Chambeali bible online

लूका 9

¹फिरी यीशु ने अपणे बाराह् चेल्‍लेयां जो सद्देया, ते तिन्हा जो बिमारियां जो दुर करणे ते सारी दुष्टात्मा जो कडणे री ताकत ते हक दित्तेया

²ते तिन्हा जो परमेश्वर रे राज करणे रा सुब बसेख सारे मणूआं जो सुनाणे ते बिमार मणूआं जो खरा करणे तांइ भेज्जेया।

³यीशु ने तिन्हा जो बोल्लेया कि तुसा अपणे सफर बिच किच्‍छ भी लेई करी मत जादें, ना ही सोठी ना झोली ना रोट्टी ते ना पैसे ते ना ही जादा कपड़े

⁴ते तुसा जिस भी ग्रां अन्दर जांह्गे, तित्ते कुसकी इक्क घर अन्दर प्रोह्णे बणी करी रेय, जां तांइ तुसा तिस ग्रां का बाहर नी आन्गे, तां तांइ तिस ही घर बिच रेयो

⁵जे तिस ग्रां रे मणू तुसा रे सुब बसेख जो नी मनगे, तां तित्ते का निकलदे बेल्ले अपणे पैरां री धूड़ झाड़ी आयो, ताकि ए तिन्हा पर गवाई होई सको कि से अपणी कित्ते री अप्पु भुगतन

⁶तां से बाराह् चेल्‍ले तित्ते का निकली करी ग्रां-ग्रां अन्दर जाई करी परमेश्वर रे राज करणे री सुब बसेख रे बारे अन्दर सुणांदे रे ते बिमार मणूआं जो खरा करदे रे

⁷जां हेरोदेस राज्जे जो यीशु रे कम्मां रे बारे अन्दर पता लगेया, तां से सुणी करी बड़ा-भरी उदास होई गेया किजोकी केई मणू बोल्लदे थिये, कि ए यूहन्ना बपतिस्मा दैणे वाला है, जे कि मरी करी फिरी जिन्दा होई गे रा है।

⁸किच्‍छ मणू बोलदे थिये, कि ए एलिय्याह-भविष्यद्वक्ता है अते किच्‍छ मणू तां ए बोल्लेया करदे थिये, कि ए पुराणे बेल्ले रे भविष्यद्वक्ता बिच का कोई फिरी जिन्दा होई गे रा है

⁹पर हेरोदेस राज्जे ने बोल्लेया, कि यूहन्ना बपतिस्मा दैणे वाले रा सर तां मैं ही कटाया थिया, ते अवे ए कुण है जिसेरे बारे अन्दर मैं ए सब गल्लां सूणेया करदा है? फिरी तां राजा हेरोदेस यीशु जो दिखणे तांइ पूरी कोसीस करणा लग्गेया

¹⁰जां प्रेरित हटी आए, तां जे किच्‍छ तिन्हा ने कित्तेया थिया, से सब गल्लां यीशु जो दस्सियाँ ते यीशु अपणे चेल्‍लेयां जो तित्ते का छामत-चारे बैतसैदा नां रे सहर बिच लेई गे।

¹¹पर मणूआं जो पता लग्गी गेया ते से भी तिन्हेरे पीच्छे चली पे यीशु ने तिन्हेरा सुआगत कित्तेया ते यीशु ने तिन्हा जो परमेश्वर रे राज करणे रे बारे अन्दर दस्सेया अते जे ठीक होणा चाह्‍ंदे थिये तिन्हा मणूआं जो खरा कित्तेया

¹²जिस बेल्ले सांज्ज होणा लग्गी तां चेल्‍लेयां ने यीशु जो आई करी बोल्लेया, इन्हा मणूआं जो नेड़े, कुसकी ग्रां-पदरा अन्दर भेजी देयो, ताकि से तित्ते रेई सकण ते अप्पु तांइ रोट्टी रा इन्तजाम करी सकण किजोकी ए इलाका सुनसान है जित्ते रैह्णे-खाणे तांइ किच्‍छ भी नी है

¹³यीशु ने अपणे चेल्‍लेयां जो बोल्लेया, तुसा ही इन्हेरे तांइ रोट्टी रा इंतजाम करो तिन्हा ने बोल्लेया, कि असा रे का तां पंज रोटियां अते दो मच्छियाँ रे सिवाए होर किच्‍छ भी नी है, पर जे असी इन्हा तांइ रोट्टी खरीदी करी लेई आण, तां किच्‍छ इतंजाम होई सकदा तित्ते लाई-पाई करी पंज हजा़र तां मड़द ही थिये।

¹⁴तां यीशु ने अपणे चेल्‍लेयां जो बोल्लेया, कि इन्हा जो पंजाह्-पंजाह् करी के पान्द बिच बिठाई देयो

¹⁵चेल्‍लेयां ने तिय्यां ही कित्ता, ते सब मणू भुईय्याँ बैह्ई गे

¹⁶फिरी यीशु ने तिन्हा पंज रोटियां ते दो मच्छियाँ जो हत्थां पर रख्खेया ते स्वर्ग पास्से दिख्खी करी परमेश्वर रा शुकर कित्तेया ते फिरी तिन्हा रोटियां जो तोड़ी-तोड़ी करी मणूआं जो दैणे तांइ अपणे चेल्‍लेयां का दिन्दे गे

¹⁷जां सब जणे रज्जी करी खाई बैठ्ठे, तिसेरे बाद भी चेल्‍लेयां ने बचे री रोटियां रे बाराह् टोकरे भरी करी रख्खे

¹⁸इक्क रोज यीशु मणूआं का बखरे होई करी इक्क कह्ल्ली जगाह् बिच प्रार्थना करणे जो गे, ते तिन्हेरे सोग्गी चेल्‍ले भी थिये, तां यीशु ने तिन्हा का पूच्छेया, कि मणू मेरे बारे अन्दर कै सोचदे कि मैं कुण है?

¹⁹तिन्हा ने जवाब दित्तेया, कि किच्‍छ मणू यूहन्ना बपतिस्मा दैणे वाला बोल्दे, किच्‍छ तुसा जो एलिय्याह मन्दे, अते किच्‍छ बोल्दे, कि तुसा पुराणे बेल्ले रे भविष्यद्वक्ता बिच का कोई इक्क हिन, जे कि जिन्दा होई गे रा है।

²⁰यीशु ने अपणे चेल्‍लेयां का पूच्छेया, पर तुसा जो कै लगदा, कि मैं कुण है? पतरस ने जवाब दित्तेया, कि असी तां तुसा जो परमेश्वर रा भेज्जे रा मसीह यीशु मन्दे

²¹तां यीशु ने तिन्हा जो चितौणी देई करी बोल्लेया, कि मेरे मसीह यीशु होणे रे बारे अन्दर कुसकी जो जरा भी मत बोल्दे

²²फिरी यीशु ने अपणे चेल्‍लेयां जो बोल्लेया, कि ए पक्की गल्ल है, कि मणू रे पुत्तर ने बड़े दुख्ख सैह्णे हिन ते बड़े-बड़े बुजुर्ग लोक, बड्डे पुरोत्त, अते यहूदी शास्त्रियां ने तिसजो नक्कारी दैणा ते मरवाई दैणा, पर तिनिए त्रीय्ये रोज्जे फिरी जिन्दे होई जाणा।

²³फिरी यीशु ने तिन्हा सबणी जो बोल्लेया, जे कोई मेरा चेल्ला बणना चाह्‍ंदा, तिसजो अपणी दुख-तकलिफां जो चुक्की करी मेरे तांइ मरणे जो भी तैयार रैह्णा पैणा।

²⁴किजोकी, जे तुसा अपणी जान बचाणा चांगे, तां तुसा तिसजो नी बचाई सकणा पर जे कोई मेरे तांइ अपणी जान देई दिंगा, सिर्फ तिसजो ही सच्चा जीण मिलणा

²⁵किजोकी इसेरा कै फायदा कि इन्सान इक्क पास्से तां सारी दुनिया जो जीत्ती लै पर अपणी जान जो ही गवाई दे?

²⁶जे मणू मेरे ते मेरे सुब बसेख का शर्मसार हुंदा, मणू रे पुत्तर, जे मैं ही है ने भी, जां अपणी, ते अपणे पिता-परमेश्वर री, ते पवित्र स्वर्गदूतां कने महिमा कने आणा, तां तिन्हा मणूआं जो भी पछियानणे का मुकरी जाणा

²⁷पर मैं तुसा जो सच बोलदा, कि जे इत्ते खड़ित्ते रे हिन, तिन्हा बिच का किच्‍छ ईदेह् भी हिन, जिन्हा तिस बेल्ले तांइ नी मरणा, जां तांइ से परमेश्वर रे राज जो नी दिख्खी लिन्दे।

²⁸इन्हा गल्लां रे कोई आठ्ठ रोज्जां बाद यीशु अपणे कन्ने पतरस, याकूब, ते यूहन्ना जो लेई करी प्रार्थना करणे तांइ इक्क पहाड़ पर गे।

²⁹प्रार्थना करदे-करदे यीशु रा रुप ही बदली गेया ते तिन्हेरे कपड़े लस्कदे-गाढ़े चिट्टे रांग रे होई गे

³⁰तां दिख्खो मूसा ते एलिय्याह, ए दो मणू तिन्हा कने गल्लां करेया करदे थिये

³¹ए सब महिमा अन्दर दिस्से, ते से यीशु रे यरुशलेम अन्दर मरणे री गल्लां करेया करदे थिये

³²पतरस ते तिसेरे दोस्तां जो बड़ी गैहरी निन्दर आई गे री थी जां तिन्हेरी निन्दर पूरी तराह् कने खुल्ली गई तां, तिन्हा ने भी यीशु जो तिन्हेरी महिमा अन्दर मूसा नबी ते एल्लीयाह भविष्यद्वक्ता जो, यीशु कन्ने खड़िह्त्तेरा दिख्खेया

³³जां मूसा नबी ते एलिय्याह भविष्यद्वक्ता तित्ते का जाणा लगे तां पतरस यीशु जो बोलणा लगेया, ओ मालक, खरा होया जे असी इत्ते हिन, असा जो त्रै तम्बू बनाणा चाएदे, इक्क तुसा तांइ, इक्क मूसा तांइ अते इक्क एलिय्याह तांइ हालांकि, पतरस जाणदा नी थिया कि से कै है बोलदा?

³⁴से हल्ले ए गल्ल करदा ही थिया, कि इक्क बद्दल ने तिन्हा जो घेरी लेया ते से बड़े डरी गे,

³⁵ते से बद्दल रे अन्दर ही थिये, कि तिस बदलां बिच का अवाज आई, कि ए मेरा पुत्तर है, जिस जो मैं चुणे रा है, इसेरी सूणेया करो

³⁶जिय्यां ही ए अवाज आणा बन्द होई, तिय्यां ही सिर्फ यीशु तित्ते किल्ले खड़ित्ते रे थिये ते चेल्‍लेयां ने जे किच्‍छ भी दिख्खेया थिया, इस बारे अन्दर तिन्हा रोज्जे कुसकी कन्ने कोई गल्ल नी लाई

³⁷दूए रोज्जे जां से पहाड़ का उतरे, तां मते सारे मणू यीशु का मिलणे तांइ आई पूज्जे।

³⁸ते तिन्हा मणूआं बिच का इक्क मणू जोरे सणे बोल्ली पेया, ओ गुरु जी, मैं तुसा रे छंदे करदा, तुसा मेरे निक्के जो खरा करी के उस पर दया करो किजोकी ए मेरा इक्को-इक्क मुंडा है,

³⁹मेरे निक्के जो इक्क दुष्टात्मा घड़ी-घड़ी पकड़दी ते फिरी ए इक्कदम चिन्ड़ा मारणा लगदा से तिसजो इदेया मरोड़दी, कि तिसेरे मुँह का झग्ग निकली आन्दी ते से तिसजो बड़ा भरी मरोड़दी ते तिसजो बड़ी मुस्कल कने छड़दी

⁴⁰मैं तुसा रे चेल्‍लेयां जो अपणे निक्के का तिस दुष्टात्मा जो कढ़णे तांइ बोल्लेया थिया, पर से तिय्यां नी करी सके

⁴¹फिरी यीशु ने अपणे चेल्‍लेयां जो बोल्लेया, ओ विश्वास नी करणे वाले ते जिद्दी मणूओं! मैं तुसा कन्ने कितणे करी रोज्जां तांइ रैह्न्गा ते कधाड़ी तांइ तुसा री इदेय गल्लां बरदास्त करदा रैह्न्गा? फिरी यीशु ने तिस मणू जो बोल्लेया, अपणे निक्के जो इत्ते लेई आ

⁴²तिसेरा निक्का आया ही करदा थिया, कि दुष्टात्मा ने तिसजो पटकी करी भुईय्याँ सूटी दित्तेया ते तिसजो मरोड़णा लग्गी, पर यीशु ने दुष्टात्मा जो झिड़केया ते तिस निक्के जो खरा करी के तिसेरे प्यो का देई दित्तेया

⁴³तां सब मणू परमेश्वर रे चमत्कार जो दिख्खी करी हैरान होई गे यीशु रे चमत्कारी कम्मां जो दिख्खी करी सब मणू हैरान थिये। फिरी यीशु ने अपणे चेल्‍लेयां जो बोल्लेया,

⁴⁴तुसा मेरी गल्ल ध्यान कने सुणो, किजोकी मणू रे पुत्तर, जे मैं ही है कन्ने धोखा होणे वाला है ते तिसजो तिसेरे दुश्मणा रे हत्थे पकड़वाई दित्तेया जाणा। किजोकी मणू रे पुत्तर, जे मैं ही है कन्ने धोखा होणे वाला है ते तिसजो तिसेरे दुसमणां रे हत्थे पकड़वाई दित्तेया जाणा

⁴⁵पर ए गल्ल चेल्‍लेयां रे पल्ले नी पेई, किजोकी इस गल्ल रा सह्ई मतलब तिन्हा का छुपी रेया कि से तिसजो जाणी ना सकण ते चेल्‍ले यीशु का इस बारे अन्दर पूच्छणे का ड़रदे थिये

⁴⁶फिरी चेल्‍लेयां बिच इस गल्ल पर बैह्स होणा लग्गी पेई, कि तिन्हा बिच सबणी का बड्डा कुण है?

⁴⁷पर यीशु ने तिन्हेरे मन री गल्ल जाणी लेई इधेरे तांइ तिन्हा ने इक्क निक्के जो अपणे नेड़े खड़ा कित्ता

⁴⁸ते तिन्हा जो बोल्लेया, जे भी मेरे नां कने इस निक्के जो अपणाई लिंदा, से मेरे जो अपणाई लिंदा, ते जे मेरे जो अपणाई लिंदा, से परमेश्वर जो अपणाई लिंदा, जिन्हा ने मेरे जो भेज्जे रा है, किजोकी जे तुसा बिच सबणी का छोटा है, सेह्ई सबणी का बड्ड़ा है

⁴⁹फिरी यूहन्ना ने यीशु जो बोल्लेया, मालक जी, असा ने इक्क मणू जो तुसा रे नां कने मणूआं बिच का दुष्टात्मा जो कढ़दे दिख्खेया, ते असा ने तिसजो ए सब करणे का मन्हा कित्तेया, किजोकी से असा रे बिच का इक्क नी थिया।

⁵⁰यीशु ने यूहन्ना जो बोल्लेया, तिसजो ठाक्को मत किजोकी जे असा रे खिलाफ नी है, से असा रे पास्से ही है

⁵¹जां यीशु रा स्वर्ग अन्दर जाणे रा बेल्ला नेड़े आया करदा थिया, तां तिन्हा यरुशलेम जाणे री सोच्ची ते चली पे।

⁵²जाणे का पैल्ले यीशु ने सामरिया प्रदेश बिच अपणे चेल्‍ले का ए सुब बसेख भिजवाया कि असा रे आणे तांइ इक्क जगाह् तैयार करी रख्खो।

⁵³पर तिस ग्रां रे मणूआं ने तिन्हा जो अपणे ग्रां अन्दर आणे का साफ मन्हा करी दित्तेया ते तिन्हेरे चेल्‍लेयां जो वापस हटाई दित्तेया, किजोकी सामरी मणू जाणदे थिये, कि तिन्हा ने यरुशलेम जो जाणा थिया

⁵⁴ए दिख्खी करी तिन्हेरे चेल्‍ले याकूब ते यूहन्ना ने यीशु जो बोल्लेया, प्रभु जी, कै तुसा चाह्‍ंदे कि असी आज्ञा देई करी इन्हा मणूआं री इस हरकत तांइ आसमान का आग्ग सूटी करी इन्हा जो आग्ग कन्ने भस्म करी देंन?

⁵⁵पर यीशु ने अपणे चेल्‍लेयां जो झिड़केया ते बोल्लेया, कै तुसा जो पता नी है, कि तुसा मेरे कन्ने हिन? मणू रा पुत्तर, जे मैं ही है मणूआं री जान लैणे तांइ नी पर बचाणे तांइ आए रा है

⁵⁶ते फिरी से कुसकी होरसी ग्रां बिच चली गे

⁵⁷जां यीशु ते तिन्हेरे चेल्‍ले रस्ते पर चलेया करदे थिये, तां इक्क मणू ने यीशु जो बोल्लेया, कि तुसा ने जित्ते जित्ते भी जाणा, मैं भी तुसा कन्ने जाया करणा।

⁵⁸यीशु ने तिसजो बोल्लेया, गीदड़ां जो रैह्णें तांइ कुड्डां ते आसमान रे चिडू-पखेरुआं तांइ बसे रे हिन, पर मणू रे पुत्तर, जे मैं ही है जो सर ढ़कणे तांइ भी कोई ठकाणा नी है

⁵⁹यीशु ने कुसकी दूज्जे मणू जो बोल्लेया, मेरा चेल्ला बणी जा पर तिनिए जवाब दित्तेया, कि ओ प्रभु जी, मेरे जो पैल्ले अपणे घरे जाणा देयो ताकि मैं अपणे प्यो रे मरणे रे बाद तिन्हा दफन करी के वापिस आई सकां

⁶⁰यीशु ने तिसजो बोल्लेया, मरणे वालेयां जो अपणे मुर्दे दबणा दे, किजोकी परमेश्वर रा वचन सब मणूआं तांइ है, इधेरे तांइ तेरा फर्ज ए है कि तू मणूआं जो परमेश्वर रे राज करणे रे बारे अन्दर दस्स

⁶¹फिरी इक्क जह्णा होर बोलणा लगेया, कि मैं भी तुसा रा चेल्ला बणना, पर पैल्ले जाई करी अपणे घरेतां जो बोल्ली करी आन्दा

⁶²यीशु ने तिसजो बोल्लेया, इदेया कोई भी मणू, जे हल पर हत्थ रखणे का बाद पीच्छे दिखदा, से परमेश्वर रे राज अन्दर रैह्णे जोग्गा नी है।

Read Chambeali लूका 9 Bible Online

लूका 9 - Chambeali bible

लूका 9