Read Chambeali मत्ती 27 Bible Online

मत्ती 27 - Chambeali bible

मत्ती 27

¹भ्याग हुन्दे ही सारे बड्डे पुरोत्तां, मन्दिर रे बुजुर्गां अते शास्त्रियां ने यीशु जो मारी रखणे री सलाह कित्ती।

²तिन्हा ने यीशु जो बन्नी दित्तेया, ते लेई जाई करी पिलातुस हाकिम रे हत्थां सौपीं दित्ता।

³जां तिन्हेरे पकड़वाणे वाले यहूदा जो पता लग्गेया कि यीशु जो गुनेह्गार साबत करी के मौत री सजा सूणाई दित्ती गे री है, तां से अपणी करणी पर पछताया ते से तीह् चाँदी रे सिक्केयां जो बड्डे पुरोत्तां ते बुजुर्ग मणू का हटाई लाया,

⁴ते बोल्लेया, मैं बेगुनाह मणू जो मरवाणे तांइ पकड़वाई करी पाप कित्तेया, तिन्हा ने बोल्लेया, असा जो तिसेरी कोई परवाह नी? से तेरी दिक्कत है।

⁵तां से तिन्हा सिक्केयां जो मन्दिर रे अंगण बिच सूटी करी चली गेया, ते जाई करी अप्पु जो फाह लाई लित्ता।

⁶बड्डे पुरोत्त ने तिन्हा सिक्केयां जो लेई करी बोल्लेया, इन्हा जो मन्दिर रे भडांर बिच रखणा मूसा रे कानून रे हिसाब कने ठीक नी किजोकी ए खून करणे री कीमत है।

⁷अते तिन्हा ने सलाह करी के तिन्हा सिक्केयां कने परदेसियां रे गाढ़े जाणे तांइ कुम्हार रे खेत्तर जो खरीदी लित्तेया।

⁸इस तांइ से खेत्तर आज तिकर खून रा खेत्तर केहलादां।

⁹तां जे वचन यिर्मयाह भविष्यद्वक्ता रे जरिए दस्सेया गेया थिया, से पूरा होई गेया, “इस्राएल रे लोक्कां ने जे कीमत तिसेरी ठैहराई थी, तिन्हा ने से तीह् चाँदी रे सिक्के लेई लित्ते।

¹⁰ते जिय्यां परमेश्वर ने मेरे जो हुकम दित्तेया थिया, तिय्यां ही तिन्हा ने तिन्हा सिक्केयां कने कुम्हार रे खेत्तर रे खरीदी लित्तेया।”

¹¹जां यीशु हाकिम रे सामणे खड़ित्ते रे थिये तां हाकिम ने तिन्हा जो पूच्छेया, कै तू यहूदियां रा राज्जा है? यीशु ने तिसजो बोल्लेया, तू अप्पु ही ए बोल्लेया करदा है।

¹²जां बड्डे पुरोत्त ते बुजुर्ग मणू तिस पर इल्जाम लाया करदे थिये, तां तिन्हा ने कोई जवाब नी दित्ता।

¹³इस पर पिलातुस ने तिन्हा जो बोल्लेया, कै तू नी सूणदा कि ए तेरे खिलाफ किन्नी गल्लां बोल्लेया करदे हिन।

¹⁴पर तिन्हा ने तिसजो इक्क भी गल्ल रा जवाब नी दित्तेया, इत्ते तिकर राज्यपाल जो बड़ी हैरानी होई।

¹⁵हाकिम रा ए रीवाज थिया कि तिस त्योहर बिच लोक्कां तांइ कुसकी इक्क कैदी जो जिस जो से चाह्‍ंदे थिये, छड्डी दिंदा थिया।

¹⁶तिस बेल्ले तिन्हेरे इत्ते बरअब्बा ना रा इक्क मन्ने रा कैदी थिया।

¹⁷अते जां से कठिये, तां पिलातुस ने तिन्हेरे जो बोल्लेया तुसा कुस जो चाह्‍ंदे की मैं तुसा तांइ छड्डी देयां? बरअब्बा जो या यीशु जो जे मसीह यीशु केहलादें?

¹⁸किजोकी से जाणदा थिया की तिन्हा ने तिन्हेरे जो चलाकी कने पकड़वाया रा है

¹⁹जां से हिसाब-किताब री गद्दी पर बैठ्ठे रा थिया तां तिसेरी लाड़ी ने तिसजो बोल्ली भेज्जेया, तू तिस धार्मिक रे मामले बिच हत्थ मत पादां, किजोकी मैं अज्ज सुपने बिच तिसेरी वजह कने बड़ी तकलीफ झेलि री है।

²⁰बड्डे पुरोत्त ते बुजुर्ग मणू ने लोक्कां जो उकसाया कि से बरअब्बा जो मगीं लैण ते यीशु रा खातमा करवाण।

²¹हाकिम ने तिन्हेरे जो पूच्छेया, इन्हा दोन्नां बिच का कुस जो चाह्‍ंदे की मैं तुसा तांइ छड्डी देयां? तिन्हा ने बोल्लेया, बरअब्बा जो।

²²पिलातुस ने तिन्हेरे जो पुच्छेयाफिर यीशु जो, जे मसीह यीशु केहलादां कै करां? सारेयां ने तिन्हा जो बोल्लेया से सुली पर चढ़ाया जाए।

²³हाकिम ने बोल्लेया, किजो, तिसने कै बुराई कित्ते री है? पर से होर भी चिल्लाई करी बोलणा लग्गे, से सुली पर चढ़ाया जाए।

²⁴जां पिलातुस ने दिख्खेया कि किच्‍छ भी नी बणेया करदा है पर तिसेरे उलट हगांमा बदेया जाया करदा है तां तिनिये पाणी लेई करी भीड़ रे सामणे अपणे हत्थ धोए ते बोल्लेया मैं इस धार्मिक रे खून का बेगुनाह है तुसा ही जाणो।

²⁵सब लोक्कां ने जवाब दित्ता, इसेरे खून रा जिम्मा असा पर ते असा रे औलादां पर हो!

²⁶इस पर तिसने बरअब्बा जो तिन्हेरे तांइ छड्डी दित्तेया, ते यीशु जो कोड़े लगवाई करी तिन्हेरे जो देई दित्ता की सुली पर चढ़ाया जाए।

²⁷तां हाकिम रे सपाईयां ने यीशु जो किले बिच लेई जाई करी सारी पलटन तिन्हेरे चारो पास्से कठेरी,

²⁸ते तिन्हेरे कपड़े उतरवाई करी तिन्हेरे जो लाल रगं रा बागा पुआया,

²⁹ते कंडेया रा मुकुट दबाई करी तिन्हेरे सिर पर रख्खेया ते तिन्हेरे सज्जे हत्थ बिच नलू दित्तेया ते तिन्हेरे अग्गे घुटने टेकी करी तिन्हेरा मजाक उड़ाणा लगे ते बोल्लेया, ओ यहूदियां रे राज्जे, नमस्कार!

³⁰ते तिन्हेरे पर थूक्केया ते से ही नलू लेई करी तिन्हेरे सिर पर मारणा लग्गे।

³¹जां से तिन्हेरा मजाक उड़ाई बैठे तां से बागा उतरवाई करी फिर तिन्हेरे ही कपड़े तिन्हेरे जो पहनाए ते सुली पर चढ़ाणे तांइ लेई चले।

³²बाहर जादें बेल्ले तिन्हेरे जो शमौन नां रा इक्क कुरेनी मणू तिन्हेरे जो मिल्लेया तिन्हा ने तिसजो बेगार बिच पकड़ेया की से तिन्हेरा सुली चुकी करी लेई चले।

³³तिस जगाह् पर जे गुलगुता मतलब की खोपड़ी री जगाह् केहलादां पूज्जी करी।

³⁴तिन्हा ने पित्ता मिल्ले रा अंगूर रा रस्स तिन्हेरे जो पीणे तांइ दित्तेया पर तिन्हा ने चखी करी पीणा नी चाएया।

³⁵तां तिन्हा ने तिन्हा जो सुली पर चढ़ाया, ते चीठ्ठियां पाई करी तिन्हेरे कपड़े बडीं लित्ते।

³⁶ते तित्ते बेई करी तिन्हेरा पैह्रा दैणा लग्गे,

³⁷ते तिन्हेरा दोष-पत्तर तिन्हेरे सिर का उप्पर लाया कि ए यहूदियां रा राज्जा यीशु है।

³⁸तां तिन्हेरे कने दो डाकू इक्क सज्जे पास्से ते दुआ खब्बे पास्से, सुली पर चढ़ाए गे,

³⁹आणे-जाणे वाले सिर हिलाई-हिलाई करी तिन्हेरा बेजती करेया करदे थिये।

⁴⁰ते बोलदे थिये, ओ मन्दिर रे तोड़ने वाले ते त्रै दिनां बिच बणाणे वाले अप्पु जो तां बचा! जे तू परमेश्वर रा पुत्तर है तां सुली पर का उतरी आ।

⁴¹इसी तरिक्के कने बड्डे पुरोत्त भी शास्त्रियां ते बुजुर्ग मणू समेत मजाक उड़ाई-उड़ाई करी बोलदे थिये,

⁴²इनिये होरां जो बचाया, ते अप्पु जो नी बचाई सकदा ए तां इस्राएल रा राज्जा है अवे सुली का थल्ले उतरी आए तां असी तिस पर विश्वास करण।

⁴³तिसने परमेश्वर पर विश्वास रखे रा है जे से इसजो चाह्‍ंदे तां अवे इसजो छुड़ाई लेय, किजोकी इसने बोल्लेया थिया मैं परमेश्वर रा पुत्तर है।

⁴⁴इसी तरिक्के कने डाकू भी जे तिन्हेरे कने सुली पर चढ़ाए गेरे थिये इसी तरिक्के कने तिन्हेरा मजाक उड़ाया करदे थिये।

⁴⁵दोपहर का लेई करी त्रिये पहर तिकर तिस सारे देस बिच न्याहरा होई गेया।

⁴⁶त्रिये पहर रे नेड़े यीशु ने बड़ी जोर कने हक्क लाई करी बोल्लेया, एली एली लमा शबक्तनी। मतलब ओ मेरे परमेश्वर, ओ मेरे परमेश्वर, तुसा मेरे जो किजो छड्डी दित्तेया?

⁴⁷जे तित्ते खड़ित्ते रे थिये तिन्हा बिच का किन्नेयां ने ए सुणी करी बोल्लेया, से तां एलिय्याह जो सद्देया करदा है,

⁴⁸तिन्हा बिच का इक्क तिसी बेल्ले दोड़ेया, ते स्पंज लेई करी सिरके बिच डुबाया, ते नलू रख्खी करी तिन्हा जो चुसाया।

⁴⁹ते तिन्हा जो बोल्लेया, रुकी जाओ, दिखदे एलिय्याह तिसेरी जान बचाणे आदां या नी।

⁵⁰तां यीशु ने फिरी बड़ी हक्क लाई करी साह छड्डी दित्ते।

⁵¹ते दिख्खो, मन्दिर रा परदा उप्पर का लेई करी थल्ले तिकर फटी करी दो टोट्टे होई गेया ते दुनिया हिली गई ते चट्टानां त्रिड़की गेई।

⁵²ते कब्रां खुली गेई, ते मरे रे परमेश्वर रे मते सारे मणू फिरी जिन्दा होई गे।

⁵³ते तिन्हेरे फिरी जिन्दा होणे रे बाद से कब्रां बिच का निकली करी पवित्र नगर बिच गे ते मते लोक्कां जो दिस्से।

⁵⁴तां सूबेदार ते जे तिन्हेरे कने यीशु रा पैह्रा देया करदे थिये, हिल्लण ते जे किच्‍छ होया थिया तिसजो दिखिकरी बड़े वरी डरी गे ते बोल्लेया, सच्ची ए परमेश्वर रा पुत्तर थिया!

⁵⁵तित्ते मती सारी जनानियां जे गलील का यीशु री सेवा करदे होए तिन्हेरे कने आई री थी, दुर का ए सब किच्‍छ दिख्खेया करदी थी।

⁵⁶तिन्हा बिच मगदला सहर री मरियम, ते याकूब ते योसेस री माता मरियम, ते जब्दी रे पुत्तरां री मां थी।

⁵⁷जां सांज्ज होई ता यूसुफ नां रा अरिमतिया का इक्क अमीर मणू जे अप्पु भी यीशु रा चेल्ला थिया, आया।

⁵⁸तिसने पिलातुस का जाई करी यीशु री लास मगीं इस पर पिलातुस ने देई दैणे रा हुकम दित्ता।

⁵⁹यूसुफ ने लास लित्ती, तिसजो चमकदार चद्दर बिच लपेटेया,

⁶⁰ते तिसजो अपणी नोयी कब्र बिच रख्खेया, जे तिसने चट्टान बिच खुदवाई थी ते कब्र रे दरवाज्जे पर बड्डा बट्टा लुड़काई करी चली गेया।

⁶¹मगदला सहर री मरियम ते दुई मरियम तित्ते कब्र रे सामणे बैठे री थी।

⁶²अगले दिन, विश्राम दिन पर बड्डे पुरोत्तां ते फरीसी लोक्कां ने पिलातुस जो कठ्ठी करी बोल्लेया,

⁶³ओ महाराज, असा जो याद है की तिस भरमाणे वाले ने जां से जिन्दा थिया, बोल्लेया थिया, मैं मेरे मरणे रे बाद तिज्जे दिन पर जिन्दा होई जाणा।

⁶⁴अते हुकम देयो की त्रिये दिन तिकर कब्र पर पैहरा रख्खेया जाए, इय्यां ना हो की तिसेरे चेल्‍ले आई करी तिसेरी सरीर जो चोरी करी के लेई जाण ते लोक्कां जो बोलणा लग्गे, से मरेयां बिच का जिन्दा होई गे रा है, तां ए धोख्खा पैल्ले वाले तिस धोख्खे का भी बुरा होणा जां तिसने बोल्लेया थिया कि मैं मसीह है।

⁶⁵पिलातुस ने तिन्हा जो बोल्लेया, तुसा का पैहरेदार तां हिन जाओ, जिय्यां तुसा जो सही लग्गे, तिय्यां रखवाली करो।

⁶⁶अते से पैहरेदारां जो कन्ने लेई करी गे, ते कब्र जो बट्टे कने ढकी करी तिस बट्टे पर मौहर लाई करी कब्र री रखवाली कित्ती ताकि कोई तिसजो हटाई ना सके।