Read Chambeali यूहन्ना 13 Bible Online

यूहन्ना 13 - Chambeali bible

यूहन्ना 13

¹फसह रे त्याहार का पैल्ले, जां यीशु ने जाणी लेया कि मेरा से बेल्ला आई गेया कि दुनिया जो छड्डी करी पिता का हटी जां। यीशु अपणी सेवकाई री सुरुआत का लेई आखर तिकर अपणे चेल्‍लेयां कने बड़ा प्यार करदे थिये।

²जां शैतान शमौन इस्करियोती रे निक्के यहूदा रे मन बिच ए गल्ल पाई बैठ्ठे रा थिया, कि से तिन्हा जो पकड़वाए, तां फसह री रोट्टी खाणे रे बेल्ले

³यीशु ने ए जाणी करी कि पिता ने सब किच्‍छ मेरे हक बिच देई दित्ते रा है, ते से परमेश्वर रे पास्से का आया ते परमेश्वर का हटेया करदा है,

⁴तां रोट्टी जो चुक्की करी अपणे चोग्गा उतारी दित्ता ते अंगोछा लेई करी अपणी कमर बन्नी,

⁵तां भांडे बिच पाणी भरी करी अपणे चेल्‍लेयां रे पैर धोणे ते जिस अंगोछे, ते अपणी कमर बन्नी थी तिसी कने पुंजणे लगे

⁶जां से शमौन पतरस का आये तां पतरस ने तिन्हा जो बोल्लेया, ओ प्रभु कै तुसा मेरे पैर धोया करदे हिन?

⁷यीशु ने तिसजो जवाब दित्तेया, जे मैं करदा, तू तिसजो हल्ले नी जाणदा, पर इधेरे बाद समझणा

⁸पतरस ने तिन्हा जो बोल्लेया, तुसा मेरे पैर कदी भी नी धोई पाणे! ए सुणी करी यीशु ने तिसजो बोल्लेया, जे मैं तेरे पैर ना धोआं, तां तेरा मेरे कने कोई सांझा नी

⁹शमौन पतरस ने तिन्हा जो बोल्लेया, ओ प्रभु जी, तां मेरे पैर ही नी, बल्कि हत्थ ते सिर भी धोई देयो

¹⁰यीशु ने तिसजो बोल्लेया, जे न्हाई बैठ्ठे रा है तिसेरे पैर रे सवाये होर किच्‍छ भी धोणे री जरुरत नी है, पर से बिल्कुल सुच्चा है, ते कुसकी इक्क जो छड्डी करी तुसा सारे सुच्चे हिन।

¹¹से तां अपणे पकड़वाणे वाले जो जाणदे थिये इधेरे तांइ तिन्हा बोल्लेया, इक्क जो छड्डी करी तुसा सारे रे सारे सुच्चे हिन।

¹²जां से तिन्हेरे पैर धोई बैठ्ठे तां से अपणे कपड़े पाई करी फिरी बेई गे, ते तिन्हा जो बोलणे लगे, कै तुसा मणू समजे के मैं तुसा कने कै कित्तेया?

¹³तुसा मेरे जो गुरु ते प्रभु बोलदे, ते ठीक ही बोलदे, किजोकी मैं है भी।

¹⁴जे मैं प्रभु ते गुरु होई करी तुसा रे पैर धोये, तां तुसा जो भी इक्क दूये रे पैर धोणा चाएदे।

¹⁵किजोकी मैं तुसा जो इक्क नमूना दस्सी दित्तेया कि जिय्यां मैं तुसा कने कित्तेया, तुसा भी तिय्यां ही करेया करो।

¹⁶मैं तुसा कने सच-सच बोल्दा, नौक्कर अपणे मालक का बड्डा नी, ते ना ही दूत अपणे भेजणे वाले का बड्डा हुंदा।

¹⁷अवे तुसा ए गल्लां जाणदे हिन, ते जे उन्हा रे हिसाब कने चलो तां तुसा धन्न हिन।

¹⁸मैं तुसा सारे रे बारे बिच नी बोलदा; जिन्हा जो मैं चुणी लित्तेया रा है तिन्हा जो मैं जाणदा, पर ए इधेरे तांइ होया कि पवित्रशास्त्र रा से वचन पूरा हो, “जिनिये मेरी रोट्टी खाई, तिनिये मेरे कने धोखा कित्ता।”

¹⁹अवे मैं तिसेरे होणे का पैल्ले तुसा जो जताई दिंदा कि जां ए होई जांगा तां तुसा विश्वास करो कि से मैं ही है।

²⁰मैं तुसा जो सच-सच बोलदा कि जे मेरे भेजे रे जो अपणाई लिंदा, से मेरे जो अपणाई लिंदा, अते जे मेरे जो अपणांदा, से मेरे भेजणे वालेयां जो अपणाई लिंदा।

²¹ए गल्लां बोल्ली करी यीशु अपणे मन बिच बड्डा वरी उदास ते दुखी होई गे, ते बोलणा लग्गे, “मैं तुसा जो सच-सच बोलदा तुसा बिच इक्क ने मेरे जो पकड़वाणा।”

²²चेल्‍ले शक्क कने, कि ए कुसेरे बारे बिच बोल्लेया करदे हिन, इक्क दूज्जे पास्से दिख्खणा लग्गे।

²³तिन्हेरे चेल्‍लेयां बिच का इक्क चेल्ला, जिस कने यीशु प्यार करदे थिये, यीशु नेड़े बैठ्ठे रा थिया।

²⁴शमौन पतरस ने तिसजो इसारा करी के पूच्छेया, दस्स, ए कुसेरे बारे बिच बोल्लेया करदे हिन?

²⁵तां तिसने तिय्यां ही यीशु रे पास्से झुकी तिन्हा जो पूच्छेया, ओ प्रभु, से कुण है?

²⁶यीशु ने जवाब दित्तेया, जिस जो मैं ए रोट्टी रा टुकड़ा डूबाई करी दिंगा, से ही है, तां तिन्हा ने टुकड़ा डूबाई करी शमौन इस्करियोती रे निक्के यहूदा जो दित्तेया।

²⁷टुकड़ा लिंदे ही शैतान तिस बिच समाई गेया, तां यीशु ने तिसजो बोल्लेया, जे तू करेया करदा, झट कर।

²⁸पर बैणे वालेयां बिच का कुन्ने नी जाणेया कि तिन्हा ने ए गल्ल तिसजो कुधेरे तांइ बोल्ली

²⁹यहूदा का इक्क थैली हुंदी थी, इधेरे तांइ कुसकी-कुसकी ने ए समजेया कि यीशु तिसजो बोल्लेया करदे हिन कि जे किच्‍छ असा जो त्योहर तांइ चाएदा से खरीदी लै, या ए कि कंगाला जो किच्‍छ दे

³⁰ते से रोट्टी रा टुकड़ा खाणे रे बाद झट बाहर पास्से चली गेया, ते ए रात्ती रा बेल्ला थिया।

³¹जां से बाहर चली गेया तां यीशु ने बोल्लेया, अवे मेरी, यानी मणू रे पुत्तर री महिमा होई, अते परमेश्वर री महिमा मेरे अंदर होई है।

³²ते जिय्यां परमेश्वर जो अपणे पुत्तर री वजह कने महिमा मिल्ले री है तिय्यां ही पिता-परमेश्वर ने भी अपणे पुत्तर जो जल्द ही महिमा दैणी।

³³ओ मेरे प्रियों, मैं होर थोड़ी हाण तुसा रे कने है: फिरी तुसा मेरे जो तोपणा, ते जिय्यां यहूदियां जो बोल्लेया, जित्ते जाया करदा है तित्ते तुसा नी आई सकदे, तिय्यां ही मैं तुसा जो भी बोलदा

³⁴मैं तुसा जो इक्क नौआ हुकम दिंदा कि इक्क दूए कने प्यार रख्खो, जिय्यां मैं तुसा कने प्यार करदा, तिय्यां तुसा भी इक्क दूये कने दाह-पीड़ रख्खो।

³⁵जे अगर तुसा अप्पु मिते प्यार रखगे, तां इसी कने सारेयां जो पता चलणा कि तुसा मेरे चेल्‍ले हिन।

³⁶शमौन पतरस ने तिन्हा जो बोल्लेया, ओ प्रभु जी, तुसा कुते जाया करदे हिन? यीशु ने जवाब दित्तेया, जित्ते मैं जाया करदा है तू हल्ले तित्ते नी आई सकदा, पर इसेरे बाद मेरे पीच्छे आणा।

³⁷पतरस ने तिन्हा जो बोल्लेया, ओ प्रभु जी, अब्बे मैं तुसा रे पीच्छे किजो नी आई सकदा? मैं तां तुसा तांइ अपणी जान दैणे तांइ भी तैयार है।

³⁸यीशु ने जवाब दित्तेया, कै तू मेरे तांइ अपणी जान देई दिंगा? मैं तेरे कने सच-सच बोलदा कि मुर्गे रे बाहर बांग मारणे का पैल्ले ही तू मेरे जो पछानणे का त्रै वरी मुकरी जाणा।