Read Chambeali लूका 14 Bible Online

लूका 14 - Chambeali bible

लूका 14

¹इक्क वरी विश्राम दिन यीशु फरीसियां रे प्रधानाँ बिच का कुसकी इक्क रे घरे रोट्टी खाणा गे, तित्ते सबणी फरीसियां री नजरां यीशु पर ही थिया, कि से इस विश्राम दिन कै करदे।

²तित्ते इक्क इदेया मणू भी थिया, जिसेरे हत्थ अते पैर बीमारी री वजह कने सूजी गेरे थिये।

³यीशु ने फरीसियां ते शास्त्री लोक्कां का पूच्छेया, कि कै मूसा रे नियम रे हिसाब कने विश्राम दिन कुसकी मणू जो खरा करणा ठीक है कि नी?

⁴पर तिन्हा ने यीशु जो कोई जवाब नी दित्तेया इधेरे तांइ यीशु ने तिस बिमार मणू पर हत्थ रख्खी करी खरा करी दित्तेया ते तिसजो तित्ते का भेज्जी दित्तेया।

⁵फिरी यीशु ने तिन्हा जो पूच्छेया, जे अगर तुसा रा खोत्ता या दाँन्द कुसकी गत्ता बिच छुडकी पेयो तां कै विश्राम दिन तुसा तिस्जो तित्ते का बाहर नी कडणा?

⁶से इस गल्ल पर यीशु कने बैह्स नी करी सके।

⁷जां यीशु ने दिख्खेया कि रोट्टी खाणे जो जितणे भी मणू आए रे हिन, से बैणे तांइ इक्क दूज्जे का बड्डा आसन तोप्पेया करदे हिन, ए दिख्खी करी यीशु ने तिन्हा जो इक्क उदारण सुणाया।

⁸जां तुसा जो कोई ब्याह री धाम अन्दर सद्दे तां तुसा तित्ते जाई करी सबणी का अग्गे, बड्डा आसन तोपी करी मत बेई जान्दे, कुदखी इय्यां ना हो कि तिस धाम अन्दर तुसा का भी बड्डा कोई मणू सद्दे रा हो,

⁹ते फिरी तुसा जो बोल्लेया जाये, कि अपणी जगाह् का उठी जाओ, इत्ते कुसकी होरसी ने बैणा ते तुसा जो शर्मिदां होई करी निच्चली जगाह् बैणा पेयो।

¹⁰इधेरे तांइ तुसा इय्यां करेया करो कि तुसा सबणी का निच्चली जगाह् बेई जाया करो, फिरी जां सदणे वाले ने तुसा जो दिखणा तां तिनिए तुसा का आई करी बोलणा, ओ भाई, अग्गे जाई करी बड्डी जगाह् पर बेयो, इस कने बाकि मणूआं सामणे तुसा री बड़ाई बद्धी जाणी।

¹¹किजोकी जे भी अप्पु जो बड्डा बणांगा, तिसजो परमेश्वर ने लोक्कां री नजरां अन्दर छोटा करणा, पर जे अप्पु जो छोटा बणागा, तिसजो परमेश्वर ने बड्डा करणा।

¹²फिरी यीशु ने तिस फरीसी मणू जो बोल्लेया जिनिये यीशु जो धाम पर सद्देया थिया, तू जां भी कदी धाम दिंगा, तां अपणे मित्तरां, भ्यालां, रिस्तेदारां या फिरी पड़ोसियाँ जो मत सद्दा, नी तां कल्ला जो तिन्हा ने भी तिज्जो सदणा ते तेरा हिसाब बराबर होई जाणा।

¹³जां भी तू धाम दिंगा, तां सिर्फ दुखी, रोले, लट्टे अते अन्ने मणूआं जो ही सद्देयाँ,

¹⁴किजोकी तिन्हा का तिज्जो हटाणे तांइ किच्‍छ भी नी है, ए ही गल्ल तेरे तांइ आशीष री वजह बणी जाणी इधेरा फल्ल तिज्जो धार्मिक मणूआं रे फिरी जिन्दे होई उठणे का बाद[7] मिलणा।

¹⁵फिरी तिन्हा कन्ने धाम खाणे वाले मणूआं रे बिच का इक्क ने यीशु जो बोल्लेया, जे परमेश्वर रे राज अन्दर धाम खान्गा, तिनिए बड़े धन्न होणा।

¹⁶तां यीशु ने उन्हां जो बोल्लेया, इक्क मणू बड्डी धाम री तयारी करेया करदा थिया ते तिनिए मते मणूआं जो सद्दे रा थिया।

¹⁷जां धाम तैयार होई गयी, तां तिनिए अपणे नौक्कर जो बोल्लेया, जिन्हा जो मैं सद्दे रा है, तिन्हां जो बोल्ली आ कि धाम पकी गई, ते अवे रोट्टी खाणे तांइ आई जाओ।

¹⁸से सब मणू नी आणे रे नेक-बनेके बहाणे तोपणा लग्गी पे इक्क जणे ने बोल्लेया, मैं इक्क नौआ खेत्तर खरीदे रा है, ते मैं तिसजो दिख्खणा है, ते मैं तुसा कने बिनती करदा, मेरे जो माफ करी देयो।

¹⁹दूज्जे मणू ने बोल्लेया, मैं अज्ज पंज जोड़े दांद रे खरीदे अते तिन्हा जो परखणा जाणा, मैं तुसा कने बिनती करदा कि मेरे जो माफ करी देयो।

²⁰इक्क होर मणू ने बोल्लेया, मेरा नौआ-नौआ ब्याह् होये रा है, अते मैं भी आई करी धाम नी खाई सकदा।

²¹जां तिस नौक्कर ने हटी करी अपणे मालक जो ए सारी गल्लां सूणाई तां से सुणी करी बड़ा गुस्सा होया ते तिनिए अपणे नौक्कर जो बोल्लेया, कि सहर रे बजारा ते गलियां बिच झट जाई करी गरीबां, डुन्डे़याँ, लट्टेयाँ अते अन्नेयां जो सद्दी करी लेई आ।

²²नौक्कर अपणे मालक जो बोलदा, ओ मालक, जिय्यां तुसा ने बोल्लेया थिया, तिय्यां ही मैं कित्तेया पर तां भी किच्‍छ जगाह् खाली रेई गई।

²³तां मालक ने नौक्कर जो बोल्लेया, सड़कां अते बाड़ियां अन्दर जितणे भी मणू मिलगे, तिन्हा जो धाम खाणे तांइ जोर पा, ते तिन्हा जो लेई आ, ताकि मेरा घर भरी जाओ।

²⁴ते तू सुणी लै, कि जिन्हा मणूआं जो मैं पैल्ले री धाम पाये री थी, तिन्हा बिच का इक्क जो भी मेरी इस धाम बिच का किच्‍छ भी चख्खणे जो नी मिलणा।

²⁵जां यीशु कन्ने मते मणू तिन्हेरे पीच्छे जाया करदे थिये, तां तिन्हा ने पीच्छे मुड़ी करी तिन्हा जो बोल्लेया,

²⁶जे मणू अपणे मां-प्यो, लाडी-बच्चे, भैण-भ्याल अते अपणे आप जो मेरे का भी जादा प्यार करदा हो, से मेरा चेल्ला नी बणी सकदा।

²⁷जे कोई अपणी दुख-तकलिफां जो अपणाई करी मेरे तांइ मरणे तिकर भी तैयार है से ही मेरा चेल्ला बणी सकदा।

²⁸जे तुसा इक्क घर बणाणे चाह्‍ंदे तां पैल्ले तुसा तिस बिच लगणे वाले खर्चे रा हिसाब कताब लाणा कि तुसा का घर बणाणे जिन्ना पैसा है या नी?

²⁹कुदखी इय्यां नी हो कि से घर री नींय्याँ पाई देयो ते पैसे नी होणे री वजह कने तिसजो अपणा कम्म बांद्द करणा पेई जाओ, ते जिन्हा ने तिसजो कम्म सुरु करदे दिख्खेया हो से तिसेरा मजाक उड़ान अते बोलण,

³⁰कि ए मणू बड़े जोस अन्दर आई करी घर बनाणा तां लग्गेया थिया, पर बगैर सोच्चे-समजे बणाणे री वजह कने इसेरा कम्म अद्दा रुकी गेया

³¹ते इदेया कुण जणा राजा हुन्गा जे ए नी सोच्चगा, कि मैं अपणे दस्स-हजार सपाहीयाँ जो लेई करी दूज्जे राज्जे कने किय्यां लड़गा, जिस का बीह्-हजार सपाही होण?

³²नी तां तिसेरे दुर रैहन्दे ही तिनिये अपणे दूतां जो भेज्जी करी सुलाह करी लैणी।

³³इय्यां ही जां तांइ कोई मणू अपणा सब किच्‍छ पूरी तरह् कने छड्डी नी दिंगा, तां तांइ से मेरा चेल्ला बणने जोग्गा नी है।

³⁴लूण सुआद तांइ तां खरा है पर तिस ही लूण रा सुआद नी रेयो तां तिसजो कुस चीज कने स्वाद कित्तेया जाणा?

³⁵इदेया लूण नां तां मिट्टी पर सुटणे रे कम्मां आन्दा ते ना ही इसजो खाद तांइ इस्तेमाल करी सकदे, इदेय लूण जो मणू सूटी दिन्दे। इस गल्ल जो जे सुनणा चाए, से ध्यान कने सुणे!