Read Chambeali लूका 3 Bible Online

लूका 3 - Chambeali bible

लूका 3

¹ए तिस्स बेल्ले री गल्ल है, जिस बेल्ले तिबिरियुस सम्राट पन्द्रा साल्लां का रोम रे देस पर राज करेया करदा थिया अते तिस बेल्ले पुन्तियुस पिलातुस यहूदियां प्रदेश रा राजपाल थिया, ते हेरोदेस [1]गलील जिल्ले अन्दर राज करदा थिया, ते तिसेरा भ्याल फिलिप्पुस जे थिया से इतूरैया अते त्रखोनीतिस नां रे प्रदेशां अन्दर राज करेया करदा थिया, ते लिसानियास अबिलेने नां रे प्रदेश अन्दर राज करदा थिया।

²अते तिस बेल्ले हन्ना अते कैफा नां रे बड्डे पुरोत्त थिये, तां, जकरयाह रे निक्के, यूहन्ना बपतिस्मा दैणे वाला, जे कि बियाबान जगाह् अन्दर रैहन्दा थिया, तिसेरे का परमेश्वर रा वचन पूज्जेया।

³अते तिसने यरदन नदी रे अरे-परे रे सबणी इलाकेयां बिच जाई-जाई करी मणूआं जो तिन्हेरे पाप्पां री माफी तांइ मन फिराणे ते बपतिस्मा लैणे रे बारे अन्दर प्रचार करणा लग्गेया।

⁴यशायाह नां रे भविष्यद्वक्ता रे वचनां री कताब बिच भी जिय्यां लिख्खे रा है, “बंजर जगाह् अन्दर इक्क हक्कां लाणे वाले मणू री अवाज है आया करदी, कि प्रभु जी तांइ रस्ता तैयार करो, तिन्हा तांइ सड़कां जो सीद्दी करो,

⁵सारे नाले भरी दित्ते जाणे अते सारे पहाड़ ते घाटी पधरी करी दित्ती जाणियां, ते जे टेड्डा-मेड्डा है, से सीद्दा अते जे उच्चा-न्हिट्ठा है, से पद्धरा रस्ता बणाई दित्ता जाणा,

⁶अते सबणी मणूआं ने तिसजो दिख्खी लैण जिस जो परमेश्वर ने असा रे छुटकारा तांइ भेजणा।”

⁷यूहन्ना ने तिन्हा सबणी मणूआं जो बोल्लेया, जे तिसका बपतिस्मा लैणे जो आए रे थिये, ओ जहरिल्ले सप्प सांई बुरे लोक्कों, तुसा जो कुसने दस्सेया तुसा परमेश्वर रे आणे वाले क्रोध का बचो?

⁸तुसा जो अपणे कम्मां का ए जताणा पैणा कि तुसा अपणे सच्ची पाप्पां का तौबा करी लित्ते री है, अते तुसा अपणे मना बिच ए मत सोच्चो अब्राहम असा रा प्यो है, मैं तुसा जो बोल्दा, परमेश्वर तां इन्हा बट्टेयां का अब्राहम तांइ बच्चे पैदा करी सकदा।

⁹जिय्यां इक्क मणू तिस बूट्टे जो जड़ का कट्टी दिंदा जिस पर खरा फल्ल नी लगदा तिय्यां ही अवे परमेश्वर तिन्हा लोक्कां जो सजा दैणे तांइ तैयार हिन जे अपणे पाप्पां का तौबा नी करदे।

¹⁰तां मणू यूहन्ना का पूच्छणा लग्गे, अवे असा जो परमेश्वर री सजा का बचणे तांइ कै करणा चाएदा?

¹¹तिन्ने तिन्हा जो जवाब दित्ता, जिस जणे का दो कुरते होण, से तिन्हा जो, जिस का लाणे जो किच्‍छ भी नी हो, तिन्हा कने बन्डी लैण अते जिस का खाणे जो है से भी इय्यां ही करण

¹²फिरी चुंगी लैणे वाले भी तिसका बपतिस्मा लैणे जो आये, अते तिसजो पूच्छणा लगे, ओ गुरु जी, असा जो कै करणा चाएदा?

¹³अते यूहन्ना ने तिन्हा जो बोल्लेया, जितणी चुंगी लैणे जो रोम री सरकार ने तुसा जो बोल्ले रा है, तिसका जादा चुंगी मत लेया करो।

¹⁴सपाईयां ने भी तिसका ए बोल्ली करी सुआल पुच्छे, अते असा रा कै, असा जो कै करणा चाएदा? तां यूहन्ना ने तिन्हा जो बोल्लेया, कुसकी पर दवाब पाई करी तिन्हा का जादा पैसे मत लेयो अते ना ही कुसकी पर झूठा इल्जाम भी मत लान्दे, अते जितणी तन्खाह् तुसा जो मिलदी, तिस्स कने खुस रेयो

¹⁵सब मणू मसीह री आणे री बड़ी उम्मीद बिच थिये, इधेरे तांइ मणू ए जानणे तांइ अप्पु बिच बोल्लेया करदे थिये, कि यूहन्ना ही कुदखी मसीह तां नी है?

¹⁶तां यूहन्ना ने तिन्हा सबणी मणूआं जो ए जवाब दित्ता, कि मैं तां तुसा जो सिर्फ पाणी कने ही बपतिस्मा दिन्दा, पर जे आणे वाला है, से तां मेरे का भी जादा सक्तसाली है, मैं तां इस जोग्गा भी नी है, कि तिन्हेरे जूत्ते रे तस्मे जो भी खोल्ली सकां, तिन्हा ने तां आग्ग ते पवित्रात्मा कने बपतिस्मा दैणा।

¹⁷तिन्हेरे हत्थां बिच छज्ज है ते तिन्हा ने अपणा भंडार अच्छे तरिक्के कने साफ करणा, जिस कने तिन्हा अनाज जो खलाड़े बिच पाई करी फटकारी करी अनाज जो भूह् का बखरा करी दैणा ते भूह् जो आग्ग बिच पाई दैणा जे कि कदी नी बुझणी

¹⁸यूहन्ना इदेयी गल्लां करी करी के परमेश्वर रे सुब बसेख जो समझांदा थिया

¹⁹(पर जां तिसने राजा हेरोदेस जो तिसेरे भ्याल फिलिप्पुस री लाड़ी हेरोदियास कने नजायज रिश्ते अते होर भी दूज्जे गलत कम्मां तांइ झिड़केया

²⁰तां राजा हेरोदेस ने यूहन्ना जो पकड़ी करी जेह्ल बिच पाई दित्तेया अते तिन्ने इक्क होर गलत कम्म अपणे गलत कम्मां कने जोड़ी लेया)।

²¹इय्यां होया कि जां सब जणे यूहन्ना का बपतिस्मा लेया करदे थिये तां यीशु ने भी आई करी यूहन्ना का बपतिस्मा लेया, अते जां यीशु प्रार्थना करेया करदे थिये, तां स्वर्ग खुली गेया।

²²ते पवित्रात्मा इक्क कबूतर रे रुप बिच यीशु पर उतरेया ते स्वर्ग बिच का ए अवाज आई, तू मेरा प्यारा पुत्तर है, अते मैं तेरे का खुस है।

²³जां यीशु ने अपणी सेवा सुरु कित्ती थी, तां से कोई तीह् कर साल्ले रे थिये (जिय्यां कि समजेया जान्दा), यीशु यूसुफ रे पुत्तर थिये, अते यूसुफ एली रा पुत्तर थिया।

²⁴ते एली मत्तात रा पुत्तर थिया, मत्तात रा पुत्तर थिया। ते लेवी, मलकी रा पुत्तर थिया, ते मलकी यन्ना ते यूसुफ रा पुत्तर थिया।

²⁵ते यसूफ, मत्तियाह रा पुत्तर थिया, ते मत्तियाह, अमोस रा पुत्तर थिया। ते अमोस, नहूम रा पुत्तर थिया, ते नहूम, असल्याह रा पुत्तर थिया। ते असल्याह, नोगह रा पुत्तर थिया

²⁶ते नोगह, मात रा पुत्तर थिया। ते मात, मत्तियाह रा, ते मत्तियाह, शिमी रा पुत्तर थिया। ते शिमी योसेख रा, ते योसेख योदाह रा पुत्तर थिया।

²⁷ते योदाह यूहन्ना रा, ते यूहन्ना, रेसा रा पुत्तर थिया। ते रेसा जरुब्बाबेल रा, ते जरुब्बाबील, शालतियेल रा पुत्तर थिया। ते शालतिएल नेरी रा,

²⁸ते नेरी मलकी रा पुत्तर थिया। ते मलकी अद्दी रा ते अद्दी कोसाम रा पुत्तर थिया। ते कोसाम इलमोदाम रा, ते इलमोदाम, एर रा पुत्तर थिया।

²⁹ते एर येशु रा, ते येशु एलीएजेर रा पुत्तर थिया। एलीएजेर से योरीम रा, ते योरीम मत्तात रा पुत्तर थिया। ते मत्तात लेवी रा,

³⁰ते लेवी शमौन रा पुत्तर थिया। ते शमौन यहूदा रा, ते यहूदा यूसुफ रा पुत्तर थिया। ते यूसुफ योनान रा, ते योनान इलयाकीम रा पुत्तर थिया।

³¹ते इलयाकीम, मलेआह रा, ते मलेआह मिन्नाह रा पुत्तर थिया। ते मिन्नाह, मत्तता रा, अते से नातान रा, अते से दाऊद रा पुत्तर थिया।

³²अते से यिशै रा, अते से ओबेद रा पुत्तर थिया। अते से बोअज रा, अते से सलमोन रा, अते से नहशोन रा पुत्तर थिया।

³³अते से अम्मीनादाब रा, अते से अरनी रा पुत्तर थिया। अते से हिस्त्रोन रा, अते से फिरिस रा पुत्तर थिया। अते से यहूदा रा,

³⁴अते से याकूब रा, अते से इसहाक रा, अते अब्राहम रा पुत्तर थिया। अते से तेरह रा, अते से नाहोर रा पुत्तर थिया।

³⁵अते से सरूग रा, अते से रऊ रा पुत्तर थिया। अते से फिलिग रा, अते से एबिर रा पुत्तर थिया। अते से शिलह रा,

³⁶अते केनान रा पुत्तर थिया। अते से अरफक्षद रा, अते से शेम रा पुत्तर थिया। अते से नूह रा, अते से लिमिक रा पुत्तर थिया।

³⁷अते से मथूशिलह रा, अते हनोक रा पुत्तर थिया। अते से यिरिद रा, अते से महललेल रा पुत्तर थिया। अते केनान रा,

³⁸अते से एनोश रा, अते से शेत रा पुत्तर थिया। अते से आदम रा, अते से परमेश्वर रा पुत्तर थिया।