Read Chambeali मरकुस 2 Bible Online

मरकुस 2 - Chambeali bible

मरकुस 2

¹मते रोज्जां बाद से फिरी कफरनहूम रे कस्बे बिच आया, ते लोक्कां ने सूणेया कि अपणे से घरे है।

²फिरी तित्ते इन्ने मणू कठ्ठित्ते कि दरवाज्जे का भी जगाह् नी थी, ते से तिन्हा लोक्कां जो परमेश्वर रा वचन सुणादा थिया।

³ते चार मणू इक्क अधरंग रे बिमार मणू जो मन्जे पर चुक्की करी यीशु का लेई करी आए।

⁴पर जां से भीड़ री वजह कने उसेरे नेड़े नी पूज्जी सके, तां उन्हा ने तिस छत जो जिसेरे थल्ले यीशु थिया, पुट्टी दित्तेया, ते जां से तिसजो पुट्टी बैठ्ठे, तां तिस मन्जे जो जिसेरे पर से अधरंग रा बिमार पे रा थिया, तित्ते का झिक्क लटकाई दित्तेया।

⁵यीशु ने तिन्हा लोक्कां विश्वास दिख्खी करी तिस अधरंग रे बिमार मणू जो बोल्लेया, “ओ पुत्तर, मैं तेरे पाप माफ कित्ते।”

⁶तां किच्‍छ शास्त्रि जे उत्ते बैठ्ठे रे थिये, अपणे-अपणे मना बिच ए सोचणा लग्गे,

⁷“ए मणू इय्यां किजो बोलदा? ए तां परमेश्वर री बेजती है करेया करदा। परमेश्वर जो छड्डी करी होर कुण पाप माफ करी सकदा?”

⁸यीशु ने तिस्सी बेल्ले अपणी आत्‍मा बिच जाणी लित्तेया कि से अपणे-अपणे मन बिच इदेइ गल्ल हिन सोचदे, ते उन्हेरे जो बोल्लेया, “तुसां अपणे-अपणे मन बिच ए गल्ल किजो हिन सोचदे?”

⁹असान कै है? कै अधरंग रे बिमार जो बोलणा, “तेरे पाप माफ होए, या ए कहणा, उठ अपणा पन्द चुक्की करी चल फिर?”

¹⁰पर जिस कने तुसा जाणी लेयो कि मणू रे पुत्तर, जे मैं ही है जो जे मैं ही है इस धरती पर पाप माफ करणे रा भी अधिकार है। तिनिये तिस अधरंग रे बिमार जो बोल्लेया;

¹¹“मैं तेरे जो बोलदा, उठ्ठ, अपणा पन्द चुक्की करी अपणे घरे चली जा।”

¹²से उठ्ठेया ते तिस्सी अपणा पन्द चुक्की करी सारेयां रे बिच का निकली करी अपणे घरे चली गेया। इस पर सारेयां जो हैरानी होई, ते परमेश्वर री बड़ाई करी के बोलणा लग्गे, “असां ने इदेया कदी नी दिख्खेया।”

¹³से फिरी निकली करी गलीली समुन्द्र रे कनारे गेया, ते सारी भीड़ उस का आई, ते यीशु उन्हा जो उपदेस दैणे लग्गेया।

¹⁴जादें बेल्ले तिनिये हलफई रे पुत्तर लेवी जो जिस जो मत्ती भी बोलदे, चुगीं री चौक्की पर बैठ्ठे रे दिख्खेया, ते तिसजो बोल्लेया, “मेरा चेल्ला बणी जा।” ते से उठ्ठी करी तिन्हा रा चेल्ला बणने तांइ तिन्हेरे पीच्छे चली पेया।

¹⁵जां से मत्ती रे घरे रोट्टी खाणे जो बैठ्ठेया, तां मते सारे चुंगी लैणे वाले ते पापी, यीशु ते तिन्हा रे चेल्‍लेयां कनें रोट्टी खाणे जो बेई गे किजोकी से मते सारे थिये, ते उसदे पीच्छे चली आए रे थिये।

¹⁶शास्त्रियां ते फरीसियां ने ए दिख्खी करी कि से पाप्पियां ते चुंगी लैणे वालेया कने रोट्टी खाया करदा है, उन्हा रे चेल्‍लेयां जो बोल्लेया, से तां चुंगी लैणे वाले ते पाप्पियां कने खादां पीदां।

¹⁷यीशु ने ए सुणी करी उन्हा जो बोल्लेया, “खरे भलेयां जो वैद्द री जरुरत नी हुंदी पर बिमारां जो है, मैं तिन्हा जो सद्दणे तांइ नी आये रा है जिन्हा जो लगदा कि से पवित्र हिन; पर तिन्हा जो सदणा आये रा है जे मनदे कि से पाप्पी हिन।”

¹⁸बपतिस्मा दैणे वाले यूहन्ना रे चेल्‍ले, ते फरीसियां रे चेल्‍ले ब्रत्त रखदे थिये। किच्‍छ लोक्कां ने आई करी यीशु का ए पूच्छेया, “यूहना रे चेल्‍ले ते फरीसियां रे चेल्‍ले तां ब्रत्त रखदे, पर तेरे चेल्‍ले ब्रत्त नी रखदे?”

¹⁹यीशु ने उन्हा जो बोल्लेया, “जां तिकर दूल्हा बरातियां कने रैह्दां, कै से ब्रत्त रख्खी सकदे? अते जां ताई दूल्हा उन्हा कने है तां तिकर से ब्रत्त नी रख्खी सकदे।

²⁰पर से दिन आणे जां दूल्हा उन्हा का बखरा कित्तेया जाणा, तिस्स बेल्ले उन्हा ने ब्रत्त करणा।

²¹नौये कपड़े री टल्ली, पुराणे कपड़े पराल्ले कोई नी सिंदा, नी तां धोणे पर तिस्स टल्ली ने सुकड़ी जाणा ते से कपड़ा फटी जाणा।

²²नौये अंगूर रे रस्स जो कोई पुराणी मसकां बिच कोई नी रखदा, नी तां अंगूर रे रस्स ने मसकां जो फाड़ी दैणा, ते अंगूर रे रस्स कने मसकां दोन्नों बरबाद होई जाणी पर नौआ अंगूर रा रस्स नौई मसकां बिच भरेया जादां।”

²³इय्यां होया कि यीशु ते तिन्हेरे चेल्‍ले विश्राम दिन खेतरां बिच होई करी जाया करदा थिया, ते उन्हा रे चेल्‍ले चलदे-चलदे सिल्ले तोड़णा लग्गे।

²⁴तां फरीसियां ने उन्हा जो बोल्लेया, “दिख्खो ए विश्राम दिन पर कम्म किजो करदे जे मूसा रे कानून रे खिलाफ है?”

²⁵यीशु ने तिन्हा लोक्का जो बोल्लेया, “क्‍या तुसा ए कदी नी पढ़ेया कि जां असा रे पुरखे दाऊद राजा जो जरुरत पेई, ते जां से ते उसेरे दोस्त भूख्खे थिये, तां तिनिये कै कित्ता थिया?”

²⁶तिनिये किय्यां अबियातार प्रधान पुरोत्त रे बेल्ले, परमेश्वर रे तम्बू बिच जाई करी चढ़ा़वे री रोट्टियां खाई, जिस जो पुरोत्त जो छड्डी करी होर कोई नी खाई सकदा, ते अपणे दोस्तां जो भी दित्ती?

²⁷तां यीशु ने तिन्हा लोक्कां जो बोल्लेया, “विश्राम रा दिन मणूआं तांइ बणाया गे रा है, ना कि मणू विश्राम दिन ताइं।”

²⁸“इस ताइं मणू रा पुत्तर, जे मैं ही है विश्राम दिन रा भी मालक है।”