Read Chambeali लूका 10 Bible Online

लूका 10 - Chambeali bible

लूका 10

¹इन्हा गल्लां रे होणे का बाद प्रभु यीशु ने सत्तर चेल्‍ले होर चुणे ते फिरी जिस-जिस सहरां ते जगाह् पर तिन्हा अप्पु जाणा थिया, तित्ते दो-दो करी के पैल्ले तिन्हा जो भेजेया।

²यीशु ने तिन्हा जो बोल्लेया, कि पक्के रे खेतर मते हिन पर मजूर थोड़े हिन इधेरे तांइ खेतर रे मालका का प्रार्थना करो कि फसल कटणे तिकर होर मजूर भेजी देयो

³जाओ दिख्खो, जिय्यां भेड़ां भेड़िये बिच मझाटे होण तिय्यां ही मैं तुसा जो तिन्हा लोक्कां रे बिच मझाटे भेज्जेया करदा है।

⁴इधेरे तांइ, तुसा जान्दे बेल्ले अप्पु कन्ने किच्‍छ भी मत लिन्दे, ना बटुआ, ना झोला ते ना तां बूट अते रस्ते अन्दर कुसकी रा हाल-चाल भी मत पुछदे

⁵तुसा जिस भी घर अन्दर ‍जांगे, तिन्हा जो बोल्लेया कि इस घर पर परमेश्वर री सांती बणी रे।

⁶जे अगर से मणू इस सांती जोग्गे हुन्गे तां से तिन्हा पर बणी रैह्णी ते जे से इस जोग्गे नी होये तां से सांती तुसा का वापस हटी आणी।

⁷तिसी घर बिच रेयो, ते जे किच्‍छ तिन्हा का मिल्ले, से ही खाओ, किजोकी मजदूर जो तिसेरी मजदूरी मिलणा चाएदी, घर-घर मत फिरदे।

⁸जे कुसकी ग्रां अन्दर जाई करी तित्ते रे मणू तुसा जो खुस होई करी किच्‍छ भी खुआंगे, से खुसी कने खाई लेयो

⁹तित्ते रे बिमार मणूआं जो खरा करो ते तिन्हा जो बोल्लो, कि परमेश्वर राज करणे तांइ तुसा रे नेड़े आई गे रा है

¹⁰पर, जे कुसकी ग्रां रे मणू तुसा रे आणे पर खुस नी होण तां तिस जगाह् री सड़कां पर जाई करी बोल्लेया करो,

¹¹कि तुसा रे ग्रां री धूड़ जो असी तुसा रे सामणे अपणे पैरां का झम्मी करी इत्ते का चली पे, पर ए गल्ल समजी लेयो, कि परमेश्वर राज करणे तांइ तुसा रे नेड़े आई गे रा है

¹²यीशु ने तिन्हा चेल्‍लेयां जो बोल्लेया, कि इस सहर री हालत फैसले वाले रोज्जे सदोम देस का भी जादा खराब होणी है

¹³फिरी यीशु बोल्दे, खुराजीन ते बैतसैदा नां रे सहरां बिच रैह्णे वाले मणूआं तांइ बड़ा बुरा बेल्ला आणे वाला है, किजोकी जिनिये चमत्कारी कम्म मैं इन्हा दो सैहरां बिच जाई करी कित्ते, जे से ही कम्म मैं सूर अते सैदा रे सहर बिच जाई करी करदा, जित्ते मूर्तीियाँ री पूजा करणे वाले मणू रैह्‍न्दे, तां तिन्हा ने भी बोरे रे कपड़े बणाई करी ते अप्पु पर धूड़ मली करी अपणे पाप मन्नी लेरे होणे थिये।

¹⁴पर परमेश्वर ने जधाड़ी हिसाब-किताब करणा, तधाड़ी सूर अते सैदा रे सहर री हालत तुसा का तां जादा सैणे जोग्गी होणी, जे कि खुराजीन ते बैतसैदा अन्दर रैह्या करदे हिन

¹⁵ते ओ कफरनहूम कस्बे रे मणूओ, कै तुसा जो स्वरगा अन्दर लेई जाया जाणा है? पर ना, तुसा जो तां झिक्क पताल अन्दर सुट्टेया जाणा है

¹⁶यीशु ने ए भी बोल्लेया, कि जे मणू तुसा री गल्लां पर विश्वास करगा, इसेरा मतलब ए होणा कि तिनिए मेरे पर भी विश्वास करी लेया, ते जे तुसा जो नक्कारी दिंदा, तिनिए मेरे जो भी नक्कारी दित्तेया, ते जे मेरे जो नक्कारी दिंदा, तिसेरा मतलब ए होणा कि तिनिए मेरे भेजणे वाले परमेश्वर जो भी नक्कारी दित्तेया।

¹⁷जिस बेल्ले से बाकि रे सत्तर चेल्‍ले खुसी-खुसी वापस हटी आए तां यीशु जो बोलणा लगे, ओ प्रभु, दुष्टात्मा भी तुसा रे नां कने असा रे हुक्मां जो मन्नेया करदी थी।

¹⁸इस गल्ल पर यीशु ने तिन्हा जो बोल्लेया, मैं शैतान जो आसमान का बिजली सांई थल्ले पैंदे दिख्खेया।

¹⁹दिख्खो, मैं तां तुसा जो कीड़े ते बिच्छुओं जो रौदंणे रा, ते असा रे दुश्मण री सारी ताकत पर जितणे रा अधिकार दित्ते रा है ते तुसा जो कुसकी भी चीज रा कोई नुक्सान नी होणा।

²⁰फिरी भी इस गल्ल पर खुस मत हुदें, कि दुष्टात्मा तुसा रा गलाया मन्दियाँ, पर सिर्फ इस गल्ले री खुसी मनाओ कि तुसा रे नां स्वर्ग अन्दर लिखी दित्ते रे हिन।

²¹तिस ही बेल्ले यीशु पवित्रात्मा बिच मगन होई करी बड़े खुस होये ते बोलणा लगे, ओ मेरे पिता जी, तुसा आसमान ते जमीन रे प्रभु हिन, मैं तुसा रा बड़ा शुकर करदा, कि तुसा ने इन्हा गल्लां जो उन्हा मणूआं का दुर रखेया जे अप्पु जो बड़े भरी ज्ञानी ते चलाक मन्दे, ते इन्हा बच्चेयां जो सेह्ई गल्लां दस्सी दित्तीयां, हाँ, मेरे पिता जी, तुसा जो इय्यां करणा ही खरा लग्गेया।

²²फिरी यीशु ने तिन्हा चेल्‍लेयां जो बोल्लेया, मेरे पिता जी ने मेरे जो सबणी चीजां पर हक्क दित्ते रा है ते पिता ही जाणदे कि पुत्तर कुण है, ते पुत्तर जो छड्डी करी होर कोई नी जाणदा कि पिता कुण है, या तिन्हेरे जो छड्डी करी से जाणी सकदे जिस जो पुत्तर पिता रे बारे अन्दर दस्सणा चांह्दा

²³जिस बेल्ले तित्ते चेल्‍लेयां जो छड्डी करी होर कोई भी नी थिया, तां यीशु ने तिन्हा जो बोल्लेया, तुसा धन्न हिन कि ए सब किच्‍छ जे होया करदा है, से अपणी हाख्खियां कन्ने दिख्खेया करदे हिन

²⁴किजोकी मैं तुसा जो बोल्ली दिन्दा, कि मते राज्जेयां ते भविष्यद्वक्ता ने ए सब किच्‍छ जे तुसा ने दिख्खेया-सूणेया से दिखणा-सुनणा चाह्या पर ना तां से दिख्खी सके ते ना ही सुणी सके।

²⁵फिरी इक्क दिन जां यीशु लोक्कां जो सिखाया करदे थिये, तां शास्त्री लोक्कां बिच का इक्क जणा उठी करी यीशु जो परखणे तांइ सुआल पूच्छणा लग्गेया, कि ओ गुरु जी, मेरे जो कै करणा चह्ईंदा कि मेरे जो हमेसा री जिन्दगी मिल्ली जाओ?

²⁶तिन्हा ने जवाब दित्तेया, कि तैं मूसा रे कानून री कताब बिच कै पढ़दा?

²⁷से बोलणा लगेया, कि तू परमेश्वर कने पूरे मन, पूरे प्राण ते सारी ताकत लाई करी ते अपणी सारी समझ कने प्यार करेयां, ते अपणे पड़ोसियाँ जो भी अप्पु बराबर प्यार करेयां

²⁸यीशु ने बोल्लेया, तैं ठीक जवाब दित्तेया इतणा ही करेया कर, तां तिज्जो हमेसा री जिन्दगी मिली जाणी।

²⁹पर से मणू अप्पु जो सही जताणा चाह्‍न्दा थिया, इधेरे तांइ से यीशु का फिरी पूच्छणा लग्गेया, तुसा ए दस्सो कि मेरा पड़ोसी कुण होया?

³⁰यीशु ने इक्क उदारण बोल्ली करी तिसजो जवाब दित्ता, कि इक्क मणू यरुशलेम सहर का यरीहो नां रे इक्क सहर जो जाया करदा थिया, ते रस्ते अन्दर तिसजो किच्‍छ डकैत्तां ने मिल्ली करी लुट्टी लित्तेया, ते तिन्हा ने तिसेरे कपड़े खुलाए ते तिसजो मारी-कुट्टी करी धाणस करी के रस्ते पर ही छड्डी करी चली गे।

³¹ते इय्यां होया, कि तिस ही रस्ते का इक्क यहूदी पुरोत्त जाया करदा थिया, पर तिनिए तिसजो तड़फदा दिख्खी करी तिसका मुँह फेरी करी चली गेया ते तिस बचारे जो अण-दिख्खा करी दित्तेया

³²फिरी इय्यां ही इक्क लेवी, सेवादार मणू, उत्ते आया ते से भी तिसजो अण-दिख्खा करी के चली गेया।

³³पर इक्क सामरिया प्रदेश रा मणू उत्ते का जाया करदा थिया, जां तिनिए उस बचारे अध-मरे मणू जो तड़पदे दिख्खेया, तां तिसजो उस पर बड़ा तरस आया।

³⁴से तिसेरे नेड़े गेया ते तिनिए तिसेरे जखमां पर तेल ते अंगूर रा रस्स लाई करी पट्टी बह्न्नी दित्ती ते अपणे खोत्ते पर बिठाई करी रैण-बसे रे जो लेई गेया, ते तिसेरी सेवा कित्ती।

³⁵दूए रोज्जे तिस सामरी मणू ने दो दीनार [3]रैण-बसे रे मालक जो दित्ते ते तिसजो बोल्लेया, कि इसेरी दिख-रिख्ख करदे रेयां ते जे तेरा जादा खरचा होई जाह्न्गा तां से मैं हटदे बेल्ले आई करी तिज्जो देई दिंगा

³⁶फिरी यीशु ने तिस शास्त्रि मणू का पूच्छेया, कि अवे तू दस कि इन्हा तीन्न जह्णेयाँ बिच का तिस धाणस मणू रा पड़ोसी कुण होया?

³⁷से बोलणा लगेया, जिस सामरी मणू ने तिस पर तरस खाया थिया। यीशु ने तिस्जो बोल्लेया, जा ते अज्ज का बाद तू भी इय्यां ही करेयां।

³⁸जां यीशु ते तिन्हेरे चेल्‍ले यरुशलेम पास्से जाया करदे थिये तां से इक्क ग्रां बिच पूज्जे, जित्ते मार्था नां री इक्क जनानी ने तिन्हेरा अपणे घरे सुआगत कित्ता।

³⁹मार्था री इक्क भैण भी थी, जिसेरा नां मरियम थिया से यीशु रे पैरां का बेई करी तिन्हेरे वचन सूणेया करदी थी

⁴⁰पर मार्था रोट्टी पकाणे री तयारी जो लेई करी फिक्र अन्दर पेई गई, से यीशु का आई ते बोलणा लग्गी, ओ प्रभु जी, कै तुसा जो फिक्र नी है कि मेरी भैण ने सारा कम्म मेरे उप्पर पाई दित्ते रा है? इधेरे तांइ इसजो बोल्लो की मेरे कने हत्थ बटाए।

⁴¹पर प्रभु यीशु ने तिसजो जवाब दित्तेया, ओ मार्था, तू मती गल्लां रे बारे अन्दर फिकर करदी रेह्न्दी।

⁴²पर इक्क बदिया चीज है जिस जो मरियम ने चुणी लित्ते रा है, जे तिसका खुस्सेया नी जाणा।