Read Chambeali मरकुस 13 Bible Online

मरकुस 13 - Chambeali bible

मरकुस 13

¹जां यीशु मन्दिर का निकलेया करदे थिये, तां तिन्हेरे चेल्‍लेयां बिच का इक्क ने तिन्हा जो बोल्लेया, “ओ गुरु जी, इन्हा खूबसुरत ईमारतां जो दिख्खो! इन्हा दुआलां बिच इन्ने छैल ते बड्डे-बड्डे बट्टेयां जो दिख्खो।”

²यीशु ने तिसजो बोल्लेया, “हाँ, इन्हा खूबसुरत ईमारतां जो दिख्खो। पर ए सारी पूरी तरिक्के कने तबाह करी दित्ती जाणी। इत्ते इक्क बट्टा भी नी बचणा!”

³बाद बिच, यीशु मन्दिर रे सामणे, जैतून रे पहाड़ री पद्दरी जगाह् बैठ्ठे रे थिये। पतरस, याकूब, यूहन्ना ते अन्द्रियास तिन्हा का लुकी करी मिलणे जो आये ते तिन्हा का पूच्छेया।

⁴“असां जो दस्सो कि ए सारा किच्‍छ कधाड़ी होणा? ते जां ए सब गल्लां पूरी होणे वाली होणी, तां ईधेरी कै निशानी होणी?”

⁵यीशु तिन्हा जो बोलणा लगे, “चुकन्ने रेयो कि कोई तुसा जो भटकाई ना सके।”

⁶किजोकी मते जणेया ने मेरा नां लेई करी आणा, ते बोलणा कि, “मैं ही मसीह है” ते मते जणेया जो भटकाई दैणा।

⁷जां तुसा लड़ाईयां ते लड़ाईयां री धमकियां सुणगे, तां डरदे मत। हाँ, ए सारी गल्लां तां होणी ही हिन, पर अंत इन्ने तौले नी होणा।

⁸किजोकी देस-देस रे लोक्कां ने अप्पु अंदर लड़ाईयां करणी ते इक्क राज ने दूज्जे राज पर हमले करणे। मती जगाह् पर हिल्लण आणे, ते अकाल पेई जाणे, पर ए तां तकलिफां री सुरुआत ही है।

⁹“पर तुसा चुकन्ने रेयो, किजोकी जां ए सारी चीजां होणा सुरु होणी तां तुसा लोक्कां जो पकड़ी करी पंचायत बिच लेई जाया जाणा ते सभास्थल बिच मारेया-कुट्टेया जाणा, तुसा जो हाकमां ते राज्जेयां सामणे लेई जाया जाणा किजोकी तुसा मेरे चेल्‍ले हिन।” पर ए तुसा तांइ मौक्का होणा कि तुसा तिन्हेरे सामणे मेरी गवाई देई सको।

¹⁰पर जरुरी है कि सुब बसेख पैल्ले दुनिया रे सारे देस रे लोक्कां अन्दर रा सूणाई दित्तेया जाए।

¹¹जिस बेल्ले तुसा कने कचेरी बिच सवाल-जवाब कित्ते जाणे, तां डरदे मत कि कै जवाब दिंगे। से ही बोल्लेयो जे परमेश्वर तिस बेल्ले बोलणे तांइ दस्से, किजोकी बोलणे वाले तुसा नी पर पवित्रात्मा है।

¹²“भाई ने भाई जो धोख्खे कने मरवाई दैणा, प्यो ने अपणे ही मुंडे जो धोख्खा दैणा, ते बच्चेयां ने मां-प्यो रे खलाफ होई जाणा ते तिन्हा जो मरवाई दैणा।”

¹³ते सारेयां ने तुसा कने नफरत करणी किजोकी तुसा मेरे चेल्‍ले हिन। पर जिनिये मरदे दम तक विश्वास बिच टिके रैह्णा तिसेरा ही छुटकारा होणा।

¹⁴पढ़ने वाले इस गल्ल जो समजी जाण “से दिन आया करदा है जां तुसा मन्दिर बिच तिस घटिया चीज जो, तित्ते दिखणा जित्ते तिसजो नी होणा चाएदा ते जिसेरे बारे बिच दानिय्येल भविष्यद्वक्ता ने भविष्यवाणी कित्ती थी, जां तुसा तिसजो मन्दिर बिच आंदे दिख्खो तां जे यहूदियां जिले बिच हिन से पहाड़ा पर नह्सी जायो।”

¹⁵जे भोड़ी हुन्गा, से अपणे घरां का किच्‍छ लैणे तांइ अन्दर मत जांदे।

¹⁶अते जे खेतरां अन्दर हुन्गा, से होर कपड़े लैणे तांइ पीच्छे ना हटो।

¹⁷मैं तिन्हा जनानियां तांइ बड़ा बुरा महसूस करदा, जे तिन्हा दिनां बिच दुपराणी अते दूद्द पुआणे वाली होणी किजोकी तिन्हा ने नह्सी नी सकणा।

¹⁸ते प्रार्थना करो कि से दिन सरदी रे मौसम बिच ना हो जां सफर करणा बड़ा मुस्किल होणा।

¹⁹किजोकी से रोज इदेइ कहला वाले होणे कि दुनिया रे सुरु होणे का, जे परमेश्वर ने बणाए री है, हल्ले तांइ ना तां होये अते ना ही फिरी कदी होणा।

²⁰जे प्रभु तिन्हा रोज्जां जो घट्ट नी करदे, तां कुसकी भी जीव-जन्तु ने नी बचणा थिया पर तिन्हा चुणे रे मणूआं री वजह कने जिन्हा जो परमेश्वर ने चुणे रा है, तिन्हा रोज्जां जो घटाया।

²¹तिस बेल्ले अगर तुसा जो कोई बोल्लो, “दिख्खो, मसीह यीशु इत्ते हिन, या ‘दिख्खो, उत्ते हिन’ तां तिन्हेरा विश्वास मत करदे।”

²²किजोकी झूठ्ठे मसीह ते झूठे भविष्यद्वक्ता खड़ी उठणे, अते तिन्हा मती किस्म री निशानियां ते चमत्कार वाले कम्म दखाणे ताकि होई सके तां से चुणे रे लोक्कां जो भी धोखा देई दैण।

²³पर तुसा चुकन्ने रेयो दिख्खो, मैं तुसा जो सब गल्लां पैल्ले ही बोल्ली रख्खियाँ।

²⁴“तिन्हा रोज्जां बिच, तिन्हा मुसीबतां रे दिनां रे बाद, सूरज न्याहरा होई जाणा, ते चाँद ने रौसनी नी दैणी,

²⁵ते आसमान का तारे छुड़कणा लग्गी पैणे, ते आसमान री शक्तियां हिलाई जाणी।”

²⁶तां लोक्कां ने मणू रे पुत्तर, जे मैं ही है, जो महान ताकत अते महिमा कने बद्दलां पर आंदे दिखणा।

²⁷तिस बेल्ले मैं अपणे स्वर्गदूतां जो भेजी करी, धरती ते आसमान रे हर कुणे का अपणे चुणे रे मणूआं जो कठेरणा।

²⁸“अवे अंजीर रे बूट्टे का ए उदारण सिख्खो: जां तिसेरी डाली नरम होई जांदी, अते पत्ते निकलणा लग्गी पैंदे, तां तुसा जो पता लग्गी जांदा कि गरमी आणे वाली हिन।

²⁹इय्यां ही जिस बेल्ले तुसा इन्हा गल्लां जो हुंदे दिखगे, तां समजी जायो की से बेल्ला अवे इन्ना नेड़े पूजी गे रा है जिय्यां से दराज्जे पर ही हो।

³⁰मैं तुसा जो सच बोल्दा कि इस पीढ़ी रे मरणे का पैल्ले ही ए सारी गल्लां पूरी होई जाणी।

³¹आसमान ते जमीन टली जाँगे, पर मेरी गल्लां कदी भी नी टलणी।”

³²“तिस रोज या तिस बेल्ले रे बारे अन्दर कुस्की जो भी नी पता, ना स्वर्गदूत अते ना ही पुत्तर जो। पर सिर्फ पिता जो ही पता है।”

³³किजोकी तुसा नी जाणदे कि से दिन कधाड़ी आणे वाला है, इधेरे तांइ, चुकन्ने रेयो, ते प्रार्थना करदे रेयो!

³⁴“मेरे से आणे रा दिन तिस आदमी रे उदारण जदेया होणा जे इक्क लम्बे सफर पर गेया। ते जाणे का पैल्ले तिसने अपणे हर नौक्कर जो तिन्हेरे कम्म समझाई दित्ते, ते तिसने अपणे चौकीदार जो तिसेरे हटणे री भाल बिच रैह्णे जो बोल्लेया।

³⁵इधेरे तांइ जागदे रेयो, किजोकी तुसा जो पता नी है कि घर रे मालक ने कुस बेल्ले आणा है, संझा या धरात्ते बेल्ले, या मुर्गे रे बांग दैणे रे बेल्ले या भ्याग्गा।

³⁶इय्यां ना हो कि से चाण-चक्केई आई रेयो ते तुसा सुत्ते रे होन्।

³⁷अते मैं जे तुसा जो बोल्दा, से ही सबणी जो बोल्दा : चुकन्ने रेयो!”