Read Chambeali मरकुस 12 Bible Online

मरकुस 12 - Chambeali bible

मरकुस 12

¹फिरी यीशु तिन्हा लोक्कां कने उदारण देई करी सिखाणा लगे : “कुसकी मणू ने अंगूर रा बगीच्चा लगाया, ते तिसेरे चौन्नी पास्से बाड़ा लाया, ते तित्ते इक्क अंगूर रे रस्स रा कुंड बणाया ते बगीच्चे री रखवाली करणे तांइ इक्क छन्न बणाई, ते किसान्नां जो तिसेरा ठेक्का देई करी अप्पु दुर देस जो चली गेया।

²फिरी अंगूर री खुणारी बेल्ले बगीच्चे रे मालक ने तिन्हा किसान्नां का अपणा इक्क नौक्कर जो भेज्जेया कि से जाई करी तिन्हा जमीदारां का बगीचे रा अपणा हिस्सा लेई आओ।

³पर तिन्हा जमीदारां ने तिस नौक्कर जो मारी-कुट्टी करी खाल्ली हत्थ वापस भेजी दित्तेया।

⁴फिरी बगीच्चे रे मालक ने इक्क होर नौक्कर जो तिन्हा का भेज्जेया, तिन्हा लोक्कां ने तिस नौक्कर री बेज़ती कित्ती ते तिसेरा सर फाड़ी रख्खेया।

⁵फिरी तिस मालिक ने इक्क होर नौक्कर जो भेज्जेया, तिन्हा लोक्कां ने तिस नौक्कर जो मारी रख्खेया। तां तिनिए होर मते नौक्करां जो भी भेज्जेया पर तिन्हा लोक्कां तिन्हा बिच का किच्‍छ जो तां कुट्टेया, ते किच्‍छ जो मारी रख्खेया।

⁶आखर बिच तिस मालक का सिर्फ तेरा मुंडा ही बचेया जिस जो से बड़ा जादा प्यार करदा थिया। तिस मालक ने अपणे मुंडे जो ए सोच्ची करी भेज्जेया कि इसेरी तां तिन्हा लोक्कां ने इज्जत जरुर करणी।

⁷पर तिन्हा किसाना ने अप्पु-मिते बोल्लेया कि, ए ही तां वारिस है। आओ, असी इसजो ही मारी रखदे, ते ए बगीच्चा असा रा होई जाणा।

⁸ते तिन्हा लोक्कां ने मालक रे मुंडे जो पकड़ी करी मारी रख्खेया, ते तिस अंगूर रे बगीचे का बाहर सूटी दित्तेया।”

⁹यीशु ने बोल्लेया, मैं तुसा जो दसदा “अंगूर रे बगीचे रा मालक ने अवे कै करणा। तिनिए आई करी उन्हा किसाना जो मारी रखणा, ते अंगूर रा बगीच्चे रा ठेक्का दूए किसान्नां जो देई दैणा।

¹⁰कै तुसा ने पवित्रशास्त्र अन्दर ए वचन नी पढ़ेया? ‘जिस पत्थर जो मिस्त्रियां ने तुच्छ समजेया थिया, सेह्ई कुणे रा खास पत्थर बणी गेया।

¹¹ए परमेश्वर रे कम्म हिन, ते ए अनौखे हिन।’”

¹²तां बड्डे पुरोत्तां, शास्त्रियां ते मन्दिर रे बुजुर्गां ने यीशु जो पकड़ने री कोसीस कित्ती किजोकी से समजी गे थिये कि यीशु रे उदारण बिच से मणू दुष्ट किसान हिन पर लोक्कां रे डर कने किच्‍छ नी कित्तेया, इधेरे तांइ यीशु जो छड्डी करी चली गे।

¹³बाद बिच किच्‍छ यहूदियां रे प्रधान मणूआं ने किच्‍छ फरीसियां ते हेरोदेस रे झुण्ड रे लोक्कां जो यीशु का भेज्जेया ताकि तिन्हा जो गल्लां बिच फसाए ते फिरी तिन्हा जो गिरफ्तार कित्तेया जाई सके।

¹⁴फरीसियां ते हेरोदेस रे समुह रे लोक्कां ने आई करी यीशु जो बोल्लेया, “ओ गुरु जी, असा जो पता है कि तुसा सच्चे हिन। तुसा कुसकी रा पक्षपात नी करदे। ते तुसा परमेश्वर री गल्लां सच्चाई कने सिखांदे। अवे असा जो दस्सो कि कै सम्राट जो चुंगी दैणा चाएदी की नी?

¹⁵कै असा जो चुंगी दैणी चाएदी या नी दैणी चाएदी?” यीशु तिन्हा लोक्कां रे कपट जो समजी गे, ते फरीसियां ते हेरोदेस रे समुह रे लोक्कां जो बोल्लेया, “तुसी मणू किजो मेरे जो परखेया करदे हिन? मेरे का इक्क दीनार रा सिक्का[2]लेई आओ, मैं तुसा जो जवाब दिंदा।”

¹⁶से लेई आए, ते यीशु ने तिन्हा जो बोल्लेया, “इस सिक्के पर कुसेरा नां ते छाप बणे री है?” तिन्हा लोक्कां ने जवाब दित्तेया, “सम्राट रा,”

¹⁷यीशु ने तिन्हा जो बोल्लेया, “तां जे सम्राट रा है, से सम्राट जो देयो ते जे परमेश्वर रा है से परमेश्वर जो देयो,” तां से मणू बड़े वरी हैरान होए।

¹⁸फिरी यहूदी समाज रे सदूकी लोक, जे मनदे थिये कि मरणे का बाद कोई फिरी जिन्दा नी होई सकदा, यीशु का आई करी पूच्छणा लगे,

¹⁹“ओ गुरु जी, मूसा ने असा तांइ लिख्खे रा है कि अगर इक्क मणू मरी जाए ते तिसेरी कोई औलाद भी ना हो तां तिसेरे भाई जो तिस जनानी कने ब्याह करी लै ताकि तिस कने तिस मरणे वाले मणू रा नां चलदा रे।

²⁰उदारण रे तौर पर, कुसकी बेल्ले सत्त भ्याल हुंदे थिये। सबका बड्डे भ्याल ने तिस जनानी कने ब्याह् कित्ता पर बगैर औलाद रे ही मरी गेया।

²¹तां दूज्जे भ्याल ने तिस जनानी कने ब्याह् करी लेया ते से भी बगैर औलादे रे ही मरी गेया ते तिय्यां ही त्रिये ने भी तिस जनानी कने ब्याह कित्ता।

²²ते सत्त रे सत्त भ्यालां बिच का कुसकी रे भी औलाद नी हुई ते सारे भ्यालां रे मरणे का बाद, से जनानी भी मरी गई।

²³फिरी जिन्दे होणे पर तिस जनानी ने कुसेरी लाड़ी होणा? किजोकी से तां तिन्हा सत्त रे सत्त भ्यालां कने ब्याह करी बैठ्ठे री थी?”

²⁴यीशु ने तिन्हा सदूकी लोक्कां जो बोल्लेया, “तुसां री गलती ए है कि तुसा पवित्रशास्त्र री गल्लां जो नी समजदे, ते ना ही परमेश्वर री ताकत रे बारे अन्दर किच्‍छ जाणदे।

²⁵किजोकी जां परमेश्वर ने मरे रे लोक्कां फिरी जिन्दे करणा तां तिन्हा अंदर कोई ब्याह नी होसणे, पर से मणू स्वर्ग बिच परमेश्वर रे स्वर्गदूतां सांई बणी जाणे।

²⁶पर अवे, मरे रे लोक्कां रे जिन्दे होणे रे बारे बिच कै तुसा मूसा री कताबां री तिस बलदी झाड़ी री कहाणी बिच ए नी पढ़ेया? अब्राहम, इसहाक ते याकूब रे मरणे रे मते साल्लां बाद भी परमेश्वर मूसा कने बोलदे, ‘मैं अब्राहम रा परमेश्वर, इसहाक रा परमेश्वर ते याकूब रा परमेश्वर है।’

²⁷इधेरे तांइ परमेश्वर मरे रे लोक्कां रा नी पर जिन्दे लोक्कां रे परमेश्वर हिन। तुसा मणू बड़ी बड्डी गलतफहमी बिच पेय रे हिन।”

²⁸शास्त्रि लोक्कां बिच का इक्क जणे ने आई करी तिन्हा जो बैह्स करदे सूणेया। से समजी गेया कि यीशु ने तिन्हा जो सही तरिक्के कने जवाब देई करी चुप्प कराई दित्ते रा है। तिन्हा का पूच्छणा लगेया, “सारेयां का खास हुकम कुण जणा है?”

²⁹यीशु ने तिसजो जवाब दित्तेया, “सारे हुकमां बिच का बधी करी ए हुकम है, ‘ओ इस्राएल, सुण! असा रा प्रभु परमेश्वर ही इकलौता प्रभु है।

³⁰ते तू अपणे प्रभु परमेश्वर कने पूरे मन कने, पूरी जान कने, सारी समझ कने, अते अपणी सारी ताकत कने प्यार करेयां।’

³¹ते दुज्जा हुकम ए है कि, ‘तू अपणे गुआडियां कने अपणे बराबर प्यार करेयां।’ इसका बड्ड़ा होर कोई हुकम नी है।”

³²शास्त्रि लोक्कां ने यीशु जो बोल्लेया, “ओ गुरु जी, बड़ी ठीक गल्ल है! तुसा ने सच बोल्लेया कि परमेश्वर इक्को ही हिन, ते तिन्हा जो छड्ड़ी, होर कोई परमेश्वर नी है।

³³ते तिन्हा कने पूरे मन, पूरी समझ, पूरी जान, अते सारी ताकत कने प्यार करणा चाएदा अते गुआडियां कने अप्पु रे बराबर प्यार करणा, सारी दान ते कुर्बानी का भी बधी करी।”

³⁴जां यीशु ने दिख्खेया कि तिस मणू ने बड़ी समजदारी कने जवाब दित्तेया, तां तिन्हा ने बोल्लेया, “तू परमेश्वर रे राज का दुर नी है।” ते फिरी कुसकी जो भी यीशु का किच्‍छ भी पूच्छणे री हिम्मत नी पेई।

³⁵फिरी यीशु ने मन्दिर अन्दर उपदेस दिन्दे बेल्ले बोल्लेया, “शास्त्रि मणू किय्यां बोल्दे कि मसीह दाऊद रा पुत्तर है?

³⁶किजोकी दाऊद ने अप्पु ही पवित्रात्मा अन्दर होई करी बोल्ले रा है: ‘परमेश्वर ने मेरे प्रभु जो बोल्लेया, मेरे सज्जे पास्से बैह्, जां तांइ मैं तेरे दुश्मणा जो तेरे पैरां हेठ नी करी दिन्दा।’

³⁷दाऊद तां अप्पु ही तिन्हा जो प्रभु बोल्दा, फिरी से किय्यां तिसेरा पुत्तर होया? अते भीड़ रे मणू तिन्हेरी गल्लां जो खुसी कने सूणदे थिये।”

³⁸यीशु ने तिन्हा लोक्कां जो ए भी सिखाया “शास्त्रियां का बची करी रेयो! किजोकी से मणू लम्बे-लम्बे चोग्गे पाई करी फिरणा अते बजारां बिच लोक्कां का प्रणाम तोपदे,

³⁹अते सभास्थल अन्दर खास-खास जगाह् पर बैह्णा अते धाम अन्दर खास-खास जगाह् तोपदे।”

⁴⁰से विधवा जनानियां कने धोखा करी के तिन्हेरी जमीन-जायदाद हड़पी लिंदे, ते बड़ी लम्बी-लम्बी प्रार्थना करी के पवित्र बणने रा ढोंग करदे। इदेइ गल्लां री वजह कने तिन्हा लोक्कां जो बड़ी सजा मिलणी।

⁴¹यीशु मन्दिर रे भंडार रे सामणे बेई करी लोक्कां जो तिस बिच दान पांदे दिख्खेया करदे थिये अते मते अमीर मणूआं ने बड़ा दान पाया।

⁴²तां तित्ते इक्क गरीब विधवा ने आई करी दो सिक्के पाए, जिसेरी कीमत इक्क अधेल्ले रे बराबर थी,

⁴³तां यीशु ने अपणे चेल्‍लेयां जो सद्दी करी बोल्लेया, “मैं तुसा जो सच बोल्दा कि मन्दिर रे भंडार अन्दर दान पाणे वाले मते लोक्कां बिच का इस कंगाल विधवा ने सबणी का जादा बधी करी पाया।

⁴⁴किजोकी सबनां ने अपणे मते सारे पैसेयां बिच का थोड़ा-मता पाया, पर इस जनानी ने अपणा से सब किच्‍छ भी पाई दित्ता जे इसजो जीणे तांइ चाएदा थिया।”