Read Chambeali मरकुस 1 Bible Online

मरकुस 1 - Chambeali bible

मरकुस 1

¹ए कताब मसीह यीशु रे सुब बसेख रे बारे बिच है, से परमेश्वर रे पुत्तर हिन।

²ते इसेरी सुरुआत इय्यां हुंदी कि जिय्यां परमेश्वर ने अपणे पुत्तर यीशु मसीह जो यशायाह भविष्यद्वक्ता री कताब बिच बोल्ले रा है, “दिख्ख मैं अपणे दूत जो तेरे अग्गे भेज्जेया करदा है, जिनिये तेरे आणे तांइ लोक्कां जो तैयार करणा।”

³“बियाबान बिच इक्क हक्क मारणे वाले री अवाज सुणिदीं, ‘प्रभु रे आणे तांइ अप्पु जो तैयार करो, ते तिन्हेरा रस्ता सीद्दा करो।’”

⁴यूहन्ना ही से दूत थिया जे आया, जे बियाबान बिच थिया ते लोक्कां बिच ए प्रचार कित्तेया कि बपतिस्मा लेयो ताकि ए गवाई होई सके कि तुसा तौबा करी लित्ते री है ते पाप्पां री माफी तांइ परमेश्वर पास्से मुड़ी आए रे हिन।

⁵यहूदियां जिले ते यरुशलेम सहर का मते सारे निकली करी तिसेरे नेड़े गे, ते अपणे पाप्पां जो मन्नी करी यरदन नदी बिच तिसका बपतिस्मा लित्तेया।

⁶यूहन्ना ऊँट रे बालां रे बणे रे कपड़े पाई करी ते कमर बिच चमड़े रा कमरबंद बन्नी करी रखदा थिया ते टिड्डियां कने जगंली शहद खादां थिया,

⁷ते ए प्रचार करदा थिया, “मेरे बाद से आणे वाला है जे मेरे का भी शक्तिसाली है, मैं इस जोग्गे भी नी कि इक्क गुलाम रे तौर पर भी निठ्ठे होई करी तिन्हेरे जूत्ते री डोरी खोल्ली सकां।

⁸मैं तां तुसा जो पाणी कने बपतिस्मा दित्तेया पर उन्ने तुसा जो पवित्रात्मा कने बपतिस्मा दैणा।”

⁹तिन्हा दिना बिच यीशु ने गलील प्रदेश रे नासरत कस्बे का आई करी यरदन नदी बिच यूहन्ना का बपतिस्मा लित्तेया।

¹⁰ते जां यीशु पाणी का निकली करी उप्पर आए, तां तिस्सी बेल्ले तिनिये स्वर्ग जो खुलदे ते पवित्रात्मा जो कबूतर सांई अपणे उप्पर उतरदे दिख्खेया।

¹¹ते ए स्वर्ग बिच का ए अवाज आई, “तू मेरा प्यारा पुत्तर है, तेरे का मैं खुस है।”

¹²तां पवित्रात्मा ने तिस्सी बेल्ले तिसजो बियाबान जो भेज्जेया,

¹³बियाबान बिच चाली रोज तिकर शैतान ने तिसजो परखेया, ते से बियाबान रे जानवरां कने रेया, ते स्वर्गदूत उसेरी सेवा-टहल करदे रेय।

¹⁴यूहन्ना जो जेल बिच पाई दित्ता गेया किजोकी तिसने हेरोदेस जो तिसेरे पाप रे खलाफ चितौणी दित्ती थी ते तिसेरे पकडाए जाणे रे कुछ समय बाद यीशु ने गलील प्रदेश बिच आई करी परमेश्वर रे राज रा सुब बसेख प्रचार कित्तेया,

¹⁵ते बोल्लेया, “वक्त पूरा होई गेया, ते परमेश्वर रा राज नेड़े आई गे रा है तौबा करो ते सुब बसेख पर विश्वास करो।”

¹⁶गलीली समुन्द्र रे कन्डे-कन्डे जान्दे बेल्ले उनिये शमौन ते उसदे छोटे भाई अन्द्रियास जो झील बिच जाल पादें दिख्खेया किजोकी से मछवारे थिये।

¹⁷यीशु ने उन्हा जो बोल्लेया, “आओ, मेरे चेल्‍ले बणो तां मैं तुसा जो मेरे तांइ मच्छियाँ सांई मणूआं जो मेरे चेल्‍ले बणने तांइ कठेरणा सिखाणा।”

¹⁸से तिस्सी बेल्ले जालां जो छड्डी करी तिन्हेरे चेल्‍ले बणने तांइ तिन्हा कने चली पे।

¹⁹थोडा अग्गे बदधी करी तिन्हा ने जब्दी रे पुत्तर याकूब, ते तिसेरे भाई यूहन्ना जो किस्ती पर जालां जो ठीक करदे दिख्खेया।

²⁰यीशु ने तिस्सी बेल्ले तिन्हा जो सद्देया ते से अपणे प्यो जब्दी जो मजदूरां कने किस्ती पर छड्डी करी, यीशु रे पीच्छे तिन्हेरे चेल्‍ले बणने तांइ चली पे।

²¹तां यीशु ते तिन्हेरे चेल्‍ले कफरनहूम कस्बा बिच आए, ते से तिस्सी बेल्ले विश्राम दिन सभास्थल बिच जाई करी उपदेस दैणा लग्गेया।

²²ते मणू यीशु रे उपदेस कने हैरान होई गे किजोकी से उन्हा जो शास्त्रियां सांई नी, पर अधिकार कने उपदेस दिंदा थिया,

²³तिस्सी बेल्ले, सभास्थल बिच इक्क मणू थिया, जिस बिच इक्क दुष्टात्मा थी।

²⁴तिनिये चिडं मारी करी बोल्लेया, “ओ नासरत कस्बे रे रैह्णे वाले यीशु, असा जो तुसा रे कने कै काम्म? कै तुसा असा जो खत्म करणे तांइ आए रे हिन? मैं तुसा जो जाणदी कि तुसा कुण हिन? परमेश्वर रे भेज्जे रे पवित्र मसीह!”

²⁵यीशु ने उस दुष्टात्मा जो बकी करी बोल्लेया, “चुप रेह! ते इस मणू बिच का निकली जा।”

²⁶तां दुष्टात्मा तिसजो मरोड़ी करी, ते बड़े जोर कने चिडं मारी करी उस बिच का निकली गई

²⁷इस पर सारे मणू हैरान होई करी अपणे बिच बैह्स करणा लग्गी पे, “ए कै गल्ल? ए तां कोई नौआ उपदेस है! ओ अधिकार कने दुष्टात्मा जो भी हुकम दिंदा, ते से तिसेरा हुकम मनदी।”

²⁸ते तिन्हेरे नां री खप्प झटपट ही गलील प्रदेश रे नेड़े-तेड़े री सारी जगाह् बिच फैल्ली गई।

²⁹यीशु सभास्थल का निकली करी यूहन्ना ते याकूब ते अपणे बाकि चेल्‍लेयां कने शमौन ते अन्द्रियास रे घरे जो गे।

³⁰शमौन री सास्स बुखार कने दुखी थी, ते उन्हा ने तिस्सी बेल्ले उसदे बारे बिच यीशु जो बोल्लेया।

³¹तां उन्हा ने नेड़े जाई करी उसदा हत्थ पकड़ी करी तिसजो उठाया ते उसदा बुखार उतरी गेया, ते से तिन्हेरी सेवा करणा लग्गी पेई।

³²सूरज डूबणे रे बाद जां विश्राम दिन मुकी गेया तां मणू सारे बिमारां जो, ते उन्हा जो, जिन्हेरे बिच दुष्टात्मा थियां, तिन्हेरे का लेई करी आए।

³³ते कस्बे रे मते सारे मणू शमौन रे घरे का कठ्ठी गे।

³⁴यीशु ने मते सारे बिमार लोक्कां जो ठीक कित्तेया। तिन्हा ने लोक्कां का मती सारी दुष्टात्मां जो भी कड्डेया। यीशु ने तिन्हा जो किच्‍छ भी बोलणा नी दित्तेया किजोकी दुष्टात्मां जाणदी थी कि से मसीह हिन।

³⁵अगली भ्याग यीशु न्याहरे-न्याहरे ही जाग्गी होए। ते से घरे का निकली करी इक्क सुनसान जगाह् पर जाई करी प्रार्थना करणा लगे।

³⁶तां शमौन ते तिसेरे साथी यीशु जो तोपणे जो निकले।

³⁷जां यीशु मिल्ले, तां उन्हा जो बोल्लेया, “मते सारे मणू तुसा जो कफरनहूम रे कस्बे बिच तोपदे हिन।”

³⁸यीशु ने चेल्‍लेयां जो बोल्लेया, “आओ, असी होर कुसकी कस्बे बिच जान्दे ताकि मैं तित्ते भी प्रचार करां, किजोकी मैं इस तांइ ही दुनिया बिच आए रा है।”

³⁹अते से सारे गलील प्रदेश बिच, ते सभास्थल बिच जाई-जाई करी प्रचार करदा ते दुष्टात्मा कडदा रेया।

⁴⁰इक्क कोढ़ी यीशु रे नेड़े आया, उस का बिनती कित्ती, ते तिन्हा रे सामणे घुटने टेकी करी उन्हा जो बोल्लेया, “जे अगर तुसा चाओ तां मेरे जो ठीक करी सकदे।”

⁴¹यीशु ने उस पर तरस खाई करी अपणा हत्थ बधाई करी, ते तिसजो छुई करी बोल्लेया, “मैं चाह्‍ंदा कि तू ठीक होई जाए।”

⁴²ते तिस्सी बेल्ले तिस मणू रा कोढ़ हटी गेया ते से ठीक होई गेया।

⁴³तां यीशु ने तिसजो चितौणी देई करी तिस्सी बेल्ले भेजी दित्तेया,

⁴⁴ते तिन्हा ने तिसजो बोल्लेया, “दिख्ख कुसकी कने किच्‍छ मत बोलदा पर जाई करी अपणे आप जो पुरोत्त जो दिखा, ते कोढ़ का ठीक होणे रे बारे बिच जे किच्‍छ मूसा ने ठैहराए रा है से कुर्बानी चढ़ा ताकि तित्ते रे लोक्कां पर गवाई हो।”

⁴⁵पर से बाहर जाई करी इस गल्ल रा बड्डा प्रचार करणे ते इत्ते तक फैलाणा लग्गेया कि यीशु फिरी नगर बिच खुली करी नी जाई सके, पर बाहर सुनसान इलाकें बिच रेया ते चारो पास्से का मणू उस का आन्दे रेय।