Read Chambeali यूहन्ना 2 Bible Online

यूहन्ना 2 - Chambeali bible

यूहन्ना 2

¹फिरी तिसरे दिन गलील प्रदेश रे काना ग्रां बिच कुसकी रा ब्याह थिया कने यीशु री अम्मा भी तित्ते ही थी

²यीशु कने तिसेरे चेल्‍ले भी तिस ब्याह बिच सद्दे रे थिये

³जिस बेल्ले अंगूर रा रस्स नी बचेया तां यीशु री मां, मरियम ने तिसजो बोल्लेया, तिन्हा का दाखरस मुकी गेया।

⁴यीशु ने तिसजो बोल्लेया, मां, ए सब किच्‍छ मेरे जो किजो दस्सेया करदी हिन? हल्ले मसीह रे रुप बिच जाहिर होणे रा मेरा समय नी है आए रा।

⁵तिसेरी मां ने नौक्करां जो बोल्लेया, जे किच्‍छ से तुसा जो बोलदा, तिय्यां ही करेयो।

⁶तित्ते यहूदियां री रसम अनुसार बट्टेयां रे छे घढे़ रख्खे रे थिये जिस बिच लगभग अस्सी रा सौ लीटर पाणी भरी जान्दा थिया।

⁷यीशु ने नौक्करां जो बोल्लेया, “घढ़ेयां जो पाणी कने भरी दो।” तिन्हा ने तिसजो पूरा उप्पर तिकर भरी दिता।

⁸तां यीशु ने तिन्हा नौक्करां जो बोल्लेया, अवे इस बिच थोड़ा पाणी कड्डी करी धाम रे प्रधान का लेई जाओ, ते नौक्कर लेई गे।

⁹जिस बेल्ले धाम रे प्रधान ने से पाणी चख्खेया, तां से पाणी अंगूर रा रस्स बणी गे रा थिया, ते नी जाणदा थिया कि से दाखरस कुते का आया, तां धाम रे प्रधान ने लाड़े जो सदी करी तिसजो बोल्लेया,

¹⁰सारे जणे पैल्ले बदिया वाला अंगूर रा रस्स दिंदे ते जिस बेल्ले मणू पी करी रजी जान्दे तां तिसका हल्का दाखरस दिंदे पर तू बदिया वाली दाखरस अब्बे तक रख्खी छड्डे रा है।

¹¹यीशु ने गलील प्रदेश रे काना बिच अपणाए पैल्ला चमत्कार दिखाई करी अपणी महिमा दिखाई, इसेरी वजह कने तिन्हेरे चेल्‍लेयां ने तिन्हा पर विश्वास कित्ता।

¹²इसेरे बाद से कने तिसेरी मां कने तिन्हेरे भ्याल कने तिसेरे चेल्‍ले कफरनहूम कस्बे जो गे कने तित्ते किच्‍छ दिन रे।

¹³यहूदियां रा फसह रा त्याहार नजदीक थिया कने यीशु यरुशलेम सहर जो गे।

¹⁴यीशु मन्दिर बिच बैल, भेड़ कने कबूतर रे बेचनेवाले कने सौदेबाजा जो बैठे रे दिख्खेया।

¹⁵तां तिसने रस्सी जो कट्टी करी सारे भेड़ ते दांदा जो मन्दिर का कड्डी दिता कने व्यापार करणे वालेयां रे पैसे खलारी दित्ते कने फट्टियां जो पलटाई दित्ता।

¹⁶कने कबूतर बेचणे वालेयां जो बोल्लेया इन्हा जो इत्ते का लेई जाओ मेरे बाबे रे घर जो डाकुआं रा अड्डा बणाई दित्ते रा है।

¹⁷तां तिसेरे चेल्‍लेयां जो चेत्ता आया कि पवित्रशास्त्र बिच लिख्खे रा है, “तेरे मन्दिर तांइ मेरा जुनून आग्ग सांई भखेया करदा है।”

¹⁸इस पर यहूदी लोक्कां रे अगुवे लोक्कां ने तिसजो बोल्लेया, तू जे ए करदा तां हमारे जो कुण वाला चमत्कार दसदा?

¹⁹यीशु ने तिन्हा जो जवाब दित्ता इस मन्दिर जो ढाई देयो ते मैं इसजो तीन्न दिना बिच खड़ा करी दिंगा।

²⁰यहूदी लोक्कां रे अगुवे लोक्कां ने बोल्लेया, इस मन्दिर जो बणाणे तिकर छताली साल लगे रे हिन, तां कै तू तिसजो तीन्न दिना बिच खड़ा करी सकदा?

²¹पर मन्दिर बोलणे तिन्हेरा मतलब सरीर थिया।

²²इधेरे तांइ जां यीशु मुर्देयां बिच का जिन्दे होई गे, तां तिन्हेरे चेल्‍लेयां जो इस गल्ल रा दुबारा तां चेत्ता आया। तां तिन्हा ने पवित्रशास्त्र री तिस गल्ल रा विश्वास कित्तेया, जे मसीह रे फिरी जिन्दे होणे रे बारे बिच बोलदी, ते यीशु ने भी बोल्ली थी।

²³“जिस बेल्ले से यरुशलेम सहर बिच फसह रे त्याहार बिच थिया, तां मतेयां ने तिन्हेरे चमत्कार, जे से दसदा थिया, से दिख्खी करी तिस पर विश्वास कित्ता।”

²⁴पर यीशु ने अप्पु जो तिन्हेरे भरोस्से पर नी छड्डेया किजोकी से सबणी जो जाणदा थिया।

²⁵कने तिसजो कोई जरुरत नी थी कि से मणूआं रे बारे बिच कोई गवाई दे किजोकी से अप्पु ही जाणदा थिया कि मणूआं रे मना बिच कै है।