Chambeali bible online

लूका 1

¹आदरणीय थियुफिलुस, ए सारी गल्लां जे असा रे बिच मझाटे बीत्ती, तिन्हा जो लिखणे बिच मते लोक्कां ने कोसीस कित्ते री है।

²यीशु री सेवकाई री सुरुआत रे बारे बिच से ही गल्लां लिख्खी जे तिन्हा ने तिन्हा लोक्कां का सुणी जिन्हा ने ए सब किच्‍छ अपणी हाख्खियां कने दिख्खेया थिया ते बाद बिच जे मणू मसीह रे सेवक भी बणी गे थिये।

³मैं भी इन्हा गल्लां रे बारे बिच ठीक तरिक्के कने जांच-पड़ताल कित्ते री है, ते मेरे जो ए ही खरा लग्गेया कि मैं ए सारी गल्लां तुसा जो क्रमनुसार लिख्खी करी भेज्जी देयां।

⁴मैं ए सारा किच्‍छ इधेरे तांइ करेया करदा है ताकि तुसा जाणी सको कि ए सब गल्लां किन्नी सच्ची हिन जे तुसा लोक्कां का सूणी।

⁵जां यहूदियां प्रदेश बिच राजा हेरोदेस रा शासन थिया, तां तित्ते जकरयाह नां रा इक्क पुरोत्त थिया जे पुरोत्तां रे इक्क दल बिच का थिया, जिस दल रा नां अबिय्याह याजक रे नां पर पेया थिया, अते जकरयाह ते तिसेरी लाड़ी रा नां इलीशिबा थिया ते से दोन्नों इस्राएल रे सबका पैल्ले पुरोत्त, हारून रे ‍खानदान री थी।

⁶जकरयाह अते इलीशिबा परमेश्वर री नजरां बिच धार्मिक थिये, ते प्रभु रे सारे हुक्मा ते विधियां पर चलणे वाले थिये।

⁷पर इलीशिबा इक्क ओत्तर जनानी थी, इधेरे तांइ तिन्हेरी कोई औलाद नी थी, अते से दोई जणे बड़े सियाणे भी होई गेरे थिये।

⁸इक्क दिन जां जकरयाह रे दल री वरी, मन्दिर बिच पुरोत्त रा कम्म करणे तांइ आई, अते से परमेश्वर री सेवा करणे तांइ तित्ते ही थिया।

⁹तां पुरोत्तां रे चलाये रे रीवाज रे हिसाब कने पर्ची जकरयाह रे नां री निकली, कि से परमेश्वर रे मन्दिर बिच जाई करी धूप बाले।

¹⁰जां धूप बालणे री वरी आई तां झुण्ड रे सारे मणू कठ्ठी करी बाहर मन्दिर रे अंगण बिच प्रार्थना करणा लगे।

¹¹जकरयाह मन्दिर बिच ही थिया, कि तिस्सी बेल्ले परमेश्वर रा इक्क स्वर्गदूत धूप री वेदी रे सज्जे पासे आई खड़ा होया।

¹²जकरयाह स्वर्गदूत जो दिख्खी करी बड़ा डरी गेया, जिय्यां कि तिसेरे प्राण निकलणा लग्गी पे रे होण

¹³पर तिस्स स्वर्गदूत ने तिसजो बोल्लेया, जकरयाह, डरां मत! किजोकी परमेश्वर ने तेरी प्रार्थना सुणी लित्ती री है, अवे तेरी लाड़ी इलीशिबा ने, जे ओत्तर है, दुपराणी होणा, अते तिन्ने इक्क निक्के जो जमणा, अते तू तिस्स निक्के रा नां यूहन्ना रख्खे,

¹⁴तिसेरे पैदा होणे पर तिज्जो तां खुसी होणी ही, पर तिनिये मते लोक्कां री खुसी होणा,

¹⁵किजोकी तिन्ने प्रभु री नजरां बिच महान मणू होणा, तिसजो अंगूर रा रस्स या सराब पीणा मना है, अते से पैदा होणे का पैल्ले ही पवित्रात्मा कने भरपूर होणा।

¹⁶तिन्ने इस्राएल रे मते मणूआं का तिन्हेरे पाप्पां का तौबा कराणी अते तिन्हा जो प्रभु-परमेश्वर रे पास्से हटाई लाणा।

¹⁷तिन्ने एलिय्याह री आत्‍मा ते ताकत बिच भरपूर होई करी प्रभु रा रस्ता तैयार करणा, तिन्ने मां-प्यो जो अपणे निके-निकेयाँ कने प्यार करणा सिखाणा, अते अड़मण लोक्कां जो धार्मिक मणूआं री जिन्दगी जीणा सिखाणा ते तिन्हा परमेश्वर जोग्गी इक्क प्रजा बणने तांइ तैयार करणा।

¹⁸तां जकरयाह ने स्वर्गदूत जो पूच्छेया, कि मैं किय्यां मन्नी लेयां कि ए सब किच्‍छ जे तू बोल्लेया करदा है, सच होई जाणा? किजोकी, मैं तां बड़ा सियाणा मणू है, अते मेरी लाड़ी भी सियाणी है।

¹⁹तां स्वर्गदूत ने तिस्स जो बोल्लेया, मैं जिब्राईल है, मैं से स्वर्गदूत है, जे हर बेल्ले परमेश्वर रे सामणे खड़ा रैहन्दा मेरे जो परमेश्वर ने तेरे का इधेरे तांइ भेज्जेया कि ए सुब बसेख मैं तिज्जो दस्सी देयां।

²⁰पर दिख्ख, अब्बे मैं जे किच्‍छ भी तिज्जो बोल्लेया, तिन्हा गल्लां पर तैं विश्वास नी कित्तेया, ईधेरी तांइ अवे जां तांइ तेरा निक्का पैदा नी होई जान्दा, तां तांइ तैं जल्ला रैह्णा।

²¹मन्दिर रे अंगण बिच खड़ित्ते रे सारे मणू जकरयाह रा बाहर आणे रा इतंजार करेया करदे थिये, ते हैरान होणा लग्गे कि तिसजो मन्दिर बिच इन्नी देर किजो लग्गेया करदी है।

²²फिरी जां से बाहर आया, तां तिसका किच्‍छ भी बोल्ली नी होया अते तिसेरी हरकतां जो दिख्खी करी मणू समजी गे, कि इन्ने मन्दिर बिच जाई करी जरुर परमेश्वर रा कोई दर्शन दिख्खया होणा।

²³फिरी जिस बेल्ले जकरयाह रे मन्दिर बिच सेवा करणे रा बेल्ला पूरा होई गेया तां से अपणे घरे जो हटी गेया।

²⁴फिरी थोड़े रोज्जां बाद, इलीशिबा दुपराणी होई कने से पांज्ज महिन्ने तांइ मणूआं री नजरां का दुर रेह्ई,

²⁵मणूआं बिच मेरी बेज्जती दुर करणे तांइ परमेश्वर ने इनां दिनां बिच अपणी रहमत कने इक्क बड्डा कम्म कित्ते रा है।

²⁶एलीशिबा रे दुपराणी होणे रे छेम्मे महिन्ने अंदर परमेश्वर ने जिब्राईल स्वर्गदूत जो गलील सहर रे नासरत कस्बे बिच,

²⁷इक्क कुंवारी कुड़ी का भेजेया, तिस्स कुंवारी कुड़ी रा नां मरियम थिया, जिसेरी मंगणी यूसुफ नां रे इक्क मणू कने होये री थी, अते से दाऊद राज्जे रे ‍खानदान रा थिया।

²⁸जिब्राईल स्वर्गदूत मरियम का आई करी बोलणा लगेया, “नमस्कार, तेरे पर परमेश्वर ने बड़ी दया कित्ती, ते परमेश्वर तुसा कने हिन।”

²⁹स्वर्गदूत री इस गल्ल का घबराई करी मरियम इस सोच्चा बिच पेई गई कि इसेरी इन्हा गल्लां रा कै मतलब होई सकदा?

³⁰तां स्वर्गदूत ने मरियम जो बोल्लेया, डरां मत, किजोकी परमेश्वर री दया तेरे पर होये दी है।

³¹अवे तैं दुपराणी होणा ते इक्क निक्के जो जमणा, जिसेरा नां तू यीशु रख्खेयां,

³²से निक्का बड़ा महान होणा अते तिस्स जो मणूआं ने परमप्रधान परमेश्वर रा निक्का मनणा अते होर तां होर, परमेश्वर ने तिस्स जो तिसेरे पुरखे दाऊद राज्जे सांई राज्जा बनाणा,

³³अते तिन्ने हमेसा तांइ याकूब रे ‍खानदान पर राज करणा जे इस्राएल देस है अते तिसेरा राज कदी भी नी मुकणा।

³⁴ए सुणी करी मरियम ने जिब्राईल स्वर्गदूत जो बोल्लेया, ए किय्यां होई सकदा, किजोकी मैं तां कुंवारी ही है।

³⁵तां जिब्राईल स्वर्गदूत ने मरियम जो बोल्लेया, पवित्रात्मा ने तेरे पर उतरणा अते परमप्रधान परमेश्वर री ताकत ने तेरे पर छां करणी, अते से बच्चा जे तेरे का पैदा होणा, से पवित्र होणा, तिसजो परमेश्वर रा पुत्तर बोल्लेया जाणा,

³⁶होर तां होर, तेरी रिस्तेदार इलीशिबा, जिस जो सब मणू ओत्तर समजदे थिये, से भी दुपराणी होई गे री है कने तिस्स जो इस बेल्ले छेम्मा महीन लग्गे रा है।

³⁷किजोकी परमेश्वर किच्‍छ भी करी सकदे।

³⁸फिरी मरियम ने बोल्लेया, दिख्ख, मैं ता परमेश्वर री नौक्कर है तू जिय्यां बोल्लेया तिय्यां ही मेरे कने हो तां फिरी स्वर्गदूत तित्ते का चली गेया।

³⁹थोड़े रोजां बाद मरियम यहूदियां नां रे इक्क पाह्डी ग्रां बिच जकरयाह रे घरे जो गई।

⁴⁰अते तित्ते तिन्ने जकरयाह री लाड़ी, इलीशिबा जो प्रणाम कित्ती

⁴¹अते इय्यां होया कि जिस बेल्ले मरियम ने इलीशिबा जो प्रणाम कित्ती, तिस्सी बेल्ले इलीशिबा रे पेट्टा बिच निक्का उटकी पेया, अते इलीशिबा पवित्रात्मा कने भरपूर गई,

⁴²अते से ऊच्ची अवाज बिच बोल्णा लग्गी, सारी जनानियां बिच तू धन्न है अते जिस निक्के जो तैं जमणा, से भी धन्न है।

⁴³मैं बड़ी भाग्गा वाली है कि मेरे प्रभु री मां अप्पु चली करी मेरे कने मिल्णा मेरे घरे जो आई।

⁴⁴किजोकी जिय्यां ही तुसा ने मेरे जो प्रणाम बोल्लेया, तिय्यां ही मेरे पेट्टा बिच निक्का खुसी कने उटकी पेया।

⁴⁵तू धन्न है किजोकी तैं प्रभु री गल्लां रा भरोसा कित्ता।

⁴⁶तां मरियम ने बोल्लेया, “मैं अपणे परमेश्वर री बड़ाई करदी,

⁴⁷अते मेरी आत्‍मा मेरे छुटकारा दैणे वाले परमेश्वर का बड़ी वरी खुस है,

⁴⁸तिन्हा ने अपणी दासी रे निम्तेपन पर नजर रख्खी, कने अब्बे का लेई करी जुग-जुगान्तर री पीढ़ियां ने मेरे जो बोलणा कि, तू तां बड़ी धन्न है,

⁴⁹किजोकी उस शक्तिसाली परमेश्वर ने मेरे तांइ बड़े बड्डे-बड्डे कम्म कित्ते रे हिन, तिन्हेरा नां पवित्र है,

⁵⁰अते तिन्हेरी दया उन्हा सबणी मणूआं पर है जे कि तिन्हेरा डर मन्दे, अते तिन्हा पर दया आणे वाली सारी पीढ़ियां तांइ बणी रैह्णी,

⁵¹परमेश्वर ने अपणी बड़ी ताकत कने बड्डे-बड्डे कम्म कित्ते रे हिन, अते जे अपणे दिल बिच घमंड री गल्लां सोचदे थिये, तिन्हा रा घमण्ड तोड़ी दित्ता।

⁵²तिन्हा ने ताकतवर मणूआं जो तिन्हेरे राज-पद का हटाई दित्ता, अते निम्ते मणूआं जो आदर दित्ता,

⁵³तिन्हा ने भुख्खेयां जो खरी खरी चीजां कने रजाया, पर अमीरां जो खाली हत्थ हटाई दित्तेया,

⁵⁴तिन्हा ने अपणे इस्राएली सेवकां री मदद कित्ती, कि अपणी दया याद करे,

⁵⁵जिय्यां कि तिन्हा ने असा रे पुरखे अब्राहम ते तिन्हेरे पूरे ‍खानदान कने वादा कित्तेया थिया,”

⁵⁶मरियम कोई त्रै महिन्ने तांइ इलीशिबा कने रेई फिरी तिसेरे बाद से अपणे घरे जो चली गई।

⁵⁷फिरी इलीशिबा रा लोकिणे रा बेल्ला आई गेया अते तिसेरे घरे इक्क मुडां पैदा होया।

⁵⁸तिसेरे गुआन्ड अते रिस्तेदारां ने जिस बेल्ले ए गल्ल सुणी कि परमेश्वर ने तिस्स पर दया कित्ती, तां तिन्हा भी इलीशिबा कने मिली करी बड़ी खुसियां मनाई

⁵⁹अते फिरी अठमे रोज्जे निक्के रे खतना तांइ जकरयाह रे रिस्तेदार तित्ते आये, अते से प्यो रे नां पर तिस निक्के रा नां जकरयाह ही रखणा लग्गी पे,

⁶⁰तिस्सी बेल्ले तिसेरे मुंडे री मां इलीशिबा बोल्ली पेई, कि ना, इसेरा नां तां यूहन्ना रखणा है।

⁶¹तां तित्ते आये रे मणू बोल्णा लगे कि तेरे रिस्तेदारां बिच तां ए नां कुसेरा भी नी है।

⁶²तां फिरी तिन्हा मणूआं ने जकरयाह जो इसारा करी के पूच्छेया, कि तू इसेरा कै नां रखणा चाह्‍ंदा?

⁶³जकरयाह ने इस गल्ल जो बोलणे तांइ इक्क पट्टी मंगाई अते तिस्स पर लिख्खी दित्ता, इसेरा नां यूहन्ना रख्या जाए ए दिख्खी करी सब जणे हैरान होई गे

⁶⁴तिस्सी बेल्ले जकरयाह री जिब्ब खुली गई अते मुँह खुलदे ही से परमेश्वर रा शुकर करणा लग्गी पेया।

⁶⁵तिसेरे अख्खी-बख्खी जिन्ने भी मणू थिये, से सब ए दिख्खी करी बड़े डरी गे इस गल्ल री खाप्प यहूदियां रे सारे पहाड़ी कस्बे बिच पेई गई।

⁶⁶जिन्हा ने भी ए गल्ल सूणी, से अपणे मनां बिच सोचणा लगे, कि ए निक्का कदेया होणा? किजोकी इस पर तां अप्पु परमेश्वर री ताकत है।

⁶⁷फिरी यूहन्ना रा प्यो, जकरयाह, पवित्रात्मा रे गलाए भविष्यवाणी करणा लगेया।

⁶⁸कि इस्राएल रे प्रभु परमेश्वर री जै हो! किजोकी तिन्हा ने अपणे मणूआं जो बचाणे तांइ इक्क मददगार भेज्जेया, अते अपणे मणूआं जो पाप का छुड़ाया,

⁶⁹तिन्हा ने असा तांइ अपणे नौक्कर, दाऊद राज्जा रे ‍खानदान का असा जो इक्क बचाणे वाला उद्धारकर्ता दित्ता।

⁷⁰जिय्यां कि परमेश्वर ने बड़े पैल्ले ही अपणे पवित्र भविष्यद्वक्ता रे जरिए बोल्लेया थिया,

⁷¹कि तिन्हा ने असा जो असा रे दुश्मणा का ते तिन्हा लोक्कां का बचाणा ते जे असा कने नफरत करदे।

⁷²तिन्हा ने ए सब किच्‍छ असा तांइ इधेरे तांइ करणा किजोकी तिन्हा ने जे वादा असा रे पूरखां कने कित्तेया थिया, से तिसजो नी भुल्ले।

⁷³अते से वादा जे परमेश्वर ने असा रे पुरखे अब्राहम कने कित्तेया थिया,

⁷⁴कि से असा रे दुश्मणा रे हत्थां का असा जो बचाई लिन्गे, ताकि असी बगैर डरे रे परमेश्वर री सेवा करदे रैण।

⁷⁵अते सारी उमर-भर, ते हर रोज, परमेश्वर रे अग्गे पवित्र अते धार्मिक बणी करी रेई सकण,

⁷⁶इधेरे तांइ ओ मेरे बच्चे, यूहन्ना, अवे तैं परमप्रधान परमेश्वर रा भविष्यद्वक्ता बणना, किजोकी तैं प्रभु रे अग्गे-अग्गे चली करी तिन्हेरे आणे तांइ लोक्कां जो तैयार करणा।

⁷⁷तैं प्रभु रे लोक्कां जो सिखाणा कि से अपणे पाप्पां का माफी रे जरिए से छुटकारा पाई सकदे।

⁷⁸ए सब असा रे परमेश्वर री दया कने होणा, जिस तरिक्के कने इक्क नौआ दिन सुरु हुंदा, तिय्यां ही मसीह ने भी असा तांइ नौई चीजां करणी जां तिन्हा ने असा का स्वर्ग का आणा।

⁷⁹जे मणू परमेश्वर जो नी जाणदे से इदेय हिन कि जिय्यां से मौत रे साये बिच बैठ्ठे रे हिन, ते हमेसा री मौत री खतरे बिच हिन जे कि नरक है, इधेरे तांइ परमेश्वर री रौसनी तिन्हा लोक्कां जो परमेश्वर रे सांती रे रस्ते पर लेई चलणा।

⁸⁰जिय्यां-जिय्यां जकरयाह रा बच्चा, यूहन्ना, मुटिंदे गेया, तिय्यां ही से आत्मिक तरिके कने भी पक्का हुन्दा गेया, ते जां तांइ तिनिये इस्राएल रे लोक्कां सामणे आई करी प्रचार करणा सुरु नी कित्तेया, तां तांइ से बियाबान जगाह् बिच रेया।

Read Chambeali लूका 1 Bible Online

लूका 1 - Chambeali bible

लूका 1