Read Chambeali मरकुस 10 Bible Online

मरकुस 10 - Chambeali bible

मरकुस 10

¹फिरी यीशु कफरनहूम कस्बे का उठी करी यहूदियां जिले री सीमा का टप्पी करी यरदन नदी रे पार इक्क जगाह् पर गे। भीड़ फिरी तिन्हेरे का जमा होई गई, अते से हमेसा सांई तिन्हा जो उपदेस दैणे लगे।

²तां फरीसी लोक्कां ने यीशु का आई करी तिन्हा जो परखणे तांइ तिन्हा का पूच्छेया, “कै ए ठीक है कि मड़द अपणी लाड़ी जो तलाक दे?”

³यीशु ने फरीसी लोक्कां जो पूच्छेया, “मूसा ने तुसा जो कै हुकम दित्ते रा है?”

⁴फरीसी लोक्कां ने जवाब दित्तेया, “मूसा ने त्याग-पत्तर लिखणे अते छड्डणे रा हुकम दित्ते रा है।”

⁵यीशु ने तिन्हा जो बोल्लेया, “मूसा ने तुसा तांइ ए नियम इधेरे तांइ लिख्खेया थिया किजोकी तुसा मणू ढ़ीठ हिन।”

⁶पर परमेश्वर ने दुनिया री सुरुआत का मड़द अते जनानी जो बणाया।

⁷इस वजह कने मड़द अपणे मां प्यो का बखरा होई करी अपणी लाड़ी कने रैहन्दा,

⁸अते तिन्हा दोन्नां ने इक्क जिस्म होई जाणा इधेरे तांइ से दो नी पर इक्क जिस्म हिन।

⁹इधेरे तांइ परमेश्वर ने जिस जो जोड़ेया, तिसजो इंसान अलग ना करे।

¹⁰फिरी यीशु जां घरे हटी आये तां चेल्‍लेयां ने इसेरे बारे तिन्हा का फिरी पूच्छेया।

¹¹यीशु ने चेल्‍लेयां जो बोल्लेया, “जे कोई आदमी अपणी लाड़ी जो छड्डी करी दूज्जी कने ब्याह करदा तां से पैल्ली रे खलाफ व्यभिचार करदा।”

¹²अते जे लाड़ी अपणे लाड़े जो छड्डी करी दूज्जे कने ब्याह करदी तां से व्यभिचार करदी।

¹³फिरी लोक्क अपणे निक्के-निक्केयां जो यीशु का लियाणे लगे कि से तिन्हा पर हत्थ रख्खी करी तिन्हा जो आशीष दैण, पर चेल्‍लेयां ने तिन्हा जो झिड़की करी रोक्केया।

¹⁴पर ए दिख्खी करी यीशु गुस्सा होई गे अते चेल्‍लेयां जो बोल्लेया, “निक्केयां जो मेरे का आणे देयो, अते तिन्हा जो मत ठाक्को, किजोकी परमेश्वर रा राज इदेय जणेया रा ही है।

¹⁵मैं तुसा कने सच बोलदा कि जे कोई परमेश्वर रे राज जो छोटे बच्चेयां सांई अपनादां, से ही परमेश्वर रे राज बिच जाई सकदा।

¹⁶अते यीशु ने बच्चेयां जो खोख्खा लेया, ते तिन्हा पर हत्थ रख्खी करी तिन्हा जो आशीष दित्ती।”

¹⁷जां यीशु यरुशलेम सहर तांइ निकलणे वाले थिये, तां इक्क मणू दौड़ी करी आया, अते तिन्हेरे अग्गे गोड्डे टेकी करी तिन्हा का पूछणा लगेया, “ओ भले गुरु, हमेसा री जिन्दगी रा हकदार बणने तांइ मैं कै करां?”

¹⁸यीशु ने तिस मणू जो बोल्लेया, “तू मेरे जो भला किजो बोलदा? परमेश्वर जो छड्डी करी कोई भला नी है।

¹⁹तू हुकमां जो तां जाणदा ही: ‘खून नी करणा, व्यभिचार नी करणा, चोरी नी करणी, झूठ्ठी गवाई नी दैणी, धोखा नी दैणा, अपणे मां-प्यो रा आदर करणा।’

²⁰तिस मणू ने यीशु जो बोल्लेया, ओ गुरु, इन्हा सारी गल्लां जो तां मैं बचपन का ही का मन्नेया करदा है। इसेरे अलावा मेरे जो होर कै करणे री जरुरत है?”

²¹यीशु ने तिस मणू जो दिख्खेया अते तिसजो दाह लाई अते तिसजो बोल्लेया, “हल्ले भी इक्क गल्ल री कमी है, जे किच्‍छ तेरा है, तिसजो बेच्ची करी गरीबां जो बंड्डी दे अते तिज्जो स्वर्ग बिच धन्न मिलणा, फिरी हटी करी मेरा चेल्ला बणने तांइ मेरे पीछे आई जा।”

²²इस गल्ल कने तिसेरा मुँह उतरी गेया, अते से उदास होई करी चली गेया, किजोकी से बड़ा अमीर थिया।

²³यीशु ने चौं पास्से दिख्खी करी अपणे चेल्‍लेयां जो बोल्लेया, “अमीर लोक्कां रा परमेश्वर रे राज बिच जाणा बड़ा जादा मुस्किल है।”

²⁴चेल्‍लेयां जो यीशु री गल्लां पर हरानी होई, पर यीशु ने फिरी चेल्‍लेयां जो बोल्लेया, “ओ निक्केयो, जे पैसेयां पर विश्वास रखदे, तिन्हेरे तांइ परमेश्वर रे राज अन्दर जाणा बड़ा जादा मुस्किल है।

²⁵अमीर लोक्कां ने परमेश्वर रे राज बिच जाणे का जादा असान तां ऊँट रा सुई रे भोक्का निकली जाणा है।”

²⁶चेल्‍ले बड़े ही जादा हरान होई करी अप्पु-मित्ते बोलणा लग्गे, “तां फिरी कुसेरा छुटकारा होई सकदा?”

²⁷यीशु ने तिन्हेरे पास्से दिख्खी करी बोल्लेया, “मुणआं रे तौर पर तां ए नामुमकिन है पर परमेश्वर सब किच्‍छ करी सकदे।”

²⁸तां पतरस बोलणे लगेया, “दिख्खो, असा तां सब किच्‍छ छड्डी करी तुसा रे चेल्‍ले बणी गेरे हिन तां फिरी असा जो कै मिलणा?”

²⁹यीशु ने तिन्हा जो जवाब दित्तेया, “मैं तुसा जो सच-सच बोलदा, जिस कुसकी ने भी मेरे ते मेरे सुब बसेख तांइ अपणे घर-बार, भाई-भैण, मां-प्यो, निके-निके, जमिनां जो छड्डी दित्तेया,

³⁰इदेय हर कुसकी मणू जो सताव कन्ने कन्ने बदले बिच सौ गुणा घर-बार, भाई-भैण, मां, निके-निके, जमिनां ते आणे वाले दिनां बिच हमेसा री जिन्दगी मिलणी।

³¹पर बड़े जणे जे अब्बे बड़े खास हिन से बाद बिच खास नी रैह्णे ते जे अब्बे खास नी समजे जांदे से तिस बेल्ले खास होणे।”

³²से यरुशलेम सहर जो जाया करदे थिये अते हल्ले रस्ते बिच थिये, ते यीशु अपणे चेल्‍लेयां रे अग्गे अग्गे चलेया करदे थिये: चेल्‍ले हैरान थिये अते जे मणू तिन्हेरे पीछे-पीछे चलदे थिये से डरे रे थिये। तां यीशु फिरी अपणे चेल्‍लेयां जो लोक्कां का अलग लै जाई करी तिन्हा कने से सारी गल्लां जे तिन्हा कने होणे वाली थी, दसणा लग्गे।

³³“दिख्खो, असी यरुशलेम सहर जो जाया करदे हिन, अते मणू रा पुत्तर, जे मैं ही है बड्डे पुरोत्तां ते शास्त्रियां रे हत्थे पकड़ाया जाणा, अते तिन्हा ने मेरे जो मौत री सजा दैणी अते मेरे जो रोमी राज रे लोक्कां का पकड़वाई दैणा।

³⁴तिन्हा मेरा हसी-मजाक उड़ाणा, मेरे पर थूकणा, मेरे जो कोड़े मारणे अते मेरे जो सजा देई करी मारी दैणा, अते तिज्जे रोज्जे मैं जिंदा होई जाणा।”

³⁵तां जब्दी रे निक्के याकूब अते यूहन्ना ने यीशु का आई करी बोल्लेया, “ओ गुरु जी, असी तुसा का किच्‍छ चाह्‍ंदे।

³⁶यीशु ने तिन्हा दोन्नां जो बोल्लेया, कि तुसा मेरे का कै चाह्‍ंदे?”

³⁷तिन्हा दोन्नां ने यीशु जो बोल्लेया, “असी चाह्‍ंदे कि जां तुसा अपणे राज बिच अपणे महिमामय सिंहासन पर बैह्णा तां असा बिच का इक्क तुसा रे सज्जे पास्से अते दुज्जा तुसा रे खब्बे पास्से बये।”

³⁸यीशु ने तिन्हा दोन्नां जो बोल्लेया, “तुसां नी जाणदे हिन कि तुसा कै मंगदे हिन! जे दुख मैं सहणे वाला है, कै तुसा सही सकदे? ते जिय्यां मेरे जो मारेया जाणा कै तुसा तैसी मौत जो सहन करी सकदे?”

³⁹तिन्हा दोन्नां ने यीशु जो बोल्लेया, “असी सही सकदे।” यीशु ने तिन्हा जो बोल्लेया, “बिल्कुल तुसा से दुख सही सकदे जे मैं सहणे वाला है,

⁴⁰पर मेरे जो कुसकी जो भी अपणे सज्जे या खब्बे पास्से बिठाणे रा अधिकार नी है। परमेश्वर पिता ने से जगाह् अपणे चुणे रे लोक्कां तांइ तैयार कित्ते री है।”

⁴¹ए सुणी करी बाकि रे दस चेल्‍ले याकूब अते यूहन्ना पर गुस्सा होई गे।

⁴²तां यीशु ने चेल्‍लेयां जो अप्पु का सद्दी करी उन्हा जो बोल्लेया, “तुसां जाणदे कि इस दुनिया बिच जे शासक हिन, से लोक्कां पर राज करदे, अते बड्डे अधिकारी मणू अप्पु का छोटे लोक्कां पर हुकम चलांदे

⁴³पर तुसा अंदर इदेया नी होणा चाएदा, पर तुसा बिच जे कोई बड्डा बणना चाए से नौक्कर बणे,

⁴⁴ते जे कोई तुसा बिच प्रधान बणना चाओ, से सबणी रा दास बणे।

⁴⁵किजोकी मणू रा पुत्तर, जे मैं ही है इधेरे तांइ नी आया कि मेरी सेवा टहल कित्ती जाए, पर इधेरे तांइ आया ताकि अप्पु दूज्जेयां री सेवा-टहल करें अते बड़े जणेया रे छुटकारे तांइ अपणी जान देई दे।”

⁴⁶यरुशलेम सहर जांदे बेल्ले से जां से, तिन्हेरे चेल्‍ले इक्क बड्डी भीड़ कने यरीहो कस्बे जो पार करेया करदे थिये तां तित्ते ते तिन्हा जो तिमाई रा मुंडा बरतिमाई मिल्लेया जे जन्म का ही अह्न्ना थिया, जे सड़क रे कनारे बेई करी भीख मंगेया करदा थिया।

⁴⁷से ए सुणी करी कि नासरत रे यीशु तित्ते का गुजरेया करदे हिन, हक्का लाई-लाई करी बोलणे लगेया, “ओ दाऊद री संतान, यीशु मेरे पर दया करो!”

⁴⁸बड़े जणेया ने बरतिमाई जो बक्केया कि चुप रेह्, पर से होर हक्का मारणे लगेया, “ओ दाऊद री सन्तान, मेरे पर दया करो!”

⁴⁹यीशु ने रुकी करी बोल्लेया, “तिसजो सद्दो।” अते मणूआं ने तिस अन्ने जो सद्दी करी तिसजो बोल्लेया, “हिम्मत कर, उठ! से तिज्जो सद्ददे हिन।”

⁵⁰से अपणा चोग्गा सूटी करी झट उठेया, अते यीशु का आया।

⁵¹तां यीशु ने तिसजो बोल्लेया, “तू कै चाह्‍ंदा कि मैं तेरे तांइ करां?” अन्ने ने तिन्हा जो बोल्लेया, “ओ गुरु, ए ही कि मैं दिखणे लगां।”

⁵²यीशु ने तिसजो बोल्लेया, “चली जा, तेरे विश्वास करणे री वजह तू ठीक होई गेया अते से उस्सी बेल्ले दिखणा लग्गी पेया।” अते तिन्हेरे पीछे चली पेया।