Read Chambeali यूहन्ना 1 Bible Online

यूहन्ना 1 - Chambeali bible

यूहन्ना 1

¹दुनिया रे बणाए जाणे का पैल्ले वचन थिया, वचन परमेश्वर कने थिया ते वचन परमेश्वर थिया।

²से ही सुरु अन्दर परमेश्वर रे कने थिया।

³परमेश्वर ने सब किच्‍छ वचन रे जरिए बणाया ते हर इक्क चीज जे इस दुनिया बिच बणाई गयी से तिन्हेरे ही जरिए बणाई गयी।

⁴तिस बिच जिन्दगी थी जे सारे मणूआं जो रौसनी दिंदा।

⁵रौसनी न्याहरे बिच चमकदी, ते न्याहरा तिसका कदी नी जीत्ती सकदा।

⁶इक्क मणू परमेश्वर रे पास्से का आया, जिसेरा नां यूहन्ना थिया

⁷से गवाह बणी करी आया ताकि रौसनी री गवाई दे, ताकि तिसेरे जरिए सारे रौसनी बिच विश्वास करण,

⁸से अप्पु तां रौसनी नी थी पर तिस रौसनी री गवाई दैणे तांइ आए रा थिया,

⁹से सच्ची रौसनी जे सारे लोक्कां जो रौसनी दिंदी, से दुनिया बिच आणे वाली थी।

¹⁰से दुनिया बिच आया, कने दुनिया तिसेरी वजह कने बणेया थिया, ते दुनिया रे लोक्कां ने तिसजो नी पछाणेया।

¹¹से अपणे लोक्कां का आया पर तिसेरे अपणे लोक्कां ने तिसजो नी अपणाया।

¹²पर जितणेया ने तिसजो अपणाया, तिसने तिन्हा जो परमेश्वर रे पुत्तर होणे रा हक्क दिता, तिन्हा लोक्कां जो जे तिस पर विश्वास रखदे।

¹³से मणू ना तां अपणे मां-प्यो री मर्जी कने, ना सरीर री इच्छा कने ते ना ही लोक्कां री बच्चे पैदा करणे री इच्छा री वजह कने पैदा होए रे हिन पर से परमेश्वर री इच्छा कने पैदा होए रे हिन।

¹⁴वचन मणू रे रुप बिच आया, ते से अनुग्रह ते सच्चाई कने भरी कने तिसने हमारे बिच डेरा कित्ता कने असी तिसेरी इदेइ बड़ाई दिख्खी जिय्यां पिता रे इकलौत्ते पुत्तर री महिमा दिख्खी हो।

¹⁵यूहन्ना ने तिसेरे बारे गवाई दिती कने बड़ी हक्कां लाई करी बोल्लेया, “ए से ही है जिसेरे बारे मैं तुसा जो दस्सेया थिया कि जे मेरे बाद आए करदा है सेह मेरे का भी बधी करी है किजोकी से मेरे का भी पैहले थिया।”

¹⁶तिन्हा री अनुग्रह री भरपुरी बिच का असी तिन्हा का इक्क का बाद इक्क मती सारी आशीषां हासिल कित्ती।

¹⁷इस तांइ कि मूसा रा कानून तां मूसा रे पास्से का दित्तेया गेरे थिया पर परमेश्वर ने यीशु मसीह रे जरिए अनुग्रह कने सच्चाई लोक्कां पर ज़ाहिर कित्ती।

¹⁸परमेश्वर जो कदी कुसकी ने नी दिख्खेया पर इकलौते पुत्तर ने जे अप्पु ही परमेश्वर है, ते पिता रे सबका जादा करीब है। तिन्हा ने ही असा पर परमेश्वर जो प्रकट कित्ते रा है।

¹⁹यूहन्ना री गवाई ए है कि जिस बेल्ले यहूदी अधिकारियां ने यरुशलेम सहर रे लेवी पुरोत्तां ते लेवी गोत्र रे लोक्कां जो तिसका ए पूछने जो भेज्जेया “तू कुण है।”

²⁰तिसने सही तौर पर तिन्हा जो दस्सेया, “मैं मसीह नी है।”

²¹तां तिन्हा ने तिसजो पूच्छेया, “तां फिरी कुण है? ‘क्‍या तू एलिय्याह भविष्यद्वक्ता है? तिसने बोल्लेया मैं नी है, तां कै तू भविष्यद्वक्ता है?’” तिसने जवाब दिता, “नी।”

²²“तां तिन्हा ने तिसजो पूच्छेया, फिरी तू कुण है ताकि असी अपणे भेजणे वालया जो जवाब देई सकन् कि तू अपणे बारे बिच कै बोलदा?”

²³तिसने बोल्लेया जिय्यां यशायाह भविष्यद्वक्ता ने बोल्लेया है; मैं जंगला बिच इक्क अवाज है, कि परमेश्वर रा रस्ता तैयार करो

²⁴किच्‍छ मणू फरीसी लोक्कां रे पास्से का भिजवाए रे थिये।

²⁵तिन्हा ने तिसका एह़ सवाल पूच्छेया, “अगर तू न मसीह है न एलिय्याह है, ते ना ही सेह भविष्यवाणी करणे वाला है, तां फिरी बपतिस्मा किजो दिंदा?”

²⁶यूहन्ना ने तिन्हा जो जवाब दित्ता, मैं ता पाणी कने बपतिस्मा दिंदा पर तुसा रे बिच इक्क इदेया मणू खडिते रा है तिसजो तुसा नी जाणदे।

²⁷जे मेरे बाद आणे वाले है मैं तां तिसेरी जूत्ते रे तसमे खोलणे रे जोग्गा भी नी है

²⁸ए गल्लां यरदन नदी रे पार बैतनिय्याह कस्बे बिच होई, जित्ते यूहन्ना लोक्कां जो बपतिस्मा देया करदा थिया।

²⁹दूए दिन तिसने यीशु जो अपणे पास्से आंदे दिख्खी करी बोल्लेया, “दिख्खो! ए परमेश्वर रा मेमना है, जे दुनिया रे पाप्पां जो मिटाणे तांइ आए रा है।[1]”

³⁰ए से ही है जिसेरे बारे बिच मैं बोल्लेया थिया इक्क मणू मेरे का बाद आणे वाला है जे कि मेरे का बधी करी है किजोकी से मेरे का पैहले थिया

³¹मैं तां तिसजो पछियाणदा नी थिया कि से मसीह हिन, मैं इधेरे तांइ पाणी कने बपतिस्मा दिंदा आया कि से इस्राएल रे लोक्कां सामणे आई जाए।

³²कने यूहन्ना ने गवाई दिती, “मैं आत्‍मा जो कबूतर रे रुप बिच स्वर्ग का उतरदे दिख्खेया ते से तिस पराल्ले उत्तरी गेया।”

³³मैं तां तिसजो पछियाणदा नी कि से मसीह हिन, पर जिस ने मेरे जो पाणी रा बपतिस्मा दैणे जो भेज्जेया तिसी ने मेरे जो बोल्लेया, जिस पराले तू आत्‍मा जो उतरदे कने रुकदे दिख्खेया से ही पवित्रात्मा कने बपतिस्मा दैणे वाला है।

³⁴ते मैं दिख्खेया कने गवाई दिती कि ए ही परमेश्वर रा पुत्तर है।

³⁵अगले दिन फिरी यूहन्ना कने तिसेरे चेल्‍लेयां बिच का दो मणू खडित्ते रे थिये

³⁶कने तिसने यीशु जे जाए करदे थिये दिख्खी करी बोल्लेया दिख ए परमेश्वर रा मेमना है

³⁷तां से दोई चेल्‍ले तिसका एह़ सुणी करी यीशु रे पीछे चली पे

³⁸यीशु ने मुड़ी करी तिन्हा जो अपणे पीच्छे आंदे दिख्खेया ते बोल्लेया, तुसा कुस जो तोप्पेया करदे हिन, ते तिन्हा जो बोल्लेया, ओ गुरु, तू कुते रैहन्दा।

³⁹तां तिन्हा ने यीशु रे रैह्णे री जगाह् जो दिख्खेया, ते तिस रोजे से तिन्हा कने ही रे। ए सब किच्‍छ चार बजे रे लगभग होया थिया।

⁴⁰तिन्हा दोन्नां बिच का जे यूहन्ना री गल्ल सुणी करी यीशु रे पीछे होए रे थिये इक्क शमौन पतरस रा भ्याल अन्द्रियास थिया

⁴¹तिसने पहले अपणे सगे भ्याल शमौन जो मिली करी तिसजो बोल्लेया, हमारे जो मसीह मिली गे।

⁴²अन्द्रियास शमौन जो यीशु का लेई आया, यीशु ने तिसजो दिख्खी करी बोल्लेया, तू यूहन्ना रा मुंडा शमौन है, तू कैफा [2]मतलब पतरस [3]केहलाणा।

⁴³दूए दिन यीशु ने गलील प्रदेश जाणे रा फैसला कित्तेया। से फिलिप्पुस कने मिल्लेया कने बोल्लेया, मेरा चेल्ला बणने तांइ पीच्छे आई जा।

⁴⁴फिलिप्पुस अन्द्रियास कने पतरस रे ग्रां बैतसैदा रा रैह्णे वाला थिया

⁴⁵फिलिप्पुस नतनएल कने मिलया कने तिसजो बोल्लेया, मूसा ते भविष्यद्वक्तां ने ते परमेश्वर रे कानून बिच जिसेरी चर्चा ने कित्ती री है, से असा जो मिली गेया, से यूसुफ रा पुत्तर, नासरत कस्बे रा यीशु है।

⁴⁶नतनएल ने तिसजो बोल्लेया, कै कोई ठीक चीज भी नासरत का निकली सकदी है? फिलिप्पुस ने तिसजो बोल्लेया, चली करी दिख्खी लै

⁴⁷यीशु ने नतनएल जो अपणे पास्से आंदे दिख्खी करी उसेरे बारे बिच बोल्लेया: ए सच्ची इस्राएल रे ‍खानदान[4] रा है ते भरोसेमंद है: इस आदमी बिच कोई ढोंग नी है।

⁴⁸नतनएल ने तिसजो बोल्लेया, तू मेरे जो किय्यां करी जाणदा? यीशु ने तिसजो जवाब दित्ता इसेरे का पैहले फिलिप्पुस ने तिज्जो सदया जिस बेल्ले तू अंजीर रे बूट्टे रे हेठ थिया, तिस बेल्ले मैं तिज्जो दिख्खेया थिया

⁴⁹नतनएल ने तिसजो जवाब दिता, ओ गुरु, तू परमेश्वर रा पुत्तर है, तू इस्राएल रा महाराजा है।

⁵⁰यीशु ने तिसजो जवाब दिता, मैं जे किच्‍छ तिज्जो बोल्लेया कि मैं तिज्जो अंजीर रे बूट्टे रे हेठ दिख्खेया, कै तू इसी तांइ विश्वास करदा, तैं इसका भी बड्डे-बड्डे कम्म दिखणे।

⁵¹फिरी तिसने बोल्लेया, मैं तुसा कने सच-सच बोलदा कि तुसा स्वर्ग जो खुले रे कने परमेश्वर रे स्वर्गदूतां जो मणू रे पुत्तर, जे मैं ही है, पराले उतरदे कने उप्पर जांदे दिखणा।