Read Chambeali यूहन्ना 12 Bible Online

यूहन्ना 12 - Chambeali bible

यूहन्ना 12

¹यीशु फसह रे त्याहार का छे दिन पैल्ले बैतनिय्याह कस्बे जो आया जित्ते तिन्हा ने लाज़र जो मुर्देयां का फिरी जिन्दा कित्तेया थिया।

²तित्ते तिन्हा ने यीशु रे आदर तांइ रात्ती बेल्ले रोट्टी बणाई, ते मार्था सेवा करदी थी, ते लाज़र उन्हा बिच का इक्क थिया जे रोट्टी खाणा थिये बैठे रे थिये।

³तां मरियम ने जटामांसी रा अद्दा लीटर[24] कीमती इत्र लेई करी यीशु रे पैरां पर उन्धेरी दित्तेया, ते अपणे बालां कने तिन्हेरे पैर पुन्जे, ते इत्र री खुशबू कने सारा घर खुशबूदार होई गेया।

⁴पर उसदे चेल्‍लेयां बिच का यहूदा इस्करियोती जे तिसजो पकड़वाणे वाला थिया, बोलणा लग्गेया,

⁵ए इत्र तीन्न सौ दीनार[25] बिच बेच्ची करी गरीबां जो किजो नी दित्तेया गेया?

⁶तिनिये ए गल्ल इस तांइ नी बोल्ली कि तिसजो गरीबां री चिन्ता थी, पर इस तांइ किजोकी ओ चोर थिया, ते उन्हेरी पैसे री थैल्ली हमेसा तिसका रैहंदी थी, ते जे किच्‍छ भी उस बिच पाया जादां थिया, ओ कड्डी लिदां थिया।

⁷यीशु ने बोल्लेया, तिसजो रैह्णा देयो, तिसने ए मेरे मरणे रे बाद मेरे सरीर जो कब्र बिच रख्खे जाणे री तयारी बिच कित्तेया।

⁸किजोकी गरीब तां तुसा रे कन्ने हमेसा रैन्हदे, पर मैं तुसा रे कन्ने हमेसा नी रैह्णा।

⁹जां यहूदी लोक्कां री बड़ी भीड़ जो पता चली गेया कि से उत्ते है, तां से ना सिर्फ यीशु री वजह कने आए, पर इस तांइ भी कि लाज़र जो दिख्खे, जिस जो तिनिये मरेयां बिच का जिन्दा कित्तेया थिया।

¹⁰तां बड्डे पुरोत्तां ने लाज़र जो भी मारणे री तरकिब सोच्ची।

¹¹किजोकी तिसेरे वजह कने मते सारे यहूदी लोक्कां ने यहूदी अधिकारियां जो नक्कारी दित्तेया थिया, ते यीशु पर विश्वास करणा लग्गी पे थिये।

¹²अगले दिन मते लोक्कां ने जे त्योहर बिच आए थिये ए सूणेया कि यीशु यरुशलेम सहर बिच आया करदा है।

¹³इस तांइ उन्हा ने खजूर री डालियां लित्ती ते उस कने मिलणे जो निकले, ते हक्का मारणा लग्गे, जय हो! धन्न इस्राएल रा राज्जा, जे प्रभु रे नां कने आंदा।

¹⁴जां यीशु जो गधे रा बच्चा मिल्लेया तां से तिस पर बेई गेया, जिय्यां कि पवित्रशास्त्र बिच लिख्खे रा है,

¹⁵“ओ सिय्योन री कुड़ी[26] मत डर, दिख, तेरा राज्जा गधे रे बच्चे पर बेई करी चली आया करदा है।”

¹⁶यीशु रे चेल्‍ले पैल्ले ए गल्ल नी समजे थिये, पर जां यीशु री बड़ाई सामणे आई तां तिन्हा जो याद आया कि ए गल्लां उसदे बारे बिच लिख्खी गई री हिन, ते लोकां ने उस कने इसी तरिक्के रा बर्ताव कित्तेया थिया।

¹⁷तां भीड़ रे तिन्हा लोकां ने ग्वाही दित्ती, जे उस बेल्ले उस कन्ने थिये जां तिनिये लाज़र जो कब्र का सद्दी करी मुर्देयां बिच का फिरी जिन्दा कित्तेया थिया।

¹⁸इसी वजह कने मणू तिसजो मिलणे जो आए थिये किजोकी उन्हा ने ए सूणेया थिया कि तिनिये ए चमत्कार दिखाए रा है।

¹⁹तां फरीसियां ने आपस बिच बोल्लेया, सोच्चो तां सही कि असा रे का किच्‍छ नी बणदा दिख्खो दुनिया उसदे पीच्छे होई चल्लि री है।

²⁰जे मणू उस पर्व बिच अराधना करणे जो आए थिये उन्हा बिच का किच्‍छ यूनानी थिये।

²¹उन्हा ने गलील प्रदेश रे बैतसैदा रे रैहणेवाले फिलिप्पुस का आई करी उस का बिनती कित्ती की, श्रीमान, असी यीशु जो मिलणा चाह्‍ंदे।

²²फिलिप्पुस ने आई करी अन्द्रियास जो बोल्लेया, तां अन्द्रियास ते फिलिप्पुस ने जाई करी यीशु जो बोल्लेया

²³इस पर यीशु ने उन्हा जो बोल्लेया, ओ वक्त आई गे रा है कि मणू रे पुत्तर री बड़ाई हो।

²⁴मैं तुसा जो सच-सच बोलदा कि जा तिकर कणक रा दाणा जमीन पर पेई करी मरी नी जादां, ओ किल्ला रेन्दां पर जां ओ मरी जादां, तां बड्डा फल्ल लान्दा।

²⁵जे अपणी जान जो प्यार करदा, ओ तिसजो गुआई दिन्दा पर जे इस दुनिया बिच अपणे प्राण जो प्यार नी करदा, ओ हमेसा री जिन्दगी तांइ उसेरी रक्षा करगा

²⁶जे कोई मेरी सेवा करे, तां मेरा चेल्ला बणी जाए, ते जित्ते मैं है उत्ते तिनिये भी होणा, तां पिता ने उसदा आदर करणा।

²⁷अवे मेरा मन बड़ा वरी दुखी है इस तांइ अवे मैं कै बोल्लां? ओ पिता, मेरे जो इस दुख री घड़ी का बचा? पर मैं इसी वजह कने इस दुख का घड़ी[27] बिच पूज्जे रा है।

²⁸ओ पिता, अपणे नां री बड़ाई कर। तां तिस बेल्ले स्वर्ग बिच का ए अवाज आई, मैं उसेरी बड़ाई कित्ती, ते अग्गे भी करगा।

²⁹तां जे मणू खड़ित्ते रे सूणदे थिये उन्हा ने बोल्लेया कि बद्दल गरजेया, दुज्जयां ने बोल्लेया, कोई स्वर्गदूत उस कने बोल्लेया।

³⁰इस पर यीशु ने बोल्लेया, ए मेरे तांइ नी पर तुसा री मदद तांइ होए रा है।

³¹अवे इस दुनिया रे लोक्कां रा हिसाब-किताब होणा, अवे इस दुनिया रा सरदार जे शैतान है, तिसजो कड्डी दित्तेया जाणा।

³²ते जे अगर मैं दुनिया का उच्चे पर चढ़ाया गेया तां सारेयां जो अपणे पास्से छिक्की लैणा।

³³इय्यां बोल्ली करी तिनिये ए साफ करी दित्तेया कि उन्ने कदेइ मौत कने मरणा।

³⁴इस पर लोक्कां ने तिसजो बोल्लेया, असा ने पवित्रशास्त्र री ए गल्ल सुणे री है, कि मसीह ने हमेसा जिन्दे रैह्णा, फिरी तू किय्यां बोलदा कि मणू रे पुत्तर जो उच्चे पर चढ़ाया जाणा ज़रुरी है? ए मणू रा पुत्तर, कुण है?

³⁵यीशु ने तिन्हा जो बोल्लेया, अवे थोड़ी देर तिकर तुसा रे मझाटे है, जां तिकर रौसनी[28] तुसा रे कन्ने है, तां तिकर चलदे रेयो, इय्यां ना हो कि न्याहरा तुसा जो आई घेरे, जे न्याहरे बिच चलदा से नी जाणदा कि कुते जाया करदा है।

³⁶जां तिकर रौसनी तुसा रे कन्ने है, रौसनी पर विश्वास रख्खो ताकि तुसा रौसनी री सतांन बणो। ए गल्लां बोल्ली करी यीशु तित्ते का चली गे ते तिन्हा लोक्कां का दुर रे।

³⁷तिनिये उन्हेरे सामणे इन्ने चमत्कार दिखाए। तां भी उन्हा ने उस पर विश्वास नी कित्तेया।

³⁸ताकि यशायाह भविष्यद्वक्ता रा बोल्ले रा वचन पूरा हो जे तिनिये बोल्लेया थिया: “ओ प्रभु, ह्मारी खबर रा कुसने विश्वास कित्तेया? ते परमेश्वर री ताकत कुस पर प्रगट होए रा है?”

³⁹इस तांइ ओ विश्वास नी करी सकें, किजोकी यशायाह ने ए भी बोल्लेया है:

⁴⁰“उन्नये उन्हेरी हाख्खी अन्नि ते, उन्हेरा मन कठोर करी दित्तेया रा है, कुते इय्यां ना हो कि ओ हाख्खी कने दिख्ण, ते मन कने समजन, ते फिरण, ते मैं उन्हेरे जो ठीक करां।”

⁴¹यशायाह ने ए गल्लां इस तांइ बोल्ली किजोकी उसने यीशु री आणे वाली महिमा दिख्खी थी, ते उसदे बारे बिच गल्लां कित्ती।

⁴²तां भी अधिकारियां बिच मते लोक्कां ने उस पर विश्वास कित्तेया, पर फरीसियां री वजह कने खुल्ली करी नी मन्दे थिये, कि कुते ऐसा ना हो कि ओ सभास्थल का बाहर कड्डी दित्ते जाण।

⁴³किजोकी मणूआं रे पास्से री बड़ाई उन्हा जो परमेश्वर रे पास्से री बड़ाई का जादा प्यारी थी।

⁴⁴“यीशु ने हक्क मारी करी बोल्लेया, जे मेरे पर विश्वास करदा, ओ मेरे पर नी पर परमेश्वर पर जिन्हा ने मेरे जो भेज्जे रा है तिन्हा पर विश्वास रखदा।”

⁴⁵ते जे मेरे जो दिखदा, ओ मेरे भेजणे वाले जो दिखदा

⁴⁶मैं दुनिया बिच रौसनी होई करी आए रा है, ताकि जे कोई मेरे पर विश्वास करे, ओ न्याहरे बिच ना रे

⁴⁷जे कोई मेरी गल्लां सुणी करी ना मन्ने, तां मैं तिसजो गलत नी ठैहरादां, किजोकी मैं दुनिया जो गलत ठैहराणे तांइ नी, पर दुनिया रे लोक्कां छुटकारा दैणे तांइ आए रा है।

⁴⁸जे मेरे जो निक्कमा मनदा ते मेरी गल्लां नी मन्दा, तिसजो गलत ठैहराणे वाला तां इक्क है उन्निए ही आखरी दिन बिच तिसजो गलत ठहराणा।

⁴⁹किजोकी मैं अपणे पास्से का गल्लां नी कित्ती पर पिता जिनिये मेरे जो भेज्जे रा है, उन्ने ही मेरे जो हुकम दित्तेया कि क्‍या-क्‍या बोलणा?

⁵⁰ते मैं जाणदा कि तिन्हेरे हुकम हमेसा री जिन्दगी रे रस्ते पर लेई चलदे, इस तांइ मैं जे किच्‍छ भी बोलदा से ही बोलदा जैसा पिता मेरे जो बोलदे।