Read Chambeali मरकुस 6 Bible Online

मरकुस 6 - Chambeali bible

मरकुस 6

¹कफरनहूम सहर का निकली करी यीशु ते तिन्हेरे चेल्‍ले नासरत बिच आए,

²विश्राम दिन से सभास्थल बिच उपदेस दैणे लग्गेया, ते मते सारे मणू सुणी करी हैरान होए। मणू बोलणा लग्गे, “इसजो इदेयी समझ ते चमत्कार करणे री ताकत कुते का मिल्ली?”

³तां से मणू अप्पु अंदर बोलणा लग्गे, ए तां मरियम रा मुंडा है जे मिस्त्रि है, ते ए याकूब, योसेस, यहूदा, ते शमौन रा भाई है। ते इसेरी भैणा भी असा रे बिच ही रैहन्दी। तिन्हा लोक्कां ने यीशु पर विश्वास ई कित्तेया ते तिन्हेरी बेज्जती कित्ती।

⁴यीशु ने तिन्हा लोक्कां जो बोल्लेया, “भविष्यद्वक्ता री अपणे सहर, ते अपणे रिस्तेदारां, ते अपणे घर जो छड्डी करी होर कुते भी बेज़्ज़ती नी हुंदी।”

⁵यीशु तिस जगाह् पर होर कोई चिन्ह-चमत्कार रा कम्म नी करी सकेया, वस थोड़े जणे बिमारां पर हथ रख्खी करी तिन्हेरे जो ठीक कित्तेया।

⁶ते यीशु जो तिन्हा लोक्कां रे घट विश्वास पर हरानी होई, ते से चारो पास्से रे ग्रां बिच भाषण दिंदा फिरदा रेया।

⁷यीशु ने अपणे बारा चेल्‍लेयां जो अपणे नेड़े सद्देया ते तिन्हेरे जो दो-दो करी के भेजणा लग्गे ते उन्हा जो दुष्टात्मा पर हक्क दित्तेया।

⁸यीशु ने चेल्‍लेयां जो हूक्कम दित्तेया, “रस्ते तांइ सोठी जो छड्डी करी होर किच्‍छ होर मत लिन्दे, ना तां रोट्टी, ना तां झोली, ना तां बटुए बिच पैसे,

⁹जूत्ते तां पाओ पर दो-दो कुरते मत लेई करी जान्दे।”

¹⁰ते यीशु ने अपणे चेल्‍लेयां जो बोल्लेया, “जिस कुसी घर बिच जाओ, तां जां तिकर उत्ते का निकली ना जाओ तां तिकर तिस्सी घर बिच ही ठैहरे रेयो।

¹¹जिस जगाह् रे मणू तुसा जो ना अपनाण ते तुसा री ना सूणन, उत्ते का जादें ही अपणे तलियां री धूड़ झाड़ सूट्टो ताकि ए तिन्हा लोक्कां रे खलाफ ए गवाई हो कि तिन्हा ने तुसा री गल्ल नी सूणी।”

¹²तां उन्हा ने जाई करी प्रचार कित्तेया कि तौबा करो ते परमेश्वर का हटी आओ।

¹³ते तिन्हा ने मते लोक्कां बिच का दुष्टात्मां जो कड्डेया, ते मते सारे बिमारां पर तेल मली करी तिन्हा जो ठीक कित्तेया।

¹⁴हेरोदेस राज्जे ने भी यीशु री गल्लां सूणी, किजोकी यीशु रा नां फैल्ली गे रा थिया, ते हेरोदेस राज्जे ने बोल्लेया, “ए यूहन्ना बपतिस्मा दैणा वाला मरेयां बिच का जिन्दा होई गे रा है, इस तांइ से इदेय चिन्ह-चमत्कार करदे।”

¹⁵होर लोक्कां ने बोल्लेया, “ए एलिय्याह भविष्यद्वक्ता है,” पर किच्‍छ होर लोक्का ने बोल्लेया, “भविष्यद्वक्ता या भविष्द्वक्तां बिच का कुसकी इक्क सांई है।”

¹⁶हेरोदेस राज्जे ने सुणी करी बोल्लेया, “जिस यूहन्ना रा सर मैं कटवाया थिया, से ही जिन्दा होई गे रा है।”

¹⁷हेरोदेस राज्जे ने अपणे भाई फिलिप्पुस री लाड़ी हेरोदियास री वजह कने, जिस कने तिनिये ब्याह करी लित्तेया थिया, लोक्कां जो भेज्जी करी यूहन्ना जो पकड़व़ाई करी जेल बिच पुआई दित्तेया थिया।

¹⁸किजोकी यूहन्ना बपतिस्मा दैणे वाले ने हेरोदेस राज्जे जो बोल्लेया थिया, “अपणे भाई री लाड़ी जो रखणा तेरे जो ठीक नी है।”

¹⁹इस तांइ हेरोदियास उस का नफरत करदी थी ते ए चांह्दि थी कि तिसजो मरवाई रख्खे पर इय्यां नी होई सकेया,

²⁰किजोकी हेरोदेस यूहन्ना जो धार्मिक ते पवित्र मणू समजी करी उस का डरदा थिया, ते तिसजो बचाई रखदा थिया ते उसेरी गल्ल सुणी करी बड़ा डरदा थिया पर खुसी कने सूणदा थिया।

²¹हेरोदियास ने हेरोदेस राज्जे रे जन्मदिन रे मौक्के रा फैदा चुक्केया जां हेरोदेस राज्जे ने अपणे प्रधान्नां, सेनापती ते गलील प्रदेश रे बड्डे लोक्कां ताई धाम पाए री थी।

²²तां हेरोदियास री कुड़ी अन्दर आई, ते नच्ची करी हेरोदेस जो ते उसेरे कन्ने बैणे वालेयां जो खुस कित्तेया। तां राज्जे ने कुड़ी जो बोल्लेया, “तू जे चाह्दीं मेरे का मग्गं मैं तेरे जो दैणा।”

²³ते तिस कुड़ी कने कसम खाई करी बोल्लेया “मैं अपणे अद्दे राज तिकर जे किच्‍छ तैं मेरे का मग्गंणा मैं तेरे जो देई दैणा।”

²⁴तिनिये बाह्र जाई करी अपणी मां का पूच्छेया, “मैं कै मग्गां?” हेरोदियास ने बोल्लेया, “यूहन्ना बपतिस्मा दैणे वाले रा सर।”

²⁵से तिस्सी बेल्ले राज्जे का अन्दर आई ते उसेरे का बिनती कित्ती, “मैं चाह्दि कि तू अब्बे ही यूहन्ना बपतिस्मा दैणे वाले रा सर इक्क थाल बिच मेरे जो मग्गांई दे।”

²⁶तां राज्जा बड़ा उदास होया, पर अपणी कसम री वजह कने ते कन्ने बैह्णे वालेया री वजह कने उसेरे जो टालणा नी चाह्या।

²⁷ते राज्जे ने इक्क सिपाई जो हुकम देई करी तिसी बेल्ले भेज्जेया कि तिसेरा सिर कटवाई करी लेई आए।

²⁸तिनिये जेल बिच जाई करी उसेरा सिर कट्टेया ते इक्क थाल बिच रख्खी करी लेई आया ते कुड़ी जो दित्तेया, ते कुड़ी ने अपणी मां जो देई दित्तेया।

²⁹ए सुणी करी यूहन्ना रे चेल्‍ले आए, ते उसेरी लास जो लेई गे ते कब्र बिच दब्बी दित्तेया।

³⁰प्रेरितां ने हटी करी यीशु रे नेड़े कठ्ठी गे ते जे किच्‍छ तिन्हा ने कित्तेया ते सिखाया थिया, सारा किच्‍छ यीशु जो दस्सी दित्तेया।

³¹यीशु ने चेल्‍लेयां जो बोल्लेया, “असी कुसकी किल्ली जगाह् बिच जाई करी अराम करी लिंदे।” किजोकी मते मणू तित्ते आदें-जादें थिये, ते तिन्हा जो खाणे रा भी मौक्का नी मिल्लेया।

³²इस तांइ यीशु ते तिन्हेरे चेल्‍ले किस्ती पर चढ़ी करी किल्ली जगाह् पर अलग चली गे।

³³मते लोक्कां ने यीशु ते तिन्हेरे चेल्‍लेयां जो जादें दिख्खी करी पैह्चाणी लेया, ते मते सारे मणू कस्बे का कठ्ठे होई करी उत्ते पैदल दौड़े ते उन्हेरे का पैल्ले पूज्जी गे।

³⁴यीशु ने उतरी करी बड्डी भीड़ दिख्खी, ते तिन्हा पर तरस खाया, किजोकी से तिन्हा भेड़ां सांई थियां, जिन्हेरा कोई रखवाला ना हो, ते से तिन्हा लोक्कां जो मती सारी गल्लां सिखाणा लग्गी पेय।

³⁵जां सांज्ज होणे वाली थी, तां उन्हेरे चेल्‍ले यीशु का आई करी बोलणा लग्गे, “ए सुनसान जगाह् है, ते सांज्ज भी होणे वाली है।

³⁶इन्हा लोक्कां जो भेज्जी देयो कि नेड़े-तेड़े रे ग्रां या बस्ति बिच जाई करी, अपणे तांइ किच्‍छ खाणे जो खरीदी लैण।”

³⁷यीशु ने अपणे चेल्‍लेयां जो जवाब दित्तेया, “तुसी ही इन्हा लोक्कां जो किच्‍छ खाणे जो देयो।” चेल्‍लेयां ने यीशु जो बोल्लेया, “क्‍या असी दो सौ दीनार [1](दो सौ दिनां री धियाड़ी) री रोट्टियां खरीदी लैण ते उन्हेरे जो खिलाण?”

³⁸यीशु ने चेल्‍लेयां जो बोल्लेया, “जाई करी दिख्खो कि तुसा का किन्नी रोट्टियां हिन?” चेल्‍लेयां ने पता करी के दस्सेया, “पाज्जं रोट्टी ते दो मच्छियाँ भी हिन।”

³⁹तां यीशु ने चेल्‍लेयां जो हुकम दित्तेया कि सारेयां जो हरी घा पराले छोटे-छोटे गुट बणाई करी के बेठाई देयो।

⁴⁰से सौ-सौ ते पजां-पजां रे गुट बणाई करी बेई गे।

⁴¹यीशु ने तिन्हा पाज्जं रोट्टियां ते दो मच्छियाँ जो चुक्केया, ते स्वर्ग पास्से दिख्खी करी परमेश्वर रा धन्यवाद कित्तेया, ते रोट्टियां तोड़ी-तोड़ी करी चेल्‍लेयां जो दिंदा गे कि से लोक्कां जो दिंदे जाण, ते से मच्छियाँ भी उन्हा सारेयां बिच बंड्डी दित्ती।

⁴²सारे खाई करी रज्जी गे।

⁴³जां मणू रोट्टी खाई बैठ्ठे तां रोट्टी ते मच्छी रे बारा टोकरे बचे रे थिये।

⁴⁴रोट्टी खाणे वाले लगभग पाज्जं हजार आदमी थिये।

⁴⁵तां यीशु ने तिस्सी बेल्ले अपणे चेल्‍लेयां जो किस्ती पर चढ़ने तांइ मजबूर कित्तेया कि जां तिकर यीशु तिन्हा लोक्कां जो भेजण तां तिकर चेल्‍ले यीशु का पैल्ले उस पार बैतसैदा रे कस्बे जो चली जाण।

⁴⁶चेल्‍लेयां जो भेजी करी यीशु पहाड़ पर प्रार्थना करणे जो चली गे।

⁴⁷रात्ती बेल्ले चेल्‍लेयां री किस्ती समुन्द्र रे बिच थी ते यीशु किल्ले किनारे पर थिये।

⁴⁸यीशु ने दिख्खेया कि से बड़ी मुसीबत बिच हिन, किजोकी ब्यार तिन्हेरे पुठ्ठे पास्से रे थी, तां रात्ती रे त्रै बजे रे नेड़े से समुन्द्र पर चलदे होए चेल्‍लेयां रे नेड़े आए ते तिन्हेरे का अग्गे निकली जाणा चाह्‍ंदे थिये,

⁴⁹पर चेल्‍लेयां ने यीशु जो झील पर चलदे दिख्खी करी समजेया कि से भूत हिन, ते चिडां मारणा लगे

⁵⁰किजोकी सारे उन्हा जो दिख्खी करी डरी गेरे थिये पर यीशु ने तिस्सी बेल्ले चेल्‍लेयां कने गल्लां कित्ती ते बोल्लेया, “हिम्मत रख्खो: मैं है, डरो मत!”

⁵¹तां यीशु ने तिन्हेरे नेड़े किस्ती पर आया, ते ब्यार रुकी गेई ते से बड़े ही हैरान होणा लग्गे।

⁵²चेल्‍ले अपणे मन री सख्ती री वजह कने तिन्हा चमत्कारां रे बारे बिच समजी नी सके थिये।

⁵³यीशु ते तिन्हेरे चेल्‍ले गलीली समुन्द्र जो पार करी के गन्नेसरत जिले जो पूज्जे, ते किस्ती कनारे पर लाई।

⁵⁴जां यीशु ते तिन्हेरे चेल्‍ले किस्ती का उतरे, तां मणू तिन्हा जो दिखदे ही पहचाणी गे।

⁵⁵ते दौड़ी करी सारे इलाक्के रे बिमारां मणूआं जो मन्जेया पर पाई करी जित्ते से हुंदे थिये तित्ते लेई जांदे थिये।

⁵⁶ते जिस कुसकी सहर, या बस्तियां बिच यीशु जांदे थिये, मणू बिमारां जो बजारां बिच रख्खी करी उन्हा का बिनती करदे थिये कि से तिन्हा बिमार लोक्कां जो अपणे कपड़े रे पल्ले जो ही छुई लैणा दैण : ते जिनिये यीशु जो छूदें थिये से सारे ठीक होई जादें थिये।