Read Chambeali मत्ती 22 Bible Online

मत्ती 22 - Chambeali bible

मत्ती 22

¹फिरी यीशु तिन्हा कने उदारण बिच गल्लां करणा लगे।

²स्वर्ग रा राज तिस कहाणी सांई है जिस बिच इक्क राज्जे ने अपणे मुंडे रा ब्याह तांइ बड्डी धाम दित्ती।

³ते तिसने अपणे नौक्कर जो भेज्जेया कि सद्दे रे लोक्कां जो ब्याह री धाम बिच सद्दी लेई आए।

⁴फिर तिनिए होर नौकरांं जो ए बोल्ली करी भेज्जेया, सद्दे रे लोक्कां जो बोल्लो: दिख्खो, मैं धाम दैणे तांइ बदिया-बदिया चीजां भी पकाई करी तैयार करी रख्खे री हिन,

⁵पर से मणू तिसेरी धाम बिच नी जाणा चाह्‍ंदे थिये इधेरे तांइ बहान्ना बणाई करी अपणे खेत्तरां जो ते किच्‍छ अपणे कम्मां जो चली गे।

⁶होर लोक्कां ने जे बचेया करदे थिये तिसेरे नौकरांं जो पकड़ी करी तिन्हेरी बेजती कित्ती ते मारी रख्खेया।

⁷जां राज्जे ने सब सूणेया तां तिसजो जो गुस्सा आया ते तिसने अपणी सैना भेज्जी करी तिन्हा खूनियां जो मारी दित्ता, ते तिन्हेरे सहर जो फुक्की दित्तेया।

⁸तां तिसने अपणे नौकरांं जो बोल्लेया, ब्याह री धाम तां तैयार है पर सद्दे रे मणू इस बिच शामिल होणे रे जोग्गे नी हिन।

⁹इस तांइ हर चौराहे पर जाओ ते जिन्ने मणू तुसा जो मिलण सारेयां जो ब्याह री धाम बिच सद्दी लेयो।

¹⁰अते तिन्हा नौकरांं ने हर चौराहे पर जाई करी, कै ठीक कै बुरे जिनिये मणू मिल्ले, सारेयां जो कठ्ठेरेया, ते ब्याह रा घर मेहमानां कने भरी गेया।

¹¹जां राज्जा मेहमानां जो दिखणे तांइ अन्दर आया, तां तिसने तित्ते इक्क मणू जो दिख्खेया, जे से कपड़े पाई करी नी आया थिया जे तिसजो ब्याह बिच पाणे तांइ दित्ते गे थिये।

¹²तिसने तिसजो पूच्छेया, ओ दोस्त, तिज्जो जे कपड़े ब्याह बिच पाणे तांइ दित्ते गे थिये तैं से किजो नी पाए? तां तिसेरा मुँह बांद्द होई गेया।

¹³तां राज्जे ने नौकरांं जो बोल्लेया, इसेरे हात्थ-पैर बन्नी करी इसजो बार न्याहरे बिच पाई देयो, तित्ते रोणा ते दांद्द पिह्णा होणा।

¹⁴इस कहाणी सांई ही परमेश्वर ने मते लोक्कां जो सद्दे रा है पर किच्‍छ चुणे रे लोक्कां ने ही तिन्हा कने रैह्णा।

¹⁵तां फरीसियां ने जाई करी अप्पु बिच गल्ल कित्ती की तिसजो किय्यां गल्लां बिच फसाण।

¹⁶अते तिन्हा ने अपणे चेल्‍लेयां जो हेरोदेस रे झुण्ड रे लोक्कां कने तिन्हेरे का ए बोलणे जो भेज्जेया, ओ गुरु, असी जाणदे की तुसा सच्चे हिन, ते परमेश्वर रा रस्ता सच्चाई कने दसदे, ते कुसकी री परवाह नी करदे, किजोकी तुसा मणूआं रा मुँह दिख्खी करी गल्लां नी करदे।

¹⁷इसी तांइ असा जो दस तुसा कै सोचदे? सम्राट जो कर दैणा ठीक है या नी।

¹⁸यीशु ने तिन्हेरी बुराई जो जाणी करी बोल्लेया, ओ कपटियों, मेरे जो किजो हिन परखदे?

¹⁹मेरे जो से सिक्का दिखाओ जिस कने तुसा अपणी चुंगी भरदे, तां से तिन्हा का इक्क दीनार [17]रा सिक्का लेई आए।

²⁰तिन्हा ने तिन्हेरे का पूच्छेया, ए छाप ते निसान कुसेरा है?

²¹यीशु ने तिन्हेरे जो बोल्लेया, जे सम्राट रा है से सम्राट जो देयो, ते जे परमेश्वर रा है से परमेश्वर जो देयो।

²²ए सुणी करी तिन्हेरे जो हैरानी हुई ते तिन्हेरे जो छड्डी करी चली गे।

²³तिसी दिन सदूकी जे बोलदे की मरेयां रा फिरी जिन्दा होणा है ही नी, तिन्हेरे का आए ते तिन्हेरे जो पूच्छेया,

²⁴ओ गुरु, मूसा ने बोल्लेया थिया तां की जे कोई म्हणू बगैर बच्चे रे मरी जाए तां तिसेरा भाई तिसेरी लाड़ी कने ब्याह करी के अपणे भाई रा वशं बधाए।

²⁵अवे असा रे इत्ते सत्त भाई थिये पैहल्ला ब्याह करी के मरी गेया ते बच्चा ना होणे री वजह कने अपणी लाड़ी जो अपणे भाई तांइ छडी गेया,

²⁶इसी तरिक्के कने दूए ते त्रिए ने भी कित्तेया ते सत्तों तिकर ए ही होया।

²⁷सारेया रे बाद से जनानी भी मरी गई।

²⁸अते फिरी जिन्दे होणे पर तिनिये तिन्हा सत्तां बिच का कुसेरी लाड़ी होणी? किजोकी से सारेयां री लाड़ी होई चुके री थी।

²⁹यीशु ने तिन्हा जो जवाब दित्तेया, तुसा पवित्रशास्त्र ते परमेश्वर री ताकत नी जाणदे इसी वजह कने भूल बिच पे रे हो।

³⁰किजोकी फिरी जिन्दे होणे रे बाद तिन्हा ने स्वर्गदूतां सांई होणे।

³¹पर मरे होए रे फिरी जिन्दे होणे रे बारे बिच कै तुसा ए वचन नी पढ़ेया जे परमेश्वर ने तुसा कने बोल्लेया;

³²मैं अब्राहम रा परमेश्वर, ते इसहाक रा परमेश्वर, ते याकूब रा परमेश्वर है? से मरेयां रा नी, पर जिन्देया रा परमेश्वर है।

³³ए सुणी करी मणू तिन्हेरे उपदेस कने हैरान होई गे।

³⁴जां फरीसियां ने सूणेया की यीशु ने सदूकियां रा मुँह बांद्द करी दित्ते रा है तां से कठ्ठे होए।

³⁵तिन्हा बिच का इक्क शास्त्री लोक्कां ने तिन्हा जो परखणे तांइ तिन्हेरे जो पूच्छेया,

³⁶ओ गुरु, परमेश्वर रे कानून बिच कुण वाला हुकम सबका बड्डा है?

³⁷तिन्हा ने तिन्हेरे जो बोल्लेया, तू परमेश्वर अपणे प्रभु कने अपणे सारे मन ते अपणे सारे प्राण ते अपणे सारी समझ कने प्यार कर।

³⁸बड्डा ते खास हुकम ता ए ही है।

³⁹ते तिसी सांई ए दुआ हुकम भी है कि अपणे पड़ोसी कने अप्पु सांई प्यार रख।

⁴⁰ए ही दो हुकम सारे मूसा रे कानून ते भविष्यद्वक्ता रा आधार है।

⁴¹जां फरीसी कठ्ठे थिये, तां यीशु ने तिन्हा का पूच्छेया।

⁴²मसीह यीशु रे बारे बिच तुसा कै सोचदे कि से कुसेरा मुंडा है? तिन्हा ने तिन्हेरे जो बोल्लेया, दाऊद रा।

⁴³तिन्हा ने तिन्हेरे का पूच्छेया, तां दाऊद आत्‍मा बिच होई करी तिसजो प्रभु किजो बोलदा?

⁴⁴प्रभु ने मेरे प्रभु जो बोल्लेया, मेरे सज्जे पास्से बैह्, जा तिकर मैं तेरे बैरियां जो तेरे पैरां रे थल्ले ना करी देयां।

⁴⁵भला, जां दाऊद तिसजो प्रभु बोलदा, तां से तिसेरा पुत्तर किय्यां ठैहरेया।

⁴⁶इसेरे जवाब बिच कोई भी इक्क जवाब भी देई सकेया तिस दिन का कुसकी जो भी तिन्हेरे का कुछ भी पूच्छणे री हिम्मत नी होई।