Read Chambeali मत्ती 7 Bible Online

मत्ती 7 - Chambeali bible

मत्ती 7

¹यीशु ने अपणे उपदेस जो जारी रखदे होए तिन्हा लोक्कां जो बोल्लेया “दूज्जेयां पर इल्जाम मत लगाओ नी तां परमेश्वर ने तुसा पर इल्जाम लाणा।”

²किजोकी जिय्यां तुसा लोक्कां पर इल्जाम लांदे, तिय्यां ही परमेश्वर ने भी तुसा पर इल्जाम लाणा, अते जिस तरिक्के कने तुसा लोक्कां पर इल्जाम लांदे, तिस्सी तरिक्के कने तुसा पर भी इल्जाम लाया जाणा।

³“तुसी किजो अपणे भाई री छोटी जदेई गलती जो दिख्खेया करदे हिन, जां तुसा री अपणी जिन्दगी बिच बड्डी गलतियां हिन।”

⁴जां तेरी अपणी जिन्दगी बिच बड्डी गलतियां हिन, तां तुसा किय्यां अपणे भाई जो बोल्ली सकदे कि अपणी गलतियां जो सुधार?

⁵ओ ढोंगी! पैल्ले तू अपणी बड्डी गलतियां जो सुधार, फिरी तू ठीक तरिक्के कने अपणे भाई री गलतियां जो सुधारी सकणा।

⁶“तिन्हा लोक्कां जो परमेश्वर री गल्लां मत सुणाओ जे मणू सुनणा नी चाह्‍ंदे, किजोकी जे अगर तुसा इय्यां करदे तां ए पवित्तर चीजां कूत्तेयां या सूअरां रे मुहाग्गर सुटणे रे बराबर होणा, जिन्हा तिसजो अपणे पैरां कने मसल्ली करी तुसा पर हमला करणा।”

⁷“अपणी जरुरत री चीज परमेश्वर का मन्गो तां तिन्हा ने तुसा जो दैणा, तोपगे तां तुसा जो मिल्ली जाणा, ते खटखटांगे तां तुसा रे तांइ दुआर खोल्लेया जाणा।”

⁸किजोकी हर इक्क मणू जे मंगदा, तिसजो मिली जान्दा जे तोपदा से तिसजो पाई लिंदा अते जे खटखटांदा ही रैहन्दा तिसेरे तांइ दुआर खोल्ली दित्तेया जाणा।

⁹“तुसां बिच का इदेया कुण ए जे अपणे मुंडे जो जां से रोट्टी मन्गो तां पत्थर देयो?”

¹⁰या मच्छी मन्गो, तां तिसजो कीड़ा देयो?

¹¹इधेरे तांइ जे चाये तुसा बुरे ही किजो नी हिन, अपणे बच्चेयां जो ठीक चीजां दैणा जाणदे तां तुसा रा पिता परमेश्वर जे स्वर्ग बिच हिन तुसा रे मन्गणे पर ठीक चीजां किजो नी दिंगा?

¹²“इधेरे तांइ जिय्यां तुसा चाह्‍ंदे कि मणू तुसा कने करण, तुसा भी तिन्हा कने तिय्यां ही करो किजोकी परमेश्वर रे कानून अते भविष्यद्वक्ता री गल्लां रा ए ही मतलब है।”

¹³“परमेश्वर रे राज बिच तंग रस्ते का जाओ, किजोकी चौड़ा दरवज्जा अते बड्डा रस्ता तां विनास रे पास्से लेई जांदा मते जणे हिन जे तिस रस्ते पर चलदे हिन।”

¹⁴पर कितणा तंग है से दुआर अते कितणा मुस्किल है से रस्ता जे हमेसा री जिन्दगी पास्से जांदा, बड़े घट्ट जणे हिन जे तिस पर चलदे।

¹⁵“झूठे भविष्यद्वक्ता का बच्ची रेयो, जे भेड़ां रे भेस अन्दर तुसा का आन्दे, पर अन्दर का से खूंखार भेड़िए सांई हिन।”

¹⁶तिन्हेरे कम्मां का तुसा ने तिन्हा जो पछियाणी लैणा। कै झिल्लां पर अंगूर या कंडेया पर अंजीर उग्गि सकदे?

¹⁷इय्यां ही हर इक्क खरा बूट्टा ठीक फल्ल दिंदा अते बुरा बूट्टा बुरे फल्ल दिंदा।

¹⁸खरा बूट्टा बुरे फल्ल नी देई सकदा, अते ना ही बुरा बूट्टा खरा फल्ल देई सकदा।

¹⁹हर इक्क बूट्टा जे खरा फल्ल नी दिंदा, से बड्डेया अते आग्ग अन्दर पाई दित्तेया जान्दा ए।

²⁰इस तरिक्के कने तुसा तिन्हेरे कम्मां कने तिन्हा जो पछियाणी लैणा।

²¹“प्रभु-प्रभु बोलणे वाला हर मणू स्वर्ग रे राज अन्दर नी जाई पाणा बल्कि से जे मेरे स्वर्ग अन्दर रैह्णे वाले परम-पिता री मरजी पर चलदा तिन्ने अन्दर जाई पाणा।”

²²हिसाब-किताब रे रोज मते जह्णेयाँ ने मेरे जो पूच्छेया प्रभु जी, ओ प्रभु जी! कै असा तुसा रे नां कने भविष्यवाणी नी कित्ती? कै तुसा रे नां कने दुष्टात्मा नी कड्डियां अते कै असा तुसा रे नां कने मते सारे चिन्ह-चमत्कार नी दिखाए?

²³तां मैं तिन्हा कने साफ बोलणा मैं तुसा जो नी जाणदा, ओ पापियों, मेरे का दुर हटो।

²⁴“इधेरे तांइ जे कोई मेरे इन्हा वचना जो सुणी करी तिन्हा पर चलदा, से उस समजदार मणू सांई ए जिनिए अपणा घर पक्के सप्पड़ा पर बणाया।

²⁵अते बरखा होई, हड़ आया, ते तूफान चलेया अते ए सब तिस घर कने बज्जियां पर से नी ढैत्तेया किजोकी तिसेरी नीय्यां पक्के सप्पड़ा पर बणे री थिया।

²⁶पर जे कोई मेरे इन्हा वचनां जो सूणदा पर उन्हा पर चलदा नी, से उस बेवकूफ मणू सांई हिन, जिनिए अपणा घर रेत पर बणाया।

²⁷बरखा होई, हड़ आया, ते तूफान आया ते उस घर कने टकराई जिस कने से पूरा घर ढेई गेया।”

²⁸इसेरे नतिजे ए होया कि जां यीशु ए गल्लां बोल्ली बैठ्ठे तां मणूआं जो तिन्हेरी उपदेस जो सुणी करी हैरान गई होई,

²⁹किजोकी से तिन्हा जो तिन्हेरे शास्त्रियां सांई नी बल्कि इक्क अफसरां सांई उपदेस थिये देया करदे।