुस हक्क कने करदा? ते तेरे जो ए हक्क कुनिये दित्ते रा है?

²⁴यीशु ने तिन्हेरे जो जवाब दित्तेया, मैं भी तुसा का इक्क गल्ल पूच्छदा जे तुसा मेरे जो से दस्सी दिंगे तां मैं भी तुसा जो दसणा कि ए कम्म कुस हक्क कने करदा।

²⁵यूहन्ना रा बपतिस्मा कुते का थिया? स्वर्ग रे पास्से का या मणूआं रे पास्से का? तां से अप्पु बिच बैह्स करणा लग्गी पेय, जे असी बोलण स्वर्ग रे पास्से का, तां तिनिये असा कने बोलणा फिरी तुसा तिसेरा विश्वास किजो नी कित्ता?

²⁶ते जे बोलिये मणूआं रे पास्से का, तां असा जो भीड़ रा डर है, किजोकी से सारे यूहन्ना जो भविष्यद्वक्ता मनदे।

²⁷अते तिन्हा ने यीशु जो जवाब दित्ता, असी नी जाणदे तिन्हा ने भी तिन्हेरे जो बोल्लेया, तां मैं भी तुसा जो नी दसदा की ए कम्म कुस हक्क कने करदा।

²⁸तुसा इस उदारण रे बारे बिच कै सोचदे? कुसकी मणू रे दो पुत्तर थिये तिसने पैल्ले का जाई करी बोल्लेया, ओ पुत्तर अज्ज अंगूर रे बगीच्चे बिच कम्म कर।

²⁹तिसने जवाब दित्ता, मैं नी जाणा, पर बाद बिच पछताई करी से बगीच्चे बिच कम्म करणा चली गेया।

³⁰फिरी प्यो ने जाई करी दूए मुंडे जो इय्यां ही बोल्लेया, तिसने जवाब दित्तेया, हाँज्जी, जादां, पर से नी बगीच्चे बिच कम्म करणा नी गेया।

³¹इन्हा दोन्नां बिच का कुसने पिता री मर्जी पूरी कित्ती? तिन्हा ने बोल्लेया, पैल्ले मुंडे ने, यीशु ने बोल्लेया, मैं तुसा कने सच बोलदा की महसुल लैणे वाले ते वेश्या तुसा का पैल्ले स्वर्ग रे राज बिच पुजदे।

³²किजोकी यूहन्ना बपतिस्मा दैणे वाला धार्मिकता रा रस्ता दसदे होए तुसा का आया, ते तुसा ने तिसेरा विश्वास नी कित्ता पर महसुल लैणे वालेया ने ते वेश्या ने तिसेरा विश्वास करी के अपणे पाप्पां का तौबा कित्ती ते तिसेरे गलाए चलणा लग्गी पये, ते तुसा ए दिख्खी करी बाद बिच भी नी पछताए की तिसेरा विश्वास करी लिदें।

³³इक्क होर उदारण सुणो: इक्क घर रा मालक थिया जिनिये अंगूर रा बगिचा लाया, तिसेरे चारो पास्से बाड़ा लाया, तिस बिच रस्स रा कुआँ खोदेया ते गुम्मट बणाया, ते कसानों जो तिसेरा ठेका देई करी परदेस चली गेया।

³⁴जां फल्ल रा बेल्ला नेड़े आया तां तिसने अपणे नौकरांं जो तिसेरा फल्ल लैणे तांइ कसानां का भेज्जेया।

³⁵पर किसानां ने तिसेरे नौकरांं जो पकड़ी करी, कुसकी जो कुट्टेया, ते कुसकी जो मारी रख्खेया ते कुसकी पर बट्टे मारे।

³⁶फिरी तिसने पैल्ले का जादा नौकरांं जो भेज्जेया, ते तिन्हा ने तिन्हेरे का भी तिय्यां ही कित्तेया।

³⁷आखर बिच तिसने अपणे मुडें जो तिन्हेरे का ए सोच्ची करी भेज्जेया की से मेरे मुडें री बड़ाई करगे।

³⁸पर किसानां ने तिस मुडें जो दिख्खी करी अप्पु बिच बोल्लेया, ए तां वारिस है, आओ, इसजो मारी रखदे ते इसेरी मिरास लेई लिदें।

³⁹अते तिन्हा ने तिसजो पकड़ेया ते अंगूर रे बगीच्चे का बार कड्डी करी मारी रख्खेया।

⁴⁰इस तांइ जां अंगूर रे बगीच्चे रा मालक आंगा तां तिन्हा किसानां कने कै करगा?

⁴¹तिन्हा ने तिस कने बोल्लेया, तिनिये तिन्हा बुरे लोक्कां जो बुरे तरिक्के कने खत्म करी रखणा ते अंगूर रे बगीच्चे रा ठेका दूए किसानां जो दैणा, जिन्हा ने ठीक बेल्ले तिसजो फल्ल दैणा।

⁴²यीशु ने तिन्हा जो बोल्लेया, कै तुसा कदी पवित्रशास्त्र बिच ए नी पढ़ेया: जिस बट्टे जो राजमिस्त्रियां ने ठुकराई दित्तेया थिया, से ही कुणे रे सिरे रा बट्टा होई गेया? ए परमेश्वर रे पास्से का होया ते असा री नजर बिच अनौखा है।

⁴³इसी तांइ मैं तुसा जो बोलदा की परमेश्वर रा राज तुसा का लेई लित्तेया जाणा ते इदेइ गैर यहूदी जाति जो दित्तेया जाणा जे तिसेरा फल्ल लाए।

⁴⁴जे इस बट्टे पर पैगां, से चकनाचूर होई जाणा ते जिस पर से पैणा, तिसजो पीह् रखणा।

⁴⁵बड्डे पुरोत्त ते फरीसी तिसेरे उदारणा जो सुणी करी समजी गे की से तिन्हेरे बारे बिच बोल्लेया करदे थिये।

⁴⁶ते तिन्हा ने तिन्हेरे जो पकड़ना चाएया पर लोक्कां का डरी गे किजोकी से तिन्हेरे जो भविष्यद्वक्ता मनदे थिये।