Read Chambeali मत्ती 6 Bible Online

मत्ती 6 - Chambeali bible

मत्ती 6

¹यीशु ने अपणे उपदेस जो जारी रखदे होए तिन्हा लोक्कां जो बोल्लेया “सावधान रेयो! तुसा मणूआं जो दसणे तांइ भलाई रे कम्म मत करो, नी तां तिज्जो अपणे स्वर्ग अन्दर रैह्णे वाले पिता का कोई ईनाम नी मिलणा।

²इधेरे तांइ जिस बेल्ले तुसा दान करो तां तिसेरा ढिडोंरा मत पिट्टो, जिय्यां कि सभास्थल ते गलियां बिच कपटी मणू भी होर लोक्कां का तारिफ सुनणे तांइ करदे ताकि मणू तिन्हेरी बड़ाई करण, मैं तुसा कने सच बोलदा कि से ही तिन्हेरा ईनाम है।

³पर जां तुसा दान करो तां लोक्कां जो पता मत लगणा देयो कि तुसा कै देया करदे हिन।

⁴ताकि जे दान तू दित्ता से कुसकी जो पता ना लग्गे अते तेरा से परम-पिता जे तिज्जो लुकी करी दिखदा, तिन्हा ने तिज्जो उधेरा ईनाम दैणा।”

⁵“जां तू प्रार्थना करेया करे, तां ढोंगी लोक्कां सांई लोक्कां री तारिफ तांइ सड़कां रे मौड़ां पर ते सभास्थल बिच मत करदा, मैं तुसा जो सच बोलदा कि इय्यां करणे वाले लोक्कां रा ईनाम सिर्फ लोक्कां री तारिफ ही है।

⁶पर जां तू प्रार्थना करे, तां अपणे कमरे बिच जा, ते दुआर बांद्द करी के गुप्त बिच अपणे पिता परमेश्वर का प्रार्थना कर जे स्वर्ग बिच हिन, तां परमेश्वर पिता ने तुसा जो ईनाम दैणा जे स्वर्ग का तुसा जो गुप्त रीति कने दिखदे रैहन्दे।

⁷ते जां तू प्रार्थना करगा तां गैर-यहूदी लोक्कां साई बे-मतलब री गल्लां जो घड़ी-घड़ी मत बोल, किजोकी तिन्हा लोक्कां जो लगदा कि तिन्हेरे बड़ा जादा बोलणे कने तिन्हेरी प्रार्थना सुणी जाणी।

⁸इधेरे तांइ तुसा तिन्हा लोक्कां सांई मत बणो, किजोकी तुसा रा पिता परमेश्वर तुसा रे मंगणे का पैल्ले ही जाणदा कि तुसा री कै-कै जरुरतां हिन।”

⁹इधेरे तांइ तुसा इस तरिक्के कने प्रार्थना करेया करो: ओ असा रे पिता, तुसा जे स्वर्ग बिच हिन, तुसा रा नां पवित्र मन्नेया जाए।

¹⁰तुसा रा राज आओ जिय्यां तुसा री मरजी स्वर्ग अन्दर पूरी हुंदी, तिय्यां ही दुनिया पर भी पूरी हो।

¹¹असा री दिन भर री रोट्टी अज्ज असा जो देयो।

¹²ते जिय्यां असा ने अपणे गुनेह्गार जो माफ कित्तेया, तिय्यां ही तुसा भी असा रे पाप्पां जो माफ करी देयो,

¹³अते असा जो परखदे मत, पर शैतान का बचाई रख्खेयो, (किजोकी राज, पराक्रम ते महिमा हमेसा तुसा रा ही है, आमीन)!

¹⁴“इधेरे तांइ जे तुसा मणूआं रे पाप्पां जो माफ करगे, तां तुसा रे पिता परमेश्वर ने जे स्वर्ग बिच रैहन्दे तुसा जो माफ करी दैणा।”

¹⁵अते जे तुसा मणूआं रे पाप्पां जो माफ नी करगे, तां तुसा रे पिता परमेश्वर ने भी तुसा रे पाप माफ नी करणे।

¹⁶“जां तुसा ब्रत्त रख्खो, तां ढोंगी लोक्कां सांई तुसा रे मुँह नी उत्तरे रे होणे चाएदे, किजोकी से अपणा मुँह उदास बणाई रखदे ताकि सबणी मणूआं जो पता लग्गो कि तिन्हा ने ब्रत्त रख्खे रा है, मैं तुसा जो सच-सच बोलदा कि तिन्हा जो ईनाम बिच सिर्फ लोक्कां री तारिफ ही है।”

¹⁷जां तू ब्रत्त रख्खो, तां मुँह धोई करी अपणे सर पर तेल मले,

¹⁸ताकि मणूआं जो नी पर तुसा रे पिता परमेश्वर जो जे स्वर्ग का तुसा जो गुप्त रीति कने दिखदे पता चले कि तुसा ब्रत्त रख्खे रा है, ते तिन्हा ने तुसा जो ईनाम दैणा।

¹⁹“अपणे तांइ दुनिया पर धन-दौलत मत कठेरो, जित्ते कीड़ा लग्गी जान्दा ते जांग कने खराब होई जांदी अते जित्ते चोर सेंध लाई करी चोरी लिन्दे।”

²⁰पर भले कम्म करी के अप्पु तांइ स्वर्ग अन्दर धन-दौलत कठेरो, जित्ते ना कीड़ा लगदा ते ना जांग कने से खराब हुंदी ते ना चोर सेंध लाई करी चोरी करदे।

²¹किजोकी जित्ते तुसा री धन-दौलत होणी तित्ते ही तेरा मन भी लग्गी रैह्णा।

²²“हाख्खियां सरीर रे दीये सांई हुंदी: ते जे अगर तुसा रे दिखणे रा नजरिया परमेश्वर सांई है तां ए इदेया होणा जिय्यां तुसा रा सारा सरीर रौसनी कने भरे रा हो।”

²³पर जे तेरे दिखणे रा नजरिया बुरा हो, तां ए इदेया होणा जिय्यां तुसा रा पूरा सरीर न्याहरे कने भरे रा हो, इधेरे तांइ से रौसनी जे तेरे अन्दर है जे, से अगर हकीकत बिच अगर न्याहरी होई जाओ तां से न्याहरा कदेया ड्रोणा होणा!

²⁴“कोई मणू इक्क समय पर दो मालकां री सेवा नी करी सकदा, किजोकी तिनिए इक्क कने नफरत अते दूज्जे जो प्यार करे, या तिनिए इक्क जणे कने वफादार रैह्णा अते दूज्जे जो नफरत करणी तुसा परमेश्वर ते धन-दौलत, दोन्नां री सेवा नी करी सकदे।”

²⁵“इधेरे तांइ मैं तुसा कने बोलदा कि अपणी जिन्दगी री हर जरुरत री फिकर करणा छड्डी देयो कि कै खांगे, कै पींगे या कै पांगे। कै मणू री जिन्दगी रोट्टी का या सरीर कपड़ेयां का बदधी करी नी है?”

²⁶दिख्खो, आसमान रे चिड़ू-पखेरु ना तां भी बीह् बांदे, ना बडदे, ते ना ही खलाड़े अन्दर कठेरदे, फिरी भी तुसा रा पिता परमेश्वर जे स्वर्ग बिच हिन, तिन्हा जो खुआन्दा। कै तुसा तिन्हा का बधी करी नी हिन?

²⁷तुसा बिच का इदेया कुण है, जे फिकर करी के अपणी उमर अन्दर इक्क घड़ी भी बद्धाई सकदा हो?

²⁸कपड़ेयां तांइ तुसा किजो फिकर करदे हिन? जंगली फूलां जो दिख्खो कि से किय्यां बद्धदे, से ना तां कम्म करदे ते ना ही अपणे कपड़े बणांदे,

²⁹तां भी मैं तुसा जो बोलदा कि राज्जा सुलैमान री इत्तणी महिमा होणे रे बावजूद भी से उन्हा बिच का कुसकी इक्क सांई भी नी सजी सकेया।

³⁰इधेरे तांइ जां परमेश्वर द्रबड़ री घा जो, जे अज्ज है ते कल भट्टी बिच सूटी दित्ती जाणी, तिसेरा इन्ना ख्याल रखदे, तां ओ घट्ट विश्वास वाले लोक्कों, तां तिन्हा ने तुसा रा तिसका बधी करी ख्याल नी रखणा?

³¹“इधेरे तांइ तुसा ए बोल्ली करी फिकर मत करो, असी कै खान्गें या असी कै पिन्गे या कै पान्गें?”

³²किजोकी गैर यहूदी इन्हा सबणी चीजां रे पीच्छे लगे रैहन्दे, पर फिकर मत करो किजोकी तुसा रे पिता परमेश्वर जे स्वर्ग बिच हिन, तिन्हा जो पता है कि तुसा जो इन्हा सबणी चीजां री जरुरत है,

³³पर पैल्ले तुसा परमेश्वर रे राज ते तिन्हेरी धार्मिकता जो महत्व देयो, तां ए सब चीजा तुसा जो मिली जाणियां।

³⁴“इधेरे तांइ कल री फिकर मत करो, किजोकी कल रा दिन अपणी फिकर अप्पु करी लिंगा अज्ज तांइ अज्ज रा दुख ही बड़ा है।”