Read Chambeali लूका 24 Bible Online

लूका 24 - Chambeali bible

लूका 24

¹हफ्ते रे पैले रोज्जे तड़के ही से जनानियां कब्र पर तिस खुशबू वाले लेप जो, जिस जो तिन्हा ने तैयार कित्या थिया, लेई करी आई।

²तिन्हा ने कब्र का पत्थर घिरे रा दिख्खेया, जे कि कब्र रे पराले रखे दा थिया

³तां से अन्दर गई, पर तिन्हा जो प्रभु यीशु री लास नी मिल्ली

⁴जां से इस सोच बिच ही थी कि, तिन्हेरे का लशकदे कपड़े पाये रे दो मणू आई खड़ी होए

⁵डरे रे मारे तिन्हा ने अपणे मूह् जमीन पास्से करी दित्ते दो मणूआं ने तिन्हा जो बोल्लेया जे जिन्दा है तिसजो तुसा मुर्दे बिच किजो तोपदे हिन?

⁶से कब्र बिच नी हिन से जिन्दा होई गेरे हिन चेता करो जां से हल्ले गलील बिच ही थिये, तिन्हा ने तुसा जो बोल्लेया थिया

⁷तिन्हा ने बोल्लेया थिया, कि मणू रे पुत्तर, जे मैं ही है, जो पाप्पी मणूआं रे हत्थां पकड़ाया जाणा, अते सुली पर चढ़ाया जाणा अते तिज्जे रोज्जे जिन्दा होई जाणा ए सब हुणा पक्का थिया।

⁸तां तिन्हा जनानियां जो यीशु री गल्लां चेता आई

⁹से जनानियां क्रब का वापस हटी आई अते तिन्हा ने ए सब गल्लां तिन्हा ग्यारा चेल्‍लेयां जो अते होर भी मणूआं जो सूणाई।

¹⁰से जनानियां मगदला सहर री मरियम, योअन्ना, अते याकूब री मां, मरियम थी अते तिन्हा कन्ने दूज्जी जनानियां भी थिया जिन्हा जे ए गल्लां प्रेरितां जो दस्सी,

¹¹पर तिन्हेरी गल्लां चेल्‍लेयां जो रास नी आई अते तिन्हा ने तिन्हेरी गल्लां रा विश्वास नी कित्तेया

¹²पर पतरस खड़ा होया अते यीशु री क्रब रे पास्से दौड़ी गेया तिन्ने थल्ले झुक्की करी दिख्खेया तां तिसजो सन रे कपड़े रे अलावा होर किच्‍छ भी नी लिब्बेया अते से ए सब किच्‍छ दिख्खी करी अपणे मन बिच बुड्बुड़ान्दे चली गेया।

¹³तिसी ही रोज यीशु रे होर चेल्‍लेयां बिच का दो जणे, यरुशलेम सहर का कोई ग्यारह किलोमीटर दुर इम्माऊस ना रे ग्रां जो जाया करदे थिये।

¹⁴जे गल्लां होई थी, तिस बारे आपस बिच गल्ल बात करेया करदे थिये

¹⁵जां से तिन्हा गल्लां जो इक्क दूज्जे कने लाया ही करदे थिये कि तखणी यीशु तिते आई पूज्जे अते तिन्हा कन्ने कन्ने चली पे,

¹⁶पर तिन्हा ने यीशु जो पछाणेया नी किजोकी परमेश्वर ने तिन्हा जो यीशु,

¹⁷यीशु ने तिन्हा जो पछानणा नी दित्तेया, यीशु ने तिन्हा जो पूच्छेया, ए कुण गल्लां हिन जे तुसा हन्डदे हन्डदे इक्क दूज्जे कने लाया करदे हिन? से हन्डदे हन्डदे से रुकी गे अते जे गल्लां होईयाँ तिस वजह कने तिन्हेरे मूह् लटकेरे थिये।

¹⁸तिन्हा बिच का क्लियोपास ना रा इक्क मणू ने यीशु बोल्लेया, यरुशलेम सहर बिच रैणे वाला तू कल्ला इक्क इदेया मणू है जिस जो नी पता है कि पिछले दिनां बिच कै होया थिया?

¹⁹यीशु ने तिन्हा जो पूच्छेया, कुण देई गल्लां? तिन्हा ने यीशु जो बोल्लेया, ए सब गल्लां नासरत कस्बे रे यीशु रे बारे बिच हिन। से इक्क इदेय मणू थिये जिन्हा ने जे किच्‍छ कित्ता अते बोल्लेया तिसजो परमेश्वर अते सबणी मणूआं जो ए दिखाई दित्ता कि से इक्क बडे़ शक्तिसाली भविष्यद्वक्ता थिये जिन्हा ने बड़े चमत्कार कित्ते, ते लोक्कां री नजर बिच परमेश्वर रे बड़े सामर्थी गुरु थिये।

²⁰अते असा रे बड्डे पुरोत्त अते यहूदी धर्म गुरुआं ने यीशु मौत री सजा दैणे तांइ पकड़वाई दित्तया अते मणूआं ने तिन्हा जो ने सुली पर चढ़ाई दित्ता असी सोच्चे दा थिया कि तिन्हा ने इस्राएल जो गुलामी का छुड़ाणा अते इन सब गल्लां जो होए दे अज्ज तिज्जा रोज है,

²¹पर असा जो आस थी कि ये ही इस्राएल जो रोमी साम्राज्य का छुटकारा दैणा पर इन्हा सारी गला जो होयरे तिसरा दिन है।

²²अते अवे असा री टोल्ली री जनानियां ने असा जो सोच्चा बिच पाई दित्ते दा है। से अज्ज भयागा तड़के ही कब्र पास्से गई थी,

²³अते तिन्हा जो तित्ते यीशु री लास नी मिल्ली, तिन्हा ने तित्ते का आई करी असा जो बोल्लेया कि तिन्हा स्वर्गदूतां रा दर्शन दिख्खेया अते तिन्हा बोल्लेया थिया कि यीशु जिन्दा हिन,

²⁴अते फिरी असा रे बिच का किच्‍छ कब्र जो गे अते जिय्यां तिन्हा जनानियां ने बोल्लेया थिया तिय्यां ही दिख्खेया कि यीशु री लास तित्ते नी थी

²⁵तां यीशु ने तिन्हा दो चेल्‍लेयां जो बोल्लेया, तुसा बड़े बेवकूफ हिन भविष्यद्वक्ता ने शास्त्र बिच जे किच्‍छ बोल्लेया थिया तिन्हा गल्लां पर विश्वास करणा तुसा जो बड़ा मुशकल लग्गेया करदा है?

²⁶ए जरुरी थिया कि मसीह ए दुख चुक्की करी अपणी महिमा बिच आओ,

²⁷तां यीशु ने मूसा रे कानून अते सारे भविष्यद्वक्ता री कताबां का सुरु करी के, सारे पवित्रशास्त्र बिच लिखी री गल्लां बिच का खुद रे बारे बिच तिन्हा जो समजाया।

²⁸से जां तिस ग्रां रे नेड़े पूज्जे, जित्ते से रेन्दे थिये, यीशु रे बर्ताव कने इय्यां लग्गेया कि जिय्यां तिन्हा ने अग्गे जाणा थिया

²⁹पर तिन्हा ने यीशु पर बड़ा जोर पाया अते बोल्लेया, तुसा असा रे का इत्ते रुकी जाओ किजोकी सूरज डूब्बी गे रा है अते सांज्ज होणे वाली है आखिर यीशु तिन्हेरे तित्ते रुकणे तांइ तिन्हा कने अन्दर चली गे

³⁰जां यीशु तिन्हा कने रोट्टी खाणे जो बैठ्ठे तां तिन्हा ने रोट्टी चुक्की अते परमेश्वर रा शुकर कित्ता फिरी तिसजो तोड़ी करी तिन्हा जो दित्ती

³¹कि तां तिन्हेरी हाख्खी खुली गई अते तिन्हा यीशु जो पछाणी लेया पर यीशु तित्ते का छुपन्त होई गे

³²फिरी से आपस बिच बोल्णा लगे, रस्ते बिच जां से असा रे कने गल्लां करदे थिये, अते असा जो पवित्रशास्त्र बिच का समजाया करदे थिये तां असा रे दिलां बिच उम्मीद कने भरी गेया।

³³फिरी से झट उठ्ठे अते वापस यरुशलेम सहर जो चली गे अते तित्ते तिन्हा जो गेया रा चेल्‍ले अते होर भी मणू लिब्बे अते से तिन्हा कन्ने मिल्ले।

³⁴जे बोल्लेया करदे थिये, प्रभु जी, सच्ची ही जिन्दा होई गेरे हिन तिन्हा ने शमौन पतरस जो दर्शन दित्तेया।

³⁵फिरी तिन्हा दोन्नां ने, जे किच्‍छ तिन्हा कन्ने रस्ते बिच होया थिया, तिसेरे बारे अन्दर बोल्लेया अते ए भी कि, जां यीशु ने रोटियां रे टुकड़े तोड़े तां तिन्हा ने यीशु जो किय्यां पछाणेया थिया।

³⁶हल्ले से तिन्हा जो ए गल्लां बोलदा ही थिया कि यीशु खुद तिन्हेरे गब्बे आई खड़े होए अते तिन्हा जो बोल्णा लगे, तुसा जो सांती मिल्ले।

³⁷पर से झुरकी पे अते डरी गे तिन्हा सोच्चेया कि से कोई भूत है,

³⁸पर यीशु ने तिन्हा जो बोल्लेया, तुसा किजो घबराया करदे हिन? तुसा रे दिलां बिच शक किजो आया करदे हिन?

³⁹मेरे हत्थां अते पैरां जो दिख्खो ते मेरे जो छुह्ई लियो, कि मैं ही है, अते किजोकी कुसकी भूत बिच मास ते हड्डियाँ नी हुंदी जिय्यां कि तुसा मेरे जो दिखदे हिन।

⁴⁰ए बोल्दे बोल्दे यीशु अग्गे आए, अते तिन्हा जो अपणे हथ पैर दिखाए

⁴¹पर तिन्हा जो खुसी भी थी अते हैरान भी थी तिस वजह कने तिन्हा जो विश्वास नी करी पांदे थिये यीशु मरे रे बिच का जिन्दे होई गेरे हिन। तां यीशु ने तिन्हा का पूच्छेया, तुसा का किच्‍छ खाणे जो है?

⁴²अते तिन्हा ने पकाई री मच्छी रा इक्क टुकड़ा यीशु जो दित्ता

⁴³यीशु ने तिसजो लेई करी तिन्हा सामणे खाया।

⁴⁴फिरी यीशु ने तिन्हा जो बोल्लेया, ए से गल्लां हिन जे मैं तुसा जो बोल्ली थिया, जां मैं तुसा कन्ने थिया, कि हर से गल्ल जे मेरे बारे बिच मूसा रे कानून बिच भविष्यद्वक्ता री कताबां बिच अते भजना री कताबां बिच लिख्खी दी हिन, से सब गल्लां पूरी होणी।

⁴⁵फिरी पवित्रशास्त्र जो समजणे तांइ यीशु ने तिन्हेरी मदद कित्ती।

⁴⁶अते तिन्हा जो बोल्लेया, पवित्र शास्तर, बिच इय्यां लिख्खे दा है, कि मसीह दुख उठाणा अते तिज्जे रोज्जे मरे रे मणूआं बिच का जिन्दा होई जाणा।

⁴⁷अते तिन्हेरा नां लेई करी यरुशलेम सहर अते देस-देस रे लोक्कां बिच पाप्पां का तौबा अते माफी पाणे रा सुब बसेख सुणाया जाणा।

⁴⁸तुसा इन सब गल्लां रे गवाह हिन,

⁴⁹ते दिख्खो, जिय्यां मेरे पिता ने वादा कित्ते रा है, तिसेरे हिसाब कने मैं तुसा पर पवित्रात्मा जो भेजणा, ते स्वर्ग का ताकत पाणे तिकर तुसा इसी कस्बे बिच ठहरे रेयो।

⁵⁰यीशु फिरी तिन्हा जो सहर का बाहर बैतनिय्याह रे ग्रां तांइ लेई गे अते तिन्हा जो हथ चुक्की करी आशीष दित्ती।

⁵¹जां यीशु अपणे चेल्‍लेयां जो आशीष देया करदे थिये तां तिन्हा जो स्वर्ग पर चुक्की लित्तेया गेया।

⁵²तां तिन्हा ने यीशु री जे जे कार कीति अते बड़ी खुसी कने यरुशलेम जो हटी आए

⁵³अते से लगातार मन्दिर बिच आई करी परमेश्वर री तारीफ करेय करदे थिये।