Read Chambeali यूहन्ना 3 Bible Online

यूहन्ना 3 - Chambeali bible

यूहन्ना 3

¹फरीसियां बिच नीकुदेमुस ना रा इक्क मणू थिया। से यहूदियां रा सरदार थिया जे फरीसी थिया।

²तिनिये रात्ती यीशु का आई करी तिन्हा जो बोल्लेया, ओ गुरु, असी जाणदे कि परमेश्वर ने तुसा जो असी लोक्कां जो सिखाणे तांइ भेज्जे रा है, किजोकी जदेय जदेय चमत्कार तुसा दिखादें, अगर परमेश्वर तुसा रे कन्ने ना हो तां नी दिखाई सकदे।

³यीशु ने तिसजो जवाब दित्ता मैं तुसा कने सच्ची-सच्ची बोलदा जे अगर कोई नौए सिरे का नी जम्मे तां परमेश्वर रे राज जो नी दिख्खी सकदा[5]।

⁴नीकुदेमुस ने तिसका पुछया, मणू जिस बेल्ले सयाणा होई जाए तां से दुबारा किय्यां जमी सकदा? कै से अपणी मां रे पेट्टा बिच दुबारा जाई करी जन्म लेई सकदा?

⁵यीशु ने जवाब दिता मैं तिज्जो सच-सच बोलदा जिस बेल्ले तक कोई मणू पाणी ते पवित्रात्मा कने न जम्मे तिस बेल्ले तिकर से परमेश्वर रे राज बिच नी जाई सकदा।

⁶किजोकी इन्सान तां अपणे जदेय इन्सान जो पैदा ही करी सकदा, पर पवित्रात्मा तिसजो इक्क नौई जिन्दगी देई सकदी।

⁷हैरान मत हो कि मैं तिज्जो बोल्लेया कि तीजो नौए सिरे का जन्म लैणा जरुरी है।

⁸हवा जित्ते चाहन्दी तिते चली आन्दी तू उसेरी अवाज तां सूणदा पर नी जाणदा कि कुते का आंदी है कने कुते जांदी? जेड़ा भी आत्‍मा बिच जम्मेया से इदेया ही है।

⁹नीकुदेमुस ने जवाब दित्ता ए गल्लां कियां होई सकदीयां?

¹⁰ए सुणी करी यीशु ने बोल्लेया, तू इस्राएलियों रा गुरु होई करी भी कै इन्हा गल्लां जो भी नी समजदा?

¹¹मैं तुसा कने सच्ची-सच्ची बोलदा, असी जे जाणदे, से बोलदे, ते जिस जो असी दिखदे तिसेरी ही गवाई दिन्दे, तुसा असा री गवाई पर विश्वास नी करदे,

¹²जां मैं तुसा कने दुनिया बिच होणे वाली गल्लां रे बारे बिच बोलदा, तुसा तां ही विश्वास नी करदे, तां जिस बेल्ले मैं तुसा रे कने स्वर्ग री गल्लां बारे बिच बोलणा, तां तुसा किय्यां विश्वास करणा।

¹³कोई स्वर्ग बिच नी गेया सिवाय मणू रे पुत्तर, जे मैं ही है, जे स्वर्ग का आये रे हिन।

¹⁴जिस तरिक्के कने मूसा ने बियाबान जगाह् बिच पीतल रे कीड़े [6]जो ऊचे पर चढ़ाया उसी तरिके कने जरुरी है कि मणू रा पुत्तर, जे मैं ही है भी उँचे पर चढ़ाया जाए।

¹⁵तां कि जे कोई तिस पर विश्वास करे से हमेसा री जिन्दगी पाए।

¹⁶किजोकी परमेश्वर ने दुनिया रे लोक्कां कने इन्ना प्यार कित्ती कि तिन्हा ने अपणा इकलौता पुत्तर देई दिता कि जेड़ा तिस पर विश्वास करे से नास न हो पर हमेसा री जिन्दगी पाओ।

¹⁷परमेश्वर ने अपणे पुत्तर जो दुनिया बिच इस तांइ नी भेज्जेया कि दुनिया रे लोक्कां पर सजा रा हुकम दे, पर इस तांइ कि दुनिया रे मणू तिसेरे जरिए छुटकारा पाए।

¹⁸जेड़ा तिस पर विश्वास करदा, तिस पर सजा रा हुकम नी हुन्दा पर जे तिस पर विश्वास नी करदा से दोषी ठहरी चुक्केया इस तांइ कि तिसने परमेश्वर रे इकलौते पुत्तर रे नां पर विश्वास नी कित्ता।

¹⁹ते सजा रे हुकम री वजह ए है कि रौसनी दुनिया अन्दर आई, ते मणूआं ने न्याहरे जो रौसनी का प्यारा मन्नेया किजोकी तिन्हेरे कम्म बुरे थिये।

²⁰कि जे कोई बुराई करदा से रौसनी कने दुश्मणी रखदा कने रौसनी रे नेड़े नी आंदा, इदेया न हो कि तिसेरे कम्मां पर दोष लगाया जाए

²¹पर जे मणू सच्चाई रे रस्ते पर चलदा, से रौसनी रे नेड़े आंदा है ताकि दूए मणू दिख्खी सके कि तिनिये परमेश्वर रे हुकमां जो मन्ने रा है।

²²इसेरे बाद यीशु कने तिसेरे चेल्‍ले यहूदियां प्रदेश बिच आए कने से तित्ते तिन्हा कने रेई करी बपतिस्मा दैणे लगया।

²³यूहन्ना भी शालेम रे नेड़े सामरिया प्रदेश रे एनोन नां रे ग्रां बिच बपतिस्मा दिंदा थिया किजोकी तित्ते बड्डा वरी पाणी थिया कने मणू आई करी बपतिस्मा लिन्दे थिये।

²⁴यूहन्ना तिस बेल्ले तिकर जेलखाने बिच नी पायरा थिया।

²⁵तित्ते यूहन्ना रे चेल्‍लेयां रा कुसी यहूदी कने शुद्वीकरण [7]रे बारे बिच बहस होई गयी।

²⁶कने यूहन्ना रे चेल्‍लेयां ने यूहन्ना रे नेड़े आई करी तिसजो बोल्लेया ओ गुरु, जे मणू यरदन रे पार तेरे कने थिया कने जिसेरे बारे बिच तू गवाई दित्ती, दिख, से बपतिस्मा दिन्दा है, कने सब तिसेरे का आंदे हिन।

²⁷यूहन्ना ने जवाब दित्ता, जिस बेल्ले तक मणू जो स्वर्ग का हक्क ना दित्तेया जाए, तिस बेल्ले तक सेह कुछ भी नी पाई सकदा

²⁸तुसा ता अप्पु ही मेरे गवाह हिन कि मैं बोल्लेया मैं मसीह यीशु नी पर तिसेरे अग्गे भेजेरा है

²⁹दूल्हा ही दुल्हन कने ब्याह करदा। दुल्हे रा दोस्त तिसेरे आणे रा इंतजार करदा ते जां दूल्हा ब्याह बिच पूजी जांदा तां तिसेरा दोस्त तिसेरे पुजणे री गल्ल पर खुस हुंदा। ए सुणी करी मिन्जो भी तैसी ही खुसी मिल्लेया करदी है।

³⁰जरुरी है कि से बधे, ते मैं घटां।

³¹जे स्वर्ग का आन्दा से सबणी का जादा बधी करी है, ते जे दुनिया का आन्दा से दुनिया रा है, ते दुनिया री ही गल्लां करदा जे स्वर्ग का आन्दा, से सबणी का उप्पर है।

³²जे किच्‍छ तिसने दिख्खेया ते सूणेया, तिसेरी ही गवाई दिंदा है ते किच्‍छ मणू तिसेरी गवाई जो नी मनदे,

³³पर जिनिए तिसेरी गवाई मन्नी लेई, तिनिए इस गल्ल पर छाप लगाई दित्ती कि परमेश्वर सच्चे हिन।

³⁴किजोकी जिस जो परमेश्वर ने भेज्जे रा है से परमेश्वर री गल्लां बोलदा किजोकी से पवित्रात्मा नाप्पी-तोल्ली करी नी दिंदा।

³⁵“पिता” अपणे पुत्तर कने प्यार रखदा, ते तिन्हा ने सारी चीजां पुत्तर रे हत्थां अन्दर देई दित्ते री हिन,

³⁶जे परमेश्वर रे पुत्तर पर विश्वास करदा, हमेसा री जिन्दगी तिसेरी है, पर जे परमेश्वर रे पुत्तर री नी मनदा, तिनिए हमेसा री जिन्दगी नी दिखणी, पर परमेश्वर ने तिसजो सजा दैणी।