Read Chambeali लूका 18 Bible Online

लूका 18 - Chambeali bible

लूका 18

¹फिरी यीशु ने अपणे चेल्‍लेयां जो ए बताणे तांइ कि से हर बेल्ले प्रार्थना करदे रैण अते दुख्खी ना होण तिधेरे तांइ इक्क उदारण दित्ता

²तिन्हा ने बोल्लेया, कुसकी सहरां बिच इक्क हाकिम थिया से ना तां परमेश्वर जो मन्दा थिया ना ही मणूआं री परुवाह् करदा थिया

³तिस्सी सहर बिच इक्क विधवा जनानी रैंन्दी थी से तिसका घड़ी-घड़ी आन्दी थी अते बोल्दी थी, मेरे दुश्मण ने मेरे कने बे-न्याई करी के मेरा नुकसान कित्ता, अवे मेरे जो तिस मणू का फैसला मिलणा ही चाएदा।

⁴तिस हाकिम ने मते रोजां तांइ तिस विधवा री गल्लां री कोई परवाह ही नी कित्ती, पर बाद बिच तिन्ने अपणे मनां अन्दर सोचेया, कि मैं ना तां परमेश्वर का डरदा ना ही मणूआं री परवाह करदा,

⁵पर तां भी से जनानी घड़ी-घड़ी मेरे का आई करी मेरे जो तंग करदी रैंन्दी इधेरे तांइ मैं इय्यां करदा कि तिसेरा फैसला करी ही दिन्दा, नी तां तिन्ने मेरे नक्का धूँ देई रखणा,

⁶फिरी प्रभु यीशु ने बोल्लेया, सुणो, तिस अधर्मी हाकिम ने कै बोल्लेया थिया?

⁷तां कै परमेश्वर अपणे चुणे दे मणूआं पर ध्यान नी दिह्गां, जे तिन्हा जो रात-ध्याड़ी चेता करदे अते मन्गदे कि असा जो फैसला कर? कै परमेश्वर ने तिन्हेरी सुनणे तांइ बड़ी हाण लगागाँ?

⁸मैं तुसा जो बोल्दा, कि परमेश्वर ने तिसी ही बेल्ले तिन्हेरा फैसला करणा पर जां मणू रा पुत्तर जे मैं ही है, इस दुनिया बिच आणा, तां इदेय किन्ने हुन्गे जे इदेया विश्वास करणे वाले हुन्गे?

⁹ते यीशु ने इक्क उदारण तिन्हा लोक्कां जो सुणाया जे अप्पु जो बड़ा पवित्तर मनदे थिये ते दूए लोक्कां जो अप्पु सामणे किच्‍छ नी समजदे थिये,

¹⁰इक्क वरी दो मणू मन्दिर बिच प्रार्थना करणे तांइ गे! इक्क फरीसी थिया, दुज्जा चुंगी लैणे वाला थिया!

¹¹से फरीसी कल्ला खड़ी करी प्रार्थना करणे लगया, ओ परमेश्वर, मैं तेरा शुकर करदा, कि मैं दूज्याँ सांई ना ही मणूआं जो ठगदा, ना ही मैं गलत करदा, अते ना ही व्यभिचारी है, अते ना चुंगी लैणे वाले सांई है

¹²मैं हफ्ते बिच दो वरी ब्रत्त रखदा, हाँ, अते मिन्जो मिलणे वाली हर इक्क चीज रा दसमा हिस्सा तिज्जो दिन्दा!

¹³पर से चुंगी लैणे वाला मणू दुर खड़ी करी प्रार्थना करणे लगेया! पर प्रार्थना करदे बेल्ले स्वर्ग रे पासे अपणी हाख्खियां चुकणे री हिम्मत नी करी सकया! बजाए इसेरे, से अपणे हिक्का जो पीटी-पीटी करी बड़े दुख्खी मन कने बोलणे लगया, ओ परमेश्वर, मेरे पर दया करो, किजोकी मैं बड़ा पाप्पी मणू है!

¹⁴यीशु ने फिरी बोल्लेया, मैं तुसा जो बोलदा हाँ कि ए चुंगी लैणे वाला मणू परमेश्वर रे अग्गे धार्मिक मन्नेया गेया, अते अपणे घरे वापिस हटी गेया, ना कि दुज्जा! पर फरीसी कने इदेया नी होया, किजोकी जे कोई भी अपणे आप जो बड्डा समझगा, से छोटा कित्ता जाँणा, पर जे कोई अपणे आप जो छोटा समझगा, तिसजो बड्डा कित्तेया जाँणा।

¹⁵इक्क रोज किच्‍छ मां प्यो अपणे निक-निकेयाँ जो यीशु का लेई आए कि से तिन्हा पर हथ रखण! पर, यीशु रे चेल्‍लेयां ने तिन्हा जो बोल्लेया, कि यीशु जो तंग मत करो

¹⁶पर यीशु ने चेल्‍लेयां जो बोल्लेया, निक्याँ जो मेरे का आणा देयो, अते इन्हा जो मेरे का आणे तांइ ठाक्को मत! किजोकी परमेश्वर रा राज बिच इदेय ही मणू होणे

¹⁷मैं तुसा जो सच बोल्दा, कि इदेया कोई भी जे परमेश्वर रे राज जो निक्के-निक्के सांई नी मन्गा, स्वर्ग बिच से नी जाई सकदा।

¹⁸इक्क वरी कुसकी यहूदी सरदार ने यीशु का सवाल पूच्छया, ओ उत्तम गुरु, हमेसा री जिन्दगी पाणे तांइ मैं कै करां?

¹⁹यीशु ने बोल्लेया, तू मेरे जो उत्तम किजो है बोल्दा? सिर्फ परमेश्वर ही उत्तम है!

²⁰तिज्जो परमेश्वर रे नियमां रे हुकमा रा पता ही है कि परमेश्वर रे कै हुकम हिन: व्याभिचार नी करणा, जान नी लैणी, कने चोरी नी करणी, झूठ्ठी गवाई नी दैणी, अते अपणे मां प्यो री इजज्त करणी!

²¹तिस मणू ने बोल्लेया, जां मैं हल्का थिया, तां दा मैं ए सारे हुकमा जो मन्या करदा आया है!

²²यीशु ने ए सारी गल्लां जो सुणी करी तिसजो बोल्लेया, तेरे बिच अवे भी इक्क गल्ल री कमी है, से ए कि अपणा सब किच्‍छ बेच्ची करी गरीब्बां बिच बन्डी दे फिरी तिज्जो स्वर्ग रा धन्न मिलणा! फिरी आ अते मेरा चेल्ला बणी जा!

²³पर जिस बेल्ले तिस मणू ने ए गल्लां सुणी तिसेरा मूंह् हल्का होई गेया किजोकी से बड्डा अमीर थिया!

²⁴जां यीशु ने तिसजो बड़ा दुख्खी हुन्दे दिख्खया, तां से अपणे चेल्‍लेयां जो बोलणे लगे, अमीर मणू रा परमेश्वर रे राज बिच आणा बड़ा मुस्कल है!

²⁵इक्क से ही रे नाके बिच का ऊँट असानी कने निकली सकदा पर, इक्क अमीर मणू स्वर्ग रे राज अन्दर चली जाए ए नी होई सकदा!

²⁶इस पर सुनणे वालेयां ने पूच्छेया, तां फिरी कुसेरा छुटकारा होई सकदा?

²⁷तां यीशु ने जवाब दित्या, जे मणू का नी होई सकदा, से परमेश्वर का होई सकदा!

²⁸पतरस ने बोल्लेया, असा ने तां तुसा रे पीच्छे चलणे तांइ अपणा घर-बार बेच्ची दित्या

²⁹यीशु ने तिन्हा जो बोल्लेया, मैं तुसा जो सच बोल्दा, जिस कुसकी ने भी परमेश्वर रे राज तांइ, घर-बार, लाडी, भ्याल, मां प्यो, या बाल बच्चे छडी दिता हो

³⁰तिसजो इस जुग बिच तां कई गुणा जादा मिलणा ही पर आणे वाले जुग बिच हमेसा री जिन्दगी भी मिलणी।

³¹फिरी तिन्हा ने अपणे कने बारा चेल्‍लेयां जो लित्या, अते तिन्हा जो बोल्लेया, असी यरुशलेम सहर जो जाए करदे हिन अते जिस बेल्ले असी तित्ते पूज्जणा, तां मणू रे पुत्तर, जे मैं ही है रे बारे बिच, भविष्यद्वक्ता री लिखी रियां से सारी गल्लां पूरी होणी

³²कि से पापियां रे हात्था पकड़ाया जाणा तिन्हा ने तिसेरा मजाक उडाणा अते तिसजो कोस्या जाणा अते तिस पर थूकणा!

³³तिन्हा तिसजो कुटणा अते तिसजो मारी दैणा! पर तिन्नी तिज्जे रोज्जे फिरी जिन्दा होई जाणा

³⁴पर, यीशु जे किच्‍छ बोल्लेया करदे थिये, से गल्लां चेल्‍लेयां रे पल्ले नी थी पेया करदी अते से गल्लां तिन्हा का छीपी रेई, अते से जाणी नी पाए कि से कुधेरे बारे बोल्लेया करदे हिन।

³⁵जां से यरीहो रे नेड़े जाई पूज्जे तां इक्क अह्न्ना भिखारी सड़क रे कनारे बैठ्ठे दा थिया

³⁶फिरी जां मणू तिसेरे मुहाग्गर पूज्जे तां तिन्हेरी अवाज सुणी करी से कुसकी का पूच्छणा लगेया, ए कै होया करदा है?

³⁷तिन्हा ने तिसजो बोल्लेया कि, नासरत कस्बे रे यीशु, जी जाया करदे हिन

³⁸अते तां तिन्ने हक्क लाई करी बोल्लेया, ओ दाऊद रे पुत्तर, यीशु! मेरे पर दया करो!

³⁹जे मणू यीशु रे अग्गे अग्गे चलदे थिये से तिसजो बक्णा लगे, पर से होर भी जादा जोरे हक्कां लाणे लग्गेया, ओ दाऊद रे पुत्तर! मेरे पर दया कर!

⁴⁰तां यीशु ने तिसेरी अवाज सूणी, अते अपणे चेल्‍लेयां जो बोल्लेया, इसजो मेरे का लेई आओ जां तिसजो लेई आए, तां यीशु ने पूच्छेया,

⁴¹तू कै चाह्‍ंदा कि मैं तेरे तांइ करां? तिन्ने बोल्लेया, ओ प्रभु जी, मैं ए चाह्‍ंदा कि मैं अपणी हाख्खियां कने दिख्खी सकां

⁴²यीशु ने तिसजो बोल्लेया, तां ठीक है, तू अवे दिख्खी सकदा अते तेरे विश्वास ने तिज्जो खरा कित्ता

⁴³तां से तिस्सी बेल्ले दिख्णा लग्गी पेया अते परमेश्वर री बड़ाई करणा लग्गेया अते यीशु रे पीच्छे चली पेया अते ए सब किच्‍छ दिख्खी करी मणू परमेश्वर री बड़ाई करणा लगे।