Read Chambeali मत्ती 8 Bible Online

मत्ती 8 - Chambeali bible

मत्ती 8

¹जां यीशु पहाड़ का उतरे तां मणूआं री इक्क बड़ी बड्डी भीड़ तिन्हेरे पीच्छे चली पेई।

²तित्ते इक्क कोढ़ी भी थिया से यीशु का आया अते तिन्हा जो प्रणाम करी के बोलणा लग्गेया, “ओ प्रभु जी,” जे तुसा चाह्‍ण तां मेरे जो ठीक करी सकदे।

³यीशु ने अपणा हत्थ बधाई करी के तिसजो छुत्तेया, अते बोल्लेया, मैं चाह्‍ंदा, तू ठीक होई जाए ते से तिस्सी बेल्ले से कोढ़ी ठीक होई गेया।

⁴यीशु ने तिसजो बोल्लेया, दिख्ख, “कुसी जो भी मत बोलदा, पर जाई करी अप्पु जो पुरोत्त जो दस्स अते जे चढ़ाणे तांइ मूसा ने दस्से रा ए तिसजो चढ़ा, ताकि उन्हा पर गवाई होई जाओ।”

⁵जां यीशु कफरनहूम कस्बे अन्दर आए तां इक्क हाकिम[1] तिन्हा का आया ते तिन्हेरे छन्दे करी के बोलणा लग्गेया,

⁶“ओ प्रभु जी, मेरा इक्क नौक्कर जो अधरंग होए रा है, अते तिसजो बड़ी वरी तकलीफ होय करदी है।”

⁷यीशु ने तिसजो बोल्लेया, “मैं आई करी तिसजो ठीक करी दिंगा।”

⁸हाकिम ने जवाब दित्तेया, ओ “प्रभु जी, मैं इस जोग्गा नी है कि तुसा मेरे घरे आण, इधेरे तांइ तुसा सिर्फ हुकम देई देयो, ते मेरे नौक्कर ने ठीक होई जाणा।

⁹मैं ए इस तांइ समजी सकदा किजोकी मैं भी कुसकी रे थल्ले कम्म करदा, ते मेरे हेठ भी सिपाई कम्म करदे जां मैं इक्क जो बोलदा, जा तां से चली जान्दा, अते जां दूज्जे जो सददा तां से आई जान्दा, अते जां अपणे नौक्कर जो बोलदा कि, इय्यां कर तां से करदा।”

¹⁰ए सुणी करी यीशु जो बड़ी हैरानी होई अते जे तिन्हेरे पीच्छे आया करदे थिये तिन्हा जो बोल्लेया, “मैं तुसा जो सच बोलदा कि मैं इस्राएल बिच भी कुसकी इक्क मणू जो नी दिख्खेया जे इस गैर-यहूदी रे बराबर मेरे पर विश्वास करदा हो।”

¹¹मैं तुसा जो बोलदा कि पूरब ते पश्चिम का मते सारे गैर यहूदियां ने आई करी अब्राहम, इसहाक अते याकूब कने स्वर्ग रे राज बिच रोट्टी खाणा बैह्णा,

¹²पर इस्राएल रे मते सारे लोक्कां जो बाहर न्याहरे बिच सूटी दित्तेया जाणा: तित्ते रोणा अते दांद्द पिह्णा होणा।

¹³तां यीशु ने हाकिम जो बोल्लेया, घरे जा, तेरे विश्वास रे हिसाब कने तेरे तांइ होई जाए, अते तिस्सी बेल्ले सूबेदार रा नौक्कर खरा होई गेया।

¹⁴जां यीशु पतरस रे घरे आये, तां तिन्हा ने तिसेरी सस्सू जो बुखार री वजह कने बिस्तर पर पे रा दिख्खेया।

¹⁵तिन्हा ने तिसेरा हत्थ छुत्तेया अते तिसेरा बुखार उतरी गेया, अते से उठी करी यीशु री सेवा-पाणी करणा लग्गी पेई।

¹⁶जां सँझ होई, तां मणू उन्हा का इदेय बड़े मणूआं जो लेई करी आये जिन्हा बिच दुष्टात्मा थी, अते उसने अपणे इक्क ही शब्द कने दुष्टात्मा जो निकाली दित्तेया इस तरिक्के कने उसने सब बिमारां जो खरा करी दित्तेया।

¹⁷ताकि जे वचन यशायाह भविष्यद्वक्ता रे जरिए बोल्लेया गेया थिया से पूरा हो: तिसने अप्पु ही असा री कमजोरियां जो लेई लित्तेया अते असा री बमारियाँ जो चुक्की लित्तेया।

¹⁸यीशु ने जां अपणे चौन्नी पास्से इक्क बड़ी बड्डी भीड़ दिख्खी तां उन्हा ने अपणे चेल्‍लेयां जो हुकम दित्तेया “चलो असी गलीली समुन्द्र रे दूज्जे कनारे जो जाण।”

¹⁹ते जां से जाणे री तैयारी करेया करदे थिये तां कुसकी शास्त्रि ने आई करी तिन्हा जो बोल्लेया, “ओ गुरु जी, जित्ते कुते तुसा जान्गे, मैं तुसा रे पीच्छे चलणा।”

²⁰यीशु ने तिसजो बोल्लेया, “लोमड़ी री खोह अते आसमान रे चिड़ू-पखेरुआं रे घोंसले हुन्दे हिन पर मणू रे पुत्तर का, जे मैं ही है का रैह्णे तांइ अपणी कोई जगाह् नी है।”

²¹तिन्हेरे चेल्‍लेयां बिच का कुसकी ने तिन्हा जो बोल्लेया, प्रभु जी, “पैल्ले मेरे जो अपणे घरे हटणे देयो, मेरे प्यो रे मरणे रे बाद मैं तुसा रे पीच्छे हटी आंगा।”

²²पर यीशु ने तिसजो बोल्लेया, “जे मणू आत्मिक तौर पर मरी चुके रे हिन तिन्हा जो अपणे मुरदे दबणा दे, अते तू मेरा चेल्ला बणी जा।”

²³तां यीशु इक्क किस्ती पर जाई बैठ्ठे तिन्हेरे चेल्‍ले भी तिन्हा कने थिये।

²⁴उस्सी बेल्ले झील अन्दर इक्क इदेयी बड़ी बड्डी हनेरी आयी कि तिन्हेरी किस्ती पाणी री छलारां कने ढकी गई, पर यीशु सुत्ते रे थिये।

²⁵तां चेल्‍लेयां ने आई करी तिन्हा जो जगाया अते बोल्लेया, “ओ प्रभु जी, असा जो बचा, नी तां असा ने मरी जाणा।”

²⁶यीशु ने तिन्हा जो बोल्लेया, तुसा रा विश्वास छोटा है, “तुसां इत्तना किजो ड़रेया करदे हिन? तां यीशु ने उठी करी हनेरी अते झील जो झिड़ख दित्ती, अते सब किच्‍छ सान्त होई गेया।”

²⁷अते से हैरान होई करी बोलणा लगे, “ए कदेया मणू ए कि हनेरी अते झील भी इसेरा हुकम मन्दे हिन?”

²⁸अते जां से दूज्जे पास्से गदरेनियाँ रे देस अन्दर पूज्जे, तां तिन्हा जो कब्र का बाहर आन्दे दो मणू मिल्ले जिन्हा बिच दुष्टात्मा थियां से इतणे भयंकर थिये कि कोई तिस रस्ते का जाई तक नी सकदा थिया।

²⁹अते दिख्खो, तिन्हा ने लेर देई करी बोल्लेया, ओ परमेश्वर रे पुत्तर, असा रा तुसा कने कै कम्म ए? “कै तुसा असा जो बेल्ला पूरा होणे का पैल्ले ही दुख दैणे आये हिन?”

³⁰थोड़ी ही दुर बड़े सारे सूअरां रा इक्क झुण्ड चरेया करदा थिया।

³¹तां उन्हा दुष्टात्मा ने तिन्हा कने ए बोल्ली करी छन्दे करणा लग्गी, “जे तुसा असा जो कडणा लग्गे रे हिन तां असा जो इन्हा सूअरां रे झुण्ड अन्दर भेजी दे।”

³²“तां यीशु ने उन्हा जो बोल्लेया, चली जाओ!” ते से उन्हा मणूआं का निकली करी सूअरां अन्दर चली गेई फिरी से सारा झुण्ड खड़ी ढलान का रूलकदे-रूलकदे दौड़दे पाणी अन्दर जाई पेया, ते डूब्बी करी मरी गेया।

³³सूअरां रे रखवाले तित्ते का न्ह्सी करी सहर जो आये अते सूअरां कने ते उन्हा कने जिन्हा बिच दुष्टात्मा थी जे होया थिया से सब किच्‍छ दस्सी दित्तेया।

³⁴फिरी तां सहर रे सब मणू यीशु का मिलणे तांइ आये जां तिन्हा ने यीशु जो दिख्खेया तां उन्हेरे छन्दे कित्ते कि से उन्हेरे उत्ते का कुदखी होरथी चली जाओ।