Read Chambeali यूहन्ना 16 Bible Online

यूहन्ना 16 - Chambeali bible

यूहन्ना 16

¹मैं ए गल्लां इधेरे तांइ तुसा रे कने बोल्ली हिन, ताकि तुसा रा विश्वास डगमगाई नी जाओ।

²तिन्हा तुसा जो सभास्थल का बाहर कड्डी दैणा, बल्कि से बेल्ला आया करदा ए जां तुसा रे बिच का कुसकी जो भी मारी करी हर कोई ने सोचणा कि से परमेश्वर री सेवा करेया करदा है।

³अते तिन्हा ने इय्यां इधेरे तांइ करणा किजोकी तिन्हा ने ना ता स्वर्ग बिच रैह्णे वाले पिता जो जाणेया ते ना ही मेरे जो जाणेया,

⁴अते ए गल्लां मैं इधेरे तांइ बोल्ली कि जां से बेल्ला आये तां तुसा चेत्ता करेयो कि मैं तुसा जो इधेरे बारे बिच दस्सी दित्तेया थिया। अते ए गल्लां मैं तुसा जो सुरु बिच इधेरे तांइ नी दस्सी किजोकी मैं तुसा रे कने थिया।

⁵पर अवे मैं अपणे भेजणे वाले का हटेया करदा है, जिनिये मेरे जो भेज्जे रा है, पर तुसा मेरे का नी पूच्छदे कि तू कुते चलेया?

⁶किजोकी मैं ए गल्लां तुसा जो दस्सी दित्ती हिन, ते तुसा दुखी होई गेरे हिन।

⁷पर मैं तुसा रे कने सच-सच बोलदा कि तुसा तांइ भला है कि मैं जाया करदा है, किजोकी जे अगर मैं नी जांगा तां पवित्रात्मा ने जे तुसा रा मददगार है, तुसा का नी आणा, पर जे अगर मैं चली जांगा तां तिसजो तुसा रे का भेजी दिंगा।

⁸अते जां पवित्रात्मा ने तुसा का आणा, तां तिन्हा ने पाप, परमेश्वर री धार्मिकता ते तिन्हेरे हिसाब-किताब रे बारे बिच दुनिया रे लोक्कां जो सच दसणा।

⁹पाप रे बारे बिच इधेरे तांइ, किजोकी दुनिया रे मणू मेरे पर विश्वास नी करदे।

¹⁰अते धार्मिकता रे बारे बिच इधेरे तांइ किजोकी मैं पिता का चलेया, अते तुसा मेरे जो फिरी नी दिख्खी सकणा।

¹¹अते हिसाब-किताब रे बारे बिच, इधेरे तांइ कि दुनिया रे शासक, शैतान जो कसुरवार ठैहराई दित्तेया गे रा है।

¹²मेरे जो तुसा कने होर भी मती सारी गल्लां करणे जो हिन, पर हल्ले तुसा उन्हा जो सैह्‍ण नी सकदे।

¹³पर जां सच्चाई री आत्‍मा ने आणा, तां तिसने तुसा जो परमेश्वर रे सच बारे बिच सिखाणा, किजोकी तिसने अपणे पास्से का किच्‍छ नी बोलणा, पर जे किच्‍छ तिसने परमेश्वर का सूणेया हो, से ही बोलणा अते होणे वाली गल्लां जो तुसा रे सामणे लियाणा।

¹⁴तिन्हा ने तुसा जो से सारी गल्लां मेरे का सुणी करी तुसा जो दसणी ते इय्यां करी के मेरे जो महिमा दैणी।

¹⁵जे किच्‍छ पिता का है से सब मेरा है, इधेरे तांइ मैं बोल्लेया कि जे किच्‍छ मेरा है, तिन्हा गल्लां जो सुणी करी पवित्रात्मा ने तुसा जो दस्सी दैणा।

¹⁶[29]थोड़ी देर बाद तुसा मेरे जो नी दिखणा, अते तिसेरे बाद तुसा मेरे जो फिरी दिखणा।

¹⁷तां तिन्हेरे चेल्‍लेयां बिच का किच्‍छ ने अप्पु-मित्ते बोल्लेया, ए कै गल्ल ए जे ए असा रे कने दस्सेया करदे हिन, थोड़ी देर बाद तुसा मेरे जो नी दिखणा, अते तिसेरे बाद तुसा मेरे जो फिरी दिखणा, किजोकी मैं पिता का चलेया?

¹⁸फिरी से बोलणा लग्गे, थोड़ी हाण बाद कै है! जिसेरे बारे बिच ए दस्सेया करदे हिन ए कै बोल्लेया करदे हिन असा जो नी ए लग्गेया करदा पता।

¹⁹यीशु समजी गे कि से मेरे का पूच्छणा चाह्‍ंदे हिन, अते यीशु ने बोल्लेया, कै तुसा इस गल्ल रे बारे बिच अप्पु-मित्ते सोच-विचार करेया करदे हिन, जे मैं बोल्ली, थोड़ी देर बाद तुसा मेरे जो नी दिखणा, अते तिसेरे बाद तुसा मेरे जो फिरी दिखणा?

²⁰मैं तुसा कने सच-सच बोलदा कि मेरे मरणे रे बाद तुसा रोणा ते पीटिणा, पर इस दुनिया रे लोक्कां ने खुस होणा। तुसा दुखी होणा, पर दुख खुसी बिच बदली जाणा

²¹जां कोई जनानी बच्चा जमणा लगदी तां तिसजो पीड़ां हुंदी, किजोकी से तिसेरे बड़े वरी दर्द सैहणे रा बेल्ला हुदां, पर जां से बच्चे जो जन्म देई बैन्दी तां तिसेरा दुख खुसी बिच बदली जांदा किजोकी दुनिया बिच इक्क बच्चा पैदा होया, से तिस दुख जो भूली जादीं ते से तिसजो फिरी याद नी करदी।

²²तिस्सी तरिक्के कने अवे तुसा दुखी तां हिन, पर मैं तुसा रे कने फिरी मिलणा, अते तुसा रे मन खुस होई जाणे, अते तुसा री खुसी जो कोई तुसा का खुस्सि नी सकदा।

²³तिस रोज तुसा मेरे का किच्‍छ नी मंगणा। मैं तुसा रे कने सच-सच बोलदा, जे तुसा मेरे ना कने पिता का जे किच्‍छ भी मंगगे तिन्हा ने तुसा री हर जरुरत जो पूरा करणा।

²⁴हल्ले तांइ तुसा मेरे नां कने किच्‍छ भी नी मंगेया: मंगो, अते तुसा जो मिल्ली जाणा, ताकि तुसा खुस होई जाओ।

²⁵ए गल्लां मैं तुसा कने उदारण बिच बोल्ली हिन, पर से बेल्ला आया करदा ए जां मैं तुसा कने उदारण दैणे रे बजाए, साफ-साफ गल्लां करणी।

²⁶तिस बेल्ले तुसा मेरे ना कने मंगणा, अते मैं तुसा कने ए नी बोलदा कि मैं तुसा रे तांइ पिता का प्रार्थना करगा,

²⁷किजोकी पिता परमेश्वर अप्पु तुसा कने प्यार करदे, किजोकी तुसा ने मेरे कने प्यार कित्तेया अते ए विश्वास कित्तेया कि मेरे जो पिता ने भेजेया है।

²⁸मैं पिता रे पास्से का आए रा है अते इस दुनिया बिच आया, मैं फिरी दुनिया जो छड्डी करी पिता का चलेया

²⁹यीशु रे चेल्‍लेयां ने बोल्लेया, दिख्खो अवे तुसा बिना उदारण रे साफ-साफ गल्लां दस्सेया करदे हिन।

³⁰अवे असी समजी गे कि तुसा सब किच्‍छ जाणदे, अते तुसा जो जरुरत नी है कि कोई तुसा का सवाल करे, इसेरी वजह कने असी विश्वास करदे कि तुसा जो परमेश्वर ने भेज्जे रा है।

³¹यीशु ने जवाब दित्तेया, कै तुसा अवे विश्वास करदे?

³²दिख्खो, से बेल्ला आया करदा ए, बल्कि आई गेया कि तुसा तित्तर-बित्तर होई करी अपणे-अपणे रस्ते चली जाणा अते मेरे जो किल्ला छड्डी दैणा, फिरी भी मैं किल्ला नी ए, किजोकी पिता मेरे कने हिन।

³³ए गल्लां मैं तुसा रे कने बोल्ली हिन कि तुसा जो मेरे जरिए सांती मिल्लो, दुनिया बिच तुसा जो तकलिफां मिल्ली हिन, पर हिम्मत रख्खो किजोकी मैं इस दुनिया रे सरदार, शैतान जो हराई दित्ते रा है।