Chambeali bible online

मरकुस 14

¹फसह ते अखमीरी रोट्टी रे त्योहर रे दो रोज्जे पैल्ले, बड्डे पुरोत्त ते शास्त्रि मणू इस गल्ल री तोपा अन्दर थिये, कि से यीशु जो किय्यां धोखे कने पकड़वाई करी मारी रखण।

²पर बड्डे पुरोत्त ते शास्त्रि मणू बोल्दे थिये, “असां ए कम्म त्योहर वाले रोज्जे नी करणा, कुदखी इय्यां ना हो कि मणूआं अन्दर दंगा होई जाओ।”

³जिस बेल्ले यीशु बैतनिय्याह रे कस्बे अन्दर तिस शमौन रे घरे जिस जो तिन्हा ने कोढ़ का ठीक कित्तेया थिया, रोट्टी खाणे जो बैठे रे थिये, तां तिस बेल्ले इक्क जनानी चिट्टे पत्थर रे पात्र बिच जटामांसी फूल रा बड़ा मैह्न्गा इत्र लेई आई अते सगंमरमर रे बर्तन जो तोड़ी करी तेल जो यीशु रे सरा पर उन्धेरी दित्तेया।

⁴पर किच्‍छ मणू जे तित्ते बैठ्ठे रे थिये से गुस्सा होई करी बोलणा लग्गे, “किजो इन्ना मैह्ंगा खुशबूदार इत्र बर्बाद करी दित्ता?

⁵इस खुशबूदार इत्र जो तां तीन्न सौ दीनार [3] का जादा कीमत अन्दर बेच्ची करी गरीबां जो देई सकदे थिये!” अते से तिसजो झिड़खा मारणा लगे।

⁶यीशु ने तिन्हा जो बोल्लेया, “इसजो मत बको, इसजो किजो तंग करेया करदे हिन? इसने तां मेरे तांइ खरा कम्म कित्तेया।

⁷गरीब तुसा कने हमेसा रैह्‍न्दे, अते तुसा जे चाह्‍ण, तिन्हा तांइ खरा करी सकदे पर मैं तुसा कने हमेसा नी रैह्णा।

⁸जे किच्‍छ भी ए करी सकदी थी, तिसने कित्ता, तिसने मेरे दब्बे जाणे री तयारी बिच पैल्ले आई करी मेरे जिस्म बिच तेल मलेया।

⁹मैं तुसा जो सच बोलदा कि सारी दुनिया अन्दर जित्ते भी सुब बसेख रा प्रचार कित्तेया जाणा, तित्ते इस जनानी रे इस कम्म रा जो याद कित्तेया जाणा।”

¹⁰तां यहूदा इस्करियोती जे बारा चेल्‍लेयां बिच का इक्क थिया, बड्डे पुरोत्तां का गेया कि यीशु जो तिन्हेरे हत्था पकड़वाई देयो।

¹¹बड्डे पुरोत्त मणू ए सुणी करी खुस होई गे, ते यहूदा इस्करियोती जो पैसे दैणे रा वादा कित्ता। अते से मौका तोपणा लग्गेया कि यीशु जो कुस तरिक्के कने पकड़वां।

¹²अखमीरी रोट्टी रे त्योहर रे पैल्ले रोज्जे, जिस अन्दर से फसह रा मेमना कुर्बान करदे थिये, यीशु रे चेल्‍लेयां ने तिन्हा का पूच्छेया, “तुसां कुते चाह्‍ंदे कि असी जाई करी फसह री रोट्टी खाणे री तयारी करण?”

¹³यीशु ने अपणे चेल्‍लेयां बिच का दो जणेयाँ जो ए बोल्ली करी भेज्जेया, “यरुशलेम सहर अन्दर जाओ, ते तुसा जो तित्ते इक्क मणू मिलणा जिनिए पाणी रा घड़ा चुक्के रा होणा, तिसेरे पीच्छे चली जायो।

¹⁴ते से जिस घर अन्दर जान्गा, तिस घर रे मालक जो बोल्ले, ‘गुरु जी बोलदे कि मेरा परौणे वाला कमरा कुते है जिस अन्दर मैं अपणे चेल्‍लेयां कने फसह री रोट्टी खाई सकां?’

¹⁵तिनिए तुसा जो भोड़ी, सजे-सजाए रे, अते तैयार कित्ते रे कमरा दखाई दैणा, तित्ते असा तांइ तयारी करो।”

¹⁶चेल्‍ले निकली करी सहर अन्दर आये, ते जिय्यां यीशु ने तिन्हा जो बोल्ले रा थिया, तिय्यां ही दिख्खेया ते फसह री रोट्टी तैयार कित्ती।

¹⁷जां सांज्ज होई, तां यीशु अपणे चेल्‍लेयां कने तिस घर बिच आये।

¹⁸जिस बेल्ले से बेई करी रोट्टी खाया करदे थिये, तां यीशु ने बोल्लेया, “मैं तुसा जो सच बोल्दा कि तुसा बिच का इक्क जणे ने, जे मेरे कने रोट्टी खाया करदा है, मेरे जो पकड़वाई दैणा।”

¹⁹बड़े वरी उदास होई करी चेल्‍ले वरी-वरी यीशु जो पूच्छणा लग्गे, “क्‍या मैं तुसा जो पकड़वाणे वाला है?”

²⁰यीशु ने तिन्हा जो बोल्लेया, “से बारा बिच का इक्क है, जे मेरे कने थाली अन्दर हत्थ पाया करदा है।

²¹किजोकी मणू रा पुत्तर, जे मैं ही है, जरुर मरणा जिय्यां कि मेरे बारे बिच पवित्रशास्त्र बिच लिख्खे रा भी है, पर तिस मणू तांइ ए ड्रौणी गल्ल होणी जिसेरी वजह कने मैं पकड़वाया जाणा! पकड़वाणे मणू वाले तांइ ए ही खरा हुंदा कि से पैदा ही नी हुंदा।”

²²जां से खाया ही करदे थिये, यीशु ने रोट्टी लेई, अते आशीष मंगी करी तोड़ी, अते चेल्‍लेयां जो दित्ती, ते बोल्लेया, “लेयो, ए रोट्टी मेरे सरीर जो दर्शांदी।”

²³फिरी तिन्हा ने अंगूर रे रस्स रा डुंगा लेई करी परमेश्वर रा धन्यवाद कित्ता, अते से भी अपणे चेल्‍लेयां जो दित्तेया ते उन्हा सब जणेयाँ ने तिस बिच का पित्तेया।

²⁴ते यीशु ने चेल्‍लेयां जो बोल्लेया, “ए अंगूर रा रस्स मेरे खून जो दर्शांदा, जे परमेश्वर री लोक्कां कने वाचा जो साफ तौर पर पक्का करदा। ते ए मते लोक्कां रे पाप्पां का छुटकारे तांइ बहाया जाणा।

²⁵मैं तुसा जो सच-सच बोल्दा कि अंगूर रा रस्स तिस रोज तांइ नी पीणा, जां तांइ परमेश्वर रे राज बिच नौआ ना पीयां।”

²⁶फिरी यीशु ते तिन्हेरे चेल्लेया ने भजन गाई करी बाहर जैतून रे पहाड़ जो चली गे।

²⁷जां से मणू रस्ते बिच थिये, तां यीशु ने अपणे चेल्‍लेयां जो बोल्लेया, “तुसां सबणी जणेया ने मेरे जो छड्डी दैणा, किजोकी पवित्रशास्त्र बिच लिख्खे रा है, ‘मैं रखवाले जो मारणा, ते भेड़ां ने तितर-बितर होई जाणा।’

²⁸पर मैं मुर्देयां बिच का जिन्दे होणे रे बाद, तुसा का पैल्ले गलील प्रदेश जो जाणा ते तुसा जो तित्ते ही मिलणा।”

²⁹पतरस ने यीशु जो बोल्लेया, “जे अगर सारे जणे तुसा जो छड्डी भी दिंगे, मैं तां भी तुसा जो नी छडणा।”

³⁰यीशु ने पतरस जो जवाब दित्ता, “मैं तेरे कने सच बोल्दा, अज्ज रात्ती ही मुर्गे रे दो वरी बांग मारणे का पैल्ले तैं तीन्न वरी मेरे जो पहचानणे का मुकरणा।”

³¹पर पतरस ने होर भी जादा जोर देई करी बोल्लेया, “अगर मेरे जो तुसा कने मरणा भी पेया, तां भी तुसा जो पहचानणे का कदी भी नी मुकरणा।” इय्यां ही बाकि सारे चेल्‍लेयां ने भी बोल्लेया।

³²फिरी यीशु ते तिन्हेरे चेल्‍ले गतसमनी नां री इक्क जगाह् जो आए, ते तिन्हा ने अपणे चेल्‍लेयां जो बोल्लेया, “जां तांइ मैं प्रार्थना नी करी लिंदा तां तांइ इत्ते बेई रेयो।

³³ते यीशु पतरस, याकूब अते यूहन्ना जो अपणे कन्ने प्रार्थना करणे तांइ लेई गे, ते बड़े ही उदास होई गे।”

³⁴ते तिन्हा त्रैनी चेल्‍लेयां जो बोल्लेया, “मेरा मन बड़ा उदास है, इत्ते तांइ कि मैं मरणे वाला है। तुसा इत्ते ही रुको, ते जागदे रेयो।”

³⁵फिरी यीशु थोड़े अग्गे बधे अते जमीन पर गोड्डे-भारे पेई करी प्रार्थना करणा लगे कि जे अगर होई सकदा तां ए घड़ी मेरे का टली जाये,

³⁶अते बोल्लेया, “ओ अब्बा, पिता, किजोकी तुसा सब किच्‍छ करी सकदे इधेरे तांइ इस दुख जो मेरे का हटाई लेयो, ताकि मेरे जो ए सब ना सहणा पेयो, पर तां भी जिय्यां मैं चाह्‍ंदा तिय्यां नी, पर जे तुसा चाह्‍ंदे, से ही हो।”

³⁷फिरी यीशु हटे अते तिन्हा ने दिख्खेया कि चेल्‍ले सुत्ते रे हिन। तिन्हा ने पतरस जो बोल्लेया, “ओ शमौन, तू सुत्ते रा है? कै तू थोड़ी होर देर भी नी जाग्गी सकेया?”

³⁸यीशु ने तिन्हा त्रै चेल्‍लेयां जो बोल्लेया, “तुसी मेरी गल्ल मनणा तां चाह्‍ंदे, पर तुसा शारीरिक तौर पर कमजोर हिन। इधेरे तांइ चुकन्ने रेयो ते प्रार्थना करदे रेयो ताकि तुसा परिक्षा बिच ना पेयो।”

³⁹ते यीशु वापिस हटी करी फिरी से ही प्रार्थना करणा लगे।

⁴⁰यीशु जां वापिस तिन्हा त्रै चेल्‍लेयां का आए तां फिरी तिन्हा जो सुत्ते रा दिख्खेया, से इन्नी जादा निन्दर बिच थिये कि से अपणी हाख्खियां भी नी खोली पांदे थिये, से बड़े शर्मिंदा होए ते समजी नी सके कि अवे कै जवाब दैण।

⁴¹जां यीशु तिज्जी वरी हटी करी आये तां फिरी तिन्हा जो सुत्ते रा दिख्खी करी बोल्लेया, “तुसी हल्ले भी सुत्ते रे हिन? बस्स करो! से बेल्ला आई चुके रा है। दिख्खो मणू रा पुत्तर, जे मैं ही है पाप्पी लोक्कां रे हत्थां पकड़वाया जाणा।

⁴²उठ्ठो ते चलो! दिख्खो, मेरे जो पकड़वाणे वाला नेड़े आई रेया।”

⁴³हल्ले यीशु जां ए सब गल्लां बोल्लेया ही करदे थिये कि तिस्सी बेल्ले यहूदा, जे यीशु रे बारा चेल्‍लेयां बिच का इक्क चेल्ला है, बड्डे पुरोत्तां, शास्त्रियां ते मन्दिर रे बुजुर्गां रे भेज्जे रे हथियारबंद लोक्कां री भीड़ लेई करी तित्ते पूजी गेया।

⁴⁴धोखेबाज यहूदा ने तिन्हा लोक्कां जो ए बोल्लेया थिया। “जिस जो मैं चुम्मी करी मिलणा, तिसजो ही बन्नी करी लेई जायो।”

⁴⁵यहूदा आया, अते झट्ट यीशु का आई करी बोल्लेया, “ओ गुरु!” अते तिन्हा जो चुम्मेया।

⁴⁶तां तिन्हा लोक्कां ने यीशु जो पकड़ी करी गिरफ्तार करी लित्तेया।

⁴⁷पर यीशु रे चेल्‍लेयां बिच का इक्क ने तलवार कने प्रधान पुरोत्त रे नौक्कर रा कान्न कट्टी दित्ता।

⁴⁸यीशु ने तिन्हा जो बोल्लेया, “क्‍या मैं ड़ाकू है जिस जो तुसा मेरे जो पकड़ने तांइ तलवारां ते सोठ्ठे लेई करी आए रे हिन?

⁴⁹मैं ता हर रोज मन्दिर अन्दर तुसा कने रेई करी उपदेस दिन्दा थिया, ते तां तुसा ने मेरे जो नी पकड़ेया: पर ए इधेरे तांइ होया कि पवित्रशास्त्र री गल्लां पूरी होण जे मेरे बारे बिच लिख्खे री हिन।”

⁵⁰तां ए सब किच्‍छ दिख्खी करी से सारे चेल्‍ले यीशु जो छड्डी करी नह्सी गे।

⁵¹इक्क जुआन मणू अपणे नंगे सरीर पर चादर लेई करी यीशु रे पीच्छे चली पेया। जां मणूआं ने तिसजो पकड़ेया,

⁵²पर से चाद्दर जो छड्डी करी नंगा ही नह्सी गेया।

⁵³फिरी से यीशु जो सबका प्रधान पुरोत्त रे घरे लेई गे जित्ते सब बड्डे पुरोत्त, शास्त्रि मणू ते मन्दिर रे बुजुर्ग मणू कठित्ते रे थिये।

⁵⁴पतरस दुर का ही यीशु रे पीच्छे-पीच्छे सबका प्रधान पुरोत्त रे अंगण रे बिच चली आया, ते नौक्करां कने बेई करी आग्ग तपणे लग्गेया।

⁵⁵बड्डे पुरोत्तां अते सारी सभा यीशु जो मारी रखणे तांइ तिन्हेरे खलाफ झूठ्ठी गवाई जो तोप्पेया करदे थिये, पर तिन्हा लोक्कां जो किच्‍छ नी मिल्लेया।

⁵⁶मते लोक्कां ने यीशु रे खलाफ झूठ्ठी गवाईयां दित्ती पर तिन्हेरी गल्लां आपस अंदर नी थी मिलेया करदी।

⁵⁷आखिरकार किच्‍छ लोक्कां ने खड़ी करी यीशु रे खलाफ इक्क झूठ्ठी गवाई दित्ती:

⁵⁸असा ने इसजो ए बोल्दे सुणे रा है, “मैं इस मन्दिर जो ढ़ाह्ई दैणा जिस जो इन्सानां ने बणाए रा है, अते त्रै रोज्जां अन्दर दुज्जा बणाई दैणा, जे कुसकी इन्सान ने नी बणाए रा होणा।”

⁵⁹पर तिन्हेरी गवाईयां भी सही नी बैठ्ठी!

⁶⁰तां फिरी प्रधान पुरोत्त ने उठी करी यीशु जो पूच्छेया, “क्‍या तू इन्हेरे इल्जाम रा जवाब नी दैणा? तू अपणे बारे बिच कै बोलणा चाह्‍ंदा?”

⁶¹पर यीशु चुप्प ही रे, ते कोई जवाब नी दित्तेया। प्रधान पुरोत्त ने तिन्हा का फिरी पूच्छेया, “क्‍या तू उस परमधन्य रा पुत्तर, मसीह है?”

⁶²यीशु ने बोल्लेया, “हाँ! ‘मैं है’ ते तुसा मणू रे पुत्तर जो, जे मैं ही है, तिस ताकतवर परमेश्वर री सज्जे पास्से बैठ्ठे रे ते आसमान बिच बदलां पर आंदे दिखणा।”

⁶³तां प्रधान पुरोत्त ने अपणे कपड़ेयां जो फाड़ी करी बोल्लेया[4], “अवे असा जो गवाई दैणे वालेयां री होर कोई जरुरत नी है?”

⁶⁴तुसा सारे जणेया इसजो परमेश्वर री ए बुराई करदे सूणेया ही है। अवे तुसा कै सोचदे? तिन्हा ने लेर मारी करी बोल्लेया “इसजो मारी रखणा चाएदा!”

⁶⁵तां किच्‍छ लोक्कां यीशु पर थूक्की करी, ते तिन्हेरे मुँह जो ढ़की करी मुक्के मारणा सुरु करी दित्ता ते तिन्हा रा मजाक उड़ाणे तांइ तिन्हा जो बोल्लेया, “अगर तू भविष्यद्वक्ता है तां दस्स कि कुसने तिज्जो मारेया!” अते सैनिकां ने तिन्हा जो पकड़ी करी थप्पड़ मारे, ते तिन्हा जो लेई गे।

⁶⁶जिस बेल्ले पतरस थल्ले बड्डे पुरोत्त रे अंगणा बिच थिया, तां प्रधान पुरोत्त री नौक्कराणियां बिच का इक्क तित्ते आई,

⁶⁷अते तिसने पतरस जो आग्ग तपदे दिख्खेया, ते तिसजो दिख्खी करी बोलणा लग्गी, “तू भी तां तिस नासरत कस्बे रे यीशु कने थिया।”

⁶⁸पतरस मुकरी गेया, ते बोलणा लग्गेया, “मेरे जो नी पता कि तू कै बोल्लेया करदी है।” फिरी से बाहर ड़ेवढ़ी अन्दर गेया, अते मुर्गे ने बांग मारी।

⁶⁹तिस नौक्कराणी ने पतरस जो तित्ते दिख्खी करी जे नेड़े खड़ितेरे थिये, तिन्हा जो फिरी बोलणा लग्गी, “ए तिन्हा बिच का इक्क है।”

⁷⁰पर पतरस फिरी मुकरी गेया, ते थोड़ी हाण बाद नेड़े खड़ितेरे लोक्कां ने फिरी पतरस जो बोल्लेया, “तू जरुर तिन्हा बिच का इक्क है किजोकी तू भी गलील प्रदेश रा है।”

⁷¹तां पतरस कसमां खाई करी बोलणा लग्गेया, “मैं उस मणू जो, जिसेरे बारे अन्दर तुसा मणू गल्ल करेया करदे हिन, नी जाणदा।”

⁷²तां तिस्सी बेल्ले मुर्गे ने दूज्जी वरी बांग मारी दित्ती, ते पतरस जो से गल्ल जे कि यीशु ने तिसजो बोल्ली थी, याद आई: “मुर्गे रे दो वरी बांग दैणे पैल्ले ही तैं तीन्न वरी मेरे जो पहचानणे का मुकरी जाणा।” ते से इस गल्ल जो सोच्ची करी से जोरे-जोरे रोणा लग्गेया।

Read Chambeali मरकुस 14 Bible Online

मरकुस 14 - Chambeali bible

मरकुस 14